MARKO 10 - WE NU GALE 1995

Yezu bia we ngɔ bí ngba wi

¹ Nɛ Yezu kulu ngɔ di ni, nɛ a la dɛ ngɔ nù Yude. 'Do nɛ, nɛ a kũ dɛ kulu lì Yɔrdanɛ i. Nɛ gba gili Owele wa tɛa 'bɔ 'da a, nɛ a ma ngɔ be we nu Gale hã wa, ɔ nɛ kɛ a dɛ ma fai ni.

² Nɛ ombe Fariziɛnɔ wa tɛa 'da a, takɔ wa yamba a. Nɛ wa aka a na: “Mbula 'da lɛ hã wala hã wele na, a bɛ̃ kɛnɛ a nde?”

³ Nɛ Yezu gese na: “Mɔizɛ hã zɛ́ mbula hã nɛ na ge nde?”

⁴ Nɛ wa na: “Mɔizɛ hã zɛ́ wala na, wi wili e mbɛti bɛ̃ ngba wi kɔ̃ kɛnɛ a, sɛ nɛ a gese a de.”

⁵ Nɛ Yezu tɔ̃ hã wa na: “Mɔizɛ hã zɛ́ mbula hã nɛ ɔ na mɛ ni, we duzu kɛ nɛ a wi nga sila.

⁶ Nɛ nde wa kɔma kɔ 'Buki na: ‘Ndo do kɛ Gale dɛa zi do mɛnɔ vɛ̃ ni, nɛ a dɛa wi wili do wuko.

⁷ Ma kɛ wi wili a la sɛ tɔa 'da baa a do naa a, nɛ wa mba do kɛnɛ a.

⁸ Nɛ wa bɔa ni wa hɔ sɛ kili tɛ wele kpo.’ Na mɛ ni, wa 'bɔ a Owele bɔa gɔ, nɛ nde wa hɔa kili tɛ wele kpo iko.

⁹ Kɔ ma wè na, wele gɔnɔ sanga winɔ kɛ Gale mba li wa ni gɔ.”

¹⁰ Yezu do owi yambala mɛnɔ 'da a wa si, kɔ wa hɔa nu tɔa i, nɛ owi yambala mɛnɔ wa aka 'bɔ a ngɔ we ni.

¹¹ Nɛ a gese hã wa na: “Fala kɛ wi wili bɛ̃ kɛnɛ a, kɔ a ba mbé wuko, nɛ nde a yɛngga vĩ zu yali li wuko wele kɛ dati ni.

¹² Nɛ ma 'bɔ na mɛ ni, fala kɛ wuko bɛ̃ wili ɛ, kɔ a ba mbé wili, nɛ nde a yɛnggɛ vĩ zu yali.”

Yezu wila nu ɛ tɛ obe

¹³ Nɛ Owele wa tɛa do benɔ 'da wa hã Yezu na, a é kɔ̃ a ngɔ wa, takɔ a wele nu a tɛ wa. Nɛ Owi yambala mɛnɔ wa ma ngɔ o dã zu winɔ ni na, gulu kɛ wa tɛ do benɔ we ge nde?

¹⁴ Kɔ Yezu nɛa we zɔ ní, nɛ zã a nɔ̃lɔ̃, nɛ a dãlã do Owi yambala mɛnɔ na: “Nɛ tɛ gà benɔ we tɛ 'da mi nga gɔ. Nɛ lá wa kɔ wa tɛ, we duzu kɛ le nwa 'da Gale ma we winɔ kɛ sila wa ɔ nɛ sila benɔ gɛ ni.

¹⁵ Mi tɔ̃ hã nɛ do gbãlã we na, ma wia na, wele kɔ̃ gɛnɛ dɛa to nwa 'da Gale, ɔ nɛ kɛ benɔ wa kɔ̃a do ma ni. Kɔ wele dɛ̀ na mɛ ni gɔ, nɛ nde a wé sɛ tɛ le kɔ le nwa 'da Gale gɔ.”

¹⁶ Nɛ a kala benɔ dɛ tɛ̃ a, nɛ a ma ngɔ a kɔ̃ a ngɔ wa kpo do kpo, tɛ wele nu a tɛ wa.

