MATIE 11 - WE NU GALE 1995

Yoanɛ wi batisa winɔ tumba owele hã Yezu

¹ Yezu tɔ̃a mbulanɔ ni hã owi yambala mɛnɔ 'da a 'bu ngɔ wa bɔa ni do'do, nɛ a yolo fala ni, nɛ a la we tɔ̃ mbula, do be Dia Sakoe 'da Gale hã owinɔ kɔ lenɔ ngɔ nùi ni.

² 'Da fala ni, nɛ nde Yoanɛ wi batisa winɔ zi a kɔ bɔlɔkɔ, nɛ a zila we mɛnɔ kɛ Yezu dɛ ni, nɛ a tombo ombe wi yambala mɛnɔ 'da a,

³ we aka Yezu na: “Mɔ a Mɛsiya kɛ a hɔ sɛ ni nde? Tabi lɛ 'bɔ́ 'da mbe gele wele nde?”

⁴ Nɛ Yezu gese hã wa na: “Nɛ nɛ́, kɔ nɛ tɔ̃́ lɛnggɛ mɛnɔ kɛ nɛ zɔa ma, do kɛnɔ nɛ zila ni hã Yoanɛ na,

⁵ owi lɔa linɔ wa tɛ zɔ mɔ, owi 'dã nyanganɔ wa tɛ nɛ nɔ, owi zɛlɛ ngbɛlɛnɔ wa kpasa, nɛ zala Owi la zalanɔ ma fĩ, ofionɔ wa tunu, nɛ Owi sãnɔ wa zila Dia Sakoe.

⁶ Kɔ yangga wena we wi kɛ a do kafi mi kɔ sila a bina ni.”

⁷ Owi yambala mɛnɔ 'da Yoanɛ wa nɛa we la do'do, nɛ Yezu ma ngɔ tɔ̃ we 'da Yoanɛ hã ogba gili winɔ na: “Mɛ nɛ nɛa we zɔ li gba zɔ̃ i ni a ge nde? Nɛ nɛa we zɔ wi kɛ a mbɔkɔ nɛ́ sala tɔ̃ɛ, kɛ bũi yaka ma ni nde?

⁸ Mɛ ngboo nɛ nɛa we zɔ ma ni a ge nde? Nɛ nɛa we zɔ wi kɛ a hi'da dia tulu ni nde? Owinɔ kɛ wa he'de dia tulu kɛ ma ɔ bɛndɛ bɛndɛ ni, wa ɔ kɔ tɔa 'da onwa.

⁹ Kɔ mɛ ngboo nɛ nɛa we zɔ ma li gba zɔ̃ɛ i ni a ge nde? Nɛ nɛa we zɔ wi gba olo nu Gale nde? Ĩi, mɛ a gbãlã we. Nɛ nde mi tɔ̃ hã nɛ na, Yoanɛ nɛa ngɔ wi gba olo nu Gale.

¹⁰ Mba gɔ, a a wi kɛ wa kɔma we 'da a kɔ 'Buki na: ‘Gale tɔ̃a na, mi tombo sɛ wi toe 'da mi dati mɔ, takɔ a 'dafa wala hã mɔ.’ ”

¹¹ Nɛ Yezu tɔ̃ 'bɔ na: “Mi tɔ̃ hã nɛ do gbãlã we na, sanga winɔ ngɔ nù gɛ vɛ̃, wi kɛ a nɛa ngɔ Yoanɛ wi batisa winɔ ni bina. Gɛnɛ kɔ na mɛ ni, nɛ nde wi kɛ a a tala ngɔ go'do winɔ kɔ le nwa 'da Gale ni, a nɛ sɛ ngɔ Yoanɛ.

¹² Ndo nyanga kɛ Yoanɛ ma zi ngɔ be we gbaa we hɔ sɔɛ gɛ ni, nɛ Owele wa wɛlɛ zu le nwa 'da Gale nganda wena. Nɛ owi ngawinɔ wa fa we ba ma.

¹³ Mbula kɛ Mɔizɛ kɔma zɛ́ ni, do Owi gba olo nu Gale, gbaa we hɔ tɛ Yoanɛ, wa tɔ̃a we le nwa 'da Gale.

¹⁴ Kɔ fala kɛ nɛ kɔ̃ gɛnɛ wenɔ mi tɔ̃a ni, nɛ nɛ ĩ́ na, Yoanɛ gɛ a Elia, kɛ wa tɔ̃a zɛ́ na, a tɛ sɛ ni.

¹⁵ Wi kɛ zala a boe, nɛ a zélé!

¹⁶ “Mi nɛ we winɔ kikina gɛ do ge nde? Wa wia kɔ̃ do benɔ kɛ wa dungu nù tɛ dɛ sa do nu zando, nɛ wa ma ngɔ he mɔ hã ongba wa na:

¹⁷ ‘Lɛ zɛa zi biã yɔla hã nɛ, nɛ nɛ yɔ̀ yɔla nɛ gɔ! Lɛ ga zuma kɔ̃a hã nɛ, nɛ nɛ hè kɔ̃a nɛ gɔ’ ni.

