MARKO 9 - WE NU GALE 1995

¹ Nɛ Yezu tɔ̃ 'bɔ hã wa na: “Mi tɔ̃ hã nɛ do gbãlã we na, ombe winɔ sanga nɛ gɛ wa fé sɛ do ti gɔ, wa zɔ sɛ tɛlɛ tɛ kɛ Gale a tɛ sɛ do ngawi, we dungu nwa do'do sɛ nɛ de.”

Tɛ Yezu kifi dɛ li owi yambala mɛnɔ

² 'Do nɛ la tũ gazɛlɛ, nɛ Yezu kala ombe wi yambala mɛnɔ 'da a talɛ, Petro, Zake, do Yoanɛ, nɛ a kũ do wa dɛ zu mbe ngala kala kpo, tati a wa iko. Wa hɔa i mɔ, nɛ tɛ Yezu kifi dɛ li wa.

³ Nɛ tulu tɛ̃ a ndele kpala kpala kpala. Nɛ ma fɛnga nde nde nde do tɛlɛ tɛ kɛ na, wele ngɔ nù gɛ wè tɛ dɛ tulu, nɛ ma fɛngɛ ni gɔ.

⁴ Nɛ owi yambala mɛnɔ talɛ ni, wa nɛ ka mɔ, nɛ wa zɔ Elia do Mɔizɛ, nɛ nde wa tɛ wele we do Yezu.

⁵ Kɔ Petro nɛa we zɔ ní, nɛ a tɔ̃ hã Yezu na: “Wi be mɔ, fala gɛ de wena, lɛ 'báná dɛ dɛ iko. Lɛ dɛ́ kɔnggɔ talɛ, kɛ 'da mɔ, kɛ 'da Mɔizɛ, do kɛ 'da Elia.”

⁶ Nɛ nde ma ba zi we nu Petro do'do, we duzu kɛ kili ba zi a do ongba a wena.

⁷ Nɛ gba kutu tɛa, nɛ ma lɔ'ba wa, nɛ wala gɛlɛ wele wila dɛ kɔ kuti ni na: “Wele kɛ gɛ a Be 'da mi, kɛ a ngɔ sila mi. Nɛ zélé a!”

⁸ Nɛ dɔ̃, kɔ Owi yambala mɛnɔ ni wa nɛ ka mɔ kɛ zã wa, nɛ nde mbé wele 'bɔ do wa bina, wa zɔa tati a Yezu iko.

⁹ Kɔ wa ma ngɔ zĩlĩ kala, nɛ Yezu dala nu ɛ hã wa na, wa tɛ tɔ̃̀ we mɛ kɛ wa zɔa ni hã wele gɔ, gbaa ndɔti nɛ a kɛ ɛ Be 'da Wele, ɛ za'da nza kɔ fio do'do sɛ nɛ de.

¹⁰ Nɛ wa usu wenɔ ni dɛ kɔ zã wa, nɛ nde wa aka ngba wa na: “Za'da nza kɔ fio gɛ a ge nde?”

¹¹ Nɛ wa aka Yezu na: “Gulu kɛ Owi be mbulanɔ wa tɔ̃ na, Elia a tɛ sɛ dati, sɛ nɛ Mɛsiya tɛ de ni we ge nde?”

¹² Nɛ Yezu gese hã wa na: “Mɛ a gbãlã we na, Elia a tɛ sɛ dati we 'dafa mɛnɔ vɛ̃. Kɔ gulu kɛ wa kɔma 'bɔ kɔ 'Buki 'da Gale na, Be 'da Wele a kpa sɛ zɛlɛ tɛ wena, nɛ wa dɛ sɛ a do yia dɛa mɔ wena ni we ge nde?

¹³ Gɛnɛ kɔ na mɛ ni, nɛ nde mi tɔ̃ hã nɛ na, Elia tɛa ia. Nɛ winɔ wa zɛla tɛ̃ a wena, nɛ́ kɛ zã wa kɔ̃a ni. Wa dɛa ɔ nɛ kɛ owi gba olo nu Gale wa kɔma zɛ́ we nɛ ko 'bukuno ni.”