Wi kpamɔ kpo aka Yezu

¹⁷ Nɛ 'do nɛ, nɛ Yezu ma ngɔ la nɛ, nɛ mbe wele kpo gɔnɔ ti a do yu, nɛ a gu nu ti a, nɛ a aka a na: “Aa wi be mɔ, mɔ a dia wi, mɔ tɔ̃́ hã mi sɛ! Mɛ mi wia tɛ dɛ nɛ, takɔ mi kpa kpasi kɛ ma é sɛ gɔ ni a ge nde?”

¹⁸ Nɛ Yezu aka a na: “Gulu kɛ mɔ sa li mi na dia wi ni we ge nde? Dia wi bina, dia wi tati a Gale zu a kpo.

¹⁹ Mɔ ĩ̀ ti mbulanɔ kɛ ma tɔ̃a na: ‘Mɔ tɛ gbɛ̃ wi gɔ, mɔ tɛ ɔ̃ do wili tabi wuko mɔ́ ngba mɔ gɔ, mɔ tɛ zṹ mɔ gɔ, mɔ tɛ 'bìlì bɛlɛ do zu li ngba mɔ gɔ, mɔ tɛ ɔ̀lɔ̀ ngba mɔ gɔ. Mɔ dɔ́nggɔ́ baa mɔ do naa mɔ’ ni gɔ nde?”

²⁰ Nɛ wi ni gese na: “Wi be mɔ, ndo do nyanga gã 'da mi, mi dɛ mbulanɔ ni vɛ̃ dɛa.”

²¹ Nɛ Yezu ka mɔ tɛ̃ a, nɛ a kɔ̃ gɛnɛ a, nɛ a tɔ̃ hã a na: “Mɔ zɔla mɔ kpo! Mɔ sí, kɔ mɔ bé gole kpamɛnɔ 'da mɔ vɛ̃, nɛ mɔ kɛ mbili nɛ hã owi sãnɔ. Nɛ mɔ kpa sɛ mbé kpamɔ tɛ li nza i. Nɛ mɔ kpóló tɛ mɔ, nɛ lɛ yɛnggɛ do mɔ.”

²² Kɔ wi ni nɛa we zele ní, nɛ a dɛ zɔlɛɛ, nɛ a la do 'bako, we kɛ a zi do kpamɔ wena.

²³ Nɛ Yezu ka mɔ kɛ zã a, nɛ a tɔ̃ hã owi yambala mɛnɔ 'da a na: “We le kɔ le nwa 'da Gale ma nganda sɛ do wi kpamɛnɔ wena!”

²⁴ Nɛ owi yambala mɛnɔ wa ɔngba do we ni wena. Nɛ Yezu tɔ̃ 'bɔ mbé nɛ hã wa na: “Aa benɔ 'da mi, we le kɔ le nwa 'da Gale ma nganda sɛ do wi kpamɔ wena!

²⁵ Nɛ zɔ́ gã sa'de ɔ nɛ samo. Takɔ a le li holo tonga ma nganda wena. Nɛ nde takɔ wi kpamɔ le kɔ le nwa 'da Gale, ma nganda nɛa ngɔ ki ni.”

²⁶ Nɛ owi yambala mɛnɔ wa ɔngba 'bɔ do wenɔ ni wena, nɛ wa ma ngɔ aka ngba wa na: “Na mɛ ni, wi wia sɛ we kpasa nɛ a wio nde?”

²⁷ Nɛ Yezu ka mɔ tɛ wa, nɛ a tɔ̃ hã wa na: “Owele wa wè tɛ kpasa do ngawi 'da wa wele nɛ gɔ. Nɛ nde wi a Gale hã a wia we kpasa wele. Mba gɔ, Gale wia we dɛ mɛnɔ vɛ̃.”

²⁸ Nɛ Petro tɔ̃ hã a na: “Mɔ zɔ́, kɛ lɛ la mɛnɔ 'da lɛ vɛ̃, kɔ lɛ yɛnggɛ do mɔ gɛ!”

