MARKO 2 - WE NU GALE 1995

Yezu kpasa wi kala nyanga

¹ Ma là tũ dɛlɛ gɔ, nɛ Yezu si dɛ Kafarnaumɛ. Nɛ winɔ wa zila na, a kɔ tɔa a ɔ nɛ ni,

² nɛ wa ngɛma ngba wa vɛ̃ dɛ di ni, nɛ tɔa dunu, nɛ wila fala sĩ tɛ nu tɔa 'bɔ bina. Nɛ Yezu ma ngɔ be we nu Gale hã wa.

³ Nɛ Owele nalɛ wa hɔ do wi kala nyanga ngɔ mɔ ɔi hã Yezu.

⁴ Nɛ nde fala we hɔ do a dati Yezu bina, we duzu gba gili winɔ. Nɛ wa zɔa ni gbaa, nɛ wa kũ dɛ ngɔ tɔa i, nɛ wa ɛ̃lɛ̃ gbogbo zu tɔa fala kɛ Yezu nɛ ni, nɛ wa zumu wi ni dɛ 'da Yezu nù nga.

⁵ Yezu nɛa we zɔ kɔ̃a we 'da winɔ dɛ 'da a ni, nɛ a tɔ̃ hã wi kala nyanga na: “Be 'daa, mi fua ku'da 'dã mɛ zu mɔ ia!”

⁶ A nɛa we tɔ̃ ní, nɛ ombe sanga wi be mbulanɔ kɛ wa dungu di ni ni, wa ma ngɔ lengge do kɔ sila wa na:

⁷ “Gulu kɛ wi gɛ dã zu li Gale we ge nde? Wi wia we fo ku'da 'dã mɔ zu wele, wi tati a Gale gɔ nde?”

⁸ Nɛ dɔ̃ nɛ nde Yezu ĩ sɔ ti linggamɛ 'da wa ia, nɛ a tɔ̃ hã wa na: “Gulu kɛ nɛ lengge ní we ge nde?

⁹ Mba gɔ, sanga kɛ mi tɔ̃a hã wi kala nyanga gɛ na, mi fua ku'da 'dã mɛnɔ 'da mɔ, do kɛ na, mɔ kúlú ngɔ, kɔ mɔ bá mɔ ɔi 'da mɔ, kɔ mɔ sí ni, kɛ ma nganda wena kɔ nɛ ni a ki nge nde?

¹⁰ Kɔ mi kɔ̃a we be hã nɛ na, mi Be 'da Wele, mi do ngawi ngɔ nù gɛ we fo ku'da 'dã mɔ zu Owele ni.”

¹¹ Nɛ a siki tɛ̃ a, nɛ a tɔ̃ hã wi kala nyanga ni na: “Mi tɔ̃ hã mɔ na, mɔ kúlú ngɔ, kɔ mɔ bá mɔ ɔi 'da mɔ, hã mɔ sí!”

¹² A nɛa we tɔ̃ ní, nɛ wi kala nyanga kulu ngɔ do ti, nɛ a ba mɔ ɔi 'da a, nɛ a la dɛ li winɔ vɛ̃. Nɛ owinɔ vɛ̃ wa ɔngba do ma wena, nɛ wa dɔnggɔ Gale tɛ tɔ̃ na: “Kɛ gbaa gɛ, lɛ zɔ̀ mbe mɔ ɔ nɛ fala kpo gɔ!”

Yezu sa mɔ hã Levi

¹³ Yezu kpolo tɛ̃ a dɛ nu gba ndɔ Galile. Nɛ gba gili owele wa tɛa 'da a, nɛ a ma ngɔ be we nu Gale hã wa.

¹⁴ A bia we do'do, kɔ a ma ngɔ la nɛ, nɛ a zɔ mbe wele kpo kɔ biro 'da a, kɛ winɔ wa futa do takonɔ ni, li a a Levi, be 'da Alfe. Nɛ Yezu tɔ̃ hã a na: “Mɔ tɛ́, kɔ lɛ yɛ́nggɛ́ do mɔ!” Nɛ Levi kulu ngɔ, nɛ a la do Yezu.

¹⁵ 'Do nɛ, nɛ Yezu do Owi yambala mɛnɔ 'da a, wa tɛ nyɔngɔ mɔ kɔ tɔa 'da Levi ni. Nɛ gba gili owi futa takonɔ, do o'dã winɔ wa tɛa we nyɔngɔ mɛ ni do a. Mba gɔ, Owi ɔ ní wa yɛnggɛ zi 'dɔkɔlɔ a wena.