¹⁸ Mba gɔ, Yoanɛ tɛa zi, nɛ nde a nyɔ́ngɔ́ zi gbãlã we nyɔngɔmɔ gɔ, nɛ a nɔ́ zi dɔ̃ gɔ, nɛ owinɔ wa tɔ̃a na: ‘A do 'dã hi wi kɔ a!’

¹⁹ Kɔ mi Be 'da Wele, mi hɔa, nɛ mi nyɔngɔ mɛnɔ vɛ̃ nyɔnga, nɛ mi nɔ 'bɔ dɔ̃ nɔa, nɛ wa tɔ̃a na: ‘Nɛ zɔ́ wi gɛ a lengge nyɔngɔ mɔ do nɔ dɔ́ iko, nɛ a ba 'bia do Owi futa takonɔ, do o'dã winɔ!’ Nɛ nde winɔ wa zɔa dɛa tonɔ 'da Gale, nɛ wa ĩ na, hã zã 'da a mɛ a gbãlã we hã zã.”

Olenɔ kɛ ma bɛ̃a gɛnɛ Yezu ni

²⁰ Nɛ Yezu ma ngɔ kɔ'dɔ winɔ kɛ a dɛa zi gba sɔ̃ mɛnɔ kɔ lenɔ 'da wa ni, we kɛ wa kìfì zi sila wa gɔ. Nɛ a tɔ̃a hã wa na:

²¹ “'Bako do nɛ, owi kɔ le Korazinɛ do Bɛtsaida. Mba gɔ, ɔ do kɛ ɔngbamɛnɔ ma dɛa tɛ̃ ɛ kɔ le 'da nɛ gɛ, ma dɛ sɔ tɛ̃ ɛ kɔ le Tirɛ do Sidoni, nɛ owinɔ i mɔ ni, wa he'de sɔ saki, nɛ wa a bũ zu wa we be na, wa kifi sila wa belee ia.

²² Kɔ mi tɔ̃ hã nɛ na, do ngba soe 'bili we, nɛ nɛ kpa sɛ zɛlɛ tɛ nɛ ngɔ kɛ 'da Owi kɔ le Tirɛ do Sidoni.

²³ Nɛ nɛ, owi kɔ le Kafarnaumɛ, nɛ ba tɛ nɛ na, nɛ nɛ sɛ ngɔ winɔ vɛ̃, nɛ nɛ ba li nza nde? Wa isi sɛ zu nɛ gbaa dɛ kɔ le 'da ofionɔ i. Mba gɔ, ɔ do kɛ ɔngbamɛnɔ ma dɛa tɛ̃ ɛ kɔ le 'da nɛ gɛ, ma dɛ sɔ tɛ̃ ɛ kɔ le Sodɔmɛ, nɛ le ni, ma 'bana sɔ sɔɛ gɛ.

²⁴ Ma kɛ mi tɔ̃ hã nɛ na, do ngba soe 'bili we, nɛ nɛ kpa sɛ zɛlɛ tɛ nɛ ngɔ kɛ 'da Owi Sodɔmɛ ni.”

Yezu dɛa yangga we Baa a

²⁵ Nɛ do 'da fala ni, nɛ Yezu tɔ̃a hã Baa ɛ na: “Ee Baa mi, mɔ a Nwa ngɔ li nza do nùi gɛ! Mi hã iɔ̃nae hã mɔ wena, we duzu kɛ mɔ usu mɛnɔ gɛ do owi hã zãnɔ, do owinɔ kɛ wa yambala mɔ wena ni, nɛ mɔ bia ma hã owinɔ kɛ wa yala iko ni.

²⁶ Gbãlã we, Baa mi, mɔ dɛa ni, we kɛ ma dia li mɔ na, ma dɛ tɛ̃ ɛ na mɛ ni.

²⁷ “Baa mi ia mɛnɔ vɛ̃ dɛ tambala kɔ̃ mi. Nɛ wele wè tɛ ĩ ti mi Be 'da a gɔ. Wi ĩ ti mi, wi a Baa mi. Nɛ wele ĩ̀ ti Baa mi gɔ. Wi ĩ ti a, wi tati a mi Be 'da a, do owinɔ kɛ mi kɔ̃a we be Baa mi hã wa ni.

²⁸ “Nɛ, owinɔ vɛ̃ kɛ nɛ mbɔka tɛ ba dĩ tolenɔ ni, nɛ tɛ́ 'da mi, nɛ mi kusu sɛ tole zu nɛ, nɛ mi hã sɛ fala ɔmɔ tɛ wi hã nɛ.

²⁹ Nɛ hɔ́ owi dɛa tonɔ 'da mi, nɛ nɛ yambala wenɔ mi be ni, nɛ nɛ kpa sɛ gɛ̃a dungu. We kɛ mi a wi gɛ̃a sila, nɛ zu mi gbese wena.

³⁰ Dɛ to hã mi ma ngàndà gɔ, nɛ tole kɛ mi e sɛ zu nɛ ni, ma dĩ̀lĩ̀ gɔ.”