²⁹ Nɛ Yezu gese hã wa na: “Mi tɔ̃ hã nɛ do gbãlã we na, fala kɛ wele la tɔa 'dɛ ɛ, do onya ɛ, do naa ɛ, do baa ɛ, do benɔ 'dɛ ɛ, do fɔnɔ 'dɛ ɛ vɛ̃ we yɛnggɛ do mi, we be Dia Sakoe 'da Gale nde,

³⁰ nɛ do li wese sɔɛ gɛ, wi ni a kpa sɛ mbé mɔ fala kama nɛ ngɔ kɛ a zi do ma dati ni. A kpa sɛ otɔa, do onya a, do onaa a, do obe, do ofɔ. Nɛ a kpa sɛ zɛlɛ tɛ dɛ ngɔ nɛ. Nɛ do 'do, nɛ a kpa sɛ kpasi kɛ ma é sɛ gɔ ni fai.

³¹ Nɛ gba gili winɔ kɛ wa sɔɛ gɛ a Owi dati ni, wa sɛ a Owi ngɔ go'do. Nɛ gba gili wanɔ kɛ wa a Owi ngɔ go'do ni, wa sɛ a Owi dati.”

Yezu tɔ̃a 'bɔ mbé we fie do za'da nza kɔ fie 'da a

³² Yezu do Owi yambala mɛnɔ 'da a, wa zi tɛ li wala kɛ ma kũ dɛ Yeruzalɛmɛ i ni. Nɛ Yezu la dati hã wa, nɛ kili ba Owi yambala mɛnɔ mba do owinɔ wa nɛ zi 'dɔkɔlɔ wa ni wena. Nɛ Yezu sa 'bɔ mɔ hã Owi yambala mɛnɔ 'da a 'bu ngɔ wa bɔa ni, nɛ a ma ngɔ be gulu mɛnɔ kɛ winɔ wa dɛ sɛ do a do 'do ni hã wa na:

³³ “Nɛ ĩ́ na, lɛ tɛ kũ dɛ Yeruzalɛmɛ i. Kɔ lɛ hɔ i mɔ, nɛ wa ba sɛ mi Be 'da Wele, nɛ wa 'dɔlɔ mi hã onwa nganganɔ do Owi be mbulanɔ. Nɛ wa 'bili sɛ we 'da mi na mi fe. Nɛ wa 'dɔlɔ sɛ mi hã owinɔ kɛ wa a Oyuda gɔ ni.

³⁴ Nɛ winɔ ni wa yɔndɔ sɛ mi, nɛ wa tufu sã nu wa tɛ mi, nɛ wa zɛ mi do zufa ndala, nɛ wa gbɛ mi. Nɛ do talɛ tũi, nɛ mi za'da sɛ nza kɔ fio.”

Zake do Yoanɛ wa gɔa mɔ kɔ̃ Yezu

³⁵ 'Do nɛ, nɛ Zake do Yoanɛ, benɔ 'da Zebede wa tɛa, nɛ wa aka Yezu na: “Wi be mɔ, lɛ kɔ̃a na, mɔ dɛ́ mɛ kɛ lɛ nɛ aka mɔ we nɛ ni hã lɛ.”

³⁶ Nɛ Yezu aka wa na: “Mɛ nɛ kɔ̃a na mi dɛ we nɛ ni a ge nde?”

³⁷ Nɛ wa gese hã a na: “'Da fala kɛ mɔ sɛ a gã nwa do ngawi wena ni, nɛ mɔ hã wala hã lɛ, kɔ lɛ dungu kɛ zã mɔ. Mbe dungu ngɔ ngawili kɔ̃ mɔ, nɛ mbee nɛ ngɔ gale.”

³⁸ Nɛ Yezu gese hã wa na: “Nɛ ĩ̀ gulu mɛ kɛ nɛ aka ni gɔ. Nɛ we sɛ we kunu bila ngamɛ kɛ wa nɛ hã hã mi ni nde? Nɛ wia we kpa batisimɔ ngamɛ kɛ mi nɛ kpa nɛ ni nde?”

³⁹ Nɛ wa gese na: “Lɛ we sɛ do ma.” Nɛ Yezu tɔ̃ hã wa na: “Do gbãlã we, nɛ zɔ sɛ ngamɛ kɛ mi nɛ zɔ nɛ gɛ, nɛ nɛ kpa sɛ zɛlɛ tɛ mi kpa sɛ ni.

