MARKO 16 - WE NU GALE 1995

Yezu za'da nza kɔ fio

¹ Tũ ɔmɔ tɛ wi la do'do, nɛ Maria, boko Magdala, do Salome, do Maria naa Zake, wa usa nɔ yɔmbɔ we nɛ we a tɛ wɔlɔ Yezu.

² Nɛ do kuti tũi kɔ mbé pɔsɛ 'do ɛngga ɔmɔ tɛ wi ni, nɛ wa kulu ngɔ do titole belee, do fala kɛ wese ndo gba nɛ ni, nɛ wa la ngɔ zuni i.

³ Wa ma ngɔ la nɛ, nɛ wa aka tɛ wa na: “Wi nɛ fo sɛ ta nu zuni hã lɛ a wio nde?”

⁴ Nɛ wa nɛa we ka mɔ, nɛ nde wa kimili ta ni, kɔ ma ɔ do kɛ zã nu kɔ̃ɛ iko. Ĩ na, mɛ zi a gba gbɛlɛ ta ngboo.

⁵ Nɛ wa le dɛ kɔ zunu i, nɛ wa zɔ zagbãlã kpo, a hi'da gba du fɛ̃a tulu, nɛ a dungu i mɔ si ngɔ ngawili kɔ̃, nɛ kili ba wa wena.

⁶ Nɛ a tɔ̃ hã wa na: “Nɛ tɛ dɛ̃ kili gɔ. Mi ĩ na nɛ fa Yezu, wi Nazarɛtɛ, kɛ wa bɛ̃lɛ̃ zi a ngɔ finda te ni. A tunu kɔ fio ia, nɛ fo a dɛ bina. Nɛ tɛ́, hã nɛ zɔ fala wa ia zi do a gɛ.

⁷ Kɔ nɛ nɛ́, hã nɛ tɔ̃ we nɛ hã Petro, do tala owi yambala mɛnɔ na, a gɔnɔ dati nɛ dɛ Galile i. Nɛ kpa sɛ a i mɔ, ɔ nɛ kɛ a tɔ̃a zi hã nɛ ni.”

⁸ Nɛ wukonɔ wa hɔa nza kɔ zuni, nɛ wa yu dɛ gele fala, nɛ zu wa vĩ, nɛ tɛ wa tana wena. Nɛ wa tɔ̃̀ sako nɛ hã wele gɔ, we kɛ wa dɛa kili do'do. [

Yezu bia tɛ̃ ɛ hã Maria boko Magdala

⁹ 'Do kɛ Yezu za'da nza kɔ fie do kuti tũi kɔ mbé pɔsɛ, do titole belee ni, nɛ a bia tɛ̃ a dati hã Maria boko Magdala, wele kɛ a fua zi o'dã hi winɔ sambo kɔ a ni.

¹⁰ Nɛ Maria nɛa we tɔ̃ sako nɛ hã owinɔ kɛ wa yɛnggɛ zi do Yezu ni. A kpa wa, nɛ nde wa tɛ he kɔ̃a do 'bako nɛ ge nde ni.

¹¹ Kɔwa nɛa we zele nu a na, Yezu tunu, nɛ ɛ zɔa a do li ɛ ni, nɛ wa kɔ̃̀ gɔ.

Yezu bia 'bɔ tɛ̃ ɛ hã owi yambala mɛnɔ bɔa

¹² 'Do ki ni, nɛ Yezu bia tɛ̃ a do gele wala hã ombe wele bɔa sanga owi yambala mɛnɔ tɛ li wala le 'da wa.

¹³ Kɔ wa nɛa we kpolo tɛ wa, nɛ wa tɔ̃ we nɛ hã ogele wanɔ ni, nɛ wa kɔ̃̀ 'bɔ gɔ.

Yezu bia 'bɔ tɛ̃ ɛ hã owi yambala mɛnɔ 'da a

¹⁴ Nɛ do ndɔti nɛ vɛ̃, nɛ Yezu bia tɛ̃ a hã Owi yambala mɛnɔ 'bu ngɔ wa kpo ni. Do 'da fala ni, nɛ nde wa zi tɛ nyɔngɔ mɔ. Nɛ a kɔ'dɔ wa, we duzu kɛ wa do kɔ̃a we bina, nɛ zu wa nganda 'bɔ wena. Mba gɔ, wa kɔ̃̀ zi we nu owinɔ kɛ wa zɔ a do tunu li a ni gɔ.

¹⁵ Nɛ 'do nɛ, nɛ a tɔ̃ hã wa na: “Nɛ yɛ́nggɛ́ nyanga nza gɛ vɛ̃, nɛ nɛ bé Dia Sakoe hã owinɔ.

¹⁶ Kɔ wele kɛ a kɔ̃, kɔ nɛ batisa a, nɛ Gale a kpasa sɛ a. Nɛ nde wele kɛ a kɔ̃̀ gɔ, nɛ a te sɛ li ngbangga 'da Gale.

¹⁷ Nɛ owinɔ kɛ wa kɔ̃ sɛ ni, mi hã sɛ ngawi hã wa, nɛ wa dɛ sɛ ogba sɔ̃ mɛnɔ gɛ: Wa ndaka sɛ o'dã hi wi kɔ owinɔ do zu li mi. Wa tɔ̃ sɛ ogele nu kɛ wa yàmbàlà ma dati gɔ ni.

¹⁸ Gɛnɛ kɔ wa ba gɔ̃ dɛ kɔ̃ wa, tabi wa nɔ 'dã ina, nɛ nde ma dɛ́ sɛ mɔ kpo do wa gɔ. Wa e sɛ kɔ̃ wa ngɔ owi zɛlɛ, nɛ zɛlɛmɛnɔ 'da winɔ ni ma e.”

Yezu kũ dɛ li nza i

¹⁹ Nwa Yezu tɔ̃a wenɔ ni hã wa do'do, nɛ a kũ dɛ li nza i, nɛ a dungu tɛ ngawili kɔ̃ Gale.

²⁰ Nɛ owi yambala mɛnɔ wa la tɛ be Dia Sakoe hã owinɔ nyanga nza gɛ vɛ̃. Nɛ Nwa Yezu zi do wa kɔ dɛa toe 'da wa. Nɛ wa dɛa ogba sɔ̃ mɔ do ngawi 'da a, we be hã owinɔ na, wenɔ wa be ni, mɛ a ngbongbo we.]