MARKO 12 - WE NU GALE 1995

Gba we ngɔ owi dɛ to fɔ

¹ 'Do ki ni, nɛ Yezu ma ngɔ be we hã wa do ogba we na: “Mbe wele kpo, a wa zi fɔ mɔ́ a, nɛ a mi do vinɔ. Nɛ a dɛ ngbo dɛ tɛ nɛ vɛ̃, nɛ a zã kɔ̃ we kpĩlĩ wala vinɔnɔ dɛ kɔ nɛ, nɛ a dɛ 'bɔ gba'da dɛ nu fɔɛ we zɔ do mɔ tɛ nɛ. Nɛ 'do nɛ, nɛ a e to fɔɛ ni dɛ kɔ̃ owi dɛa tonɔ na wa dɛ, nɛ lo gɔnɔ sanga wala nɛ do wa. Nɛ a la gɛnɛ.

² “Kɔ ma hɔa ngba soe 'bi wala nɛ, nɛ a tombo mbe wi to mɔ́ a kpo hã Owi dɛa tonɔ ni na, a kala kɛ 'dɛ ɛ si do ma hã ɛ.

³ Wi toe ni nɛa we hɔ i mɔ, nɛ wa ba a, nɛ wa zɛ a gbaa, nɛ wa gese a do wila kɔ̃ a.

⁴ Nɛ wele fɔɛ tombo mbé wele hã wa, nɛ wa ba 'bɔ wele ki ni, nɛ wa gɔmɔ zu a, nɛ wa dã a vɛ̃.

⁵ Nɛ wele fɔɛ tumba 'bɔ gele wi to hã wa, nɛ wa ba a ni, nɛ wa gbɛ a. 'Do wele ki ni, nɛ a tombo 'bɔ gba dɔa owi to, nɛ wa dɛa do wa ɔ nɛ kɛ 'da wanɔ sɔ dati ni. Wa zɛa ombe, nɛ wa gbɛ ombe sanga wa ni.

⁶ Nɛ wele fɔɛ 'bana tati a do bulu be 'da a kpo, kɛ a kɔ̃a gɛnɛ a nɛ ge nde ni iko. Nɛ do sɔkpɔ nɛ vɛ̃, nɛ a tombo be 'da a hã wa, nɛ a tɔ̃ na, fala kɛ wa zɔ be 'da ɛ, nɛ wa dɔnggɔ sɛ a.

⁷ Kɔ owi dɛ to fɔɛ wa nɛa we zɔ be 'da a, nɛ wa ma ngɔ tɔ̃ dɛ sanga tɛ ngba wa na: ‘Nɛ zɔ́ be wele fɔɛ, kɛ a ba sɛ fɔɛ olo baa a ni, a a i mɔ ni. Lɛ nɛ́, kɔ lɛ gbɛ́ a, nɛ lɛ ba sɛ fɔɛ gɛ do mɔ́ lɛ.’

⁸ Nɛ wa ba a, nɛ wa gbɛ a, nɛ wa da wɔlɔ a zamɔ.”

⁹ Nɛ Yezu aka wa na: “Kɔ wele fɔɛ a dɛ sɛ do Owi dɛ tonɔ ni nɛ nde? A tɛ sɛ, nɛ a gbɛ wa, nɛ a ba fɔɛ 'da a we hã ma hã ogele wi dɛa to.

¹⁰ Nɛ tɔ̀lɔ̀ mbe we kɛ wa kɔma kɔ 'Buki 'da Gale ni gɔ nde? Wa kɔma na: ‘Ta kɛ Owi dɛ tɔanɔ wa da zi ma nù ni, ma hɔa ta bɛlɛduma tɔa.

¹¹ Wi dɛa mɛ ni, wi a Nwa Gale, nɛ mɛ a ɔngbamɔ gbali lɛ.’ ”

¹² Nɛ onwa Yudanɔ wa zila ni, nɛ wa ĩ na, Yezu tɔ̃ we ni hã lo, nɛ wa fa wala we ba a. Nɛ nde wa dɛa kili gba gili winɔ, nɛ wa bà a gɔ, nɛ wa la iko.

