MARKO 6 - WE NU GALE 1995

Owi Nazarɛtɛ wa kɔ̃̀ gɛnɛ Yezu gɔ

¹ Nɛ Yezu kulu ngɔ di ni fala nɛ kpo do owi yambala mɛnɔ 'da a, nɛ wa la dɛ kɔ le kɛ a gã zi nɛ ni.

² Nɛ do tũ ɔmɔ tɛ wi, nɛ a ma ngɔ be we nu Gale kɔ tɔa mbula. Nɛ gba gili winɔ wa zila bia we 'da a ni, wa ɔngbɔ do ma wena. Nɛ wa ma ngɔ tɔ̃ na: “A kpa hã zã ki ni do nde? A kpa ngawi dɛ gba sɔ̃ mɛnɔ gɛ do nde?

³ Wi kabinda zi dɛ gɛ a ni gɔ nde? Li naa a Maria, nɛ li onya a a Zake do Yoze do Yudasi do Simɔ gɔ nde? Oboko nya a wa a wa ɔ́ dɛ sanga lɛ gɛ gɔ nde?” Nɛ wa ba kafi nu a, nɛ wa kɔ̃̀ gɛnɛ a gɔ.

⁴ Nɛ Yezu tɔ̃ hã wa na: “Wa kɔ̃ gɛnɛ wi gba olo nu Gale do gele fala. Kɔ a hɔ kɔ le 'da a, do kɔ nu fɛlɛ kula 'da a ngboo ni, nɛ nde wa kɔ̃́ gɛnɛ a gɔ.”

⁵ Nɛ Yezu dɛ zi gba sɔ̃ mɔ di ni ngboo gɔ. Tati a kɛ na, a ia kɔ̃ a ngɔ mbe owi zɛlɛnɔ, nɛ wa kpasa ni.

⁶ Kɔ a nɛa we zɔ na, wa do kɔ̃a we dɛ 'da ɛ bina ni, nɛ a ɔngbɔ wena. 'Do nɛ, nɛ Yezu la we be we nu Gale tɛ kɔ lenɔ vɛ̃ kɛ zã Nazarɛtɛ ni.

Yezu tumba owi yambala mɛnɔ 'da a bɔa bɔa

⁷ Nɛ a sa mɔ hã owi yambala mɛnɔ 'da a 'bu ngɔ wa bɔa ni, nɛ a ma ngɔ tombo wa bɔa bɔa, nɛ a hã ngawi we fo o'dã hi wi kɔ Owele hã wa.

^8-9 A nɛa we tombo wa, nɛ a tɔ̃ hã wa na: “Nɛ tɛ bà mɔ kpo dɛ kɔ̃ nɛ we nɛ do gɛnɛ gɔ. Nɛ tɛ kàlà nyɔngɔmɔ gɔ. Nɛ tɛ bà koe gɔ. Nɛ tɛ kàlà mbili dɛ kɔ koe tɛ nɛ gɔ. Nɛ nɛ tɛ kàlà tulu ngɔ bɔa gɔ. Nɛ hé'dé mɔ nyanga wi, nɛ nɛ ba dɔndɔlɔ dɛ kɔ̃ nɛ iko.”

¹⁰ Nɛ a tɔ̃ 'bɔ hã wa na: “Fala kɛ nɛ hɔ tɛ kɔ le kpo, nɛ nɛ ɔ́ dɛ kɔ tɔa kɛ wa ia hã nɛ ni gbaa, nɛ nɛ la do le ni.

¹¹ Kɔ fala kɛ owinɔ kɔ le ni, wa bɛ̃ we hã fala hã nɛ, tabi wa kɔ̃̀ we zele we nu nɛ gɔ nde, nɛ nɛ lá le ni do'do, nɛ nɛ fɛ́lɛ́ nù tambala nyanga nɛ hã wa, we be na, wa dɛ̃ de gɔ.”

¹² Nɛ owi yambala mɛnɔ wa la, nɛ wa ma ngɔ be we olo nu Gale hã winɔ na, wa kifi sila wa.

¹³ Nɛ wa fua o'dã hi wi kɔ winɔ, nɛ wa kɔa nɔ tɛ gba gili owi zɛlɛ, nɛ wa kpasa.

Fie 'da Yoanɛ wi batisa winɔ

¹⁴ Do 'da fala ni, nɛ nwa Herodɛ zila wenɔ kɛ winɔ wa tɔ̃ ngɔ Yezu ni, we kɛ sako li a dɔ̃lã zi falanɔ vɛ̃. Nɛ mbe winɔ wa tɔ̃ na: “Aa Yoanɛ wi batisa winɔ, kɔ a za'da nza kɔ fio, ma kɛ a kpa ngawi we dɛ gba sɔ̃ mɛnɔ gɛ!”

