MARKO 14 - WE NU GALE 1995

Onwa Yudanɔ wa fa we ba Yezu

¹ Ma 'bana zi tũ bɔa, takɔ tũ ɛngga Hɔ Nza kɔ Ngbá, kɛ wa nyɔngɔ do mapa wa à ina hana mapa tɛ nɛ gɔ ni, ma we. Nɛ onwa nganganɔ do owi be mbulanɔ, wa fa we ba Yezu do usu nɛ, kɔ wa gbɛ a.

² Mba gɔ, wa tɔ̃a na, lo wè tɛ ba a do ngba soe ɛngga gɔ, dɔ ma dãlã sila winɔ dɛ tɛ lo gɔ.

Mbe wuko kpo tɛnɛ yɔmbɔ dɛ zu Yezu

³ Yezu zi a kɔ le Betani, tɛ kɔ tɔa 'da Simɔ, kɛ a zi a wi zɛlɛ ngbɛlɛ ni. Nɛ Yezu dungu nù we nyɔngɔ mɔ, nɛ mbe wuko kpo le do nɔ yɔmbɔ kɔ daka albatrɛ dɛ kɔ̃ a. Yɔmbɛ ni, mɛ a nga li nɛ ngboo, wa dɛa do Hã te narɛ, nɛ mɛ a yɔmbɔ olo gã gole. Nɛ wuke ua nu daka yɔmbɛ, nɛ a tɛnɛ dɛ zu Yezu.

⁴ Nɛ sila ombe winɔ zi sanga wa ni nɔ̃lã, nɛ wa tɔ̃ na: “Gulu 'danga yɔmbɛ na ge nde?

⁵ Wa wia sɔ we be gole nɛ nɛ ngɔ gbãlã mbili kama talɛ, nɛ wa kɛ̃ ma hã Owi sãnɔ gɔ nde?” Nɛ wa kɔ'dɔ wuke ni wena.

⁶ Nɛ Yezu siki tɛ̃ ɛ, nɛ a aka wa na: “Gulu kɛ nɛ tulu wuke gɛ we ge nde? Nɛ lá a ni! We kɛ mɛ a dɛa do mi gɛ, ma de wena.

⁷ We duzu kɛ owi sãnɔ wa dɛ sanga nɛ gɛ boe fai. Kɔ 'da fala nɛ kɔ̃ we dɛ de mɔ hã wa, nɛ nɛ dɛ sɛ iko. Nɛ nde mi, mi ɔ́ sɛ do nɛ fai gɔ.

⁸ Wuke gɛ dɛa mɔ kɛ ma wia na a dɛ ni. A a yɔmbɛ gɛ tɛ mi dati, takɔ wa mi sɛ do mi.

⁹ Mi tɔ̃ hã nɛ do gbãlã we na, 'da falanɔ vɛ̃ kɛ wa be sɛ Dia Sakoe ngɔ nùi gɛ ni, nɛ wa tɔ̃ sɛ sako mɛ a dɛa gɛ, nɛ ta zu winɔ ma gba sɛ ngɔ a fai.”

Yudasi fa wala 'dɔlɔ Yezu

¹⁰ Nɛ Yudasi Iskariɔtɛ, mbe sanga owi yambala mɛnɔ 'da Yezu 'bu ngɔ wa bɔa ni nɛa 'da onwa nganganɔ, nɛ a tɔ̃ hã wa na, ɛ kɔ̃a we 'dɔlɔ Yezu hã wa.

¹¹ Wa nɛa we zele ni, nɛ wa dɛ yangga wena, nɛ wa kpua mbulu hã mbili hã a. Nɛ Yudasi ma ngɔ fa dia fala kɛ a wia tɛ 'dɔlɔ do Yezu hã wa ni.

Yezu do Owi yambala mɛnɔ 'da a wa nyɔnga ɛngga Hɔ Nza kɔ Ngbá

¹² Do kuti tũ ɛngga kɛ wa nyɔngɔ do mapa wa à ina hana mapa tɛ nɛ gɔ, nɛ wa gbɛ do obe bata we dungu do ɛngga ni, nɛ owi yambala mɛnɔ wa aka Yezu na: “Mɔ kɔ̃a na lɛ nɛ, kɔ lɛ 'dafa nyɔngɔmɔ ɛngga Hɔ Nza kɔ Ngbá hã mɔ do nde?”

¹³ Nɛ Yezu saka mbe kɔ owi yambala mɛnɔ 'da a bɔa, nɛ a tɔ̃ hã wa na: “Nɛ nɛ́ kɔ gã le i, nɛ nɛ kpa sɛ wi wili kpo, a tula kpana lì, nɛ nɛ kpé dɛ 'do a ni.

