MARKO 15 - WE NU GALE 1995

Wa nɛa do Yezu dati Pilatɛ

¹ Nɛ do titole belee, nɛ onwa nganganɔ wa mba li ngba wa fala nɛ kpo do okumunɔ, do owi be mbulanɔ, do owi 'bili wenɔ vɛ̃, takɔ wa ɔ ngɔ lɛnggɛ. Nɛ wa ba Yezu, nɛ wa ɛnzɛ a, nɛ wa nɛ do a hã Pilatɛ, gã wi fɔmɔ le.

² Nɛ Pilatɛ aka a na: “Mɔ a nwa 'da Oyudanɔ nde?” Nɛ Yezu gese hã a na: “Ma a mɔ tɔ̃a ni.”

³ Nɛ onwa nganganɔ wa ma ngɔ 'bili obɛlɛ kpi do kpi dɛ ngɔ a.

⁴ Nɛ Pilatɛ aka 'bɔ a mbé nɛ na: “Mɔ gésé nu we gɛ gɔ nde? Mɔ zélé wenɔ winɔ wa kala dɛ ngɔ mɔ dɛlɛ nɛ ge nde gɛ gɔ nde?”

⁵ Nɛ nde Yezu gèsè 'bɔ nu we kpo gɔ, nɛ Pilatɛ ɔngbɔ nɛ wena.

Wa 'bili we 'da Yezu na wa gbɛ a

⁶ Sabɛlɛ kpo kpo, do ngba soe ɛngga Hɔ Nza kɔ Ngbá, nɛ ma wia zi na, Pilatɛ da kɔ̃ ɛ tɛ mbe wi bɔlɔkɔ kpo kɛ owinɔ wa saka a ni.

⁷ Do 'da fala ni, nɛ nde mbe wele kpo, li a a Barabasi, a zi a kɔ bɔlɔkɔ fala nɛ kpo do o'dã winɔ kɛ wa gbɛa zi wele 'da fala kɛ wa kɔ̃a zi we ba le ni.

⁸ Nɛ gili winɔ wa kũ dɛ 'da Pilatɛ i, nɛ wa ma ngɔ aka a na, a dɛ́ hã lo ɔ nɛ kɛ a dɛ ma 'da fala fai ni.

⁹ Nɛ Pilatɛ gese hã wa na: “Nɛ kɔ̃a na mi da kɔ̃ mi tɛ nwa 'da Yudanɔ hã nɛ nde?”

¹⁰ A aka na mɛ ni, we kɛ a ĩ na, onwa nganganɔ wa tɛa do Yezu hɛ̃ ɛ do kɔ sila bɔnɛ iko.

¹¹ Nɛ onwa nganganɔ wa tɛ tɔndɔ go'do winɔ, takɔ wa tɔ̃ hã Pilatɛ na, lo kɔ̃a na a da kɔ̃ a tɛ Barabasi hã lo.

¹² Nɛ Pilatɛ aka 'bɔ wa na: “Kɔ mi dɛ do wele kɛ nɛ sa li a na, nwa 'da Yudanɔ gɛ nɛ nde?”

¹³ Nɛ wa he mɔ fuu na: “Mɔ bɛlɛ a ngɔ finda te!”

¹⁴ Nɛ Pilatɛ aka 'bɔ wa na: “'Dã mɛ ngboo a dɛa ni a ge nde?” Nɛ wa he 'bɔ mɔ dɛ ngɔ fuu na: “Bɛlɛ a ngɔ finda te!”

¹⁵ Pilatɛ kɔ̃a we hã yangga hã ogili winɔ, ma kɛ a da kɔ̃ ɛ tɛ Barabasi hã wa. Nɛ a ba nu a na, wa zɛ́ Yezu do zufa. 'Do nɛ, nɛ a ia Yezu dɛ kɔ̃ sodanɔ na, wa bɛ̃lɛ̃ a ngɔ finda te.

Osodanɔ wa mɔma Yezu

¹⁶ Nɛ osodanɔ wa ba Yezu, nɛ wa le do a dɛ kɔ ngboe 'da Pilatɛ. Nɛ wa mba li tala osodanɔ vɛ̃ dɛ kɛ zã a.

¹⁷ Nɛ wa he'de gba du fila tulu hã a, nɛ wa kala tɛ̃, nɛ wa fana do ndasa nwa korr ɔ nɛ kali ni, nɛ wa yulu dɛ zu a.

