MARKO 4 - WE NU GALE 1995

Gba we ngɔ wi fɛ kpalɛ

¹ Yezu ma 'bɔ ngɔ be we nu Gale tɛ nu gba ndɔ Galile i, nɛ gba gili Owele wa ngɛmɛ ngba wa dɛ kɛ zã a. Nɛ Yezu hɔa nza sanga wa, nɛ a kũ dɛ kɔ ga, nɛ a dungu nù. Nɛ ga do ngɔ lì i, nɛ ogba gili winɔ wa do nu kolo lì nza nga.

² Nɛ a ma ngɔ be we kpi do kpi hã wa. Nɛ a be zi wenɔ hã wa wena do gba we.

³ A tɔ̃a hã wa na: “Nɛ zélé do dia nɛ! Mbe wele kpo nɛa safɔ mɔ́ a we fɛ kpalɛ.

⁴ A ma ngɔ fɛ kpalɛ, nɛ mbe gbãlã nɛ ala dɛ li wala, nɛ onɔɛ wa tɛa, nɛ wa gɔmɔ ma.

⁵ Nɛ mbe ala dɛ ngɔ kpangba, fala kɛ nùi ngɔ nɛ ngboo bina ni, nɛ ma hɔa dɔ̃, we kɛ nùi dɛlɛ ngɔ ngbɛ ɛ gɔ.

⁶ Kɔ wese nɛa we nganda nɛ, nɛ bɔlɔ kpalɛ ni kula do'do, we duzu kɛ Hã nɛ nyɛ̀lɛ̀ dɛ ti nù i gɔ.

⁷ Nɛ mbe ala dɛ sanga nyaka tɛ̃. Nɛ nyaka tɛ̃ gã fala nɛ kpo do kpalɛ ni, nɛ ma kasa gɛlɛ nɛ vɛ̃, nɛ kpalɛ wè tɛ ko nɛ gɔ.

⁸ Nɛ nde mbe gbãlã kpalɛ ala dɛ fala dia nù, nɛ ma hɔa, nɛ ma gã, nɛ ma wala dɛlɛ wena. Mbe wala 'bu nɛ talɛ, nɛ mbe wala 'bu nɛ gazɛlɛ, nɛ mbe nɛ kama.”

⁹ Nɛ Yezu tɔ̃ hã wa na: “Wi kɛ zala a boe, nɛ a zélé!”

Yezu be wenɔ do gba we we ge nde?

¹⁰ 'Da fala kɛ Yezu fua tɛ̃ a sanga gba dɔa winɔ do'do, nɛ owi yambala mɛnɔ 'da a, fala nɛ kpo do ombe winɔ kɛ zã a ni, wa aka a na, a tɔ̃ gulu gba wenɔ sɔ a tɔ̃a ni hã lo.

¹¹ Nɛ Yezu gese hã wa na: “Kɛ 'da nɛ, Gale bia gulu usu lɛnggɛnɔ kɔ dɛa to nwa 'da a hã nɛ ia. Nɛ nde wanɔ sɔ i mɔ ni, wa zele ma do gba we iko.

¹² Ma ɔ nɛ kɛ wa kɔma kɔ 'Buki na: ‘Gɛnɛ kɔ wa 'du li wa gbaa, nɛ nde wa zɔ́ mɔ gɔ. Gɛnɛ kɔ wa gɛ zala wa gbaa, nɛ nde wa zélé we gɔ, da dɛ kɔ wa kífí sila wa, kɔ Gale fo ku'da 'dã mɛnɔ zu wa gɔ.’ ”

Yezu tɔ̃a gulu gba we ngɔ wi fɛ kpalɛ

¹³ 'Do nɛ, nɛ Yezu tɔ̃ hã wa na: “Nɛ ĩ̀ gulu gba we ni gɔ nde? Ní nɛ nɛ dɛ sɛ fala ĩ ti gele gba wenɔ nɛ nde?

¹⁴ Wi fɛ kpalɛ ni, a a wi kɛ a fɛ we nu Gale.