¹⁴ Nɛ kɔ tɔa a nɛ le nɛ ni, nɛ nɛ le 'do a, nɛ nɛ tɔ̃ hã wele tɔa ni na: ‘Wi be mɔ aka mɔ na, fala ɛ nɛ nyɔngɔ do ɛngga do Owi yambala mɛnɔ 'dɛ ɛ ni, ma a do nde?’

¹⁵ Nɛ a be sɛ gã 'bili kɔ tɔa do ngɔ hã nɛ, nɛ nde wa 'dafa mbɔkɔ nɛ ia, nɛ nɛ 'dáfá sɛ nyɔngɔmɛnɔ hã lɛ dɛ di ni.”

¹⁶ Nɛ owi yambala mɛnɔ wa nɛa, nɛ wa kpa mɛnɔ vɛ̃ ɔ nɛ kɛ Yezu tɔ̃a sɔ hã wa ni, nɛ wa 'dafa nyɔngɔmɔ ɛngga Hɔ Nza kɔ Ngbá dɛ di ni.

¹⁷ Wese nɛa we gɛ̃ nɛ, nɛ Yezu tɛa do owi yambala mɛnɔ 'da a 'bu ngɔ wa bɔa ni,

¹⁸ nɛ wa dungu nù we nyɔngɔ mɔ. Kɔ wa tɛ nyɔngɔ mɛ ni, nɛ Yezu tɔ̃ hã wa na: “Mi tɔ̃ hã nɛ do gbãlã we na, mbe sanga nɛ, owinɔ kɛ lɛ nyɔngɔ mɛ do nɛ fala nɛ kpo gɛ, a 'dɔlɔ sɛ mi.”

¹⁹ Nɛ wa nɛa we zele ní, nɛ 'bako ba li wa, nɛ wele do wele ma ngɔ aka a na: “Wi a mi nde?”

²⁰ Nɛ Yezu gisa hã wa na: “Wi a mbe wele kpo sanga nɛ 'bu ngɔ nɛ bɔa gɛ, wele kɛ lɛ mba 'do kɔ̃ ngba lɛ do a ngɔ nyɔngɔmɛ gɛ ni.

²¹ Mi, Be 'da Wele, mi nɛ fe ɔ nɛ kɛ 'Buki 'da Gale tɔ̃a ni. Nɛ nde 'bako do wi kɛ a nɛ 'dɔlɔ mi ni. Ma dia sɔ fɛ̃ na, wa tɛ kò a gɔ!”

Nyɔngɔmɔ Santo 'da Nwa

²² Wa tɛ nyɔngɔ mɛ ni, nɛ Yezu ba mapa, nɛ a sambala Gale we nɛ, nɛ a gbini sanga nɛ, nɛ a kɛ̃ ma hã Owi yambala mɛnɔ. Nɛ a tɔ̃ hã wa na: “Nɛ bá hã nɛ nyɔ́ngɔ́, we kɛ mɛ a kili tɛ mi.”

²³ Nɛ 'do nɛ, nɛ a ba bila dɔ̃, nɛ a hã iɔ̃nae hã Gale, nɛ a hã ma hã wa, nɛ wa vɛ̃ wa nɔ.

²⁴ Nɛ Yezu tɔ̃ hã wa na: “Kɛ gɛ mɛ a tɔkɔ tɛ mi, ma a sɛ nù we duzu gba gili Owele. Mɛ a tɔkɔ kɛ Gale gba sanga tɛ ngba ɛ do owinɔ.

²⁵ Mi tɔ̃ hã nɛ do gbãlã we na, mi nɔ́ sɛ 'bɔ mbé dɔ̃ gɔ, gbaa we hɔ tɛ ngba soe kɛ mi nɛ nɔ sɛ do mbé dɔ̃ɛ tɛ kɔ le nwa 'da Gale i ni.”

²⁶ 'Do nɛ, nɛ wa ga zuma we dɔnggɔ do Gale, nɛ wa la dɛ ngɔ kala Olivɛ.

Yezu tɔ̃a hã Petro na a kafa sɛ ɛ

²⁷ Nɛ Yezu tɔ̃ hã owi yambala mɛnɔ 'da a na: “Nɛ vɛ̃, nɛ yu sɛ, nɛ nɛ la sɛ mi zu mi kpo. Mba gɔ, wa kɔmɔ kɔ 'Buki na: ‘Gale tɔ̃a na, ɛ gbɛ sɛ wi fɔmɔ batanɔ, nɛ obatanɔ wa pɛsɛ sɛ ndã ndã!’