Yezu ndaka 'dã hi wi kɔ be

¹⁴ Wa kpula tɛ wa dɛ 'da tala owi yambala mɛnɔ i, nɛ nde gba gili Owele wa ngɛmɛ ngba wa dɛ di ni. Nɛ ombe wi be mbulanɔ wa ba kafi nu ngba wa do Owi yambala mɛnɔ.

¹⁵ Kɔ winɔ wa nɛa we zɔ Yezu, nɛ wa gbanga, nɛ wa gɔnɔ dati a do yu we fana a.

¹⁶ Nɛ Yezu aka owi yambala mɛnɔ 'da a na: “Gulu kɛ nɛ ba kafi nu ngba nɛ do wa we ge nde?”

¹⁷ Nɛ mbe kpo sanga winɔ ni gese hã a na: “Wi be mɔ, mi tɛa do bulu be 'da mi hã mɔ, we duzu kɛ a do 'dã hi wi, nɛ nde 'dã hi wi ni 'bia 'bangga a do'do, kɔ a wélé we gɔ.

¹⁸ Nɛ falanɔ vɛ̃ kɛ be tɛ nɛ ni, kɔ 'dã hi wi ni ba a ia, nɛ ma lo a nù, nɛ sã nu a nɔ̃lɔ̃ ndufã ndufã, nɛ a ma ngɔ nyɔngɔ li gogo a, nɛ tɛ̃ a ngo gborr gborr ní. Kɔ mi aka sɔ owi yambala mɛnɔ 'da mɔ na, wa ndaka 'dã hi wi ni kɔ a do'do, nɛ nde wa dɛa zãa, nɛ wa fò a gɔ.”

¹⁹ Nɛ Yezu tɔ̃ hã wa na: “O! Aa nɛ, gulu kɛ nɛ do kɔ̃a we dɛ 'da Gale bina we ge nde? Mi 'bana sɛ 'bɔ do nɛ gbaa soe ki nge nde? Mi kunu sɛ sila mi dɛ tɛ nɛ fai nde? Nɛ tɛ́ do be hã mi!”

²⁰ Nɛ wa tɛa do be hã a. Kɔ 'dã hi wi kɔ be ni nɛa we zɔ Yezu, nɛ a yaka be gbirr, nɛ be te, nɛ a kimili tɛ̃ a do nùi, nɛ sã nu a ma ngɔ nɔ̃lɔ̃ nɛ.

²¹ Nɛ Yezu aka baa be ni na: “Zɛlɛ gɛ ndua a zi belee nde?” Nɛ baa be gese na: “Ma ndua zi a do be tɛ̃ a.

²² Nɛ nde 'da fala wena 'dã hi wi ni fi a li we, tabi ma da a 'dɔ lì, takɔ a fe. Kɔ fala kɛ ma we do mɔ, nɛ mɔ ĩ́ 'bako hã lɛ, nɛ mɔ gala lɛ!”

²³ Nɛ Yezu tɔ̃ hã a na: “Gulu kɛ mɔ tɔ̃a na, fala kɛ ma we do mi ni we ge nde? Mɔ ĩ́ na, wi kɛ a ɔ do kɔ̃a we dɛ 'da Gale ni, a wia we dɛ mɛnɔ vɛ̃.”

²⁴ Nɛ baa be ni he mɔ na: “Mi kɔ̃a ia! Kɔ mɔ dɛ́ na kɔ̃a we 'da mi gã!”

²⁵ Nɛ Yezu nɛ fi li a, nɛ a zɔ gba gili Owele, wa tɛ wɛlɛ tɛ wa dɛ 'da wa nga. Kɔ a nɛa we zɔ wa, nɛ a dãlã dɛ tɛ 'dã hi wi kɔ be ni na: “Mɔ 'dã hi wi, mɔ 'bia 'bangga be, nɛ mɔ kpia zala a gɛ, mi tɔ̃ hã mɔ na, mɔ hɔ́ nza kɔ a, nɛ mɔ tɛ kpòlò 'bɔ mbé tɛ mɔ dɛ kɔ a gɔ!”