¹⁵ Nɛ ombe nɛ wa tɔ̃ 'bɔ na: “Wi a Elia.” Nɛ ombe wa na: “A a mbe sanga owi gba olo nu Gale zɛ́ dati gɛ.”

¹⁶ Kɔ Herodɛ nɛa we zele na mɛ ni, nɛ a na: “Wi a Yoanɛ wi batisa winɔ, wele kɛ mi ba zi nu mi na, wa 'bili gɛlɛ a ni, kɔ ma kɛ a za'da nza kɔ fie gɛ!”

^17-18 Ĩ na zi dati, nɛ Herodɛ ba Herodiadɛ, wuke 'da kpasa wi ti a Filipɛ kɔ̃ a do kɛnɛ ɛ. Nɛ Yoanɛ tɔ̃ hã Herodɛ na: “Mɔ wè do ba kɛnɛ nya mɔ gɔ.” Kɔ Herodɛ nɛa we zele ní, nɛ a hã nu a na, wa ba Yoanɛ. Nɛ wa ba a, nɛ wa ɛnzɛ a, nɛ wa fi a bɔlɔkɔ.

¹⁹ Nɛ Herodiadɛ ba mãlã Yoanɛ dɛ zã a, nɛ a fa we gbɛ a, nɛ nde ma wè zi gɔ.

²⁰ Mba gɔ, Herodɛ dɛ zi kili Yoanɛ wena. Nɛ a fɔmɔ a, we duzu kɛ a ĩ na, Yoanɛ a a wi bɔlɔ zu, nɛ a a wi 'da Gale ngboo. Nɛ nde 'da falanɔ vɛ̃ kɛ Herodɛ zele zi wenɔ Yoanɛ be ni, nɛ ma ia sila a ngɔ wena. Gɛnɛ kɔ na mɛ ni, nɛ nde Herodɛ dɛ zi yangga wena we zele Yoanɛ.

²¹ Nɛ do ngba soe wa dɛa mɔ dɔ we tũ kula 'da Herodɛ ni, nɛ Herodiadɛ kpa zi dia fala we dɛ mɛ kɛ a lingga zi we dɛ nɛ ni. Herodɛ sa zi mɔ hã ogã wi kɔ lenɔ, do ogã wi ngɔ sodanɔ, do ogã winɔ vɛ̃ tɛ ngɔ nù Galile ni, takɔ wa tɛ we nyɔngɔ mɔ 'da a nga.

²² Nɛ boko be 'da Herodiadɛ le kɔ tɔa wa dungu nɛ ni, nɛ a yɔ yɔla hã wa. Nɛ yɔla ni de tɛ Herodɛ do owinɔ kɛ a sa mɔ hã wa ni wena. Nɛ Herodɛ tɔ̃ hã boko be ni na: “Mɔ gɔ́ mɔ kɛ mɔ kɔ̃a ni, nɛ mi hã sɛ hã mɔ.”

²³ Nɛ a kana tɛ̃ a na: “Mɛnɔ vɛ̃ mɔ nɛ gɔ kɔ̃ mi ni, mi hã sɛ ma hã mɔ. Gɛnɛ kɔ mɔ gɔ mbe tɛ nùi 'da mi, nɛ mi gɔnɔ sɛ sanga nɛ bɔa, nɛ mi hã sɛ mbee nɛ hã mɔ.”

²⁴ Nɛ boko be ni hɔa nza, nɛ a nɛ, nɛ a tɔ̃ we nɛ hã naa a na: “Mɛ mi nɛ gɔ ma ni a ge nde?” Nɛ naa a gese hã a na: “Mɔ gɔ́ kpongbolo zu Yoanɛ wi batisa winɔ.”

²⁵ Nɛ boko be ni kpula tɛ̃ ɛ do gbɛnga tɛ̃ 'da nwa i, nɛ a tɔ̃ hã a na: “Mi kɔ̃a na, mɔ hã kpongbolo zu Yoanɛ wi batisa winɔ, dɛ kɔ kpangbala sani hã mi di dɔ́ gɛ!”

²⁶ Kɔ Herodɛ nɛa we zele ní, nɛ 'bako ba li a wena. Nɛ nde a wè 'bɔ tɛ bɛ̃ ma gɔ, we duzu kɛ a kana sɔ tɛ̃ a dɛ li ongba a ia.