²⁸ Nɛ nde fala kɛ mi za'da sɛ nza kɔ fio ni, nɛ mi gɔnɔ sɛ dati nɛ dɛ Galile.”

²⁹ Nɛ Petro tɔ̃ hã a na: “Gɛnɛ kɔ ongba mi wa yu vɛ̃, kɔ wa la mɔ, nɛ nde mi kpo gɛ, mi lá sɛ mɔ gɔ!”

³⁰ Nɛ Yezu tɔ̃ hã a na: “Mi tɔ̃ hã mɔ do gbãlã we na, tũi gɛ, dati kɛ na kɔla he mɔ fala bɔa ni, mɔ kafa sɛ mi fala talɛ na, mɔ ĩ̀ ti mi gɔ.”

³¹ Nɛ Petro dala 'bɔ nu ɛ do nga gɛlɛ na: “Gɛnɛ kɔ ma we na mi fe do mɔ, nɛ nde mi káfá sɛ mɔ na, mi ĩ̀ ti mɔ gɔ ni fala kpo gɔ.” Nɛ tala Owi yambala mɛnɔ vɛ̃ wa tɔ̃ 'bɔ na mɛ ni.

Yezu sambala Gale tɛ kɔ fɔ Gɛtsemane

³² 'Do nɛ, nɛ Yezu do Owi yambala mɛnɔ 'da a wa nɛa tɛ mbe fala kpo, li nɛ a Gɛtsemane. Nɛ a tɔ̃ hã wa na: “Mi nɛ sambala Gale, kɔ nɛ dúngú dɛ dɛ.”

³³ Nɛ Yezu kala Petro, do Zake, do Yoanɛ dɛ tɛ̃ a, nɛ a la do wa. Nɛ sasa fie tɛa dɛ tɛ̃ a, nɛ kili ba a wena.

³⁴ Nɛ a tɔ̃ hã wa na: “'Bako gulu zu mi ɔ nɛ kɛ ma nɛ gbɛ mi gbɛa ni. Kɔ nɛ 'báná dɛ dɛ, nɛ nɛ tɛ ɔ̀ yala gɔ.”

³⁵ Nɛ a la dɛ dati bi sĩ, nɛ a te nù, nɛ a ma ngɔ sambala Gale na, fala kɛ ma we, nɛ a fo ngba soe ngamɛ kɛ ma nɛ kpa ɛ gɛ ngɔ ɛ do'do.

³⁶ Nɛ a tɔ̃ na: “Aa Baa mi, mɔ wia tɛ dɛ mɛnɔ vɛ̃, kɔ mɔ fó ngamɛ kɛ ma nɛ kpa mi gɛ do'do. Nɛ nde mɔ tɛ dɛ̀ ɔ nɛ kɛ mi kɔ̃a ni gɔ, mɔ dɛ́ ɔ nɛ kɛ mɔ kɔ̃a ni.”

³⁷ Nɛ a kpolo tɛ̃ a dɛ 'da Owi yambala mɛnɔ talɛ ni, nɛ nde wa ɔa yala do'do. Nɛ a sa mɔ hã Petro, nɛ a tɔ̃ hã a na: “Simɔ, mɔ ɔa yala nde? Mɔ wè mbe we kunu yala 'do sa kpo iko ni gɔ nde?” Nɛ a tɔ̃ 'bɔ hã wa na:

³⁸ “Nɛ tɛ ɔ̃ yala gɔ, nɛ sámbálá Gale, da dɛ kɔ sila nɛ ɔlɔ nɛ, kɔ nɛ dɛ́ 'dã mɔ gɔ. We duzu kɛ hi wele kɔ̃a we dɛ de mɔ, nɛ nde kili tɛ̃ a ma a mbɔkɔ.”

³⁹ Nɛ Yezu la 'bɔ, nɛ a ma ngɔ sambala Gale nɛ́ kpo kɛ sɔ ni.

⁴⁰ Nɛ a kpolo 'bɔ tɛ̃ a dɛ 'da wa nga, nɛ a kpa wa, nɛ nde wa ɔa 'bɔ yala, we kɛ wa kunu zi yala zãa ni. Na mɛ ni, wa zi 'bɔ do mbé we nu wa we tɔ̃ ma hã Yezu bina.

⁴¹ Kɔ a nɛa we gili tɛ̃ a fala talɛ kɛ, nɛ a tɔ̃ hã wa na: “Nɛ 'bana ɔ yala, do kpe tɛ nɛ fai nde? Ma wia ia. 'Da fala nɛ wia ia. Wa nɛ 'dɔlɔ mi Be 'da Wele dɛ kɔ̃ o'dã winɔ hã ni.

