MARKO 3 - WE NU GALE 1995

Yezu kpasa wi kungga kɔ̃

¹ 'Do nɛ, nɛ Yezu lia 'bɔ kɔ tɔa mbula do tũ ɔmɔ tɛ wi, nɛ nde mbe wi kungga kɔ̃ zi di ni.

² Nɛ winɔ kɔ tɔa ni, wa soko mɔ tɛ Yezu gbo gbo gbo, we zɔ tabi na, a kpasa sɛ wi ni do tũ ɔmɔ tɛ wi nde, takɔ wa fi ngbangga zu Yezu.

³ Nɛ Yezu tɔ̃a hã wi kungga kɔ̃ɛ ni na: “Mɔ kúlú ngɔ dɛ li winɔ gɛ vɛ̃!”

⁴ A kulu ngɔ, nɛ Yezu aka winɔ ni na: “Mbula 'da lɛ hã wala na, do tũ ɔmɔ tɛ wi, nɛ lɛ dɛ de mɔ tabi 'dã mɔ nde? Lɛ kpasa wele, tabi lɛ gbɛ wele nde?” Nɛ nde wa kɔ̃̀ we gese nu nɛ gɔ.

⁵ Nɛ Yezu ka mɔ tɛ wa do nɔ̃lɔ̃ zã, nɛ a zi 'bɔ do 'bako wena, we duzu kɛ wa do 'dã sila. Nɛ a tɔ̃ hã wi zɛlɛ ni na: “Mɔ bɔ́lɔ́ kɔ̃ mɔ!” Nɛ a bɔlɔ kɔ̃ a, nɛ ma de.

⁶ Kɔ Fariziɛnɔ wa nɛa we hɔ nza kɔ tɔa ni, nɛ wa mba ngba wa do owinɔ 'da Herodɛ, takɔ wa fa wala we gbɛ Yezu.

Gba gili Owele wa tɛa 'da Yezu

⁷ Nɛ Yezu do Owi yambala mɛnɔ 'da a, wa kulu ngɔ di ni, nɛ wa la dɛ nu gba ndɔ Galile. Nɛ ogba gili wele wa nɛa 'dɔkɔlɔ a. Wa yula falanɔ kpi do kpi: Owi ngɔ nù Galile, do Yude,

⁸ do Owi Yeruzalɛmɛ, do wanɔ ngɔ nù Idume, do wanɔ kɔ lenɔ kulu lì Yɔrdanɛ, do lenɔ kɛ zã le Tirɛ do Sidoni. Ogba gili winɔ ni wa tɛa 'da Yezu, we duzu kɛ wa zila sako mɛnɔ a dɛ ni.

⁹ Nɛ Yezu tɔ̃ hã Owi yambala mɛnɔ 'da a na, wa tɛ do be ga hɛ̃ ɛ, kɔ ɛ kũ kɔ nɛ, da dɛ kɔ owinɔ wa ílí ɛ gɔ.

¹⁰ Mba gɔ, owi zɛlɛmɛnɔ vɛ̃ wa fa we 'be tɛ̃ a, we kɛ a kpasa zi owinɔ wena.

¹¹ Kɔ fala kɛ owanɔ do o'dã hi wi kɔ wa ni, wa zɔ a, nɛ wa gu nù ti a, nɛ wa he mɔ na: “Mɔ a Be 'da Gale!”

¹² Nɛ nde Yezu tɔ̃a hã wa nganda wena na, wa tɛ yɛ'bɛ sako nɛ gɔ.

Yezu saka wi nɛ tonɔ 'bu ngɔ wa bɔa

¹³ Nɛ 'do ki ni, nɛ Yezu kũ ngɔ mbe kala kpo, nɛ a sa mɔ hã winɔ kɛ a kɔ̃a wa ni. Nɛ wa tɛa,

¹⁴ nɛ a saka wele 'bu ngɔ wa bɔa sanga wa ni, takɔ a yɛnggɛ do wa, nɛ a a wa do wi nɛ tonɔ 'da a, nɛ wa be we olo nu Gale.

¹⁵ Nɛ a hã ngawi hã wa, we fo o'dã hi wi kɔ winɔ.

¹⁶ Li winɔ kɛ a saka zi wa 'bu ngɔ wa bɔa ni, ma kɛ: Simɔ (wele kɛ Yezu ia li a na Petro ni),

¹⁷ do Zake, do nya a Yoanɛ, benɔ 'da Zebede (kɛ Yezu ia zi li wa na, Boanɛrgɛsi, gulu nɛ na: “Gbanza kolo”),

¹⁸ do Andre, do Filipɛ, do Bartelɛmi, do Matie, do Toma, do Zake, be 'da Alfe, do Tade, do Simɔ kɛ a bi zi a ngɔ le 'da wa na, ma hɔ nza ti mbula 'da ogele winɔ ni,

¹⁹ do Yudasi Iskariɔtɛ, wi kɛ a 'dɔlɔ Yezu hã owi sɛnɛ a ni.