²⁷ Nɛ a tumba mbe soda wi zɔ mɔ tɛ nu tɔa 'da a do ti na, a nɛ́, kɔ a 'bílí gɛlɛ Yoanɛ, kɔ a tɛ́ do ma. Nɛ soda ni nɛa, nɛ a le kɔ tɔa bɔlɔkɔ i, nɛ a ba Yoanɛ, nɛ a 'bili gɛlɛ a.

²⁸ Nɛ a e zu a kɔ kpangbala sani, nɛ a hã ma hã boko be ni, nɛ boko be la do ma hã naa ɛ.

²⁹ Kɔ owi yambala mɛnɔ 'da Yoanɛ, wa nɛa we zele we fie 'da a ni, nɛ wa tɛa, nɛ wa ba wɔlɔ a, nɛ wa mi ma.

Yezu hã nyɔngɔmɔ hã Owele koto mɔlɔ

³⁰ Nɛ owi nɛ tonɔ 'da Yezu kɛ a tumba zi wa ni, wa si, nɛ wa tɔ̃ sako mɛnɔ wa dɛa, do bia wenɔ wa bia i mɔ ni hã a.

³¹ Nɛ nde 'da fala ni, Owele wa dɔ zi wena. Mbe nɛ wa tɛ tɛ nɛ, nɛ mbe nɛ wa tɛ si nɛ. Nɛ fala do kɛ na Yezu do owi yambala mɛnɔ 'da a, wa dungu mbe nù we nyɔngɔ mɔ ni bina. Nɛ a zɔ mɔ ni gbaa, nɛ a tɔ̃ hã wa na: “Nɛ tɛ́, kɔ lɛ nɛ́ tɛ mbe fala kɛ wele tɛ nɛ bina ni, takɔ nɛ ɔmɔ mbe tɛ nɛ sɛ.”

³² Nɛ wa kũ kɔ ga tati a wa, takɔ wa la tɛ fala kɛ wa wè tɛ kpa Owele gɔ ni.

³³ Nɛ nde Owele wena wa zɔa wa tɛ la nɛ, nɛ wa ĩ zi na, wi a Yezu do owi yambala mɛnɔ 'da a. Nɛ gba gili winɔ wa yula kɔ lenɔ tɛ̃ ɛ do tɛ̃ ɛ ni, wa wɛlɛ tɛ wa tɛ gɔnɔ do zu wa do ngu'du gba ndɔɛ do nyanga wa ni gbaa, nɛ wa hɔ i mɔ dati hã Yezu do Owi yambala mɛnɔ 'da a.

³⁴ Kɔ Yezu nɛa we zĩlĩ kɔ ga ni, nɛ a zɔ gba gili winɔ ni, nɛ 'bako ba li a dɛ tɛ wa wena, we duzu kɛ wa ɔ nɛ gili bata kɛ fo wi fɔmɔ wa bina ni. Nɛ a ma ngɔ be we nu Gale kpi do kpi hã wa.

³⁵ Nɛ Yezu bia we gbaa, nɛ wese gɛ̃a, nɛ owi yambala mɛnɔ wa tɛa, nɛ wa tɔ̃ hã a na:

³⁶ “Wese gɛ̃a ia, nɛ fo tɔa dɛ bina. Kɔ mɔ gésé owinɔ, kɔ wa la 'da owinɔ ngɔ fɔnɔ do kɔ lenɔ i, hã wa oso nyɔngɔmɔ, hã wa nyɔngɔ.”

³⁷ Nɛ Yezu gese hã wa na: “Nɛ do tɛ nɛ, nɛ ha nyɔngɔmɔ hã wa!” Nɛ wa aka a na: “Ní a mɔ kɔ̃a na lɛ nɛ, hã lɛ oso mapa olo mbili kama bɔa, takɔ lɛ hã ma hã wa nde?”

³⁸ Nɛ Yezu aka 'bɔ wa na: “Nɛ do mapa nɛ nde? Nɛ nɛ́, kɔ nɛ zɔ sɛ!” Nɛ wa nɛa we zɔ nɛ, nɛ wa tɔ̃ hã a na: “Lɛ do gbãlã mapa mɔlɔ do kɔyɔ bɔa.”

³⁹ Nɛ Yezu tombo wa we tɔ̃ hã winɔ na, wa dúngú nù dɛ ngɔ wɔkɔsɔnɔ, ngɔ gili do ngɔ gili.

⁴⁰ Nɛ winɔ wa dungu nù. Gili ombe kama kpo, nɛ gili ombe 'bu wa mɔlɔ, ni do ni.

