LUKA 5 - WE NU GALE 1995

Yezu sa mɔ hã kuti owi yambala mɛnɔ

¹ Mbe ngba soe kpo, nɛ Yezu zi tɛ nu gba ndɔ Genezarɛtɛ, nɛ gba gili Owele wa ma ngɔ ili ngba wa kɛ zã a, takɔ wa zele we nu Gale.

² Nɛ a zɔ ga bɔa dɛ ngɔ lì, nɛ nde Owi da gbanda wa zĩlĩ kɔ nɛ, kɔ wa tɛ fɔlɔ gbanda 'da wa.

³ Nɛ Yezu kũ kɔ mbe kpo, kɛ mɛ a ga 'da Simɔ. Nɛ a tɔ̃ hã Simɔ na, a tili mbe do ga bi sĩ dɛ 'dɔ lì i. Nɛ Yezu dungu nù kɔ nɛ, nɛ a ma ngɔ be we hã gba gili winɔ ni.

⁴ Kɔ a bia we do'do, nɛ a tɔ̃ hã Simɔ na: “Mɔ lá do ga dɛ 'dɔ 'du lì i, kɔ mɔ do ongba mɔ, nɛ dá gbanda 'da nɛ we fa kɔyɔnɔ.”

⁵ Nɛ Simɔ gese hã a na: “Wi be mɔ, mɔ zɔ́, lɛ da zɛ gbanda gbaa nɛ fala sa lɛ dɛ ngɔ gɛ iko, nɛ nde lɛ kpà mɔ kpo gɔ. Kɔ ɔ nɛ kɛ mɔ tɔ̃a ní ni, mi da sɛ ma.”

⁶ Kɔ wa nɛa we da gbanda, nɛ wa kala gba gili okɔyɔ, nɛ gbanda 'da wa ma ngɔ gɔnɔ nɛ.

⁷ Wa nɛa we zɔ ní, nɛ wa we kɔ̃ wa hã ongba wa, kɛ wa kɔ gele ga ni na, wa tɛ we gala lo. Wa tɛa, nɛ wa kala kɔyɔnɔ ni gbaa, nɛ wa dunu ganɔ bɔa nɛ, nɛ ma 'bana sĩ na, ganɔ ni ma bindi.

⁸ Kɔ Simɔ Petro nɛa we zɔ ni, nɛ a gu gba zugolo dati Yezu, nɛ a tɔ̃ hã a na: “Nwa, mɔ lá kɛ zã mi do'do, we kɛ mi a wi dɛ 'dã mɔ!”

⁹ Nɛ kili ba Simɔ do ongba a wena, we gba gili kɔyɔnɔ wa kala wa ni.

¹⁰ Nɛ obenɔ 'da Zebede, Zake do Yoanɛ, ongba Simɔ, wa ɔngbɔ tɛ mɛ 'bɔ do ma wena. Nɛ Yezu tɔ̃a hã Simɔ na: “Mɔ tɛ dɛ̀ kili gɔ, ngangga ni, mɔ sɛ 'bɔ a wi fa kɔyɔ gɔ, nɛ nde mɔ sɛ a wi fa Owele hã Gale.”

¹¹ Nɛ wa kpɔa ganɔ 'da wa, nɛ wa la mɛnɔ 'da wa vɛ̃ dɛ nu lì ni, nɛ wa la we yɛnggɛ do Yezu.

Yezu kpasa wi zɛlɛ ngbɛlɛ

¹² Yezu zi a tɛ kɔ mbe le kpo, nɛ mbe wele zi di ni, zɛlɛ ngbɛlɛ ma 'bili a wena. Kɔ a nɛa zɔ Yezu, nɛ a te, nɛ a gu li a nù, nɛ a ala nu a hã Yezu na: “Nwa, fala kɛ mɔ kɔ̃, nɛ mɔ wia we kpasa mi tɛ zɛlɛ tɛ mi gɛ.”

¹³ Nɛ Yezu ɛfɛ kɔ̃ ɛ, nɛ a 'be tɛ̃ a, nɛ a tɔ̃ hã a na: “Mi kɔ̃a, kɔ mɔ kpásá tɛ zɛlɛ tɛ mɔ gɛ.” Nɛ zɛlɛ ngbɛlɛ ia tɛ̃ a do ti.

¹⁴ Nɛ Yezu ba nu ɛ hã a na: “Da dɛ kɔ mɔ tɔ̃́ we kɛ mi kpasa do mɔ gɛ hã wele kpo gɔ. Nɛ nde mɔ nɛ́ 'da nganga i, kɔ mɔ be kɛ mɔ kpasa ni hã a. Nɛ mɔ ha dɔnggamɔ hã Gale nɛ́ kɛ Mɔizɛ tɔ̃a zɛ́ ni, we be hã winