MARKO 8 - WE NU GALE 1995

Yezu hã nyɔngɔmɔ hã owele koto nalɛ

¹ Do zã kɔ̃ tũnɔ ni, nɛ owinɔ wa mba li ngba wa, nɛ wa ɔa gbaa, nɛ nyɔngɔmɔ e kɔ̃ wa. Yezu zɔa ni, nɛ a sa mɔ hã Owi yambala mɛnɔ 'da a, nɛ a tɔ̃ hã wa na:

² “'Bako ba li mi dɛ tɛ owinɔ gɛ wena, we kɛ lɛ ɔa do wa tũ talɛ vɛ̃, nɛ nyɔngɔmɔ ia kɔ̃ wa do'do.

³ Kɔ mi gese wa na mɛ ni, nɛ wa ala sɛ wɛ dɛ li wala gɛ iko. Mba gɔ, ombe sanga wa gɛ, wa yula nyɛlɛ wena.”

⁴ Nɛ owi yambala mɛnɔ wa gese hã a na: “Lɛ nɛ dɛ fala kpa nyɔngɔmɔ dɛ li zɔ̃ɛ gɛ, we hã hã wa ni nɛ nde?”

⁵ Nɛ Yezu aka wa na: “Ní a nɛ do mapa nɛ nde?” Nɛ wa gese hã a na: “Lɛ do gbãlã mapa sambo.”

⁶ Nɛ a tɔ̃ hã ogba gili winɔ na, wa dúngú nù. Nɛ a kala mapanɔ sambo ni, nɛ a sambala Gale, nɛ a gbini sanga nɛ, nɛ a hã ma hã owi yambala mɛnɔ na, wa kɛ̃ hã gba gili owinɔ ni. Nɛ wa kɛ̃a ma.

⁷ Wa zi 'bɔ do mbe obe kɔyɔ sĩ. Nɛ Yezu sambala 'bɔ Gale we duzu kɔyɔnɔ ni. Nɛ a tɔ̃ hã owi yambala mɛnɔ na, wa kɛ̃́ 'bɔ ma.

⁸ Nɛ wa kɛ̃a, nɛ wele do wele nyɔnga, nɛ zã a hɛ̃a. Nɛ owi yambala mɛnɔ wa ngɛma tala kɛ 'bana ni, nɛ ma dunu sanggi sambo.

⁹ Ĩ na, winɔ wa nyɔngɔ zi mɛ ni, wa zi a owele dɔ̃ɔ do koto nalɛ. Wa nyɔngɔ mɛ ia do'do, nɛ Yezu gese wa na, wa sí.

¹⁰ Nɛ Yezu kũ kɔ ga do owi yambala mɛnɔ 'da a do ti, nɛ wa la tɛ mɛ 'bɔ dɛ ngɔ nù Dalmanuta.

Yezu bɛ̃a we dɛ gba sɔ̃ mɔ hã Fariziɛnɔ

¹¹ Nɛ Fariziɛnɔ wa tɛa 'da Yezu, nɛ wa ma ngɔ ba kafi do a, nɛ wa fa we yamba a. Nɛ wa aka a na, a dɛ́ mbe gba sɔ̃ mɔ kpo hã lo, we be na, ngawi 'da a ma yula 'da Gale ni.

¹² Nɛ Yezu ɔmɔ hɛ̃ɛ do 'bako kɔ sila a, nɛ a tɔ̃ hã wa na: “Gulu kɛ winɔ kikina gɛ, wa aka tɛ mɛ we gba sɔ̃ mɔ iko ni we ge nde? Mi tɔ̃ hã nɛ do gbãlã we na, mi dɛ́ sɛ gba sɔ̃ mɔ kpo hã wa gɔ.”

¹³ Nɛ a la wa dɛ di ni, nɛ wa do owi yambala mɛnɔ 'da a, wa kũ kɔ ga, nɛ wa la dɛ kulu gba ndɔɛ i.

