MATIE 13 - WE NU GALE 1995

Gba we ngɔ wi fɛ kpalɛ

¹ Do ngba soe ni, nɛ Yezu hɔa nza kɔ tɔa, nɛ a la, nɛ a dungu nù nu gba ndɔɛ we be we.

² Nɛ gba gili Owele wa ngɛmɛ ngba wa dɛ kɛ zã a. Nɛ Yezu kũ dɛ kɔ ga, nɛ a dungu nù, nɛ gba gili winɔ wa do nu kolo lì.

³ Nɛ a bia we hã wa wena do gba we na: “Mbe wele kpo nɛa safɔ mɔ́ a we fɛ kpalɛ.

⁴ A ma ngɔ fɛ kpalɛ, nɛ mbe gbãlã nɛ ala dɛ li wala, nɛ onɔɛ wa tɛa, nɛ wa gɔmɔ ma.

⁵ Nɛ mbe ala de ngɔ kpangba, fala kɛ nù ngɔ nɛ ngboo bina ni, nɛ ma hɔa dɔ̃, we kɛ nù dɛ̀lɛ̀ ngɔ ngbɛ ɛ gɔ.

⁶ Kɔ wese nɛa we nganda nɛ, nɛ bɔlɔ kpalɛ ni kula do'do, we duzu kɛ liã nɛ nyɛ̀lɛ̀ dɛ ti nù i gɔ.

⁷ Nɛ mbe ala sanga nyaka tɛ̃. Nɛ nyaka tɛ̃ gã fala nɛ kpo do kpalɛ ni, nɛ ma kasa gɛlɛ nɛ vɛ̃.

⁸ Nɛ nde mbe gbãlã kpalɛ ala dɛ fala dia nù, nɛ ma hɔa, nɛ ma gã, nɛ ma wala dɛlɛ wena. Mbe wala kama, nɛ mbe wala 'bu nɛ gazɛlɛ, nɛ mbe 'bu nɛ talɛ.”

⁹ Nɛ Yezu tɔ̃ hã wa na: “Wi kɛ zala a boe, nɛ a zélé!”

Yezu be wenɔ do gba we we ge nde?

¹⁰ Nɛ Owi yambala mɛnɔ 'da Yezu wa tɛa, nɛ wa aka a na: “Gulu kɛ mɔ be we hã winɔ do gba we ni we ge nde?”

¹¹ Nɛ a gese hã wa na: “Kɛ 'da nɛ, Gale bia gulu usu lɛnggɛnɔ kɔ dɛa to nwa 'da a hã nɛ ia. Nɛ nde wanɔ sɔ i mɔ ni, Gale bè ma hã wa gɔ.

¹² Na mɛ ni, wi kɛ a do mɔ kɔ̃ a boe ni, nɛ a kpa sɛ 'bɔ mbé nɛ dɛ ngɔ nɛ, nɛ ma dɛlɛ sɛ kɔ̃ a wena. Nɛ nde wele kɛ do mɔ kɔ̃ ɛ bina ni, nɛ wa kala sɛ 'bɔ bi 'bulu kɛ kɔ̃ a ni do'do.

¹³ Gulu kɛ mi wele we hã wa do gba we gɛ a ni. Ma ɔ nɛ kɛ wa kɔma kɔ 'Buki na: ‘Gɛnɛ kɔ wa 'du li wa gbaa, nɛ nde wa zɔ́ mɔ gɔ. Gɛnɛ kɔ wa gɛ zala wa gbaa, nɛ nde wa zélé we gɔ.’

¹⁴ Ma dɛa tɛ̃ ɛ ɔ nɛ kɛ Ezai, wi gba olo nu Gale kɔma zɛ́ olo nu Gale na: ‘Gɛnɛ kɔ nɛ gɛ zala nɛ gbaa, nɛ nde nɛ zélé sɛ mɔ kpo gɔ. Gɛnɛ kɔ nɛ 'du li nɛ gbaa, nɛ nde nɛ zɔ́ sɛ mɔ kpo gɔ.

¹⁵ We duzu kɛ winɔ gɛ, wa nganda sila wa na, da dɛ kɔ lo ĩ́ ti gulu mɔ kpo gɔ. Nɛ wa kpia zala wa na, da dɛ kɔ lo zélé we gɔ. Wa umu li wa na, da dɛ kɔ lo zɔ́ mɔ gɔ. Wa dɛa na mɛ ni na, da dɛ kɔ lo síkí li lo dɛ 'da mi, kɔ mi kpasa lo gɔ.’ ”

¹⁶ Nɛ Yezu tɔ̃ hã wa na: “Nɛ a wi yangga, we kɛ nɛ zɔa mɛnɔ gɛ do gbali nɛ, nɛ nɛ tɛ zele 'bɔ ma ngangga gɛ.

