MARKO 1 - WE NU GALE 1995

Bia we 'da Yoanɛ wi batisa winɔ

¹ Kɛ gɛ mɛ a ndo nyanga Dia Sakoe 'da Yezu Kristo, Be 'da Gale.

² Mbe wi gba olo nu Gale kpo, li a a Ezai, a kɔma zi olo nu Gale na: “Mɔ zɔ́, mi tumba wi toe 'da mi dati mɔ, takɔ a 'dafa wala hã mɔ.

³ Nɛ wi ni a tɛ he mɔ tɛ li gba zɔ̃ i na: ‘Nɛ 'dáfá li wala 'da Nwa, kɔ ma bɔlɔ!’ ”

⁴ Na mɛ ni, nɛ Yoanɛ wi batisa winɔ hɔa zi tɛ li gba zɔ̃ i, nɛ a ma ngɔ be we hã winɔ na: “Nɛ kífí sila nɛ, kɔ nɛ kpá batisimɔ, nɛ Gale a fo sɛ ku'da 'dã mɛnɔ zu nɛ.”

⁵ Nɛ Owi ngɔ nù Yude, do Owi Yeruzalɛmɛ vɛ̃ wa tɛa 'da a, nɛ wa gbala 'dã mɛnɔ 'da wa dɛ li winɔ vɛ̃. Nɛ Yoanɛ batisa wa 'dɔ lì Yɔrdanɛ.

⁶ Yoanɛ hi'da tulu sala mbe sa'de kpo li a a samo, nɛ a kpo 'dɛ̃ ndala 'dɛ tili a. Nyɔngɔmɔ nu a zi a odɔla do nɔ gɔlɔ.

⁷ Nɛ a tɔ̃ hã winɔ na: “Wele kɛ a nɛ hɔ 'do mi gɛ ni, a nɛa ngɔ mi do ngawi wena. Nɛ mi hɔ̀ wi gu nù ti a, nɛ mi bulu fɛlɛ ngɔ mɔ nyanga wi 'da a gɔ.

⁸ Mi gɛ, mi batisa nɛ do lì, nɛ nde a, a batisa sɛ nɛ do Hi Wi Santo.”

Yoanɛ batisa Yezu

⁹ Do 'da fala ni, nɛ Yezu yula Nazarɛtɛ, tɛ ngɔ nù Galile, nɛ a nɛ 'da Yoanɛ, nɛ Yoanɛ batisa a tɛ 'dɔ lì Yɔrdanɛ,

¹⁰ Kɔ Yezu nɛa we hɔ nza 'dɔ lì ni, nɛ a nɛ ka mɔ, nɛ nde li nza hũi, nɛ a zɔ Hi Wi Santo tɛ zĩlĩ dɛ ngɔ a ɔ nɛ gbakulĩ ni.

¹¹ Nɛ wala gɛlɛ wele wila li nza i na: “Mɔ a Be 'da mi, kɛ mɔ ngɔ sila mi, mi do yangga wena we mɔ.”

Satana yamba sila Yezu

¹² Do 'do kɛ Yezu hɔa nza 'dɔ lì ni, nɛ Hi Wi Santo tumba a, nɛ a nɛ tɛ li gba zɔ̃ i do ti.

¹³ Nɛ Yezu ɔa i mɔ 'bu tũ nalɛ, nɛ Satana yamba we ɔlɔ a. Mɛ ni nɛ nde a ɔ zi fala nɛ kpo do osa'de zamɛnɔ, nɛ oanzɛnɔ wa zi tɛ gala a.

Yezu sa mɔ hã owi da gbanda zu wa nalɛ

¹⁴ 'Do kɛ Herodɛ ba zi Yoanɛ wi batisa winɔ do bɔlɔkɛ ni, nɛ Yezu la dɛ ngɔ nù Galile, nɛ a tɛ be Dia Sakoe 'da Gale hã winɔ na:

¹⁵ “Ngba soe Gale nɛ tɛ we dungu nwa ngɔ nù gɛ ni kɔla ia. Nɛ kífí sila nɛ, kɔ nɛ kɔ̃́ gɛnɛ Dia Sakoe gɛ.”

