MARKO 7 - WE NU GALE 1995

Ofariziɛnɔ do wi be mbulanɔ wa a wi ɔlɔ wi

¹ Mbe ngba soe kpo, nɛ Ofariziɛnɔ do owi be mbulanɔ kɛ wa yula Yeruzalɛmɛ i ni, wa mba li ngba wa dɛ kɛ zã Yezu.

^2-3 Nɛ wa zɔ ombe wi yambala mɛnɔ 'da Yezu tɛ nyɔngɔ mɔ, nɛ nde wa fɔlɔ kɔ̃ wa ɔ nɛ kɛ mbula olo oyaa wa bia ma ni gɔ. (Mba gɔ, Ofariziɛnɔ do Oyudanɔ vɛ̃, wa dɔnggɔ mbula olo yaa wa wena. Wa nyɔ́ngɔ́ mɔ iko gɔ. Wa nɛ nyɔngɔ mɔ, nɛ wa fɔlɔ kɔ wa dati sɛ nɛ de.

⁴ 'Da fala kɛ wa yolo zando, kɔ wa si, nɛ wa fɔlɔ kɔ wa do'do, sɛ nɛ wa nyɔngɔ mɔ de. Nɛ wa dɛ zi 'bɔ mbe ogele mbula olo oyaa wa wena, ɔ nɛ tɛlɛ tɛ kɛ wa fɔlɔ do bilanɔ, do kpana lìnɔ, do osasonɔ ni.)

⁵ Nɛ Ofariziɛnɔ do owi be mbulanɔ wa aka Yezu na: “Gulu kɛ owi yambala mɛnɔ 'da mɔ wa dɛ́ mbula 'da oyaa lɛ gɔ we ge nde? Gulu kɛ wa nɛ nyɔngɔ mɔ, nɛ nde wa fɔ́lɔ́ kɔ wa ɔ nɛ kɛ mbula 'da oyaa lɛ tɔ̃a ni gɔ we ge nde?”

⁶ Nɛ Yezu gisa hã wa na: “Nɛ, owi ɔlɔ winɔ gɛ, Ezai tɔ̃a zɛ́ we ngɔ nɛ do gbãlã we. A kɔma olo nu Gale na: ‘Winɔ gɛ wa dɔnggɔ mi do nu wa iko, nɛ nde sila wa ngɔ mi bina.

⁷ Dɔngga wi wa dɔnggɔ do mi gɛ, ma yala iko, we duzu kɛ mbulanɔ wa be ma ni, mɛ a kɛ Owele wa ia ni iko, nɛ wa tɔ̃ na, mɛ a mbulanɔ 'da mi Gale.’ ”

⁸ Nɛ Yezu tɔ̃ hã wa na: “Nɛ la mbulanɔ 'da Gale do 'do nɛ, nɛ nɛ dɔnggɔ ombula kɛ wele ia ma ni.”

⁹ Nɛ Yezu tɔ̃ 'bɔ hã wa na: “Nɛ bɛ̃a mbula 'da Gale, takɔ nɛ dɛ mbula olo oyaa nɛ.

¹⁰ Mɔizɛ tɔ̃a zɛ́ na: ‘Mɔ dɔ́nggɔ́ baa mɔ do naa mɔ.’ Nɛ a tɔ̃ 'bɔ na: ‘Kɔ fala kɛ wele tɔ̃ 'dã nu we hã baa a, tabi hã naa a nde, nɛ ma wia na, wa gbɛ wi ni do'do.’

¹¹ Kɔ nɛ, nɛ tɛ be hã winɔ na, fala kɛ wele tɔ̃ hã baa a tabi hã naa a na: ‘Mɛ sɔ mi wia we gala do nɛ ni, ma hɔa Kɔrbanɛ’, (gulu nɛ na, mi ia ma hã Gale),

¹² na mɛ ni, nɛ ba wala hã wi ni na, a tɛ gàlà 'bɔ baa a tabi naa a gɔ.

¹³ Nɛ dɛ na mɛ ni, nɛ nde nɛ 'danga we nu Gale we dɛ tati a mbulanɔ 'da nɛ iko. Nɛ nɛ dɛ tɛlɛ tɛ mɛnɔ ɔ ní ni wena.”

Mɛnɔ kɛ ma wia we 'danga wele ni

¹⁴ Nɛ 'do nɛ, nɛ Yezu sa 'bɔ mɔ hã winɔ, nɛ a tɔ̃ hã wa na: “Nɛ vɛ̃, nɛ zélé mi sɛ! Nɛ ĩ́ na,

¹⁵ mɔ kɛ wele nyɔngɔ, nɛ ma le dɛ kɔ zã a ni, ma wè tɛ 'danga kɔ sila a gɔ. Nɛ nde mɛ a linggamɔ kɔ zã wele kɛ ma hɔ do nu a ni, sɛ nɛ ma 'danga sila a de. [

¹⁶ Kɔ mi tɔ̃ hã nɛ na, wi kɛ zala a boe, nɛ a zélé!”]

¹⁷ Nɛ 'da fala ni, nɛ Yezu la winɔ dɛ di ni, nɛ a le kɔ tɔa, nɛ owi yambala mɛnɔ 'da a wa le 'dɔkɔlɔ a, nɛ wa aka a we gulu gba we ni.

¹⁸ Nɛ a tɔ̃ hã wa na: “Nɛ tɛ mɛ 'bɔ, nɛ ĩ̀ gulu wenɔ mi tɔ̃a ni gɔ nde? Nɛ ĩ̀ na, mɔ kɛ ma le kɔ nu wele, nɛ ma la dɛ kɔ zã a, ma wè tɛ 'danga sila a gɔ.

