MARKO 11 - WE NU GALE 1995

Yezu lia kɔ le Yeruzalɛmɛ

¹ Wa nɛa we kɔlɔ do Yeruzalɛmɛ, nɛ wa hɔ tɛ ole Bɛtfaze do Betani, kɛ ma ti nyanga kala Olivɛ ni. Nɛ Yezu sa mɔ hã owi yambala mɛnɔ 'da a bɔa, nɛ a tɔ̃ hã wa na:

² “Nɛ nɛ́ kɔ le dati gɛ. Kɔ nɛ hɔ i mɔ, nɛ nɛ kpa sɛ be punda kpo, wele tɛ ku kuti ngɔ a gɔ, nɛ wa kpua a kpua. Nɛ nɛ yálá a tɛ do a hã mi.

³ Kɔ fala kɛ wele aka nɛ na: ‘Gulu kɛ nɛ dɛ ni we ge nde?’ Nɛ nɛ tɔ̃ hã wi ni na, wi tumba we a wi a Nwa, nɛ a gese sɛ a dɔ̃ iko.”

⁴ Nɛ owi yambala mɛnɔ wa nɛa, nɛ wa hɔ i mɔ, nɛ wa zɔ be punda kɛ wa kpua a dɛ kɛ zã nu tɔa, dɔ̃ɔ do li wala. Nɛ wa ma ngɔ yala a.

⁵ Nɛ mbe winɔ di ni ni wa aka wa na: “Dɛa nɛ nde? Nɛ yala a we ge nde?”

⁶ Nɛ wa gisa hã wa ɔ nɛ kɛ Yezu tɔ̃a sɔ ni. Nɛ winɔ ni wa kɔ̃a.

⁷ Nɛ owi yambala mɛnɔ wa ba punda, nɛ wa nɛ do a hã Yezu. Nɛ wa kala gba tulunɔ 'da wa, nɛ wa gu li 'do a, nɛ Yezu dungu dɛ ngɔ nɛ.

⁸ Nɛ winɔ wena wa ma ngɔ a gba tulunɔ 'da wa dɛ ngɔ wala. Nɛ ombe wa gbini nwá te kɔ fɔnɔ, nɛ wa ma ngɔ a li wala dati a.

⁹ Nɛ mbe winɔ wa la dati, nɛ mbe wa kpe do 'do Yezu, nɛ wa he mɔ na: “Hozana! Gale kpá dɔ̃lɔ̃ li! E kɔ Nwa Gale wele nu ɛ tɛ wi kɛ a tɛ do zu li a ni.

¹⁰ E kɔ a wele nu a tɛ dɛa to nwa 'da wi kɛ a tɛ tɛ nɛ ni. Mɛ a dɛa to nwa olo baa lɛ Davidi. Hozana! Gale kɛ a li nza i ni kpá dɔ̃lɔ̃ li!”

¹¹ Nɛ Yezu hɔa Yeruzalɛmɛ, nɛ a le kɔ tɔa Tɛmpɛloe, nɛ a ma ngɔ soko mɛnɔ kɔ nɛ ni vɛ̃. Nɛ a hɔ nza fala nɛ kpo do Owi yambala mɛnɔ 'da a 'bu ngɔ wa bɔa ni, nɛ wa la dɛ Betani, we duzu kɛ wese gɛ̃a zi ia.

Yezu fɔmba te figɛ

¹² Fala nɛa we sa nɛ, nɛ wa kulu ngɔ Betani, nɛ wa la, nɛ nde wɔ ba zi Yezu wena.

¹³ Nɛ a nɛ ka mɔ, nɛ a zɔ te figɛ, kɛ nwá nɛ 'bɔ wena. Nɛ a nɛ dɛ ti nɛ we zɔ na, ɛ kpa sɛ tabi mbe wala nɛ nde. Kɔ a nɛa we kɔlɔ do ma, nɛ nde fo wala nɛ bina, mɛ tati a nwá nɛ iko, we duzu kɛ zɔlɔ wala nɛ tɛ wè gɔ.

¹⁴ Nɛ a fɔmba te ni na: “Mɔ te gɛ, wele nyɔ́ngɔ́ sɛ 'bɔ wala mɔ fala kpo gɔ!” Nɛ Owi yambala mɛnɔ wa zila we ni.

Yezu nɛa kɔ Tɛmpɛlo

¹⁵ Wa hɔa tɛ Yeruzalɛmɛ i, nɛ Yezu le kɔ tɔa Tɛmpɛloe, nɛ a kpa owinɔ wa be golenɔ 'da wa di ni ni, mba do owi oso golenɔ, nɛ a ndaka wa dɛ nza. Nɛ a ili mɛsanɔ 'da Owi kpolo mbilinɔ, do mɔ dungu 'da Owi be gole pizɔ̃nɔ, nɛ a fi ma nù.

¹⁶ Nɛ a bɛ̃ na, wele kpo tɛ là 'bɔ do tole do kɔ ngboe ni gɔ.

¹⁷ Nɛ a ma ngɔ be we hã winɔ na: “Nɛ tɔ̀lɔ̀ mbe olo nu Gale kɔ 'Buki 'da a na, wa sa sɛ li tɔa 'dɛ ɛ na, mɛ a tɔa kɛ owinɔ nyanga nza gɛ vɛ̃ wa dɔnggɔ sɛ ɛ kɔ nɛ ni gɔ nde? Nɛ nde nɛ, nɛ kifi ma do fala usu tɛ wi mɔ́ Owi zũ.”

