MARKO 13 - WE NU GALE 1995

Yezu tɔ̃a na wa gbini sɛ tɔa Tɛmpɛloe

¹ Yezu nɛa we hɔ nza kɔ Tɛmpɛloe ni, nɛ mbe wi yambala mɛ 'da a kpo tɔ̃ hã a na: “Aa wi be mɔ, mɔ zɔ́ gba dia tɔa Tɛmpɛloe gɛ! Nɛ mɔ zɔ́ 'bɔ dia tanɔ wa dɛa do ma gɛ!”

² Nɛ Yezu gese hã a na: “Mɔ ɔngbɔ gba dia tɔa gɛ nde? Nɛ nde mɔ ĩ na do 'do, nɛ wa 'danga sɛ gba dia tɔa gɛ, nɛ gbãlã ta kpo 'báná sɛ ngɔ ngbɛ ɛ gɔ, ma gbini sɛ vɛ̃.”

Ngamɛnɔ kɛ ma hɔ sɛ dati a ndɔti nùi ni

³ Nɛ Yezu dungu nù dɛ ngɔ kala Olivɛ, kɛ ma ka mɔ dɛ li ngbɛ ɛ do Tɛmpɛloe ni. Wa zi dɛ di ni do Petro, Zake, Yoanɛ do Andre. Nɛ wa aka a na:

⁴ “Mɔ tɔ̃́ hã lɛ sɛ! Mɛnɔ mɔ tɔ̃a we nɛ gɛ, ma dɛ sɛ tɛ̃ ɛ soe ki nge nde? Nɛ mɛ ma be sɛ na, ngba soe ni kɔla ia ni a ge nde?”

⁵ Nɛ Yezu ma ngɔ tɔ̃ hã wa na: “Li nɛ sɔ̃́ na, da dɛ kɔ wele ɔ́lɔ́ nɛ gɔ.

⁶ We duzu kɛ Owele wena wa hɔ sɛ do zu li mi, nɛ wa tɔ̃ sɛ na lo a Mɛsiya! Nɛ wa ɔlɔ sɛ owele wena.

⁷ Kɔ fala kɛ nɛ ma sɛ ngɔ zele sako bolonɔ kɛ winɔ wa tɛ bi nɛ, do kɛnɔ wa tɛ 'dafa we bi nɛ ni, nɛ nɛ tɛ dɛ̀ kili gɔ. We kɛ ma wia na, mɛnɔ ni ma dɛ tɛ̃ ɛ. Kɔ gɛnɛ kɔ ma dɛ tɛ̃ ɛ, nɛ nde mɛ sɛ a ndɔti nùi a ni gɔ.

⁸ Nɛ do 'da fala ni, nwa kpo a kulu sɛ ngɔ do owinɔ 'da a, nɛ a bi do nwa kɔ gele le. Nɛ winɔ tɛ ngɔ nù kpo, wa bi sɛ kpo ngba wa. Nùi vɛ̃ ma tana sɛ falanɔ kpi do kpi, nɛ gba wɔ ma te sɛ. Nɛ nde mɛnɔ ni vɛ̃ sɛ a ndo nyanga ngamɔ iko.

⁹ “Nɛ ma wia na, nɛ ngboo ni, li nɛ sɔ̃́, we duzu kɛ Owele wa kala sɛ nɛ, nɛ wa nɛ do nɛ kɔ tɔa mbulanɔ dati Owi 'bili wenɔ, nɛ wa zɛ sɛ nɛ do zufa. Nɛ wa a sɛ nɛ dati Onwanɔ, do ogã winɔ, we kɛ nɛ a owinɔ 'da mi, nɛ nɛ tɔ̃ sɛ we 'da mi hã wa.

¹⁰ Nɛ nde ma wia na, Dia Sakoe kpa zala owinɔ nyanga nza gɛ dati vɛ̃, sɛ nɛ nùi 'danga de.