¹⁶ Nɛ ombe wi be mbulanɔ kɛ wa zi a Fariziɛnɔ ni, wa nɛa we zɔ na, Yezu tɛ nyɔngɔ mɔ fala nɛ kpo do o'dã winɔ, do owi futa takonɔ ni, nɛ wa aka wi yambala mɛnɔ 'da a na: “Gulu kɛ a nyɔngɔ mɔ do owi futa takonɔ, do o'dã winɔ ní we ge nde?”

¹⁷ Nɛ Yezu zila we wa tɔ̃a ni, nɛ a tɔ̃ hã wa na: “Wi kɛ a do nga tɛ̃ a ni, a nɛ́ 'da wi ina gɔ, nɛ nde wi zɛlɛ, sɛ nɛ a nɛ 'da wi ina de. Kɔ mi tɛ̀ we obɔlɔ zu wele gɔ, mi tɛa we o'dã winɔ.”

Owele wa aka Yezu ngɔ bɛ̃ nyɔngɔmɔ we dɔnggɔ Gale

¹⁸ Owi yambala mɛnɔ 'da Yoanɛ wi batisa winɔ, do Fariziɛnɔ, wa zi tɛ bɛ̃ nyɔngɔmɔ we dɔnggɔ Gale. Nɛ ombe wele wa tɛa, nɛ wa aka Yezu na: “Gulu kɛ owi yambala mɛnɔ 'da Yoanɛ, do wanɔ 'da Fariziɛnɔ, wa bɛ̃ nyɔngɔmɔ we dɔnggɔ Gale, nɛ nde wanɔ 'da mɔ, wa dɛ́ ní gɔ we ge nde?”

¹⁹ Nɛ Yezu gisa hã wa do gba we na: “Nɛ lengge na, wa sa mɔ hã Owele tɛ mɔ dɔ ba ngba wi, nɛ nɛ wia we tɔ̃ hã wa na, wa bɛ̃ nyɔngɔmɔ dɛ li wi ba wuke ni nde?

²⁰ Nɛ nde ngba soe kɛ owinɔ wa fo wi ba wuke ni sanga wa do'do, sɛ nɛ wa wia we bɛ̃ nyɔngɔmɔ de.”

²¹ Nɛ Yezu tɔ̃a 'bɔ mbé gba we hã wa na: “Wele wè tɛ ba nu mbé tulu, nɛ a 'bamba do li ã tulu gɔ. We kɛ nu mbé tuli ni wia we ɛ̃ 'da li ã tuli dɛ dati.

²² Nɛ wele wè tɛ a mbé dɔ̃ kɔ ã daka ndala gɔ. Ní gɔ, nɛ dɔ̃ɛ ma hana sɛ, nɛ ma fũ daka ndala, nɛ daka 'danga, nɛ dɔ̃ɛ a nù. Kɔ ma wia na, wa a mbé dɔ̃ kɔ mbé daka ndala!”

Yezu na ɛ a wele tũ ɔmɔ tɛ wi

²³ Mbe tũ ɔmɔ tɛ wi kpo, nɛ Yezu do owi yambala mɛnɔ 'da a, wa la do kɔ mbe fɔ ble. Nɛ owi yambala mɛnɔ 'da a wa ma ngɔ 'bi wala nɛ tɛ la nɛ.

²⁴ Nɛ Fariziɛnɔ wa aka Yezu na: “Gulu kɛ owi yambala mɛnɔ 'da mɔ wa dɛ mɛ kɛ mbula 'da lɛ bɛ̃a ma ni we ge nde? Mbula 'da lɛ kɔ̃̀ na, wele dɛ to do tũ ɔmɔ te wi gɔ.”

²⁵ Nɛ Yezu gese hã wa na: “Nɛ tɔ̀lɔ̀ mbe we mɛ Davidi, do wi dɛa tonɔ 'da a wa dɛa zi ni gɔ nde? Wɔ ba zi wa, nɛ nyɔngɔmɔ zi bina,

²⁶ nɛ wa lia kɔ tɔa Gale. ('Da fala ni, nɛ nde Abiatarɛ zi a gã nwa nganga.) Nɛ wa nyɔngɔ mapanɔ kɛ winɔ wa hã ma we dɔnggɔ do Gale ni. Mɛ ni nɛ nde mbula 'da lɛ tɔ̃a na, tati a onganganɔ hã wa nyɔngɔ ma iko gɔ nde?”

²⁷ Nɛ Yezu tɔ̃ 'bɔ hã wa na: “Gale dɛa zɛ́ tũ ɔmɔ tɛ wi we duzu wele, nɛ nde a dɛ̀ wele we tũ ɔmɔ tɛ wi gɔ.

²⁸ Nɛ ĩ́ na, mi Be 'da Wele, mi a wele tũ ɔmɔ tɛ wi.”