¹⁸ Nɛ wa ma ngɔ hã balɛ hã a na: “Nwa 'da Yudanɔ, balɛ hã mɔ!”

¹⁹ Nɛ wa ngbolo zu a do dɔndɔlɔ, nɛ wa tufu sa nu wa dɛ tɛ̃ a, nɛ wa gu gba zugolo ti a, nɛ wa dɛ ɔ nɛ kɛ wa dɔnggɔ a dɔngga ni.

²⁰ Wa mɔmɔ a gbaa, nɛ ma we do wa, nɛ wa hɔlɔ fila tuli tɛ̃ a do'do, nɛ wa gese kɛ 'da a ngboo ni dɛ tɛ̃ a. Nɛ wa hɔ do a, nɛ wa nɛ we bɛ̃lɛ̃ a ngɔ finda te.

Wa bɛ̃lã Yezu ngɔ finda te

²¹ Osodanɔ wa ma ngɔ la do Yezu, nɛ wa kpa mbe wele kpo, a yula safɔ, kɔ a si si, nɛ osodanɔ wa ngbɔkɔ a na, a ba tole finda te 'da Yezu. Li wi ni a Simɔ, wi Sirɛnɛ. A zi a baa Alɛkzandrɛ do Rifusi.

²² Nɛ wa nɛa do Yezu tɛ mbe fala wa sa li nɛ na Golgota. (Gulu nɛ na: “Fala gbãlã zu wi.”) Wa hɔa i mɔ,

²³ nɛ wa mba dɔ̃ vinɔ do mirɛ, nɛ wa hã hã a na a nɔ, nɛ a bɛ̃ do'do.

²⁴ Nɛ 'do nɛ, nɛ wa bɛ̃lɛ̃ a ngɔ finda te, nɛ wa to zeke we kɛ̃ sanga tulunɔ 'da a dɛ kɔ̃ ngba wa.

²⁵ Wa nɛa we bɛ̃lɛ̃ a ngɔ finda te, nɛ nde wese hɔa tɛ sa kusi.

²⁶ Wa dɛa gulu fie 'da a do mbɛti dɛ ngɔ te ti zu a ni na: “Wi gɛ a Nwa 'da Oyudanɔ.”

²⁷ 'Da fala ni, nde wa bɛ̃lɛ̃ tɛ mɛ 'bɔ owi zũ bɔa ngɔ finda te dɛ kɛ zã Yezu ni, mbe kpo si ngɔ ngawili kɔ̃, nɛ mbee nɛ si ngɔ gale. [

²⁸ Na mɛ ni, nɛ wenɔ wa kɔma kɔ 'Buku 'da Gale na: “Wa tɔla zi a fala nɛ kpo do o'dã winɔ” ni, ma dɛa tɛ̃ ɛ.]

²⁹ Nɛ owinɔ kɛ wa la do di ni ni, wa zɔ a, nɛ wa gɔmɔ zu wa hã a. Nɛ wa tɔ̃ hã a na: “Ee! Mɔ gɛ, mɔ tɔ̃a zi na, ɛ wia we gbini Tɛmpɛloe, nɛ ɛ dɛ mbé nɛ 'do tũ talɛ.

³⁰ Hã mɔ kpásá kili tɛ mɔ, kɔ mɔ zĩ́lĩ́ ngɔ finda te gɛ gɔ nde?”

³¹ Nɛ onwa nganganɔ do Owi be mbulanɔ, wa mɔma 'bɔ a tɛ tɔ̃ hã ngba wa na: “A kpasa zi gele winɔ, nɛ a wè mɛ 'bɔ we kpasa kili tɛ̃ a wele nɛ gɔ!”

³² Nɛ wa tɔ̃ hã a na: “Mɛsiya, nwa 'da obe Israɛlɛ, mɔ zĩ́lĩ́ ngɔ finda te gɛ, kɔ lɛ zɔ, nɛ lɛ kɔ̃ sɛ gɛnɛ mɔ!” Nɛ wi zũnɔ kɛ wa bɛ̃lɛ̃ zi wa ngɔ finda te kɛ zã a ni, wa dã 'bɔ a.

