MATIE 10 - WE NU GALE 1995

Owi nɛ tonɔ 'da Yezu 'bu ngɔ wa bɔa

¹ Nɛ Yezu sa mɔ hã Owi yambala mɛnɔ 'da a 'bu ngɔ wa bɔa ni, nɛ a hã ngawi we fo o'dã hi wi kɔ Owele, do we kpasa Owi zɛlɛ kpi do kpi hã wa.

² Nɛ zɔ́ li wa, ma kɛ: Dati ngboo wi a Simɔ (kɛ wa sa 'bɔ li a na Petro ni), do nya a Andre, Zake, do nya a Yoanɛ, benɔ 'da Zebede,

³ Filipɛ, do Bartelɛmi, do Toma, do Matie wi futa takoe, do Zake, be 'da Alfe, do Tade,

⁴ do Simɔ, kɛ a bi zi ngɔ le 'da a na, ma hɔ nza ti mbula 'da ogele winɔ ni, do Yudasi Iskariɔtɛ, wi kɛ a 'dɔlɔ Yezu hã owi sɛnɛ a ni.

Yezu tumba Owi yambala mɛnɔ 'da a bɔa bɔa

⁵ Yezu nɛa we tombo owi yambala mɛnɔ 'da a 'bu ngɔ wa bɔa ni, nɛ a tɔ̃ hã wa na: “Nɛ tɛ nɛ̀ kɔ lenɔ 'da ogele winɔ gɔ, nɛ nɛ tɛ lè kɔ lenɔ 'da Osamaria gɔ.

⁶ Nɛ nde nɛ nɛ́ 'da obe Israɛlɛ, kɛ wa yɔa wala ɔ nɛ obatanɔ ni.

⁷ Nɛ nɛ́, nɛ nɛ be we hã wa na: ‘Ngba soe Gale nɛ tɛ we dungu nwa ngɔ nù gɛ ni kɔla ia!’

⁸ Nɛ kpásá Owi zɛlɛnɔ, nɛ nɛ túnú ofionɔ. Nɛ kpásá owi zɛlɛ ngbɛlɛ, nɛ nɛ fó o'dã hi wi kɔ owinɔ. Mɛnɔ kɛ nɛ kpa iko ni, ma wia tɛ mɛ 'bɔ na, nɛ hã ma hã owinɔ iko.

⁹ Nɛ tɛ bà mbili kpo dɛ kɔ koe tɛ nɛ gɔ.

¹⁰ Nɛ tɛ bà koe we a do mɔ we gala nɛ li wala gɔ, nɛ tɛ kàlà tulu bɔa gɔ, nɛ tɛ kàlà mɔ nyanga wi gɔ, nɛ nɛ tɛ bà dɔndɔlɔ dɛ kɔ̃ nɛ gɔ. Mba gɔ, wi dɛa to wia tɛ kpa mɔ olo toe 'da a.

¹¹ “Fala kɛ nɛ hɔ kɔ gã le, tabi kɔ be le nde, nɛ nɛ fá wi kɛ a wia na, nɛ ɔ 'da a ni. Nɛ nɛ ɔ́ 'da wi ni gbaa, nɛ nɛ la do le ni.

¹² Fala kɛ nɛ le kɔ tɔa mɔ́ wele, nɛ nɛ tɔ̃́ na: ‘E kɔ nɛ kpa dungu fio!’

¹³ Kɔ fala kɛ owinɔ kɔ tɔa ni, wa we wi kɛ na nɛ ɔ 'da wa, nɛ dungu fie 'da nɛ 'bana do wa. Ní gɔ, nɛ dungu fie 'da nɛ ma la sɛ kɔ tɔa ni do'do.

¹⁴ Kɔ nɛ hɔ kɔ mbe le tabi mbe tɔa kpo, kɔ wa kɔ̃̀ gɛnɛ nɛ gɔ, tabi wa kɔ̃̀ we zele we nu nɛ gɔ nde, nɛ nɛ lá fala ni, nɛ nɛ fɛ́lɛ́ nù tambala nyanga nɛ hã wa we be na, wa dɛ̀ de gɔ.

¹⁵ Mi tɔ̃ hã nɛ do gbãlã we na, do ngba soe Gale nɛ 'bili sɛ do ngbangga 'da winɔ ngɔ nù gɛ ni, nɛ owinɔ kɔ le ni wa kpa sɛ zɛlɛ tɛ nɛ ngɔ kɛ 'da Owi Sodɔmɛ do Gomɔrɛ.

