MARKO 5 - WE NU GALE 1995

Yezu kpasa wi 'dã hi wi

¹ Wa kũ dɛ kulu gba ndɔ Galile i, nɛ wa hɔ ngɔ nùi 'da Ogeraze.

² Kɔ Yezu nɛa we zĩlĩ kɔ ga, nɛ a kpa ngba a do mbe wele kpo kɛ a yula ngɔ mabi'donggo.

³ Wi ni zi do 'dã hi wi kɔ a, nɛ a ɔ do ngɔ mabi'donggo. Wele wè tɛ ba a, nɛ a ɛnzɛ a do dɔkpɔ gɔ.

⁴ Wa yamba zi we ɛnzɛ nyanga a do kɔ̃ a do dɔkpɔ fala dɛlɛ wena, nɛ nde a gɔnɔ ma gɔna fai, nɛ wele kpo wè zi do nɛ ngɔ a do ngawi gɔ.

⁵ Nɛ 'da falanɔ vɛ̃, wese do tũ, a tɛ yɛnggɛ do ngɔ zununɔ do ngɔ kalanɔ, tɛ he mɔ nganda wena, nɛ a tɛ 'bili tɛ̃ a do tɔ̃a nu tanɔ.

⁶ Kɔ a nɛa we zɔ Yezu ndũu, nɛ a wɛlɛ tɛ̃ a dɛ dati Yezu, nɛ a gu gba zugolo ti a.

⁷ Nɛ a he mɔ do nga gɛlɛ na: “Yezu be 'da Gale, kɛ a nɛa ngɔ mɔ vɛ̃, mɔ nɛ dɛ do mi nɛ nde? Mi ala nu mi hã mɔ do zu li Gale na, mɔ tɛ ha zɛlɛ tɛ hã mi gɔ!”

⁸ (A tɔ̃a na mɛ ni, we duzu kɛ Yezu tɔ̃a sɔ hã a na: “'Dã hi wi, mɔ hɔ́ nza kɔ wi gɛ do'do!”)

⁹ Nɛ Yezu aka a na: “Li mɔ a ge nde?” Nɛ a gese na: “Li mi a Gbagili, we kɛ lɛ dɛlɛ wena.”

¹⁰ Nɛ a ala nu a nganda wena na, da dɛ kɔ Yezu fó o'dã hi winɔ ni ngɔ nùi ni gɔ.

¹¹ Mɛ ni nɛ nde gba gili ongulu wa zi tɛ nyɔngɔ mɔ ngɔ kala ni.

¹² Nɛ o'dã hi winɔ ni wa tɔ̃ hã Yezu na: “Mɔ tómbó lɛ dɛ kɔ ongulunɔ, hã lɛ le kɔ wa.”

¹³ Nɛ Yezu kɔ̃a, nɛ o'dã hi winɔ wa hɔa nza kɔ wi ni, nɛ wa le kɔ ngulunɔ. Nɛ gba gili ngulunɔ ni, wa yolo ngɔ kala i, nɛ wa zĩlĩ hurr, nɛ wa ala 'dɔ lì, nɛ wa bindi vɛ̃. Wa zi vɛ̃ ɔ nɛ ongulu koto bɔa ni.

¹⁴ Kɔ Owi fɔmɔ ngulunɔ wa nɛa we zɔ ní, nɛ wa a nyanga wa tɛ yu, we tɔ̃ we nɛ hã owinɔ kɔ le i, do wanɔ ngɔ fɔnɔ ni. Nɛ owinɔ wa tɛa we zɔ mɛ kɛ ma dɛa tɛ̃ ɛ ni.

¹⁵ Nɛ wa hɔa 'da Yezu, nɛ wa zɔ wi kɛ a zi do gba gili o'dã hi winɔ ni, nɛ nde bɔɛ ia zu a ia, nɛ a hi'da tulu dɛ tɛ̃ a, nɛ a dungu fio. Nɛ kili ba winɔ ni wena.

¹⁶ Nɛ wanɔ wa sɔ boe, nɛ wa zɔa mɛ ma dɛa wi ni ni, do kɛ ma dɛa ngulunɔ ni, wa tɔ̃a gulu nɛ hã wanɔ wa hɔa do 'do ni.

¹⁷ Nɛ wa ala nu wa hã Yezu na, a la ngɔ nùi 'da lo do'do.

¹⁸ Kɔ Yezu nɛa we kũ kɔ ga, nɛ wi kɛ a zi do o'dã hi winɔ ni aka a na, ɛ nɛ do a.

¹⁹ Nɛ Yezu bɛ̃a, nɛ a tɔ̃ hã a na: “Mɔ sí dɛ 'da onya mɔ i, nɛ mɔ tɔ̃ we mɛ kɛ Gale dɛa do mɔ, do tɛlɛ tɛ kɛ a ĩ 'bako hã mɔ ni hã wa.”

²⁰ Nɛ wi ni kpolo tɛ̃ ɛ, nɛ a la dɛ ngɔ nùi kɛ li nɛ a Lenɔ 'Bu ni, tɛ tɔ̃ gulu mɛnɔ kɛ Yezu dɛa ma we a ni. Nɛ winɔ vɛ̃ wa ɔngba do ma wena.

Yezu kpasa wi zɛlɛ, nɛ a tunu fio

²¹ Yezu lia kɔ ga, nɛ a kũ gba ndɔɛ. Kɔ a nɛa we hɔ kulu nɛ i, nɛ gba gili Owele wa ngɛma ngba wa dɛ kɛ zã nu lì.