¹⁶ Mbe ngba soe kpo, nɛ Yezu la do nu gba ndɔ Galile, nɛ a zɔ Owi da gbanda zu wa bɔa tɛ da gbanda 'da wa 'dɔ gba ndɔɛ ni tɛ fa kɔyɔ. Wi a Simɔ do nya a Andre.

¹⁷ Nɛ Yezu tɔ̃ hã wa na: “Nɛ tɛ́, kɔ lɛ yɛnggɛ do nɛ, nɛ mi a sɛ nɛ do Owi fa wele hã Gale.”

¹⁸ Wa nɛa we zele ní, nɛ wa la gbanda 'da wa dɛ di ni do ti, nɛ wa la do Yezu.

¹⁹ Nɛ a tili 'bɔ dɛ dati sĩ, nɛ a zɔ Zake do nya a Yoanɛ, benɔ 'da Zebede. Wa zi tɛ kɔ ga 'da wa tɛ kpo li gbanda 'da wa.

²⁰ Nɛ dɔ̃, nɛ Yezu sa mɔ hã wa, nɛ wa la baa wa Zebede, do owi dɛa tonɔ 'da a dɛ kɔ ga ni, nɛ wa la do Yezu.

Yezu ndaka 'dã hi wi kɔ wele

²¹ Yezu do Owi yambala mɛnɔ 'da a, wa la dɛ kɔ le Kafarnaumɛ. Nɛ ma hɔa tũ ɔmɔ tɛ wi, nɛ Yezu lia kɔ tɔa mbula, nɛ a ma ngɔ be we nu Gale.

²² Nɛ winɔ kɛ wa zila a ni, wa ɔngba do tɛlɛ tɛ bia wenɔ 'da a wena, we duzu kɛ a be zi ma do dĩ wena, nɛ nde a bé ɔ nɛ kɛ owi be mbulanɔ wa be zi ni gɔ.

²³ Do fala nɛ ni, nɛ mbe wele kpo tɛa, nɛ a le kɔ tɔa mbula, nɛ nde a do 'dã hi wi kɔ a. Nɛ a ma ngɔ he mɔ na:

²⁴ “Yezu wi Nazarɛtɛ, mɔ nɛ dɛ do lɛ nɛ nde? Mɔ tɛa we gbɛ lɛ gbɛa nde? Mi ĩ ti mɔ de wena. Mɔ a santo kɛ Gale a tumba mɔ!”

²⁵ Nɛ Yezu dãlã dɛ tɛ 'dã hi wi ni na: “Mɔ kpé nu mɔ, kɔ mɔ hɔ́ nza kɔ wi gɛ do'do!”

²⁶ Nɛ 'dã hi wi hia mɔ nganda wena, nɛ a yaka wi ni gbirr, nɛ a za'da nza.

²⁷ Nɛ winɔ vɛ̃ wa ɔngbɔ nɛ ge nde ni, nɛ wa ma ngɔ aka ngba wa na: “Ki a ge nde? Mbé bia we hɔ hɔa nde? A ba nu a hã o'dã hi winɔ do ngawi, nɛ wa zele a!”

²⁸ Nɛ sako li Yezu yɛ'ba ngɔ nù Galile vɛ̃.

Yezu kpasa ogba dɔa wi zɛlɛ

²⁹ Wa hɔa nza kɔ tɔa mbula ni, nɛ wa la dɛ kɔ tɔa 'da Simɔ do Andre, fala nɛ kpo do Zake do Yoanɛ.

³⁰ Nɛ wa kpa kɛfɛ Simɔ wuko nɛ, nɛ nde a ɔa nù, we kɛ tɛ̃ a ba we wena. Nɛ Yezu hɔa, nɛ wa tɔ̃ we nɛ hã a.