Onya Yezu wa tɛa we si do a

²⁰ Nɛ Yezu si dɛ nu tɔa kɛ a ɔ nɛ ni. Nɛ gba gili Owele wa tɛa 'bɔ 'dɔkɔlɔ a, nɛ fala do kɛ na, Yezu do owi yambala mɛnɔ 'da a wa dungu mbe nù we nyɔngɔ mɔ bina.

²¹ Kɔ onya Yezu wa nɛa we zele we nɛ, nɛ wa tɛa we kpa a si do a, we duzu kɛ ombe wele wa tɔ̃a hã wa na: “Mɔ yaka zu a yaka!”

Owi be mbulanɔ wa tɔ̃a 'dã we hã Yezu

²² Nɛ mbe Owi be mbulanɔ kɛ wa yula zi tɛ Yeruzalɛmɛ i ni, wa tɛ tɔ̃ hã winɔ na: “Beɛlzebulɛ, nwa ngɔ o'dã hi winɔ, a lia kɔ Yezu lia. Ma hã Yezu fo 'dã hi winɔ kɔ winɔ do ngawi 'da a ni.”

²³ Nɛ Yezu sa mɔ hã winɔ, nɛ a tɔ̃ hã wa na: “Tɛlɛ tɛ kɛ Satana wia we fo Satana kɔ wele ni nɛ nde?

²⁴ Fala kɛ nu fɛlɛ kula kpo gɔnɔ sanga tɛ ngbɛ ɛ do bolo, nɛ nde ma 'báná sɛ 'bɔ gɔ.

²⁵ Nɛ fala kɛ Owele dɛ kɔ zã kpo, wa kɛ̃ sanga tɛ ngba wa, nɛ wa bi ngba wa, nɛ nde wa 'báná sɛ 'bɔ gɔ.

²⁶ Kɔ fala kɛ Satana bi bolo do kpo kpo ngba a 'dã hi wi, nɛ nde nu fɛlɛ wa kɛ̃a sanga tɛ ngba ɛ ia, nɛ ngawi 'da wa wè tɛ 'bana nɛ gɔ, nɛ ma e sɛ iko.

²⁷ “Wele nɛ le we zũ mɔ kɔ tɔa mɔ́ wi ngawi, nɛ ma wia na a ba wi ngawi ni, kɔ a ɛnzɛ a kiti kiti do'do, sɛ nɛ a le we zũ mɛnɔ 'da a de.

²⁸ “Kɔ mi tɔ̃ hã nɛ do gbãlã we na, 'dã mɛnɔ vɛ̃ kɛ wele dɛ ni, gɛnɛ kɔ a dã zu li Gale nde, nɛ Gale wia tɛ fo ku'da nɛ zu a.

²⁹ Kɔ wi kɛ a dã zu li Hi Wi Santo, nɛ nde Gale fó sɛ ku'da 'dã mɛ ni zu a fala kpo gɔ. We duzu kɛ a dɛa 'dã mɔ kɛ ma é sɛ ia gɔ ni.”

³⁰ Yezu tɔ́a zi hã wa na mɛ ni, we kɛ wa tɔ̃a na: “'Dã hi wi lia kɔ a lia” ni.

Naa Yezu do onya a a wio nde?

³¹ 'Da fala kpo, nɛ naa Yezu do onya a, wa hɔa, nɛ wa yolo do tɛ̃ ɛ, nɛ wa tombo mbe wele kpo we sa mɔ hã a.

³² Nɛ gba gili winɔ kɛ zã Yezu ni, wa tɔ̃ hã a na: “Mɔ zɔ́, naa mɔ do onya mɔ wa hɔa dɛ, kɔ wa aka we mɔ.”

³³ Nɛ Yezu gisa hã wa na: “Naa mi do onya mi a wio nde?”

³⁴ Nɛ a ka mɔ tɛ winɔ wa dungu kɛ zã a ni, nɛ a tɔ̃ hã wa na: “Nɛ zɔ́ naa mi do onya mi, wi a winɔ kɛ zã mi gɛ!

³⁵ Bulu nya mi, tabi boko nya mi, tabi naa mi, wi a wele kɛ a dɛ mɛnɔ zã Gale kɔ̃a ni.”