²² Nɛ mbe nwa ngɔ tɔa mbula kpo dɛ fala ni, li a a Yairusi, a hɔa. Kɔ a nɛa we zɔ Yezu ni, nɛ a gu nù ti a,

²³ nɛ a ala nu a hã a na: “Boko be 'da mi nɛ fe fia. Kɔ mɔ tɛ́, kɔ mɔ é kɔ̃ mɔ ngɔ a, hã a kpasa!”

²⁴ Nɛ Yezu kɔ̃a, nɛ wa la do a. Nɛ ogba gili winɔ ni wa la tɛ mɛ 'bɔ fala nɛ kpo do wa, nɛ wa nɔa do a 'do 'do.

²⁵ Nɛ nde mbe wuko kpo sanga winɔ ni, a zi do zɛlɛ, tɔkɔ si tɛ̃ a wena, nɛ a ɔa do ma gbaa sabɛlɛ 'bu ngɔ nɛ bɔa.

²⁶ Wuke ni zɔa ngamɔ wena tɛ yɛnggɛ wala 'da Owi ina, nɛ mbili ia tɛ̃ a vɛ̃. Gɛnɛ kɔ na mɛ ni, nɛ nde zɛlɛ 'da a è gɔ, ma nganda dɛ dati nganda fai.

^27-28 A zila zi sakoe 'da Yezu, ma kɛ a lia dɛ sanga gba gili owinɔ 'do Yezu ni. Nɛ a lengge na, fala kɛ ɛ tamba mbamba tulu tɛ̃ a tamba iko, nɛ ɛ kpasa sɛ. Nɛ a tamba tulu tɛ Yezu,

²⁹ nɛ tɔkɛ si tɛ̃ a ni gɔnɔ do ti, nɛ a ĩ na, ɛ kpasa ia.

³⁰ Nɛ do kpo fala ni, Yezu ĩ tɛ mɛ 'bɔ na, mbe ngawi 'dɛ ɛ hɔa nza tɛ̃ ɛ. Nɛ a siki tɛ̃ a sanga gba gili owinɔ ni, nɛ a aka na: “Wi tamba tulu tɛ mi ni a wio nde?”

³¹ Nɛ owi yambala mɛnɔ wa gisa hã a na: “Mɔ zɔ́ kɛ gba gili owinɔ wa nɔa do mɔ nɛ ge nde gɛ, nɛ mɔ nɛ dɛ fala aka 'bɔ na, wi tamba tɛ mɔ a wio nde nɛ nde?”

³² Nɛ Yezu ka mɔ kɛ zã ɛ we zɔ wi dɛa mɛ ni.

³³ Nɛ kili ba wuke ni wena, nɛ tɛ̃ a tana we duzu kɛ a ĩ na, ɛ kpasa tɛ zɛlɛ 'dɛ ɛ. Nɛ a tɛa, nɛ a gu nù ti Yezu, nɛ a tɔ̃ we mɛ ma dɛa a ni vɛ̃ hã a.

³⁴ Nɛ Yezu gese hã a na: “Boko be 'daa, mɔ kpasa we duzu kɛ mɔ do kɔ̃a we dɛ 'da mi. Kɔ mɔ sí do dia nɛ.”

³⁵ Yezu 'bana tɛ tɔ̃ ni iko, nɛ ombe wi to wa yolo kɔ tɔa 'da Yairusi i, nɛ wa tɔ̃ hã a na: “Be 'da mɔ fia ia. Kɔ mɔ tɛ yɛ̀kɛ̀ 'bɔ wi be mɔ do yala gɔ.”

³⁶ Nɛ nde Yezu à tɛ̃ ɛ do lɛnggɛ wa tɔ̃a ni gɔ, nɛ a tɔ̃ hã Yairusi na: “Mɔ tɛ dɛ̀ kili gɔ, mɔ ɔ́ do kɔ̃a we iko.” Nɛ wa ma ngɔ nɛ nɛ.

³⁷ Nɛ a kɔ̃̀ zi na, ogele wele wa nɛ 'do ɛ gɔ. Nɛ a saka tati a Petro, Zake, do Yoanɛ, nya Zake na wa kã ɛ.

³⁸ Wa nɛa we hɔ nu tɔa 'da nwa Yairusi i, nɛ Yezu zɔ owinɔ tɛ te nzɛlɛ do he kɔ̃a nganda wena.

³⁹ Nɛ a le dɛ tɔa i, nɛ a aka wa na: “Gulu kɛ nɛ he, nɛ nɛ te nzɛlɛ ni we ge nde? Be gɛ fè gɔ, a ɔa yala iko.”

⁴⁰ Kɔ winɔ wa zila ni, nɛ wa ma ngɔ mɔmɔ a. Nɛ a fo wa dɛ nza vɛ̃, nɛ a kala baa be, do naa be, do owi yambala mɛnɔ 'da a talɛ ni, nɛ a le do wa dɛ kɔ 'bili tɔa kɛ wa ia do be ni.

⁴¹ Nɛ a 'be nu kɔ̃ be, nɛ a tɔ̃ hã a na: “Talita kumi” Gulu nɛ na: “Boko be, mi tɔ̃ hã mɔ na, mɔ kúlú ngɔ.”

⁴² Nɛ boko be ni kulu ngɔ do ti, nɛ a ma ngɔ la nɛ. (Do fala ni, nɛ nde a zi do sabɛlɛ 'bu ngɔ nɛ bɔa.) Nɛ winɔ wa nɛa we zɔ ní, nɛ wa ɔngba do ma wena.

⁴³ Nɛ Yezu dala nu ɛ hã wa na, wa tɛ tɔ̃̀ we nɛ hã wele gɔ. Nɛ a tɔ̃ hã Owele be ni na, wa fa nyɔngɔmɔ hã be, kɔ a nyɔngɔ.