LUKA 7 - WE NU GALE 1995

Yezu kpasa wi dɛa toe 'da nwa ngɔ sodanɔ

¹ Yezu wila wenɔ ni hã winɔ do'do, nɛ a la dɛ Kafarnaumɛ.

² Nɛ nde mbe nwa ngɔ osoda Roma zi di ni, a do mbe wi dɛa to mɔ́ a, kɛ a kɔ̃ gɛnɛ a wena ni. Nɛ wi dɛa toe ni do zɛlɛ, nɛ a kɔla do fio.

³ Kɔ nwa ngɔ sodanɔ ni nɛa we zele sakoe 'da Yezu, nɛ a tombo ombe kumunɔ 'da Oyudanɔ na, wa nɛ́, kɔ wa tɔ̃ hã Yezu na, a tɛ we kpasa wi dɛa toe 'da ɛ.

⁴ Nɛ wa nɛa, nɛ wa hɔ 'da Yezu i, nɛ wa ala nu wa hã a na: “Mɔ kɔ̃́, nɛ mɔ gálá wi ni,

⁵ we kɛ a kɔ̃ gɛnɛ winɔ 'da lɛ wena. Nɛ wi dɛa 'bɔ tɔa mbula hã lɛ, wi a a.”

⁶ Yezu zila ní, nɛ a nɛa do wa. Kɔ a nɛa we kɔlɔ do tɔa 'da nwa ngɔ sodanɔ, nɛ nwa ni tombo ongba a na, wa gɔnɔ dati Yezu, kɔ wa tɔ̃ hã a na: “Nwa, mɔ tɛ yɛ̀kɛ̀ tɛ mɔ we tɛ gbaa 'da mi nga gɔ. We kɛ mi wè wi kɛ na, mɔ le kɔ tɔa 'da mi gɔ,

⁷ ma kɛ mi zɔa na, mi hɔ̀ 'bɔ wi nɛ dati mɔ gɔ. Kɔ mɔ tɔ̃́ we kpo iko, nɛ wi toe 'da mi a kpasa sɛ.

⁸ Mba gɔ, mi tɛ mɛ 'bɔ, mi do onwa ngɔ mi boe, nɛ mi 'bɔ do osoda kɛ wa ti mbula 'da mi ni boe. Kɔ fala kɛ mi tɔ̃ hã mbe na: ‘Mɔ lá!’ Nɛ a la. Kɔ mi tɔ̃ hã mbe na: ‘Mɔ tɛ́!’ Nɛ a tɛ. Kɔ mi tɔ̃ hã wi dɛa toe 'da mi na: ‘Mɔ dɛ́ kɛ gɛ!’ Nɛ a dɛ.”

⁹ Kɔ Yezu nɛa we zele ni, nɛ a ɔngbɔ do lɛnggɛ 'da nwa ngɔ sodanɔ ni wena. Nɛ a siki tɛ̃ a, nɛ a tɔ̃ hã gba gili winɔ kɛ wa nɛ 'dɔkɔlɔ a zununu ni na: “Mi tɔ̃ hã nɛ na, kɛ mi ɔa ngɔ nù Israɛlɛ gbaa gɛ, mi kpà mbe wi kɛ a do kɔ̃a we dɛ 'da mi ɔ nɛ wi gɛ gɔ.”

¹⁰ Nɛ winɔ kɛ nwa ngɔ sodanɔ tumba sɔ wa ni, wa kpula tɛ wa, kɔ wa nɛ hɔ nu tɔa 'da a i, nɛ nde wi toe ni dungu vɛ̃ do dia nɛ iko.

Yezu tunu be zagbãlã kɔ fio

¹¹ 'Do nɛ, nɛ Yezu la dɛ kɔ mbe le kpo, li nɛ a Nainɛ. Nɛ owi yambala mɛnɔ 'da a, do ogba gili winɔ wa nɛa do a.

¹² A nɛa we kɔlɔ do nu ngba le ni, nɛ a kpa ombe wele, nɛ nde wa ba fio, kɔ wa nɛ we mi a. Fie ni a kpo bulu be mɔ́ mbe wi fio wili. Nɛ gba gili winɔ kɔ le ni wa kã naa fie.