¹⁸ Onwa nganganɔ do Owi be mbulanɔ, wa nɛa we zele ní, nɛ wa ma ngɔ fa wala we gbɛ a. Mba gɔ, kili a ba zi wa wena, we duzu kɛ owinɔ wa ɔngbɔ bia wenɔ 'da a wena.

¹⁹ Kɔ wese nɛa we gɛ̃ nɛ, nɛ Yezu do Owi yambala mɛnɔ 'da a, wa hɔa nza kɔ gã le ni do'do.

Te figɛ kula

²⁰ Fala sa titole belee, nɛ wa la do li wala zɛ olo wa ni, nɛ wa zɔ te figɛ ni, nɛ nde ma kula ngaɔɔ gbaa do oliã nɛ vɛ̃.

²¹ Nɛ Petro zɔa ní, nɛ tɛ zu a gba ngɔ we zɛ Yezu tɔ̃a ni, nɛ a na: “Wi be mɔ, mɔ kana zɛ nu mɔ tɛ te gɛ, kɔ mɔ zɔ́, ma kula do'do.”

²² Nɛ Yezu tɔ̃ hã Owi yambala mɛnɔ 'da a na: “Ma wia na, nɛ ɔ do kɔ̃a we dɛ 'da Gale.

²³ Mi tɔ̃ hã nɛ do gbãlã we na, wi kɛ a tɔ̃ hã kala gɛ na, mɔ fó tɛ mɔ dɛ do'do, kɔ mɔ té 'dɔ gba lì, kɔ fala kɛ wi ni ɔ̃ do kafi gɔ, kɔ a kɔ̃ do kɔ sila a vɛ̃ na, ma dɛ sɛ tɛ̃ ɛ, nɛ Gale a dɛ sɛ ma hã a.

²⁴ We duzu ma, mi tɔ̃ hã nɛ na, fala kɛ nɛ sambala Gale we gɔ mɔ kɔ̃ a, nɛ nɛ kɔ̃́ do kɔ sila nɛ vɛ̃ na, nɛ kpa ma ia. Kɔ nɛ dɛ ni, nɛ Gale a hã sɛ ma hã nɛ.

²⁵ Kɔ fala kɛ wele kɔ̃ we sambala Gale, kɔ a 'bana do mãlã ngba a kɛ a dɛ̀ a de gɔ ni, nɛ ma wia na, a mbɔkɔ wi ni ngɔ 'da mɛ 'da a, sɛ nɛ Baa a kɛ li nza i, a mbɔkɔ sɛ tɛ mɛ 'bɔ a de. [

²⁶ Kɔ fala kɛ nɛ mbɔ̀kɔ̀ ngba nɛ ngɔ dã mɛ 'da wa gɔ, nɛ nde Baa nɛ kɛ li nza i, a mbɔ́kɔ́ sɛ tɛ mɛ 'bɔ nɛ gɔ.]”

Yezu kpa ngawi dɛa to nwa 'da a do nde?

²⁷ Wa hɔa 'bɔ mbé nɛ Yeruzalɛmɛ, nɛ Yezu tɛ yɛnggɛ kɔ tɔa Tɛmpɛloe. Nɛ onwa nganganɔ, do Owi be mbulanɔ, do okumunɔ wa tɛa,

²⁸ nɛ wa aka a na: “Mɔ dɛ mɛnɔ gɛ do ngawi 'da wio nde? Wi tumba mɔ we dɛ ma a wio nde?”

²⁹ Nɛ Yezu gese hã wa na: “Mi kɔ̃a tɛ mɛ 'bɔ we aka nɛ do we kpo. Kɔ nɛ gese nu nɛ hã mi do'do, sɛ nɛ mi sa sɛ li wi kɛ a tumba mi we dɛ mɛnɔ gɛ hã nɛ de.

³⁰ Mi aka nɛ na, wi tumba zi Yoanɛ, wi batisa winɔ a wio nde? Wi zi a Gale, tabi wi zi a Owele nde? Nɛ gésé nu ma hã mi!”

³¹ Nɛ wa ma ngɔ tɔ̃ dɛ sanga tɛ ngba wa na: “Fala kɛ lɛ gese na: ‘Wi zi a Gale a tumba a,’ nɛ a tɔ̃ sɛ hã lɛ na: ‘Kɔ gulu kɛ nɛ kɔ̃̀ zi gɛnɛ a gɔ we ge nde?’

³² Kɔ lɛ gese 'bɔ na: ‘Wi zi a Owele hã wa tumba a’, nɛ ma wé sɛ gɔ.” Mba gɔ, wa dɛa kili winɔ, we kɛ winɔ ni wa kɔ̃a zi na, Yoanɛ a ngbongbo wi gba olo nu Gale.

³³ Na mɛ ni, nɛ wa gisa hã Yezu na: “Lɛ ĩ̀ gɔ.” Nɛ a tɔ̃ hã wa na: “Ní a mi sá sɛ tɛ mɛ 'bɔ li wi kɛ a tumba mi we dɛ do mɛnɔ gɛ ni hã nɛ gɔ.”