MATIE 1 - WE NU GALE 1995

Oyaa Yezu

¹ Kɛ gɛ a li oyaa Yezu Kristo, kɛ a a be zã Davidi, wi nu fɛlɛ Abrahama ni.

² Abrahama kua Izaka, nɛ Izaka ko Yakɔbɔ, nɛ Yakɔbɔ ko Yuda, do onya a.

³ Nɛ Yuda ko Farɛsɛ do Zara (naa wa zi a Tamarɛ), nɛ Farɛsɛ ko Ɛsrɔmɛ, nɛ Ɛsrɔmɛ ko Aramɛ,

⁴ nɛ Aramɛ ko Aminadabɛ, nɛ Aminadabɛ ko Naasoni, nɛ Naasoni ko Salmoni,

⁵ nɛ Salmoni ko Buzɛ (naa a zi a Rahabɛ), nɛ Buzɛ ko Obɛdɛ (naa a zi a Ruti), nɛ Obɛdɛ ko Yɛse,

⁶ nɛ Yɛse ko nwa Davidi. Nɛ Davidi ko Salɔmɔ do wuko olo Uri,

⁷ nɛ Salɔmɔ ko Roboamɛ, nɛ Roboamɛ ko Abia, nɛ Abia ko Asafɛ,

⁸ nɛ Asafɛ ko Yozafatɛ, nɛ Yozafatɛ ko Yoramɛ, nɛ Yoramɛ ko Oziasi,

⁹ nɛ Oziasi ko Yoatamɛ, nɛ Yoatamɛ ko Akazɛ, nɛ Akazɛ ko Ezekiasi,

¹⁰ nɛ Ezekiasi ko Manase, nɛ Manase ko Amoni, nɛ Amoni ko Yoziasi,

¹¹ nɛ Yoziasi ko Yekonia do onya a. Do 'da fala ni, nɛ owi Babilɔnɛ wa kala Oisraɛlɛ la do wa kɔlɔ 'duli.

¹² 'Do kɛ wa kala obe Israɛlɛ la do wa kɔlɔ 'duli tɛ Babilɔnɛ i ni, nɛ Yekonia ko Salatiɛlɛ, nɛ Salatiɛlɛ ko Zorobabɛlɛ,

¹³ nɛ Zorobabɛlɛ ko Abiudɛ, nɛ Abiudɛ ko Eliakimɛ, nɛ Eliakimɛ ko Azɔrɛ,

¹⁴ nɛ Azɔrɛ ko Sadɔkɛ, nɛ Sadɔkɛ ko Akimɛ, nɛ Akimɛ ko Eliudɛ,

¹⁵ nɛ Eliudɛ ko Eleazarɛ, nɛ Eleazarɛ ko Matanɛ, nɛ Matanɛ ko Yakɔbɔ,

¹⁶ nɛ Yakɔbɔ ko Yozɛfu, wili Maria naa Yezu, kɛ wa sa li a na Mɛsiya ni.

¹⁷ Yolo tɛ Abrahama we hɔ tɛ Davidi, nu fɛlɛ kula ma sanza fala 'bu ngɔ nɛ nalɛ. Nɛ yolo tɛ Davidi we hɔ ngba soe Owi Babilɔnɛ wa kala zi do obe Israɛlɛ la do wa kɔlɔ 'duli ni, nu fɛlɛ kula ma sanza fala 'bu ngɔ nɛ nalɛ. Nɛ yolo do fala ni gbaa we hɔ ngba soe wa kua do Mɛsiya ni, nu fɛlɛ kula ma sanza 'bɔ fala 'bu ngɔ nɛ nalɛ.

Lɛnggɛ kula 'da Yezu

¹⁸ Nɛ zélé sako kula 'da Yezu. Maria, naa Yezu kɔ̃a zi wili, li a a Yozɛfu. Nɛ dati kɛ na wa ba ngba wa ni, nɛ Maria ba zã. Nɛ nde zã ni yula kɔ ngawi 'da Hi Wi Santo.

¹⁹ Yozɛfu kɛ wa kɔ̃a ngba wa do Maria ni zi a wi bɔlɔ zu, nɛ a kɔ̃̀ zi we bɛ̃ Maria dɛ wila fala kɔ ma hã sape hã a gɔ. A kɔ̃a zi we bɛ̃ a do ti tũ nɛ.

²⁰ Kɔ a ma ngɔ 'dafa na mɛ ni, nɛ anzɛ 'da Nwa Gale hɔ 'da a li yalɛ, nɛ a tɔ̃ hã a na: “Yozɛfu, be 'da Davidi, mɔ tɛ dɛ̀ kili ba Maria gɔ, we kɛ zã tɛ̃ a gɛ ma yula do wala 'da Hi Wi Santo.

²¹ A ko sɛ bulu be, nɛ mɔ e sɛ li be ni na Yezu. We kɛ a kpasa sɛ winɔ 'da a kɔ 'dã mɛnɔ 'da wa.”

²² Mɛnɔ ni ma dɛa tɛ̃ ɛ na mɛ ni, takɔ we Nwa Gale tɔ̃a zɛ́ do wala 'da wi gba olo nu a na:

²³ “Be zɔnga a ba sɛ zã, nɛ a ko sɛ bulu be, nɛ wa sa sɛ li a na Emanuɛlɛ” ni, ma dɛ tɛ̃ ɛ. (Gulu li Emanuɛlɛ na: “Gale do lɛ boe.”)

²⁴ Yozɛfu kulu ngɔ li yala, nɛ a dɛa ɔ nɛ kɛ anzɛ 'da Nwa Gale tɔ̃a hã a ni, nɛ a ba Maria do kɛnɛ a.

²⁵ Nɛ nde wa ɔ̃ ngu'du ngba wa gɔ gbaa, nɛ Maria kua do be. Nɛ Yozɛfu ia li be ni na Yezu.