¹⁹ We duzu kɛ ma lé kɔ sila a gɔ, nɛ nde ma le kɔ zã a iko, nɛ 'do nɛ, nɛ a sɔ̃ ma.” (Do gba we ni, Yezu kɔ̃a zi we be hã wa na, wele wia we nyɔngɔ mɛnɔ vɛ̃.)

²⁰ Nɛ a tɔ̃ 'bɔ na: “Linggamɔ kɔ zã wele, kɛ ma hɔ do nu a ni, sɛ nɛ ma 'danga sila a de.

²¹ Mba gɔ, 'dã linggamɔ yolo kɔ zã wele, sɛ nɛ ma tombo a we yɛnggɛ vĩ zu yɛli, zũ mɔ, gbɛ wele,

²² ɔ do kɛnɛ ngba a tabi wili mɔ́ ngba a, dɛ nga'ba kpamɔ mɔ́ wele, dɛ 'dã mɔ, ɔlɔ wele, dɛ vĩ zu dɛa mɔ, dɛ bɔnɛ hã wele, dã dɛla, dɛ gã zu, do dɛ yia dɛa mɔ de.

²³ 'Dã dɛa mɛnɔ gɛ vɛ̃, ma yolo kɔ zã wele, sɛ nɛ ma 'danga sila a de.”

Mbe wuko kɛ a a Yuda gɔ ni tɛa 'da Yezu

²⁴ Nɛ Yezu yula di ni, nɛ a la dɛ kɛ zã le Tirɛ. Nɛ a le kɔ mbe tɔa kpo, nɛ a kɔ̃̀ zi na Owele wa ĩ fala ɛ gɔ. Gɛnɛ kɔ na mɛ ni, nɛ nde a wè tɛ usu tɛ̃ a gbaa gɔ.

²⁵ Nɛ mbe wuko kpo, boko be 'da a do 'dã hi wi kɔ ɛ, a zila sakoe 'da Yezu, nɛ a wɛlɛ tɛ̃ a dɛ 'da a i, nɛ a gu nù ti a. Nɛ a ala nu a hã Yezu na, a fó 'dã hi wi ni kɔ boko be 'da ɛ.

²⁶ Wuke ni zi a be Yuda gɔ, a a boko Fenisi, tɛ ngɔ nù Siri.

²⁷ Nɛ Yezu gisa hã a na: “E kɔ benɔ wa nyɔ́ngɔ́ mɔ dati, kɔ zã wa hɛ̃ sɛ. Mba gɔ, ma wè na, wele ba nyɔngɔmɔ mɔ́ be, nɛ a hã ma hã otolo gɔ.”

²⁸ Nɛ wuke gese hã a na: “Nwa, mɛ a gbãlã we. Gɛnɛ kɔ na mɛ ni, nɛ nde otolonɔ wa wia tɛ nyɔngɔ bi 'bulu kɛnɔ ma ala kɔ̃ benɔ ni.”

²⁹ Nɛ Yezu gese hã a na: “We duzu dia gisa we 'da mɔ, mɔ sí do dia nɛ. We kɛ 'dã hi wi hɔa nza kɔ be 'da mɔ ia.”

³⁰ Nɛ wuke si, nɛ a kpa be 'da a tɛ ɔ nù ngɔ mɔ ɔi, nɛ nde 'dã hi wi hɔa nza kɔ a ia.

Yezu kpasa wi la zala

³¹ Nɛ Yezu yolo 'bɔ tɛ ngɔ nùi kɛ zã le Tirɛ, nɛ a la dɛ kɔ le Sidoni. Nɛ a sa'ba do ngɔ nùi kɛ li nɛ a Lenɔ 'Bu ni gbaa, nɛ a hɔ nu gba ndɔ Galile.

³² Kɔ a nɛa we hɔ i mɔ, nɛ wa tɛ do wi la zala, kɛ a wélé we do dia nɛ gɔ ni. Nɛ wa ala nu wa hã Yezu na, a é kɔ̃ a ngɔ wi ni, kɔ a kpasa.

³³ Nɛ Yezu ba wi ni, nɛ wa ngbɔ do a sanga owinɔ dɛ gele fala, nɛ a yulu kɔ̃ a kɔ zala wi ni, nɛ a tufu sã nu a, nɛ a ndɔ ngɔ lɛfɛ a.

³⁴ 'Do nɛ, nɛ Yezu kala li ɛ dɛ ngɔ, nɛ a ɔmɔ hɛ̃ɛ do 'bako kɔ sila a, nɛ a tɔ̃ hã wi ni na: “Efata!” (Gulu nɛ na: “Mɔ fĩ́!”)

³⁵ Nɛ zala wi ni fĩ do ti, nɛ lɛfɛ a kanya, nɛ a ma ngɔ wele we do dia nɛ.

³⁶ Nɛ 'do nɛ, nɛ Yezu dala nu ɛ hã winɔ na, wa tɛ tɔ̃̀ we nɛ hã wele gɔ. Nɛ nde gɛnɛ kɔ a dala nu a hã wa wena ni, nɛ wa yɛ'ba we nɛ dɛ dati fai.

³⁷ Nɛ owinɔ vɛ̃ kɛ wa zɔa mɛ ni, wa ɔngba nɛ wena, nɛ wa tɔ̃ na: “Kɛnɔ vɛ̃ a dɛ ma gɛ, ma de wena! A kpasa owi la zala, nɛ wa zele mɔ. Nɛ a kpasa owinɔ kɛ wa wélé we gɔ ni, nɛ wa wele we.”