Wa aka Yezu ngɔ futa tako

¹³ 'Do ki ni, nɛ wa tombo mbe Fariziɛnɔ do winɔ 'da Herodɛ hã Yezu we le ti nu a.

¹⁴ Nɛ winɔ ni wa tɛa, nɛ wa aka a na: “Wi be mɔ, lɛ ĩ na, mɔ tɔ̃ gbãlã we fai, nɛ mɔ dɛ́ kili wele gɔ, nɛ mɔ sɔ́nzɔ́ do mɔ mɔ́ wele gɔ. Nɛ nde mɔ be tati a wala kɛ ma a bɔlɔ li Gale ni. Kɔ mɔ tɔ̃ hã lɛ sɛ! Mbula 'da lɛ kɔ̃a na, lɛ futa tako hã gã nwa ngɔ nù Roma, tabi lɛ tɛ fùtà gɔ nde? Lɛ wia we futa nɛ, tabi lɛ wè tɛ futa nɛ gɔ nde?”

¹⁵ Nɛ nde Yezu ĩ sɔ ti 'dã linggamɛnɔ 'da wa ia, nɛ a tɔ̃ hã wa na: “Gulu kɛ nɛ le ti sila mi we ge nde? Nɛ bá mbe gbãlã mbili hã mi, kɔ mi zɔ́ sɛ.”

¹⁶ Nɛ wa ba ma hã a. Nɛ a aka wa na: “Kɛ li mbili gɛ, mɛ a kpongbolo zu wio nde? Nɛ kɛ wa kɔma ti nɛ gɛ, mɛ a li wio nde?” Nɛ wa gese hã a na: “Mɛ a kpongbolo zu gã nwa ngɔ nù Roma.”

¹⁷ Nɛ Yezu tɔ̃ hã wa na: “Na mɛ ni, nɛ gésé mɛ 'da nwa ngɔ nù Roma hã a, nɛ nɛ hã kɛ 'da Gale tɛ mɛ 'bɔ hã Gale.” Yezu nɛa we gese hã wa na mɛ ni, nɛ ma hã ɔngbamɔ hã wa wena.

Wa aka Yezu ngɔ tunu kɔ fio

¹⁸ Nɛ ombe Sadisiɛnɔ wa tɛa 'bɔ 'da Yezu. (Sadisiɛnɔ wa a owinɔ kɛ wa tɔ̃ na, wele fe ia, nɛ nde a túnú 'bɔ kɔ fio gɔ ni.) Nɛ wa aka a na:

¹⁹ “Wi be mɔ, Mɔizɛ kɔma zɛ́ mbula hã lɛ na, fala kɛ wele kpo do nya a, kɔ nya a ni fe, nɛ nde a kò do wuke 'da a gɔ nde, nɛ ma wia na, nya a wele kɛ 'bana ni ba wuke olo a, takɔ a ko be hã a.

²⁰ Kɔ mɔ zɔ́, ombe wi wili sambo, wa vɛ̃ a onya wi dɛ kɔ zã kpo. Nɛ kuti be ba wuko, nɛ a kò do a gɔ, nɛ a fe.

^21-22 Nɛ wele kɛ a hɔa dɛ 'do wi fio ni, a ba wuke olo nya a, nɛ a kò 'bɔ do a gɔ, nɛ a fe. Nɛ hɔ dɛ 'do wele ki ni ba 'bɔ wuke ni, nɛ a tɛ kò do a gɔ, nɛ a fe 'bɔ. Ní do ní gbaa, nɛ wa fia sambo nɛ vɛ̃, nɛ nde wa kò mbe be kpo do wuke ni gɔ. Nɛ 'do kɛ wa fia vɛ̃ ni, nɛ wuke fe tɛ mɛ 'bɔ.