⁴² Nɛ kúlú ngɔ kɔ lɛ nɛ́, we kɛ wi nɛ 'dɔlɔ mi ni, a hɔa ia.”

Wa ba Yezu

⁴³ Yezu 'bana tɛ tɔ̃ tɔ̃a iko, nɛ Yudasi, mbe sanga Owi yambala mɛnɔ 'bu ngɔ wa bɔa ni, a hɔ do gba gili owinɔ kɛ onwa nganganɔ, do Owi be mbulanɔ, do okumunɔ wa tumba wa ni. Nɛ nde wa kala odɔ te do okɔya dɛ kɔ̃ wa.

⁴⁴ Mɛ ni nɛ nde Yudasi, wi 'dɔlɔ Yezu ni, a bia zi tɛlɛ tɛ kɛ a nɛ dɛ nɛ ni hã wa na: “Wi kɛ mi 'be sɛ a dɛ tɛ mi we fana a ni, nɛ nde wi a a. Nɛ nɛ bá a, nɛ nɛ lá do a, nɛ li nɛ sɔ̃ tɛ̃ a.”

⁴⁵ Nɛ Yudasi nɛa we hɔ nɛ, nɛ a nɛ ndĩi dɛ 'da Yezu, nɛ a tɔ̃ hã a na: “Wi be mɔ!” Nɛ a 'be a dɛ tɛ̃ a we fana a.

⁴⁶ Nɛ owinɔ ni wa te tɛ Yezu, nɛ wa ba a.

⁴⁷ Nɛ mbe wele kpo sanga winɔ zi di ni, a mana kɔya li foko nɛ haɔɔ, nɛ a 'bili zala mbe wi toe 'da gã nwa nganga ni fala kpo.

⁴⁸ Nɛ Yezu tɔ̃ hã wa na: “Gulu kɛ nɛ tɛa 'dɔkɔlɔ mi do okɔya do odɔ te we ba mi, ɔ nɛ kɛ mi a wi zũ ni we ge nde?

⁴⁹ Tũ kpo kpo, mi zi tɛ yɛnggɛ do sanga nɛ gɛ, tɛ be we kɔ Tɛmpɛloe, nɛ nɛ bà zi mi gɔ. Nɛ nde mɛnɔ ma la gɛ, takɔ wenɔ wa kɔma kɔ 'Buki 'da Gale ni, ma dɛ tɛ̃ ɛ.”

⁵⁰ Nɛ 'do nɛ, nɛ owi yambala mɛnɔ 'da Yezu wa yu vɛ̃, nɛ wa la a zu a kpo.

⁵¹ Nɛ mbe zagbãlã kpo nɛa 'dɔkɔlɔ Yezu, nɛ nde a gu tati a gbau tulu dɛ tɛ̃ a iko. Kɔ wa nɛa we ba a,

⁵² nɛ a hɔ kɔ tuli, nɛ a yu do kũlĩ tɛ̃ a.

Wa nɛa do Yezu dati owi 'bili wenɔ

⁵³ Wa ba Yezu, nɛ wa nɛ do a 'da gã nwa nganga, tɛ fala onwa nganganɔ, do okumunɔ, do Owi be mbulanɔ wa mba zi do li ngba wa ni.

⁵⁴ Nɛ Petro nɛa 'do Yezu, nɛ nde ngbala wa zi do a a nyɛla. Nɛ a le kɔ ngbo 'da gã nwa nganga, nɛ a dungu nù do owi zɔ mɔ nu ngboe tɛ ɔ we.

⁵⁵ Nɛ onwa nganganɔ, do owi 'bili wenɔ vɛ̃, wa ma ngɔ kũ we dɛ zu Yezu, takɔ wa kpa wala we gbɛ a, nɛ nde wa kpà mbe 'dã we dɛ ngɔ a kpo gɔ.

⁵⁶ Gɛnɛ kɔ Owele wena wa 'bili bɛlɛ dɛ ngɔ a, nɛ nde bɛlɛnɔ ni ma ló ngbɛ ɛ gɔ.

⁵⁷ Nɛ ombe wele wa kulu ngɔ, nɛ wa ma ngɔ 'bili bɛlɛ dɛ ngɔ a na:

⁵⁸ “Lɛ zila zi a tɛ tɔ̃ na, ɛ gbini sɛ Tɛmpɛloe, kɛ owinɔ wa dɛa zɛ́ ni, nɛ 'do tũ talɛ, nɛ ɛ dɛ sɛ mbé nɛ kɛ owele a wa dɛ ma gɔ ni.”