¹³ Kɔ Nwa Yezu nɛa we zɔ wuke ni, nɛ 'bako ba li a wena, nɛ a tɔ̃ hã a na: “Mɔ tɛ hè gɔ!”

¹⁴ Nɛ a ngbɔ dɛ kɛ zã sanduku fie, nɛ a 'be tɛ nɛ, nɛ Owi ba tole nɛ wa yolo nù. Nɛ Yezu tɔ̃ na: “Be zagbãlã, mi tɔ̃ hã mɔ na, mɔ kúlú ngɔ!”

¹⁵ Nɛ fie ni kulu ngɔ, nɛ a ma ngɔ wele we. Nɛ Yezu e a dɛ kɔ̃ naa a.

¹⁶ Nɛ kili ba winɔ vɛ̃ wena, nɛ wa ma ngɔ dɔnggɔ Gale tɛ tɔ̃ na: “Gã wi gba olo nu Gale hɔa kɔ lɛ gɛ! Gale tɛa we kpasa owinɔ 'da a.”

¹⁷ Nɛ sako mɛnɔ Yezu dɛa ni, ma yɛ'ba ngɔ nù Yude do kɔ lenɔ kɛ zã nɛ ni vɛ̃.

Yoanɛ wi batisa winɔ tumba owele hã Yezu

¹⁸ Nɛ Owi yambala mɛnɔ 'da Yoanɛ wa tɔ̃a lɛnggɛ mɛnɔ Yezu dɛa ni vɛ̃ hã a. Nɛ a sa mɔ hã ombe sanga wa bɔa,

¹⁹ nɛ a tombo wa hã Nwa Yezu, we aka a na: “Mɔ a Mɛsiya, kɛ a hɔ sɛ ni nde? Tabi lɛ 'bɔ́ 'da mbé gele wele nde?”

²⁰ Wa nɛa we hɔ i mɔ, nɛ wa aka Yezu na: “Yoanɛ wi batisa winɔ tumba lɛ we aka mɔ na: ‘Mɔ a Mɛsiya, kɛ a hɔ sɛ ni nde? Tabi lɛ 'bɔ 'da mbé gele wele nde?’ ”

²¹ Do 'da fala ni, nɛ nde Yezu tɛ kpasa owi zɛlɛ do Owi kunda kpi do kpi. Nɛ a tɛ fo o'dã hi wi kɔ winɔ, do hũi li gba gili owi lɔa li.

²² Nɛ a gese hã owi tonɔ 'da Yoanɛ na: “Nɛ nɛ́, kɔ nɛ tɔ̃́ lɛnggɛ mɛnɔ kɛ nɛ zɔa ma, do kɛnɔ nɛ zila ni hã Yoanɛ na, owi lɔa linɔ wa tɛ zɔ mɔ, owi 'dã nyanganɔ wa tɛ nɛ nɔ, owi zɛlɛ ngbɛlɛnɔ wa kpasa, nɛ zala owi la zalanɔ ma fĩ, ofionɔ wa tunu, nɛ owi sãnɔ wa zila Dia Sakoe.

²³ Kɔ yangga wena do wi kɛ a do kafi mi kɔ sila a bina ni.”

²⁴ Owi yambala mɛnɔ 'da Yoanɛ wa nɛa we la do'do, nɛ Yezu ma ngɔ tɔ̃ we 'da Yoanɛ hã ogba gili winɔ na: “Mɛ nɛ nɛa we zɔ li gba zɔ̃ i ni a ge nde? Nɛ nɛa we zɔ wi kɛ a mbɔkɔ nɛ́ sala tɔ̃ɛ, kɛ bũi yaka ma ni nde?

²⁵ Mɛ ngboo nɛ nɛa we zɔ ma ni a ge nde? Nɛ nɛa we zɔ wi kɛ a hi'da dia tulu ni nde? Owinɔ kɛ wa he'de dia tulu, nɛ wa kpasa de wena ni, wa ɔ kɔ ngboe 'da onwa.