²³ Ní a do ngba soe kɛ ofionɔ wa tunu sɛ kɔ fio ni, nɛ wuke ni sɛ a wuke 'da wio nde? We duzu kɛ wa sambo nɛ vɛ̃, wa zi a wili a!”

²⁴ Nɛ Yezu gisa hã wa na: “Nɛ ti kɛ nɛ tɔ̃ gɛ gɔ. Nɛ yɔa, we duzu kɛ nɛ ĩ̀ ti 'Buki 'da Gale gɔ, nɛ nɛ ĩ̀ 'bɔ ti ngawi 'da a gɔ.

²⁵ Do ngba soe kɛ ofionɔ wa tunu sɛ kɔ fio ni, nɛ nde ba ngba wi sɛ bina, nɛ winɔ vɛ̃ wa ɔ sɛ nɛ anzɛnɔ 'da Gale tɛ li nza i, kɛ wa bá ngba wa gɔɛ ni.

²⁶ Nɛ tɔ̀lɔ̀ mbe we kɛ Mɔizɛ kɔma zɛ́ ma ngɔ fionɔ kɛ wa tunu sɛ kɔ fio ni gɔ nde? Gale wila zi we hã Mɔizɛ kɔ nyɛa we tɛ kɔ gisa nwá, nɛ a tɔ̃ na, ɛ a Gale 'da Abrahama, do Izaka, do Yakɔbɔ.

²⁷ Ĩ na, Gale a a Gale 'da ofio gɔ, nɛ nde a Gale 'da owinɔ wa do tunu li wa ni. Na mɛ ni, nɛ, Osadisiɛnɔ, nɛ ĩ́ na, nɛ yɔa gã wena.”

Mbula kɛ ma nɛa ngɔ ngbɛ ɛ ni

²⁸ Nɛ mbe kpo sanga owi be mbulanɔ a zila we kɛ wa tɔ̃ zi ma ni, nɛ a ĩ na Yezu gisa nu we hã Sadisiɛnɔ de wena. Nɛ a nɛ 'da Yezu i, nɛ a aka a na: “Mbula kɛ ma nɛa ngɔ ngbɛ ɛ ni a ki nge nde?”

²⁹ Nɛ Yezu gisa hã a na: “Kuti mbula ma nɛa ngɔ ngbɛ ɛ vɛ̃ ni, mɛ a kɛ gɛ: ‘Obe Israɛlɛ, nɛ zélé! Nwa, a zu a kpo a Nwa Gale 'da lɛ.

³⁰ Ma wia na, mɔ kɔ̃ gɛnɛ Nwa Gale 'da mɔ do sila mɔ vɛ̃, mɔ hã tɛ mɔ hã a, nɛ mɔ dɛ to hã a do hã zã 'da mɔ vɛ̃, do ngawi 'da mɔ vɛ̃.’

³¹ Nɛ bɔa mbula kɛ ma wia kɔ̃ do ki ni, mɛ a kɛ ma tɔ̃a na: ‘Mɔ kɔ̃́ gɛnɛ ngba mɔ ɔ nɛ kɛ mɔ kɔ̃a do gɛnɛ kili tɛ mɔ wele nɛ ni.’ Nɛ mbé mbu nɛ ngɔ mbulanɔ bɔa ni bina.”

³² Nɛ wi be mbula ni tɔ̃ hã Yezu na: “Wi be mɔ, mɔ tɔ̃a gbãlã we. Nwa Gale zu a kpo iko, fo mbé gele gale 'bɔ olo a bina.

³³ Kɔ ma wia na, wele kɔ̃ gɛnɛ Gale do sila ɛ vɛ̃, nɛ a hã tɛ̃ a hã a, nɛ a dɛ to hã a do ngawi 'da a vɛ̃. Nɛ ma wia 'bɔ na, wele kɔ̃ gɛnɛ ngba a ɔ nɛ kɛ a kɔ̃a do kili tɛ̃ a wele nɛ ngboo ni. Ki ni ma dia nɛa ngɔ dɔ sa'de we dɔnggɔ do Gale, tabi hã gele dɔnggamɔ hã a.”