¹⁷ Kɔ mi tɔ̃ hã nɛ do gbãlã we na, gba gili Owi gba olo nu Gale, do Owi bɔlɔ zunɔ, wa kɔ̃a zi we zɔ mɛnɔ kɛ nɛ zɔ ma ngangga gɛ, nɛ nde wa zɔ̀ zi ma gɔ. Nɛ wa kɔ̃a zi we zele 'bɔ wenɔ kɛ nɛ zele ma ngangga gɛ, nɛ nde wa zèlè zi ma gɔ.”

Yezu tɔ̃a gulu gba we ngɔ wi fɛ kpalɛ

¹⁸ Nɛ Yezu tɔ̃ hã wa na: “Nɛ zélé gulu gba we ngɔ wi fɛ kpalɛ!

¹⁹ Wi kɛ a zele Dia Sako dɛa to nwa 'da Gale, nɛ nde a ĩ́ ti gulu nɛ gɔ ni, a wia kɔ̃ do li wala kɛ mbe kpalɛ ala tɛ nɛ ni. We kɛ Dia Sakoe gbo zala a, nɛ a zele ma, nɛ Satana tɛ, nɛ a fo ma kɔ sila a do'do.

²⁰ Nɛ wi kɛ a ɔ nɛ nù kpangba kɛ kpalɛ ala ngɔ nɛ ni, wi a wele kɛ a zele Dia Sakoe, nɛ a kɔ̃ gɛnɛ nɛ dɔ̃, nɛ a dɛ yangga nɛ,

²¹ nɛ nde ma lé a ngboo gɔ, nɛ a hã tɛ̃ a we nɛ 'do nɛ nyɛlɛ gɔ. Fala kɛ ngamɔ yamba sila a, tabi wele wa zɛlɛ tɛ̃ a we duzu we nu Gale nde, nɛ a la fala kɔ̃a we 'da a dɔ̃ iko.

²² Nɛ wi kɛ a ɔ nɛ nùi, kɛ kpalɛ ala tɛ nɛ dɛ sanga nyaka tɛ̃ ni, wi a wele kɛ a zele Dia Sakoe de wena, nɛ wɔ mɛnɔ nù gɛ, do yangga kpamɛnɔ kɛ ma ɔlɔ winɔ ni, ma busu ma kɔ sila a do'do, nɛ nde ma dɛ́ to gɔ.

²³ Nɛ winɔ kɛ wa ɔ nɛ dia nùi kɛ kpalɛ ala ngɔ nɛ ni, wi a wanɔ kɛ wa zele Dia Sakoe, nɛ wa ĩ gulu nɛ, nɛ wa ko dia wala te, mbe kama, nɛ mbe 'bu nɛ gazɛlɛ, nɛ mbe 'bu nɛ talɛ.”

Gba we ngɔ 'dã wɔkɔsɔ

²⁴ Nɛ Yezu tɔ̃ 'bɔ mbé gba we hã wa na: “Dɛa to nwa 'da Gale ma wia kɔ̃ do lɛnggɛ 'da mbe wele kpo, kɛ a mi zi dia kpalɛ ble kɔ fɔɛ 'da a.

²⁵ Nɛ mbe tũ kpo, do 'da fala owinɔ wa ɔa yala vɛ̃ ni, nɛ wi sɛnɛ a nɛa, nɛ a mi tɛ mɛ 'bɔ 'dã wɔkɔsɔ dɛ sanga blenɔ ni, nɛ a si.

²⁶ Kɔ kpalɛ 'da a gã, hã ma ma ngɔ ko nɛ, nɛ 'dã wɔkɔsɛ ma tɛ mɛ 'bɔ ngɔ hɔ nɛ.

²⁷ Nɛ owi dɛa tonɔ 'da wi ni wa tɛa, nɛ wa tɔ̃ hã a na: ‘Nwa, mɔ mi zi a dia kpalɛ kɔ fɔɛ 'da mɔ, kɔ 'dã wɔkɔsɛ gɛ yula do nde?’

²⁸ Nɛ a gese hã wa na: ‘Wi a wi sɛnɛ mi hã a dɛa mɛ ni.’ Nɛ owi tonɔ wa aka a na: ‘Mɔ kɔ̃́, nɛ lɛ zu'du ma do'do gɔ nde?’

²⁹ Nɛ a gese hã wa na: ‘Ɔ̃ ɔ̃, dɔ nɛ mbá nyanga nɛ do blenɔ, kɔ nɛ zu'du gɔ.