⁴⁰ Nɛ nde we saka wi kɛ a dungu sɛ ngɔ ngawili kɔ̃ mi, tabi ngɔ gale kɔ̃ mi ni, mɛ a we 'da mi gɔ. We duzu kɛ falanɔ ni, mɛ a fala 'da winɔ kɛ Gale 'dafa ma we wa ni.”

⁴¹ Kɔ tala Owi yambala mɛnɔ 'bu ni wa nɛa we zele we ni, nɛ zã wa nɔ̃lã dɛ tɛ Zake do Yoanɛ.

⁴² Nɛ Yezu sa mɔ hã wa, nɛ a tɔ̃ hã wa na: “Nɛ ĩ́ na, winɔ kɛ wa a onwa ngɔ winɔ ngɔ nùi gɛ ni, wa kɔ̃a we be ngawi 'da wa hã winɔ ti wa ni. Nɛ ogã winɔ wa hɛ̃lɛ̃ winɔ ti wa ni na, wa dɛ olo nu lo.

⁴³ Nɛ nde kɛ 'da nɛ, ma wè tɛ ɔ ni gɔ. Fala kɛ mbe kpo sanga nɛ gɛ kɔ̃ we hɔ gã wi nde, nɛ ma wia na a ɔ wi dɛa to 'da nɛ.

⁴⁴ Kɔ fala kɛ mbe kpo sanga nɛ kɔ̃ we ɔ wi dati nde, nɛ ma wia na a ɔ ngbá 'da nɛ vɛ̃.

⁴⁵ We duzu kɛ mi Be 'da Wele, mi tɛ̀ na Owele wa dɛ to hã mi gɔ, nɛ nde mi tɛa we dɛ to hã owele, nɛ mi hã 'bɔ tɛ mi hã fio, takɔ mi gɔnɔ zu ogba gili wele.”

Yezu kpasa wi tandu

⁴⁶ Yezu do owi yambala mɛnɔ 'da a, wa hɔa tɛ le Yeriko, nɛ wa tɛ gɔnɔ ngɔ zã le. Kɔ wa nɛa we hɔ dɛ nu ngba i fala nɛ kpo do ogba gili winɔ, nɛ nde mbe wi tandu kpo, li a a Bartime, be 'da Time, a dungu dɛ kɛ zã wala tɛ gɔ mɔ.

⁴⁷ Kɔ a nɛa we zele na Yezu, wi Nazarɛtɛ tɛ la ma ni, nɛ a ma ngɔ he mɔ na: “Yezu, be 'da Davidi, mɔ ĩ́ 'bako hã mi!”

⁴⁸ Nɛ ogili winɔ wa ma ngɔ o dã zu a na: “Mɔ kpé nu mɔ!” Nɛ a hia 'bɔ mɔ dɛ ngɔ nganda wena na: “Be 'da Davidi, mɔ ĩ́ 'bako hã mi gɔ nde?”

⁴⁹ Nɛ Yezu yula nù, nɛ a na, wa sá mɔ hã a. Nɛ wa sa mɔ hã a, nɛ wa tɔ̃ hã a na: “Mɔ kpã́lã́ sila mɔ, mɔ kúlú ngɔ, Yezu sa mɔ hã mɔ.”

⁵⁰ Nɛ wi tandui da gã tuli 'da a nù, nɛ a kpe'de dɛ ngɔ, nɛ a nɛ 'da Yezu i.

⁵¹ Nɛ Yezu aka a na: “Mɛ mɔ kɔ̃a na mi dɛ hã mɔ ni a ge nde?” Nɛ a na: “Wi be mɔ, mi kɔ̃a na mi zɔ 'bɔ mbé mɔ.”

⁵² Nɛ Yezu tɔ̃ hã a na: “Mɔ sí! Mɔ kpasa we kɛ mɔ do kɔ̃a we dɛ 'da mi.” Nɛ do ti, wi tandui ni zɔa mɔ, nɛ a ma ngɔ la 'dɔkɔlɔ Yezu.