²⁶ Kɔ mɛ ngboo nɛ nɛa we zɔ ma li gba zɔ̃ i ni a ge nde? Nɛ nɛa we zɔ wi gba olo nu Gale nde? Ĩi, mɛ a gbãlã we. Nɛ nde mi tɔ̃ hã nɛ na, Yoanɛ nɛa ngɔ wi gba olo nu Gale.

²⁷ Mba gɔ, a a wi kɛ wa kɔma we 'da a kɔ 'Buki na: ‘Gale tɔ̃a na, mi tombo sɛ wi toe 'da mi dati mɔ, takɔ a 'dafa wala hã mɔ.’ ”

²⁸ Nɛ Yezu tɔ̃ 'bɔ na: “Sanga winɔ ngɔ nù gɛ vɛ̃, wi kɛ a nɛa ngɔ Yoanɛ wi batisa winɔ ni bina. Gɛnɛ kɔ na mɛ ni, nɛ nde wi kɛ a a tala ngɔ go'do winɔ kɔ le nwa 'da Gale ni, a nɛ sɛ ngɔ Yoanɛ.”

²⁹ (Nɛ owi futa takonɔ, do gele winɔ vɛ̃, wa zila ní, nɛ wa ĩ na, Gale a bɔlɔ zu wele. Nɛ Yoanɛ batisa zi wa.

³⁰ Nɛ nde Ofariziɛnɔ do Owi be mbulanɔ, wa bɛ̃a mɛ Gale kɔ̃a we dɛ we wa ni, nɛ wa kɔ̃̀ zi na, Yoanɛ batisa lo gɔ.)

³¹ Nɛ Yezu tɔ̃ 'bɔ na: “Mi nɛ we winɔ kikina gɛ do ge nde? Wa wia kɔ̃ do wio nde?

³² Wa wia kɔ̃ do benɔ kɛ wa dungu nù tɛ dɛ sa do nu zando, nɛ wa ma ngɔ he mɔ hã ongba wa na: ‘Lɛ zɛa zi biã yɔla hã nɛ, nɛ nɛ yɔ̀ yɔla nɛ gɔ! Lɛ ga zuma kɔ̃a hã nɛ, nɛ nɛ hè kɔ̃a nɛ gɔ’ ni.

³³ Mba gɔ, Yoanɛ tɛa zi, nɛ nde a nyɔ́ngɔ́ zi gbãlã we nyɔngɔmɔ gɔ, nɛ a nɔ́ zi dɔ́ gɔ, nɛ nɛ tɔ̃a na: ‘A do 'dã hi wi kɔ a!’

³⁴ Kɔ mi Be 'da Wele, mi hɔa, nɛ mi nyɔngɔ mɛnɔ vɛ̃ nyɔnga, nɛ mi nɔ 'bɔ dɔ̃ nɔa, nɛ nɛ tɔ̃ na: ‘Nɛ zɔ́ wi gɛ, a lengge nyɔngɔ mɔ, do nɔ dɔ̃ iko, nɛ a ba 'bia do owi futa takonɔ, do o'dã winɔ!’

³⁵ Nɛ nde hã zã 'da Gale mɛ a gbãlã we hã zã li owinɔ kɛ wa kɔ̃a gɛnɛ nɛ ni.”

Yezu nyɔngɔ mɔ 'da mbe Fariziɛ̃ kpo li a a Simɔ

³⁶ Mbe Fariziɛ̃ kpo, li a a Simɔ, a sa zi mɔ hã Yezu na, a tɛ we nyɔngɔ mɔ. Nɛ Yezu nɛa, nɛ wa ma ngɔ nyɔngɔ mɛ.