Bia we 'da Fariziɛnɔ ma ɔ nɛ ina hana mapa ni

¹⁴ Wa tɛ la do ga 'da wa ni, nɛ owi yambala mɛnɔ 'da Yezu wa zɔa na, tɛ lo ila ngɔ nyɔngɔmɛnɔ do'do, nɛ lo tati a do gbãlã mapa kpo iko.

¹⁵ Nɛ Yezu tɔ̃a hã wa na: “Li nɛ sɔ̃́ tɛ ina hana mapa 'da Fariziɛnɔ, do kɛ 'da Herodɛ!”

¹⁶ Nɛ owi yambala mɛnɔ wa ma ngɔ tɔ̃ dɛ sanga wa na: “A tɔ̃ ní we kɛ lɛ kàlà mapa gɔ.”

¹⁷ Nɛ Yezu zila kɛ wa tɛ tɔ̃ nɛ ni, nɛ a aka wa na: “Gulu kɛ nɛ lengge na, mi tɔ̃a ní we kɛ lɛ zɔlɔ mapa ni we ge nde? Nɛ tɛ ĩ̀ gulu nɛ gɔ nde? Zu nɛ tɛ bà ma gɔ nde? Gbãlã zã nɛ bina nde?

¹⁸ Gbali nɛ boe, kɔ nɛ zɔ́ mɔ gɔ we ge nde? Zala nɛ boe, kɔ nɛ zélé we gɔ we ge nde? Tɛ zu nɛ ila ngɔ mɛ kɛ zi mi dɛa ni do'do nde?

¹⁹ Mi gbini zi sanga mapa mɔlɔ we winɔ kote mɔlɛ ni, nɛ nɛ ngɛmɛ zi tala kɛ 'bana ni, nɛ ma dunu zi sanggi nɛ nde?” Nɛ wa gese na: “Ma dunu zi sanggi 'bu ngɔ nɛ bɔa.”

²⁰ Nɛ a aka 'bɔ wa na: “Nɛ ngba soe kɛ mi gbini sanga mapa sambo we duzu winɔ kote nalɛ ni, nɛ nɛ ngɛmɛ zi tala kɛ 'bana ni, nɛ ma dunu zi 'bɔ sanggi nɛ nde?” Nɛ wa gese 'bɔ na: “Ma dunu zi sanggi sambo.”

²¹ Nɛ Yezu tɔ̃ hã wa na: “Kɔ nɛ tɛ kpà gulu nɛ gɔ nde?”

Yezu kpasa wi tandu tɛ Bɛtsaida

²² Yezu do owi yambala mɛnɔ 'da a, wa hɔa tɛ Bɛtsaida, nɛ Owele wa tɛa do mbe wi tandu kpo hã a. Nɛ wa ala nu wa hã a na, a 'bé tɛ wi tandui, takɔ a kpasa.

²³ Nɛ Yezu 'bia nu kɔ̃ a, nɛ wa hɔ do a dɛ 'do ngba le. Nɛ Yezu dɛ sã nu ɛ, nɛ a ndɔ ma dɛ ngɔ gbali wi ni, nɛ a aka a na: “Mɔ zɔ mɔ zɔa nde?”

²⁴ Nɛ wi tandui tɔ̃ hã a na: “Mi zɔ mɔ zɔa kpaa, nɛ nde mi zɔ owinɔ ɔ nɛ te kɛ ma la la ni iko.”

²⁵ Nɛ Yezu e 'bɔ kɔ̃ ɛ ngɔ li a, nɛ 'do nɛ, nɛ wi ni ka mɔ ni gbaa, nɛ li a gɛ̃lɛ̃, nɛ a ma ngɔ zɔ mɔ do dia nɛ.

²⁶ Nɛ Yezu tɔ̃ hã a na: “Mɔ sí ndĩi dɛ kɔ le 'da mɔ, nɛ mɔ tɛ ɛ́lɛ́ 'bɔ kɔ le gɛ gɔ.”