³⁴ Nɛ Yezu nɛa we zɔ na, a gisa nu nɛ do hã zã ni, nɛ a tɔ̃ hã a na: “Le nwa 'da Gale nyɛlɛ do mɔ gɔ.” Nɛ 'do ki ni, mbé wele zi 'bɔ do ngawi we aka Yezu do lɛnggɛ bina.

Mɛsiya nɛa ngɔ Davidi

³⁵ 'Da fala kɛ Yezu zi tɛ be wenɔ 'da a kɔ tɔa Tɛmpɛloe ni, nɛ a aka na: “Kɔdɛ kɛ owi be mbulanɔ wa tɔ̃ na, Mɛsiya a be zã Davidi iko ni nɛ nde?

³⁶ Mba gɔ, Hi Wi Santo lia zɛ́ kɔ Davidi, nɛ a tɔ̃ na: ‘Nwa Gale tɔ̃a hã Nwa 'da mi na, mɔ tɛ́, hã mɔ dungu tɛ ngɔ ngawili kɔ̃ mi, kɔ mi a owi sɛnɛ mɔ nù ti nyanga mɔ.’

³⁷ Kɔ Davidi ngboo a sa zi li Mɛsiya na, a a Nwa 'da ɛ ni, nɛ kɔdɛ kɛ Mɛsiya nɛ ɔ tati a be zã Davidi iko ni nɛ nde?” Nɛ ogili winɔ wa zila Yezu, nɛ wa dɛ yangga wena.

Yezu bia we ngɔ owi be mbulanɔ

³⁸ Nɛ a bia hã wa na: “Li nɛ sɔ̃́ tɛ owi be mbulanɔ, kɛ wa kɔ̃a we he'de du tulu dɔ̃lɔ̃ li, nɛ wa yɛnggɛ do ma, takɔ winɔ wa gu nù ti wa, nɛ wa hã balɛ hã wa do li gba fandanɔ ni.

³⁹ Wa le kɔ tɔa mbulanɔ, nɛ wa kɔ̃a na, lo dungu ngɔ kpongbo nwa do dati winɔ vɛ̃. Wa hɔ tɛ gbalimɔ, nɛ wa kɔ̃a na, wa hã dia fala dungu hã lo.

⁴⁰ Wa ɔlɔ Owi fio wilinɔ, nɛ wa kala mɛnɔ 'da wa vɛ̃, nɛ wa sambala dulu wena, we ɔlɔ do li winɔ. Nɛ nde wa kpa sɛ gã etumbu olo nɛ.”

Wi fio wili hã mbili hã Gale

⁴¹ Nɛ Yezu dungu nu kɔ tɔa Tɛmpɛloe, dɛ dati sanduku da do mbili. Nɛ a zɔ tɛlɛ tɛ kɛ owinɔ wa tɛ da do mbilinɔ ni. A zɔa gba gili owi kpamɛnɔ, nɛ nde wa da mbilinɔ 'da wa gã wena.

⁴² Nɛ mbe wi fio wili kpo, a a wi sã, a hɔa tɛ mɛ 'bɔ, nɛ a da bi gbãlã mbili bɔa.

⁴³ Nɛ Yezu sa mɔ hã owi yambala mɛnɔ 'da a, nɛ a tɔ̃ hã wa na: “Mi tɔ̃ hã nɛ do gbãlã we na, wi fio wili gɛ, a da mbili nɛa ngɔ tala owinɔ vɛ̃.

⁴⁴ Mba gɔ, owinɔ ni wa hã kɛnɔ 'da wa, mɛ a nu mbili kɛ wa do to dɛ do ma bina ni. Nɛ nde wi fio wili gɛ, gɛnɛ kɔ a a wi sã ni, nɛ a hã tala mbili 'da a kɛ sɔ a nɛ kpasa do ma ni vɛ̃.”