³⁷ Nɛ nde mbe wuko vĩ zu kpo zi kɔ le ni, nɛ a zila na, Yezu tɛ nyɔngɔ mɔ 'da Fariziɛ̃ ni. Nɛ a ba nɔ yɔmbɔ kɔ daka albatrɛ, nɛ a nɛ,

³⁸ nɛ a yolo dɛ kɛ zã nyanga Yezu do 'do a, nɛ a ma ngɔ he nɛ. Nɛ mili kɔ̃a li a 'bɔa tɛ nyanga Yezu, nɛ a dili ma do mili zu a, nɛ a hɔlɔ tɛ nyanga a hɛɔɔ, tɛ a nɔ yɔmbɛ ni tɛ nɛ.

³⁹ Kɔ Fariziɛ̃ kɛ a sa mɔ hã Yezu ni nɛa we zɔ ní, nɛ a tɔ̃ do kɔ sila a na: “Wi gɛ ɔ sɔ do wi gba olo nu Gale ngboo, nɛ a ĩ sɔ ti wuke 'be tɛ̃ a gɛ, nɛ a ĩ sɔ 'bɔ na, a a wuko vĩ zu.”

⁴⁰ Nɛ Yezu tɔ̃ hã Fariziɛ̃ ni na: “Simɔ, mi kɔ̃a we tɔ̃ we hã mɔ.” Nɛ Simɔ gese na: “Wi be mɔ, mɔ tɔ̃!”

⁴¹ Nɛ Yezu tɔ̃ hã a na: “Ombe wele bɔa wa ba ku'da. Mbe kpo ba ku'da kama mɔlɔ, nɛ mbe nɛ ba 'bu nɛ mɔlɔ.

⁴² Nɛ wa bɔa nɛ, wa wè zi tɛ gese olo nɛ gɔ. Nɛ wele ku'da ni gbɛa ma dɛ zu wa. Ní a sanga winɔ bɔa ni, wi kɛ a kɔ̃ sɛ gɛnɛ wele mbili wena ni a wele lá nge nde?”

⁴³ Nɛ Simɔ gese hã a na: “Mi lengge na, wi a wele kɛ ku'da gã zu a wena ni.” Nɛ Yezu tɔ̃ hã a na: “Mɔ tɔ̃a gbãlã we.”

⁴⁴ Nɛ a siki tɛ̃ a dɛ 'da wuke ni, nɛ a tɔ̃ hã Simɔ na: “Mɔ zɔ́ wuke gɛ! Mi hɔa 'da mɔ, nɛ mɔ hã̀ lì hã mi na, mi fɔlɔ do nyanga mi gɔ, nɛ nde a fɔlɔ nyanga mi do mili kɔ̃a li a, nɛ a dili ma do mili zu a.

⁴⁵ Mɔ 'bè mi dɛ tɛ mɔ gɔ, nɛ nde yolo do kɛ mi lia ni, a tɛ hɔlɔ tɛ nyanga mi fai.

⁴⁶ Mɔ à nɔ zu mi gɔ, nɛ nde a fɛla nɔ yɔmbɔ tɛ nyanga mi.

⁴⁷ Ma kɛ mi tɔ̃ hã mɔ na, gã kɔ̃a zã a bia hã mi ni, ma be na, Gale fua ku'da gba gili 'dã mɛnɔ 'da a ia. Fala kɛ wele mbɔkɔ ngba a ngɔ 'dã mɛ 'da a be sĩ, nɛ ngba a ni a kɔ̃ sɛ a tɛ mɛ 'bɔ gɛnɛ a 'bana sanga iko.”

⁴⁸ Nɛ Yezu tɔ̃ hã wuke ni na: “Mi fua ku'da 'dã mɛnɔ zu mɔ ia.”

⁴⁹ Kɔ winɔ kɛ a sɔ do wa tɛ nyɔngɔ mɛ ni, wa nɛa we zele ní, nɛ wa tɔ̃ do kɔ sila wa na: “Wi gɛ a wio nde? Kɛ a tɔ̃ na, ɛ wia do fo ku'da 'dã mɔ mɔ́ Owele gɛ, a a wio nde?”

⁵⁰ Nɛ Yezu tɔ̃ hã wuke ni na: “Gale kpasa mɔ we kɔ̃a we 'da mɔ. Kɔ mɔ sí do dia nɛ!”