¹⁵ Owinɔ kɛ wa ɔ nɛ li wala kɛ mbe kpalɛ ala tɛ nɛ ni, wi a wanɔ kɛ Dia Sakoe gbo zala wa nɛ́, nɛ Satana tɛ do ti, nɛ a fo ma kɔ sila wa do'do.

¹⁶ Nɛ winɔ kɛ wa ɔ nɛ nù kpangba kɛ kpalɛ ala ngɔ nɛ ni, wi a wanɔ kɛ wa zele Dia Sakoe, nɛ wa kɔ̃ gɛnɛ nɛ dɔ̃, nɛ wa dɛ yangga nɛ,

¹⁷ nɛ nde ma lé wa ngboo gɔ, nɛ wa ha tɛ wa we nɛ 'do nɛ nyɛlɛ gɔ. Fala kɛ ngamɔ yamba sila wa, tabi wele wa zɛlɛ tɛ wa we duzu we nu Gale nde, nɛ wa la fala kɔ̃a we 'da wa dɔ̃ iko.

¹⁸ Nɛ owinɔ kɛ wa ɔ nɛ nùi kɛ kpalɛ ala tɛ nɛ dɛ sanga nyaka tɛ̃ ni, wi a wanɔ kɛ wa zele Dia Sakoe de wena,

¹⁹ nɛ wɔ mɛnɔ nù gɛ, do yangga kpamɛnɔ kɛ ma ɔlɔ winɔ ni, do wɔ kɔ kili tɛ wi kpi do kpi, ma kɔ sila wa, nɛ ma busu Dia Sakoe do'do, nɛ nde ma dɛ́ to gɔ.

²⁰ Nɛ owinɔ kɛ wa ɔ nɛ dia nùi kɛ kpalɛ ala ngɔ nɛ ni, wi a wanɔ kɛ wa zele Dia Sakoe, nɛ wa kɔ̃ ma, nɛ wa ko dia wala te, mbe 'bu nɛ talɛ, nɛ mbe 'bu nɛ gazɛlɛ, nɛ mbe kama.”

Gba we ngɔ mwinda

²¹ Nɛ Yezu tɔ̃a hã wa na: “Nɛ zɔa mbe na, wele tũ mwinda, nɛ a gu 'bɔ kpana zu ma, tabi a e ma ti mɔ ɔi nde? A é ma ngɔ mɔ e do mwinda gɔ nde?

²² Mba gɔ, mɛnɔ kɛ ma bé tɛ̃ ɛ gɔ ni, ma be sɛ tɛ̃ ɛ dɛ wila fala, nɛ usu mɛnɔ vɛ̃ ma hɔ sɛ dɛ nza.

²³ Wi kɛ zala a boe, nɛ a zélé!”

²⁴ Nɛ Yezu tɔ̃ 'bɔ hã wa na: “Nɛ hámá do wenɔ kɛ nɛ zele ni. Mɛ kɛ nɛ we do mɔ hã ngba nɛ ni, nɛ Gale a we sɛ te mɛ 'bɔ do mɔ hã nɛ, nɛ a a sɛ 'bɔ mbé nɛ ngɔ nɛ hã nɛ.

²⁵ Na mɛ ni, wi kɛ a do mɔ kɔ̃ a boe ni, nɛ a kpa sɛ 'bɔ mbé nɛ dɛ ngɔ nɛ. Nɛ nde wele kɛ do mɔ kɔ̃ a bina ni, nɛ wa kala sɛ 'bɔ bi 'bulu kɛ kɔ̃ a ni do'do.”

Gba we ngɔ gbãlã kpalɛ

²⁶ Nɛ Yezu tɔ̃a hã wa na: “Dɛa to nwa 'da Gale ma ɔ nɛ lɛnggɛ 'da wi kɛ a mi mɔ tɛ kɔ fɔɛ 'da a,

²⁷ nɛ a si, nɛ a ɔ yala, nɛ a dungu iko ni. Ĩ na, kpalɛ tɛ hɔ nɛ, nɛ ma ma ngɔ gã nɛ, nɛ nde a ĩ̀ ti mɛ ma la ni gɔ.