²⁶ Nɛ 'dã hi wi hia mɔ kpu kpu kpu, nɛ a yaka be gbirr, nɛ a hɔ nza kɔ a. Nɛ be ni ɔa nù nɛ́ kɛ a fi fia ni. Nɛ winɔ wena wa ma ngɔ tɔ̃ na: “A fia ia.”

²⁷ Nɛ Yezu 'be nu kɔ a, nɛ a kulu ngɔ.

²⁸ Nɛ 'do nɛ, nɛ Yezu le dɛ tɔa i, nɛ owi yambala mɛnɔ wa le do a tati a wa iko. Nɛ wa aka a na: “Gulu kɛ lɛ wè sɔ we fo 'dã hi wi kɔ be ni gɔ we ge nde?”

²⁹ Nɛ Yezu gese hã wa na: “We fo 'dã hi wi ɔ nɛ wele ki ni dɛ nza, ma wia tati a do sambala Gale iko.”

Yezu tɔ̃a 'bɔ we fie do za'da nza kɔ fie 'da a

³⁰ Nɛ wa kulu ngɔ di ni, nɛ wa 'bili do ngɔ nù Galile. Nɛ Yezu kɔ̃̀ zi na, Owele wa ĩ fala kɛ ɛ nɛ ni gɔ.

³¹ We duzu kɛ a zi tɛ be hã Owi yambala mɛnɔ 'da a na: “Wa 'dɔlɔ sɛ mi Be 'da Wele hã Owele, nɛ wa gbɛ sɛ mi. Kɔ ma hɔ tɛ talɛ tũi, nɛ mi za'da sɛ nza kɔ fio.”

³² Nɛ nde Owi yambala mɛnɔ wa zèlè gulu we kɛ a tɔ̃a ni gɔ, nɛ wa dɛa kili aka a do'do.

Yezu bia tɛlɛ tɛ wi kɛ a nɛa ngɔ ongba a ni

³³ Wa hɔa tɛ Kafarnaumɛ, nɛ wa le kɔ mbe tɔa kpo, nɛ Yezu aka owi yambala mɛnɔ 'da a na: “Mɛ nɛ ba sɔ kafi nɛ li wala i ni a ge nde?”

³⁴ Nɛ wa fì nu wa tɛ we gɔ, we duzu kɛ sɔ li wala i, wa tɛ ba kafi nu ngba wa, we ĩ ti wi kɛ a nɛa ngɔ ongba a ni.

³⁵ Nɛ Yezu dungu nù, nɛ a sa mɔ hã Owi yambala mɛnɔ 'da a 'bu ngɔ wa bɔa ni, nɛ a tɔ̃ hã wa na: “Wi kɛ a kɔ̃ we hɔ wi dati sanga ongba a, nɛ ma wia na, a e tɛ̃ a do ti tala winɔ vɛ̃, nɛ a dɛ to hã wa.”

³⁶ Nɛ Yezu ba mbe be kpo, nɛ a 'be a dɛ tɛ̃ a, nɛ a e a dɛ dati owi yambala mɛnɔ ni, nɛ a tɔ̃ hã wa na:

³⁷ “Wi kɛ a kɔ̃ gɛnɛ obe ɔ nɛ wele kɛ gɛ kɔ tɔa 'da a do zu li mi, nɛ nde a kɔ̃a gɛnɛ mi kɔ tɔa 'da a. Nɛ a kɔ̃̀ tati a gɛnɛ mi iko gɔ, nɛ nde a kɔ̃a 'bɔ gɛnɛ Wi tombo mi.”

Wi 'da Yezu a wio nde?