¹¹ Kɔ fala kɛ wa kala nɛ we a nɛ dati Owi 'bili ngbangganɔ, nɛ nɛ tɛ bì tɛ nɛ na, lo nɛ tɔ̃ sɛ na ge nde gɔ. We kɛ do 'da fala ni, wi wele sɛ we, wi a nɛ gɔ, nɛ nde Hi Wi Santo a e sɛ wila we nu nɛ, nɛ nɛ tɔ̃ ma.

¹² Owele wa 'dɔlɔ sɛ onya wa ngboo hã ogele wele na wa gbɛ wa. Nɛ obaa be wa dɛ sɛ 'bɔ kpasaa na mɛ ni do obenɔ 'da wa. Nɛ obe wa kifi sɛ li wa dɛ tɛ Owele wa, nɛ wa 'dɔlɔ wa hã ogele wele na wa gbɛ wa.

¹³ Nɛ winɔ vɛ̃ wa sɛnɛ sɛ nɛ we duzu mi. Kɔ wele kɛ sila a nɔ tɛ kɔ̃a we 'da a gbaa we hɔ ndɔti nɛ, nɛ Gale a kpasa sɛ a.

Sɔkpɔ tala mɔ sape

¹⁴ “Nɛ zɔ sɛ sɔkpɔ tala mɔ sape tɛ fala kɛ ma wè sɔ we hɔ te'de gɔ ni. (Wi kɛ a tɔlɔ we gɛ, nɛ ma wia na, a fa gulu nɛ.) Nɛ winɔ kɛ wa sɛ ngɔ nù Yude ni, ma wia na, wa yu dɛ ngɔ kalanɔ i.

¹⁵ Wele kɛ a dungu ngɔ tɔa i ni, dɔ a zĩ́lĩ́ we kala tolenɔ kɔ tɔa 'da a, sɛ nɛ a yu de gɔ.

¹⁶ Nɛ wele kɛ safɔ i ni, dɔ a sí gbaa le nga we ba tuli 'da a, sɛ nɛ a yu de gɔ.

¹⁷ “Do ngba soe ni, 'bako sɛ wena we wukonɔ kɛ wa do zã, do wanɔ wa tɛ ɔmɔ be ni.

¹⁸ Kɔ ma wia na, nɛ aka Gale na, da dɛ kɔ mɛnɔ ni hɔ́ do zɔlɔ li kolo gɔ.

¹⁹ Mba gɔ, do ngba soenɔ ni, gã 'bako sɛ wena. Yolo do kɛ Gale dɛa zi do nùi ni, gbaa we hɔ sɔɛ gɛ, 'bako ɔ na mɛ ni dɛ̀ zi mbe tɛ̃ ɛ gɔ, nɛ ma dɛ́ sɛ 'bɔ tɛ̃ ɛ do 'do gɔ.

²⁰ Kɔ Nwa Gale tɛ 'bìlì sɔ mbe nu tũnɔ ni gɔ, nɛ nde wele kpo kpásá sɔ gɔ. Kɔ a 'bili mbe nu nɛ, we kɛ a lingga do owinɔ kɛ a saka zɛ́ wa ia ni.

²¹ “Kɔ fala kɛ wele hɔ, hã a tɔ̃ hã nɛ na: ‘Nɛ zɔ́, Mɛsiya a tɛ dɛ!’, tabi ‘Mɛsiya a i mɔ ni!’, nɛ nɛ tɛ kɔ̃̀ gɔ.

²² We duzu kɛ ombe wele wa hɔ sɛ, nɛ wa dɛ oɔngbamɔ do ogba sɔ̃ mɔ we ɔkɔlɔ winɔ na, lo a Mɛsiya, tabi lo a owi gba olo nu Gale. Nɛ mbe gɔ, hã ma we, nɛ wa ɔlɔ sɛ winɔ kɛ Gale saka wa ni.

²³ Kɔ li nɛ sɔ̃́, we kɛ mi tɔ̃a hã nɛ dati ia.