⁴¹ Nɛ Yezu kala mapanɔ mɔlɛ, do kɔyɔnɔ bɔa ni dɛ kɔ̃ ɛ, nɛ a ba li a ngɔ, nɛ a sambala Gale, nɛ a gbini sanga mapa, nɛ a hã ma hã owi yambala mɛnɔ na, wa kɛ dɛ kɔ̃ owinɔ. Nɛ a kɛ̃ 'bɔ kɔyɔnɔ bɔa ni hã owinɔ vɛ̃.

⁴² Nɛ wa vɛ̃ wa nyɔnga, nɛ zã wa hɛ̃a.

⁴³ Nɛ owi yambala mɛnɔ wa ngɛma tala mapanɔ do kɔyɔnɔ ni, nɛ ma dunu sanggi 'bu ngɔ nɛ bɔa.

⁴⁴ Ĩ na, owinɔ vɛ̃ kɛ wa nyɔngɔ mɛ ni, wa zi a owi wili koto mɔlɔ.

Yezu la ngɔ lì do nyanga ɛ

⁴⁵ Dɔ̃ 'do ki ni, nɛ Yezu tɔ̃ hã owi yambala mɛnɔ 'da a na, wa kũ kɔ ga, kɔ wa la dɛ Bɛtsaida i, hã wa 'bɔ 'dɛ ɛ di ni. Nɛ a 'bana we gese winɔ.

⁴⁶ Owinɔ wa si do'do, nɛ a kũ mbe kala kpo we wele we nu ngba a do Gale.

⁴⁷ Kɔ fala ma ngɔ dɛ mbĩi, nɛ nde owi yambala mɛnɔ wa kɔ ga tɛ gbogbo lì i, nɛ Yezu tɛ nu kolo lì nga zu ɛ kpo.

⁴⁸ Nɛ a nɛa we ka mɔ, nɛ a zɔ owi yambala mɛnɔ 'da a, nɛ nde lu ga ba tɛ wa wena, we duzu kɛ bũ tɛ zi dɛ ngu'du wa nga nganda wena. Kɔ kuti kɔlanɔ wa nɛa we he mɔ, nɛ Yezu la do nyanga ɛ do ngɔ lì we nɛ dɛ 'da wa i. A kpa wa, nɛ a gba wa dɛ̃ɛ.

⁴⁹ Kɔ wa nɛa we zɔ a tɛ la do ngɔ lì, nɛ wa lengge na mɛ a bɔzɔ wi, nɛ wa ma ngɔ he mɔ.

⁵⁰ Mba gɔ, wa vɛ̃ wa zɔa a, nɛ kili ba wa wena. Nɛ do ti, nɛ Yezu tɔ̃ hã wa na: “Nɛ kpã́lã́ sila nɛ, nɛ te dɛ̀ kili gɔ, wi a mi!”

⁵¹ Nɛ Yezu kũ dɛ 'da wa kɔ ga i, nɛ ngɔ tɛ bũi gɛ̃a. Nɛ Owi yambala mɛnɔ wa ɔngba do ma wena,

⁵² We kɛ wa ĩ̀ zi gulu gba sɔ̃ mɛ kɛ Yezu dɛa ma do mapa ni gɔ. Ma nɛa ngɔ hã zã 'da wa do'do.

Yezu hɔa ngɔ nù Genezarɛtɛ

⁵³ Nɛ wa kù gba ndɔɛ, nɛ wa hɔ ngɔ nù Genezarɛtɛ, nɛ wa kpo ga 'da wa tɛ nu lì.

⁵⁴ Wa nɛa we hɔ nza, nɛ owinɔ fala ni wa ĩ ti Yezu.

⁵⁵ Nɛ winɔ ni wa wɛlɛ tɛ wa tɛ kɔ lenɔ vɛ̃, we kala wi zɛlɛnɔ 'da wa we tɛ do wa hã Yezu. Wa nɛa, nɛ wa kala Owi zɛlɛnɔ dɛ ngɔ omɔ ɔi, nɛ wa tɛ do wa dɛ kɔ le kɛ wa zila na, Yezu kɔ nɛ ni.

⁵⁶ Nɛ falanɔ vɛ̃ kɛ Yezu yɛngga zi tɛ nɛ, tabi gã lenɔ tabi be lenɔ, tabi ngɔ fɔnɔ i, nɛ winɔ wa tɛ tɛ do Owi zɛlɛ, nɛ wa a wa dɛ kɛ zã wala. Nɛ wa ma ngɔ ala nu wa hã a na, a e lo, kɔ lo 'be mbamba nu tulu tɛ̃ a iko, kɔ lo kpasa. Nɛ wi zɛlɛnɔ vɛ̃ kɛ wa 'bia zi nu tulu tɛ̃ a ni, wa kpasa.