³⁰ Nɛ lá ma ni, hã ma gã bɔa nɛ gbaa we hɔ ngba soe kala do ble dɛ le. Do 'da fala ni, nɛ mi tɔ̃ sɛ hã Owi kala ma na, wa zu'du 'dã wɔkɔsɔnɔ dati, nɛ wa ɛnzɛ lã nɛ, nɛ wa dɔ, sɛ nɛ wa ĩ ti kala ble dɛ kɔ yangga 'da mi de.’ ”

Gba we ngɔ gbãlã te mutardɛ

³¹ Nɛ Yezu tɔ̃ 'bɔ gba we hã wa na: “Dɛa to nwa 'da Gale, ma wia kɔ̃ do mbe be gbãlã te kpo, li nɛ a mutardɛ. Nɛ mbe wele ba ma, nɛ a mi kɔ fɔɛ 'da a.

³² Gbãlã nɛ a bi sĩ iko, ma wè do mbe gbãlã mɛnɔ wa mi ma ngɔ nù gɛ gɔ. Nɛ nde 'da fala kɛ ma ngala ni, nɛ ma nɛa ngɔ tala kpalɛnɔ li fɔɛ ni vɛ̃, nɛ ma dɛ gã te. Nɛ onɔɛ wa tɛa, nɛ wa ma ngɔ dɛ tɔanɔ 'da wa dɛ ngɔ ogbakɔ̃ nɛ.”

Gba we ngɔ ina hana mapa

³³ Nɛ Yezu tɔ̃ 'bɔ gba we hã wa na: “Dɛa to nwa 'da Gale, ma wia kɔ̃ do ina hana mapa, kɛ wuko so ma, nɛ a zanga do farini 'bu kilo bɔa ngɔ nɛ mɔlɔ, nɛ ma hana ma vɛ̃ ni.”

Gulu kɛ Yezu wele zi wenɔ do gba we ni

³⁴ Nɛ Yezu tɔ̃a wenɔ ni vɛ̃ hã ogba gili winɔ do gba we. A tɔ̃ zi wenɔ hã wa fai do gba we iko.

³⁵ A dɛ zi na mɛ ni, takɔ we wi gba olo nu Gale tɔ̃a ni ma dɛ tɛ̃ ɛ. A tɔ̃a olo nu Gale na: “Mi wele sɛ wenɔ hã wa do gba we. Mi tɔ̃ sɛ gulu mɛnɔ kɛ ma usu tɛ̃ ɛ yolo 'da fala kɛ mi ndua zɛ́ nyanga dɛ nùi ni hã wa.”

Yezu tɔ̃a gulu gba we ngɔ wɔkɔsɔ

³⁶ Nɛ Yezu la ogba gili winɔ ni, nɛ a kpolo tɛ̃ a dɛ kɔ tɔa i. Nɛ Owi yambala mɛnɔ wa tɛa, nɛ wa tɔ̃ hã a na: “Mɔ tɔ̃ gulu gba we ngɔ 'dã wɔkɔsɛ kɔ fɔɛ ni hã lɛ.”

³⁷ Nɛ Yezu gisa hã wa na: “Wi mi dia kpalɛ, wi a mi Be 'da Wele.

³⁸ Nɛ fɔɛ, mɛ a nùi gɛ. Nɛ dia kpalɛ, wi a Owi kɔ le nwa 'da Gale. Nɛ 'dã wɔkɔsɛ, wi a owinɔ 'da Satana.

³⁹ Nɛ wi sɛnɛ mi, kɛ a mi 'dã wɔkɔsɛ ni, wi a Satana. 'Da fala kala kpalɛnɔ li fɔɛ ni, mɛ a ndɔti nùi, nɛ owi kala kpalɛnɔ, wi a oanzɛnɔ.

⁴⁰ Do ndɔti nùi, nɛ ma ɔ sɛ nɛ 'da fala wa zu'du do 'dã wɔkɔsɔnɔ we dɔ ma ni.

⁴¹ Mi Be 'da Wele, mi tombo sɛ oanzɛnɔ 'da mi, nɛ wa ngɛmɛ li winɔ kɛ wa ɔlɔ ongba wa we dɛ 'dã mɔ, do owi dɛ 'dã mɛnɔ vɛ̃, nɛ wa fo wa kɔ le nwa 'da Gale,

⁴² nɛ wa a wa li gba nyɛa we. Nɛ wa he sɛ kɔ̃a tɛ nyɔngɔ li gogo wa dɛ di ni.