Zɛlɛ tɛnɔ kɛ winɔ wa kpa sɛ 'do gɛ ni

¹⁶ “Nɛ zélé! Mi tumba nɛ, nɛ nɛ ɔ sɛ nɛ obata kɛ wa lia sanga ogɔ̃̀ ni. Kɔ li nɛ sɔ̃́ nɛ́ li gɔ̃ ni, nɛ sila nɛ gɛ̃ ɔ nɛ sila gbakulĩ ni.

¹⁷ Li nɛ sɔ̃́, we kɛ Owele wa kala sɛ nɛ, nɛ wa a nɛ dati Owi 'bili we. Nɛ wa zɛ sɛ nɛ do zufa kɔ tɔa mbulanɔ 'da wa.

¹⁸ Wa kala sɛ nɛ, nɛ wa a nɛ dati Onwanɔ do ogã winɔ, we kɛ nɛ a owinɔ 'da mi. Nɛ ma hã sɛ wala hã nɛ na, nɛ tɔ̃ we 'da mi hã wa, do hã wanɔ wa a Oyuda gɔ ni.

¹⁹ Kɔ fala kɛ wa kala nɛ we a nɛ dati Owi 'bili wenɔ, nɛ nɛ tɛ bì tɛ nɛ na, lo nɛ tɔ̃ sɛ na ge nde, tabi lo gese sɛ na ge nde ni gɔ. We kɛ do 'da fala ni, wi wele sɛ we wi a nɛ gɔ,

²⁰ nɛ nde Hi Wi 'da Baa nɛ a e sɛ wila we nu nɛ, nɛ nɛ tɔ̃ ma.

²¹ “Owele wa 'dɔlɔ sɛ onya wa ngboo hã ogele wele na, wa gbɛ wa, nɛ obaa be wa dɛ sɛ 'bɔ kpasaa na mɛ ni do obenɔ 'da wa. Nɛ obe wa kifi sɛ li wa dɛ tɛ Owele wa, nɛ wa 'dɔlɔ wa hã ogele wele na wa gbɛ wa.

²² Nɛ winɔ vɛ̃ wa sɛnɛ sɛ nɛ we duzu mi. Kɔ wele kɛ sila a nɔ tɛ kɔ̃a we 'da a, gbaa we hɔ ndɔti nɛ, nɛ Gale a kpasa sɛ a.

²³ Kɔ fala kɛ wa zɛlɛ tɛ nɛ kɔ mbe le kpo nde, nɛ nɛ yú dɛ kɔ gele le. Mi tɔ̃ hã nɛ do gbãlã we na, zu nɛ ma kpá sɛ kɔ lenɔ ngɔ nù Israɛlɛ vɛ̃ dati kɛ na mi Be 'da Wele, mi hɔ sɛ ni gɔ.

²⁴ “Wi yambala mɔ nɛ ngɔ wi be mɔ hã a gɔ. Nɛ wi dɛa to nɛ ngɔ nwa 'da a gɔ.

²⁵ Kɔ wi yambala mɔ ɔ nɛ wi kɛ a be mɛ hã a ni, hã wi dɛa to ɔ nɛ nwa 'da a ni, nɛ nde ma wia ia. Kɔ fala kɛ wa sa li wele tɔa na Beɛlzebulɛ, nɛ nde wa sá sɛ li tala owinɔ kɔ tɔa ni 'danga wena gɔ nde?

Wi kɛ lɛ wia we dɛ kili a ni

²⁶ “Nɛ tɛ dɛ̀ kili Owele gɔ. Mɛnɔ vɛ̃ kɛ ma usu tɛ̃ ɛ ni, ma hɔ sɛ dɛ wila fala, nɛ usu wenɔ vɛ̃ ma hɔ sɛ nza.

²⁷ Wenɔ vɛ̃ kɛ mi tɔ̃ hã nɛ do ti tũ nɛ ni, nɛ bé ma dɛ wila fala, nɛ wenɔ kɛ wa fɔ̃lɔ̃ dɛ zala nɛ ni, nɛ sá do mbila li fanda nza nga.