Petro tɔ̃a na Yezu a Mɛsiya

²⁷ 'Do nɛ, nɛ Yezu do owi yambala mɛnɔ 'da a, wa la si kɔ lenɔ kɛ zã le Sezare Filipɛ. Kɔ wa ma ngɔ nɛ nɛ ni, nɛ a aka wa na: “Winɔ wa tɔ̃ ngboo na, mi a wio nde?”

²⁸ Nɛ wa gese hã a na: “Ombe winɔ wa tɔ̃ na, mɔ a Yoanɛ wi batisa winɔ. Nɛ ombe wa na, mɔ a Elia. Nɛ ombe 'bɔ na, mɔ a mbe sanga Owi gba olo nu Gale zɛ́ dati gɛ.”

²⁹ Nɛ Yezu aka 'bɔ wa na: “Ní a nɛ ngboo ni, nɛ lengge mɛ na, mi a wio nde?” Nɛ Petro gese na: “Mɔ a Mɛsiya kɛ Gale tumba mɔ gɛ!”

³⁰ Nɛ Yezu bɛ̃a hã wa nganda wena na, wa tɛ tɔ̃̀ we nɛ hã wele gɔ.

Yezu tɔ̃a we fie do za'da nza kɔ fie 'da a

³¹ Nɛ 'do nɛ, nɛ Yezu ma ngɔ tɔ̃ hã owi yambala mɛnɔ 'da a na: “Ma wia na, mi Be 'da Wele, mi kpa sɛ zɛlɛ tɛ wena. Okumunɔ, do onwa nganganɔ, do Owi be mbulanɔ, wa bɛ̃ sɛ gɛnɛ mi, nɛ wa gbɛ sɛ mi. Kɔ ma hɔ tɛ talɛ tũi, nɛ mi za'da sɛ nza kɔ fio.”

³² Yezu tɔ̃a wenɔ ni dɛ zala winɔ vɛ̃. Kɔ a nɛa we fi nu a nù, nɛ Petro sa mɔ hã a dɛ nu ngbaka, nɛ a ma ngɔ dãlã dɛ tɛ̃ a we wenɔ a tɔ̃a ni.

³³ Nɛ Yezu siki tɛ̃ ɛ dɛ 'da Owi yambala mɛnɔ nga, nɛ a ka mɔ tɛ wa, nɛ a dãlã dɛ tɛ Petro na: “Fó tɛ mɔ do'do, Satana! We kɛ linggamɔ zu mɔ mɛ a linggamɛ 'da Gale gɔ, mɛ a linggamɔ mɔ wele iko.”

³⁴ Nɛ Yezu sa mɔ hã gba gili winɔ do Owi yambala mɛnɔ 'da a, nɛ a tɔ̃ hã wa na: “Fala kɛ wele kɔ̃ we hɔ wi 'da mi, nɛ ma wia na, a bɛ̃ gɛnɛ kili tɛ̃ a wele nɛ, nɛ a ba tole finda te 'da a, nɛ a tɛ 'do mi.

³⁵ Mba gɔ, wi kɛ a fa we kpasa kili tɛ̃ a, nɛ a fe sɛ. Nɛ wi kɛ a la kili tɛ̃ a na, ma fe we mi, do we Dia Sakoe ni, nɛ a kpasa sɛ.

³⁶ “Mba gɔ, mɔ olo kɛ na wele yɔ kpasi kɛ ma é gɔ ni, takɔ a ba nùi gɛ vɛ̃ do mɔ a ni a ge nde?

³⁷ Mɛ kɛ wele wia we gɔnɔ do zu kpasi 'da ɛ ni a ge nde?

³⁸ Fala kɛ sape ba li wele we mi, tabi we we olo nu mi sanga o'dã winɔ kikina gɛ, kɛ wa kɔ̃̀ 'bɔ gɛnɛ Gale gɔɛ ni, nɛ 'da fala kɛ mi Be 'da Wele, mi tɛ sɛ do dɔ̃lɔ̃ li 'da Baa mi, fala nɛ kpo do oanzɛ santonɔ ni, nɛ sape ma ba sɛ tɛ mɛ 'bɔ li mi we wi ni.”