²⁸ Nùi dɛ na kpalɛ ni hɔ, nɛ ma gã, nɛ ma ko, nɛ gbãlã li nɛ nganda, nɛ ma kolo.

²⁹ Kɔ ma kolo, nɛ nde zɔlɔ kala kpalɛ wia ia, nɛ wele fɔɛ nɛ we kala ma.”

Gba we ngɔ gbãlã te mutardɛ

³⁰ Nɛ Yezu tɔ̃a hã wa na: “Mi kɔ̃a we tɔ̃ gulu dɛa to nwa 'da Gale hã nɛ. Kɔ mi nɛ we ma do ge nde, takɔ nɛ zele ni?

³¹ Dɛa to nwa 'da Gale ma wia kɔ̃ do mbe be gbãlã te kpo, li nɛ a mutardɛ. Gbãlã nɛ a bi sĩ, ma wè do mbe gbãlã mɛnɔ wa mi ma ngɔ nù gɛ gɔ.

³² Nɛ nde 'da fala kɛ wa mi ma, nɛ ma hɔ, nɛ ma ngala, nɛ ma nɛ ngɔ tala kpalɛnɔ li fɔɛ ni vɛ̃. Nɛ gbakɔ̃ nɛ dɛndɛlɛ gã wena, nɛ onɔɛ wa tɛ, nɛ wa ma ngɔ dɛ tɔanɔ 'da wa ngɔ nɛ.”

³³ Na mɛ ni, Yezu be zi we nu Gale hã winɔ wena do gba we. A be zi do tɛlɛ tɛ kɛ na wa zele, nɛ wa ĩ ti gulu nɛ do dia nɛ.

³⁴ A be zi wenɔ hã wa do gba we iko. Kɔ fala kɛ wi tati a a do Owi yambala mɛnɔ 'da a ni, nɛ a tɔ̃ gulu nɛ hã wa vɛ̃.

Yezu ga gba bũ kamba

³⁵ Do gɛ̃a wese ni, nɛ Yezu tɔ̃ hã owi yambala mɛnɔ 'da a na: “Lɛ kṹ dɛ kulu gba ndɔɛ i.”

³⁶ Nɛ Owi yambala mɛnɔ wa la gba gili winɔ dɛ nu ndɔ ni, nɛ wa kũ dɛ 'da Yezu kɔ ga i, nɛ wa la. Nɛ mbe gele winɔ wa kũ kɔ gele ganɔ, nɛ wa la tɛ mɛ 'bɔ fala nɛ kpo do a.

³⁷ Nɛ gba bũ kamba dɛa nganda wena, nɛ ngele lì gu'da, nɛ ma a kɔ ga, nɛ ga ma ngɔ dunu do lì.

³⁸ Nɛ nde Yezu zi a tɛ ngɔ go'do ga, nɛ a ia tulu ti zu a, nɛ a ɔ yala. Nɛ owi yambala mɛnɔ wa tunu a na: “Aa wi be mɔ, mɔ zɔ mɛ gɛ li mɔ nɛ nde? Lɛ fia ia!”

³⁹ Nɛ Yezu kulu ngɔ, nɛ a ga bũi, nɛ a tɔ̃ hã lì na: “E ge sɛ! Ngɔ tɛ mɔ gɛ̃!” Nɛ ngɔ tɛ gba bũi gɛ̃a kpi kpi kpi.

⁴⁰ Nɛ 'do nɛ, nɛ Yezu aka wa na: “Gulu kɛ nɛ dɛ kili ní we ge nde? Nɛ do kɔ̃a we bina we ge nde?”

⁴¹ Nɛ kili ba wa wena, nɛ wa ma ngɔ tɔ̃ dɛ sanga ngba wa na: “A gɛ a wio nde? Gɛnɛ kɔ gba bũ do gba lì, nɛ ma zele we nu a.”