²⁸ “Nɛ tɛ dɛ̀ kili winɔ kɛ wa gbɛ kili tɛ wi, nɛ nde wa wè tɛ gbɛ hi wi gɔ ni gɔ. Nɛ dɛ́ kili Gale kɛ a wia we mba hi wi do kili tɛ wi, nɛ a gbɛ li gba nyɛa we ni.

²⁹ “Wele be gole otɛtɛ̃a bɔa, nɛ a kpa sɛ gã mbili nde? Gɛnɛ kɔ na mɛ ni, nɛ nde mbe sanga wa ni wè tɛ te nù iko gɔ, Gale kɔ̃, sɛ nɛ de.

³⁰ Kɛ 'da nɛ, gɛnɛ kɔ mili zu nɛ, nɛ nde Gale tɔlɔ ma vɛ̃ tɔla.

³¹ Kɔ nɛ tɛ dɛ̀ kili gɔ, we kɛ nɛ nɛa ngɔ nɔɛnɔ ni vɛ̃ nɛa.

Kɔ̃ gɛnɛ Yezu, tabi bɛ̃ gɛnɛ a

³² “Wi kɛ a tɔ̃ dɛ li Owele na, ɛ a wi 'da mi ni, nɛ mi tɔ̃ sɛ tɛ mɛ 'bɔ dɛ li Baa mi, kɛ a li nza i ni na, wi ni a wi 'da mi.

³³ Nɛ nde wi kɛ a kafa mi dɛ li Owele na, ɛ ĩ̀ ti mi gɔ ni, nɛ mi tɔ̃ sɛ tɛ mɛ 'bɔ dɛ li Baa mi, kɛ a li nza i ni na, mi ĩ̀ ti a gɔ.

Yezu tɛa we gɔnɔ sanga owinɔ

³⁴ “Nɛ tɛ lènggè na, mi tɛa we e dungu fio sanga owinɔ ngɔ nù gɛ gɔ. Mi tɛ̃ we e dungu fio gɔ, nɛ nde mi tɛa we e bolo sanga winɔ.

³⁵ Mi tɛa we gɔnɔ sanga bulu be do baa a, boko be do naa a, konduka do kɛfɛ a wuko nɛ.

³⁶ Nɛ kpo kpo Owi nu fɛlɛ kula wa sɛnɛ sɛ ngba wa.

³⁷ “Wi kɛ a kɔ̃ gɛnɛ baa a, tabi naa a nɛ ngɔ mi, nɛ nde a wè wi 'da mi gɔ. Wi kɛ a kɔ̃ gɛnɛ bulu be 'da a, tabi boko be 'da a nɛ ngɔ mi, nɛ nde a wè wi 'da mi gɔ.

³⁸ Wi kɛ a bà tole finda te 'da a, kɔ a tɛ 'do mi gɔ, nɛ nde a wè wi 'da mi gɔ.

³⁹ Wi kɛ a fa we kpasa kili tɛ̃ a, nɛ a fe sɛ. Nɛ wi kɛ a la kili tɛ̃ a na, ma fe we mi ni, nɛ a kpasa sɛ.

Wi kɛ a kɔ̃ gɛnɛ winɔ 'da Yezu a kpa sɛ si olo nɛ

⁴⁰ “Wi kɛ a kɔ̃ gɛnɛ nɛ kɔ tɔa 'da a, nɛ nde a kɔ̃a gɛnɛ mi, nɛ wi kɛ a kɔ̃ gɛnɛ mi, nɛ nde a kɔ̃a gɛnɛ wi tombo mi.

⁴¹ Wi kɛ a kɔ̃ gɛnɛ mbe wi gba olo nu Gale, we kɛ a a wi gba olo nu Gale ni, nɛ a kpa sɛ kpo kpo mɛ kɛ wi gba olo nu Gale kpa olo toe 'da ɛ ni. Nɛ wi kɛ a kɔ̃ gɛnɛ wi bɔlɔ zu, we kɛ zu wi ni a bɔlɔ li Gale ni, nɛ a kpa sɛ kpo kpo mɛ kɛ wi bɔlɔ zui ni kpa olo bɔlɔ zui 'da ɛ ni.

⁴² Mi tɔ̃ hã nɛ do gbãlã we na, wi kɛ a hã mbamba bila lì kpo hã mbe sanga obenɔ kɛ wa a winɔ 'da mi ni, we kɛ be ni a wi 'da mi ni, nɛ wi ni a zɔ́lɔ́ sɛ kpa si olo nɛ gɔ.”