Yezu fia

³³ Ma nɛa we hɔ midi, nɛ gba tũ tũ mbĩi ngɔ nùi vɛ̃, gbaa 'do sa talɛ.

³⁴ Sa talɛ ni nɛa we we ma, nɛ Yezu hia mɔ nganda wena na: “Eli, Eli, lama sabaktani?” (Gulu nɛ na: “Gale 'da mi, Gale 'da mi, gulu kɛ mɔ la mi ní we ge nde?”)

³⁵ Nɛ ombe sanga winɔ zi di ni ni, wa nɛa we zele hiamɛ ni, nɛ wa na: “Nɛ zélé, a tɛ sa mɔ hã Elia.”

³⁶ Nɛ mbe kpo wɛlɛ tɛ̃ ɛ, nɛ a ba nukã, nɛ a fi 'dɔ kpã dɔ̃, nɛ a ɛnzɛ ma dɛ zu ka gole, nɛ a ɛfɛ hã Yezu, takɔ a nzɔ'bɔ. Nɛ a na: “Lɛ 'bɔ́ kɔ lɛ zɔ, tabi Elia a tɛ sɛ we fo a tɛ ngɔ finda te gɛ nde!”

³⁷ Nɛ Yezu hia mbé mɔ nganda wena, nɛ a e sila a nù.

³⁸ Nɛ do 'da fala ni, nɛ gba tulu ku'bi kɔ Tɛmpɛloe i ɛ̃a dɛ gbogbo kparr, yolo ngɔ gbaa nù.

³⁹ Nɛ gã wi ngɔ osoda Roma, kɛ a yula zi dɛ dati Yezu ni, a zɔa tɛlɛ tɛ kɛ Yezu fia nɛ ni, nɛ a na: “Gbãlã we, wi gɛ a Be 'da Gale ngboo!”

⁴⁰ Nɛ ombe wukonɔ wa zi 'bɔ di ni, wa yula ndũu tɛ ka mɔ dɛ tɛ Yezu. Sanga wukonɔ ni, wi zi a Maria, boko Magdala, do Salome, do Maria, naa Zake be wele kɛ, do Yoze.

⁴¹ Wa zi a owukonɔ kɛ wa yɛnggɛ zi 'dɔkɔlɔ Yezu, nɛ wa gala a fala kɛ a zi a tɛ Galile i ni. Nɛ mbe ogele wukonɔ kɛ wa tɛa zi fala nɛ kpo do a tɛ Yeruzalɛmɛ i ni, wa zi 'bɔ boe.

Wa mi Yezu

⁴² Mɛ zi a tũi dati tũ ɔmɔ tɛ wi, nɛ mɛ zi a kɔ̃ tũ kɛ wa 'dafa do ɛngga ɔmɔ tɛ wi ni. Nɛ wese nɛa we gɛ̃ nɛ,

⁴³ nɛ Yozɛfu, wi Arimate hɔa. A zi a wi dĩ kɔ owi 'bili wenɔ, nɛ a 'bɔ zi 'da ngba soe kɛ Gale nɛ ndo do to nwa 'da a ni. Ma kɛ a ni sila a, nɛ a nɛ 'da Pilatɛ i we aka a na, a ba wɔlɔ Yezu hã ɛ.

⁴⁴ Nɛ Pilatɛ nɛa we zele na Yezu fia ia ni, nɛ a ɔngbɔ do ma wena. Nɛ a sa mɔ hã wi ngɔ sodanɔ, nɛ a aka a na, Yezu fia sɔ belee nde.

⁴⁵ Kɔ a nɛa we zele kɛ wi ngɔ sodanɔ kɔ̃a ni, nɛ a hã wala hã Yozɛfu na, a ba wɔlɔ Yezu.

⁴⁶ Nɛ Yozɛfu nɛa, nɛ a oso fɛ̃a tulu, nɛ a ba wɔlɔ Yezu ngɔ finda te dɛ nù, nɛ a kasa fɛ̃a tuli ni tɛ̃ a vɛ̃, nɛ a e a kɔ zunu kɛ wa 'dungga zi hã a kɔ tanɔ ni. Nɛ a kimili ta, nɛ a kpe do nu kɔ̃ɛ.

⁴⁷ Mɛ ni nɛ nde Maria, boko Magdala, do Maria naa Yoze, wa zi boe, nɛ wa zɔa fala Yozɛfu mi do Yezu ni.