Yezu a tɛ sɛ 'bɔ

²⁴ “Nɛ 'do ngamɛnɔ ni, nɛ li wese ma tũ sɛ mbĩi, nɛ zɛkɛ to sɛ 'bɔ gɔ.

²⁵ Nɛ sɔlanɔ wa ala sɛ dɛ nù nga, nɛ ngawi 'da mɛnɔ li ngɔ gɛ, ma vĩ sɛ zu ngbɛ ɛ.

²⁶ Nɛ 'do nɛ vɛ̃, nɛ wa zɔ sɛ mi Be 'da Wele, nɛ nde mi hɔa do ngawi, do dɔ̃lɔ̃ li vɛ̃ dɛ sanga kutunɔ.

²⁷ Nɛ mi tombo sɛ anzɛnɔ, nɛ wa yɛnggɛ nyanga nza gɛ vɛ̃, we ngɛmɛ li owinɔ kɛ Gale saka zɛ́ wa ia ni.

Yezu bia we ngɔ te figɛ

²⁸ “Te figɛ be mɔ hã nɛ, kɔ nɛ yámbálá ma sɛ! Ngba soe kɛ ombé gbakɔ̃ nɛ ma kunu, hã nwá nɛ 'bɔ, nɛ nɛ ĩ na, zɔlɔ lì kolo kɔla ia.

²⁹ Na mɛ ni, fala kɛ nɛ zɔ mɛnɔ mi tɔ̃a sɔ we nɛ ni tɛ dɛ tɛ̃ ɛ, nɛ nɛ ĩ sɛ na, mi Be 'da Wele, mi kɔla tɛ hɔ nɛ ia.

³⁰ Mi tɔ̃ hã nɛ do gbãlã we na, mɛnɔ ni ma dɛ sɛ tɛ̃ ɛ, nɛ nde mbe winɔ sɔɛ gɛ wa 'bana nza.

³¹ Li nza do nùi ma 'danga sɛ, nɛ nde we nu mi ma 'bana sɛ fai.

Gale zu a kpo a ĩ ti tũi kɛ nùi nɛ 'danga nɛ ni

³² “Nɛ nde we duzu ngba soe ni, do sa kɛ ma dɛ sɛ do tɛ̃ ɛ ni, wele kpo ĩ̀ ma gɔ. Gɛnɛ kɔ anzɛnɔ li nza i, do mi ngboo kɛ mi a Be 'da Wele ni, mi ĩ̀ 'bɔ ma go. Nɛ nde wi a Baa mi zu a kpo a ĩ ma.

³³ Kɔ li nɛ sɔ̃́, nɛ nɛ tɛ ɔ̀ yala gɔ, we kɛ nɛ ĩ̀ ti ngba soe ma dɛ sɛ do tɛ̃ ɛ ni gɔ.

³⁴ Ma ɔ sɛ nɛ lɛnggɛ 'da mbe wi wili kpo, a nɛa we la gɛnɛ, nɛ a la nu tɔa 'da a hã owi dɛa tonɔ 'da a, nɛ a kɛ̃ to hã wele do wele na a dɛ ma. Nɛ a tɔ̃ hã wi zɔ mɔ nu ngboe na, li a ɔ tɛ nu tɔa, nɛ a la.

³⁵ Ki ni, ma wia na li nɛ sɔ̃, we kɛ nɛ ĩ̀ gɔ, tabi wele tɔa a si sɛ soe ki nge nde? Tabi do gɛ̃a wese, tabi do sanga tu nde? Tabi do kuti hiamɔ kɔla, tabi do titole nde?

³⁶ Kɔ fala kɛ a hɔ do gbanga nɛ nde, nɛ dɔ a kpá nɛ tɛ ɔ yala iko gɔ.

³⁷ We mi tɔ̃a hã nɛ gɛ, mi tɔ̃ 'bɔ ma hã owinɔ vɛ̃ na, li wa sɔ̃́!”