³⁸ Nɛ Yoanɛ tɔ̃ hã Yezu na: “Wi be mɔ, mɔ ĩ́ na, lɛ zɔa mbe wele kpo, nɛ nde a tɛ ndaka o'dã hi wi do zu li mɔ. Nɛ lɛ ga a tɛ nɛ, we duzu kɛ a a wi 'da lɛ gɔ.”

³⁹ Nɛ Yezu gese na: “Nɛ tɛ gà a gɔ, we duzu kɛ wi kɛ a dɛ gba sɔ̃ mɔ do zu li mi, nɛ nde a wé sɛ we tɔ̃ 'dã we tɛ mi do ti gɔ.

⁴⁰ Mba gɔ, wi kɛ a sɛ̀nɛ̀ lɛ gɔ ni, a a wi 'da lɛ.

⁴¹ Nɛ wi kɛ a hã bila lì hã nɛ kpo, we duzu kɛ nɛ a winɔ 'da mi ni, nɛ nde mi tɔ̃ hã nɛ do gbãlã we na, wi ni a kpa sɛ si olo nɛ.”

Ma wè na wele dɛ 'dã mɔ gɔ

⁴² “Wi kɛ a fa we fi mbe sanga benɔ, kɛ wa kɔ̃a zu li mi ni li 'dã wala, nɛ ma wia sɔ na, wa kpo gã ta gɛlɛ wi ni, nɛ wa da a 'dɔ gba lì.

⁴³ Fala kɛ kɔ̃ mɔ fi mɔ kɔ 'dã mɔ, nɛ mɔ 'bili ma do'do! We kɛ ma dia fɛ̃ na, mɔ le tɛ kɔ le kpasi 'da Gale do kɔ̃ mɔ kpo, olo li kɛ na mɔ le li gba nyɛa we do kɔ̃ mɔ bɔa nɛ ni. [

⁴⁴ I mɔ ni, mɛ a fala kɛ dɔkɔnɔ wa nyɔngɔ kili tɛ winɔ, nɛ nde dɔkɔnɔ ni wa fé gɔ, nɛ we ma dɔ winɔ ni, ma bí 'bɔ gɔ.]

⁴⁵ Nɛ fala kɛ nyanga mɔ fi mɔ kɔ 'dã mɔ, nɛ mɔ 'bílí ma do'do! We kɛ ma dia fɛ̃ na mɔ le kɔ le kpasi 'da Gale do nyanga mɔ kpo, olo li kɛ na, mɔ le li gba nyɛa we do nyanga mɔ bɔa nɛ ni. [

⁴⁶ I mɔ ni, mɛ a fala kɛ dɔkɔnɔ wa nyɔngɔ kili tɛ winɔ, nɛ nde dɔkɔnɔ ni wa fé gɔ, nɛ we ma dɔ winɔ ni, ma bí 'bɔ gɔ.]

⁴⁷ Kɔ fala kɛ mbee gbali mɔ fi mɔ kɔ 'dã mɔ, nɛ mɔ 'dɔ́ ma do'do! We kɛ ma dia fɛ̃ na, mɔ le kɔ le nwa 'da Gale do gbali mɔ kpo, olo li kɛ na mɔ le li gba nyɛa we do gbali mɔ bɔa nɛ ni.

⁴⁸ I mɔ ni, mɛ a fala kɛ dɔkɔnɔ wa nyɔngɔ kili tɛ winɔ, nɛ nde dɔkɔnɔ ni wa fé gɔ, nɛ we ma dɔ winɔ ni, ma bí 'bɔ gɔ.

⁴⁹ “Mba gɔ, wa 'dafa sɛ winɔ do we, ɔ nɛ kɛ tɔ̃ɛ 'dafa do nyɔngɔmɛ ni.

⁵⁰ Tɔ̃ mɛ a de mɔ, kɔ 'da fala kɛ ma zãlã, nɛ nde wa wè tɛ dɛ 'bɔ na, ma dãlã dɛ olo nɛ gɔ. Ma wia na, nɛ ɔ do tɔ̃ tɛ nɛ, nɛ nɛ dɛ na do ngba nɛ.”