³¹ Nɛ Yezu nɛa, nɛ a 'be nu kɔ̃ a dɛ ngɔ. Nɛ bawe tɛ̃ a gɛ̃ do ti, nɛ a ma ngɔ gi nyɔngɔmɔ hã wa.

³² Wese nɛa we le nù, nɛ winɔ wa tɛa do Owi zɛlɛ do owinɔ kɛ wa do 'dã hi wi kɔ wa ni hã Yezu.

³³ Nɛ gba gili winɔ kɔ le ni, wa ngɛma ngba wa dɛ nu tɔa kɛ a zi nɛ ni.

³⁴ Nɛ Yezu kpasa wi zɛlɛ kpi do kpi, nɛ a ndaka o'dã hi wi kɔ owinɔ wena. Nɛ a kɔ̃̀ na o'dã hi winɔ wa wele we gɔ, we duzu kɛ wa ĩ ti a na, a a Be 'da Gale.

Yezu yɛngga ngɔ nù Galile vɛ̃

³⁵ Fala sa tafuu, nɛ Yezu kulu ngɔ, nɛ a hɔ nza, nɛ a la dɛ 'do ngba i, nɛ a ma ngɔ wele we nu ngba a do Gale.

³⁶ Nɛ Simɔ do ongba a, wa nɛa 'do Yezu we fa a.

³⁷ Wa kpa a, nɛ wa tɔ̃ hã a na: “Owele wena wa fa mɔ.”

³⁸ Nɛ Yezu tɔ̃ hã wa na: “Lɛ lá dɛ gele fala, tɛ kɔ lenɔ kɛ zã lɛ gɛ, we duzu kɛ ma wia na mi be tɛ mɛ 'bɔ we nu Gale i mɔ. Mba gɔ̃, mi tɛa ngɔ nù gɛ we duzu ma.”

³⁹ Na mɛ ni, a la tɛ yɛnggɛ ngɔ nù Galile vɛ̃, tɛ be we nu Gale kɔ tɔa mbulanɔ, do fo 'dã hi wi kɔ winɔ.

Yezu kpasa wi zɛlɛ ngbɛlɛ

⁴⁰ Mbe wi zɛlɛ ngbɛlɛ kpo tɛa, nɛ a gu nù ti Yezu, nɛ a ala nu a hã a na: “Fala kɛ mɔ kɔ̃, nɛ mɔ wia we kpasa mi tɛ zɛlɛ tɛ mi gɛ.”

⁴¹ Nɛ Yezu ĩ 'bako hã a, nɛ a ɛfɛ kɔ̃ a, nɛ a 'be tɛ̃ a, nɛ a tɔ̃ hã a na: “Mi kɔ̃a, kɔ mɔ kpásá tɛ zɛlɛ tɛ mɔ gɛ.”

⁴² Nɛ zɛlɛ ngbɛlɛ ia tɛ̃ a do ti, nɛ tɛ̃ a lɔ.

^43-44 Nɛ Yezu dala nu ɛ hã a na: “Da dɛ kɔ mɔ tɔ̃́ we kɛ mi kpasa do mɔ gɛ hã wele kpo gɔ. Nɛ nde mɔ nɛ́ 'da nganga i, kɔ mɔ be kɛ mɔ kpasa ni hã a. Nɛ mɔ hã dɔnggamɔ hã Gale nɛ́ kɛ Mɔizɛ tɔ̃a zɛ́ ni, we be hã winɔ vɛ̃ na, mɔ kpasa tɛ zɛlɛ 'da mɔ ia.” Na mɛ ni, nɛ Yezu gisa a na a si.

⁴⁵ Nɛ nde wi ni la, nɛ a ma ngɔ tɔ̃ gulu kɛ a kpasa nɛ ni falanɔ vɛ̃. We duzu nɛ, ma kɛ Yezu wè zi we be 'bɔ tɛ̃ a kɔ le gɔ, nɛ nde a 'bana dɛ fala kɛ wele wa tɛ nɛ bina ni. Nɛ winɔ wa yula fala do fala, nɛ wa tɛa 'da a.