MALAKI 1 - WE NU GALE 1995

NWA kɔ̃a gɛnɛ obe Israɛlɛ

¹ Nɛ zélé toe kɛ nwa tumba Malaki na, a tɔ̃ hã obe Israɛlɛ gɛ.

² NWA tɔ̃ hã winɔ 'da a na: “Mi kɔ̃a gɛnɛ nɛ.” Nɛ wa aka a na: “Lɛ nɛ dɛ do ĩ na, mɔ kɔ̃a gɛnɛ lɛ kɔ̃a ni nɛ nde?” Nɛ NWA gese na: “Ezau zi a nya Yakɔbɔ gɔ nde? Gɛnɛ kɔ ní, nɛ nde mi kɔ̃a zi gɛnɛ Yakɔbɔ,

³ nɛ mi bɛ̃ gɛnɛ Ezau. Mi 'danga lenɔ ngɔ kalanɔ kɛ obe zã Ezau wa ɔ zi nɛ ni, nɛ osa'de zamɔ wa ɔ dɛ di ni.

⁴ Mbe gɔ, nɛ obe zã Ezau kɛ wa sa li wa na Oedɔmɛ ni, wa tɔ̃ sɛ na, le 'da lo ma 'danga zi, nɛ nde lo 'dafa sɛ ma dɛ olo nɛ. Kɔ mi NWA ngɔ mɔ nyanga nza vɛ̃, mi tɔ̃a na, gɛnɛ kɔ wa 'dafa, nɛ mi 'danga sɛ 'bɔ ma. Nɛ winɔ wa e sɛ mbé li zu wa na: ‘Nu fɛlɛ Owi dɛ 'dã mɔ’, tabi ‘Owinɔ kɛ wa nɔ̃lɔ̃ zã NWA nɔ̃lã fai’.

⁵ Nɛ, obe Israɛlɛ, nɛ zɔ sɛ mɛnɔ ni, nɛ nɛ zɛ sɛ nu nɛ na: ‘NWA, mɔ bia ngawi 'da mɔ dɛ nza. Nɛ owi kɔ gele lenɔ wa zɔa 'bɔ ma!’ ”

NWA dãlã dɛ tɛ onganganɔ

⁶ NWA tɔ̃a na: “Mi NWA ngɔ mɔ nyanga nza vɛ̃, mi tɔ̃ hã nɛ onganganɔ na: Bulu be dɔnggɔ baa a dɔngga, nɛ wi dɛa to dɛ mbula nu nwa ngɔ a dɛa. Nɛ ĩ na, mi a baa nɛ, kɔ gulu kɛ nɛ dɔ́nggɔ́ mi gɔ we ge nde? Mi a nwa ngɔ nɛ, kɔ gulu kɛ nɛ dɛ́ mbula nu mi gɔ we ge nde? Nɛ zɔ mi li nɛ yala, nɛ nɛ aka na: ‘Lɛ zɔ mɔ li lɛ yala nɛ nde?’

⁷ Nɛ zɔ mi li nɛ yala, we kɛ nɛ kala odɔnggamɔ kɛ ma a sa li mi gɔ, nɛ nɛ a ma dɛ ngɔ gbagala we dɔnggɔ do mi. Nɛ nɛ aka 'bɔ na: ‘Lɛ zɔ mɔ yala, nɛ lɛ bá mɔ do dĩ gɔ ni do ge nde?’ Nɛ zɔ mi yala, we kɛ nɛ bá gbagala 'da mi do dĩ gɔ.

⁸ Nɛ ba sa'de kɛ li a lɔ lɔa, tabi a nɛ ku, tabi a do zɛlɛ, nɛ nɛ tɛ do a we dɔnggɔ do mi. Ki ni ma a dia nde? Nɛ lengge na, fala kɛ nɛ hã sa'de ɔ ní hã gã wi ngɔ le, nɛ ma dɛ sɛ yangga tɛ̃ a nde? A lengge sɛ nɛ do dia nɛ we duzu ma nde? Mi NWA ngɔ mɔ nyanga nza vɛ̃, mi aka nɛ ní.

⁹ “Nɛ, onganganɔ, nɛ álá nu nɛ hã mi Gale 'da nɛ, takɔ mi ĩ 'bako hã winɔ 'da mi. Nɛ lengge zã nɛ na, 'do mɛ kɛ nɛ dɛa gɛ, nɛ mi zele sɛ nɛ do dia nɛ nde? Fala kpo gɔ.

¹⁰ Ma wia sɔ na, mbe kɔ nɛ kpo nɛ, nɛ a kpe nu ngbo Tɛmpɛloe, dɔ nɛ lé 'bɔ i mɔ we dã we ngɔ gbagala, we dɔ do sa'de hã mi gɔ. Nɛ ĩ na, mi do yangga we zɔ nɛ bina, nɛ dɔnggamɛnɔ kɛ nɛ hã ma hã mi gɛ, ma dé tɛ mi gɔ. Mi NWA ngɔ mɔ nyanga nza vɛ̃, mi tɔ̃a ní.

¹¹ “Ogele winɔ nyanga nza gɛ vɛ̃, wa dɔnggɔ mi. Falanɔ vɛ̃, yolo 'biti gba wese we hɔ 'biti gɛ̃a wese, wa dɔ fũ yɔmbɔ we dɔnggɔ do mi, nɛ wa tɛ do dɔnggamɛnɔ kɛ ma wia do mi ni hã mi. Gbãlã we, ogele winɔ wa ĩ ti gã wi 'da mi.

¹² Nɛ nde nɛ, nɛ zɔ ma yala, nɛ nɛ ya fala gbagala 'da mi NWA, nɛ nɛ bà ma do dĩ gɔ. Nɛ kala odɔnggamɔ kɛ ma dè gɔ ni, we a ngɔ ma hã mi.

¹³ Nɛ nɛ tɔ̃ 'bɔ na: ‘Tili dɔnggɔ mɔ ba li lɛ do'do!’ Nɛ nɛ zɔ mi NWA ngɔ mɔ nyanga nza vɛ̃ li nɛ yala iko. Nɛ kala osa'de zũ, do wanɔ kɛ wa do kunda, tabi gele zɛlɛ tɛ wa ni, nɛ nɛ tɛ do wa hã mi. Kɔ mi aka nɛ na, mi wia tɛ kɔ̃ gɛnɛ mɔ ɔ na mɛ ni nɛ nde?

¹⁴ 'Bako do wi kɛ a ɔkɔlɔ mi na, ɛ nɛ hã dia sa'de kɔ onadalamɛnɔ 'da ɛ hã mi, nɛ nde a kpula ma do sa'de kɛ a do kunda, nɛ a dɔnggɔ do mi, nɛ a usu dia kɛ we duzu a wele nɛ ni. 'Bako do wi kɛ a fa we ɔkɔlɔ mi na mɛ ni, we kɛ mi a gã NWA ngɔ mɔ nyanga nza vɛ̃, nɛ ogele winɔ wa dɛ kili ngawi 'da mi dɛa. Mi NWA, mi tɔ̃a ni.”