⁴³ Nɛ wanɔ kɛ wa a wi bɔlɔ zu li Gale ni, wa sɛ kɔ le nwa 'da Baa wa Gale, nɛ wa to sɛ ɔ nɛ wese ni. Wi kɛ zala a boe, nɛ a zélé!

Gba we ngɔ kpamɔ kɛ ma usu tɛ ɛ

⁴⁴ “Dɛa to nwa 'da Gale, ma wia kɔ̃ do kpamɔ kɛ ma usu tɛ̃ ɛ kɔ fɔ ni. Mbe wele kpo hɔa ngɔ nɛ, nɛ a usu ma dɛ dati. Nɛ a dɛ yangga wena, nɛ a nɛ, nɛ a be gole mɛnɔ 'da a vɛ̃, nɛ a oso do fɔɛ ni.

Gba we ngɔ mɔ olo gã gole

⁴⁵ “Dɛa to nwa 'da Gale, ma wia 'bɔ kɔ̃ do lɛnggɛ 'da wi be gole, kɛ a tɛ fa odia iyaka we oso nɛ ni.

⁴⁶ 'Da fala kɛ a kpa dia kɛ ngboo, nɛ a si, nɛ a be gole mɛnɔ 'da a vɛ̃, nɛ a oso do ma.

Gba we ngɔ gbanda

⁴⁷ “Dɛa to nwa 'da Gale, ma wia 'bɔ kɔ̃ do gbanda kɛ wa a ma 'dɔ lì, nɛ ma kala okɔyɔ tɛ̃ ɛ do tɛ̃ ɛ ni.

⁴⁸ Ma dunu, nɛ owi a gbandanɔ wa mana ma dɛ nza, nɛ wa dungu nù we saka kɔyɔnɔ. Nɛ wa a ogã kɔyɔnɔ kɔ koe, nɛ wa gese obe wanɔ dɛ 'dɔ lì.

⁴⁹ 'Da fala ndɔti nùi, nɛ ma ɔ sɛ na mɛ ni. Oanzɛnɔ wa tɛ sɛ we gɔnɔ sanga o'dã winɔ do odia winɔ,

⁵⁰ nɛ wa a o'dã winɔ li gba nyɛa we. Nɛ wa he sɛ kɔ̃a tɛ nyɔngɔ li gogo wa dɛ di ni.”

Ombé mɛnɔ do ã kɛnɔ

⁵¹ Nɛ Yezu aka na: “Nɛ zila gulu wenɔ ni vɛ̃ do dia nɛ nde?” Nɛ wa gese na: “Ĩi, lɛ zila.”

⁵² Nɛ a tɔ̃ hã wa na: “Na mɛ ni, wi be mbula kɛ a hɔa wi kɔ le nwa 'da Gale ni, a ɔ nɛ wele tɔa kɛ a saka kɔ kpamɛnɔ 'da a, nɛ a kala ombé mɔ do ã mɔ dɛ nza ni.”

Owi Nazarɛtɛ wa kɔ̃̀ gɛnɛ Yezu gɔ

⁵³ Kɔ Yezu nɛa we fi nu a nù tɛ gba we ni,

⁵⁴ nɛ a kulu ngɔ di ni, nɛ a la dɛ kɔ le kɛ a gã zi nɛ ni. A hɔa i mɔ, nɛ a be we tɛ kɔ tɔa mbula 'da wa. Nɛ owinɔ vɛ̃ kɛ wa zila bia we 'da a ni, wa ɔngbɔ do ma wena. Nɛ wa ma ngɔ tɔ̃ na: “A kpa hã zã ki ni do nde? A kpa ngawi dɛ gba sɔ̃ mɛnɔ gɛ do nde?

⁵⁵ Be 'da wi kabinda zi dɛ gɛ a ni gɔ nde? Li naa a Maria gɔ nde? Nɛ li onya a a Zake, do Yozɛfu, do Simɔ, do Yuda gɔ nde?

⁵⁶ Oboko onya a, wa a wa ɔ́ dɛ sanga lɛ gɛ gɔ nde? A kpa kinɔ ni ní do nde?”

⁵⁷ Nɛ wa ba kafi nu a, nɛ wa kɔ̃̀ gɛnɛ a gɔ. Nɛ Yezu tɔ́a hã wa na: “Wa kɔ̃ gɛnɛ wi gba olo nu Gale do gele fala. Kɔ a hɔ kɔ le 'da a, do kɔ nu fɛlɛ kula 'da a, nɛ nde wa kɔ̃́ gɛnɛ a gɔ.”

⁵⁸ Nɛ Yezu dɛ̀ zi gba sɔ̃ mɔ di ni ngboo gɔ, we kɛ wa do kɔ̃a we dɛ 'da a bina.