⁵⁹ Gɛnɛ kɔ wa tɔ̃a na mɛ ni, nɛ nde wenɔ 'da wa ma lo ngbɛ ɛ gɔ.

⁶⁰ Nɛ gã nwa nganga ni kulu ngɔ, nɛ a yolo dɛ gbogbo winɔ vɛ̃, nɛ a aka Yezu na: “Mɔ gésé nu we gɛ gɔ nde? Mɛ ngboo owinɔ gɛ wa da mɔ we nɛ ni a ge nde?”

⁶¹ Nɛ nde Yezu dungu fio, nɛ a gèsè nu we hã a kpo gɔ. Nɛ gã nwa ni aka 'bɔ a mbé nɛ na: “Mɔ a Mɛsiya, Be 'da Gale kɛ lɛ dɔnggɔ a gɛ nde?”

⁶² Nɛ Yezu gese hã a na: “Ĩi, wi a mi! Nɛ nɛ zɔ sɛ mi Be 'da Wele, nɛ nde mi dungu si ngɔ ngawili kɔ̃ Gale, kɛ a do nganda vɛ̃ ni. Nɛ nɛ zɔ sɛ mi tɛ sanga kutunɔ ngɔ gɛ.”

⁶³ Kɔ gã nwa nganga nɛa we zele ni, nɛ zã a nɔ̃lɔ̃, nɛ a ɛ̃ tulu tɛ̃ a, nɛ a na: “Lɛ nɛ fa 'bɔ mbé we tɔ̃ dɛ ngɔ a fa we ge nde?

⁶⁴ Nɛ zila dɛla kɛ a dã do Gale ni, kɔ nɛ lengge na ge nde?” Nɛ wa vɛ̃ wa 'bili 'dã we hã a na: “A wia do fio!”

⁶⁵ Nɛ ombe winɔ wa ma ngɔ tufu sa nu wa dɛ tɛ̃ a. Nɛ wa ɛnzɛ li a do tulu, nɛ wa umu kɔ̃ wa, nɛ wa zɛ a, nɛ wa na, a sa li wi zɛa a ni. Nɛ owi zɔ mɔ nu ngbonɔ, wa ba a, nɛ wa ma ngɔ zɛ a.

Petro kafa Yezu

⁶⁶ Do 'da fala ni, nɛ nde Petro 'bana zi dɛ li fanda kɔ ngboe nù nga. Nɛ mbe wuko wi toe 'da gã nwa ni hɔa,

⁶⁷ nɛ a zɔ Petro tɛ ɔ we, nɛ a soko a gbaa, nɛ a tɔ̃ hã a na: “Mɔ tɛ mɛ 'bɔ, mɔ zi fala nɛ kpo do Yezu, wi Nazarɛtɛ ni gɔ nde?”

⁶⁸ Nɛ Petro kafa na: “Mi ĩ̀ gulu kɛ mɔ tɔ̃ nu mɔ ni gɔ.” Nɛ a kulu ngɔ, nɛ a hɔ nza dɛ tɛ nu ngboe i. Kɔ a nɛa we hɔ nɛ ni, nɛ kɔla he mɔ.

⁶⁹ Nɛ wuke wi toe ni zɔ a, nɛ a ma 'bɔ ngɔ tɔ̃ hã owinɔ di ni na: “Wi gɛ a wi 'da Yezu!” Nɛ Petro kafa 'bɔ mbé nɛ na, ɛ ĩ̀ ti a gɔ!

⁷⁰ 'Do nɛ la be sĩ, nɛ owinɔ di ni ni wa tɔ̃ 'bɔ hã Petro na: “Mɔ a mbe kpo sanga winɔ ni gbãlã we. Mba gɔ, mɔ a wi Galile.”

⁷¹ Nɛ Petro ma ngɔ tɔ̃ na: “Fala kɛ mi 'bili bɛlɛ nde, nɛ Gale fɔmbɔ mi! Mi kana tɛ mi na, mi ĩ̀ ti wi nɛ sa li a gɛ gɔ.”

⁷² Nɛ ma nɛ 'bana dɛ nu a ni, nɛ kɔla he 'bɔ mbé mɔ. Ki ni di fala bɔa. Nɛ ta zu Petro gba ngɔ we Yezu tɔ̃a zɛ hã a na: “Dati kɛ na kɔla he mɔ fala bɔa ni, mɔ kafa sɛ mi gbaa fala talɛ na, mɔ ĩ̀ ti mi gɔ”, nɛ a ma ngɔ he nɛ.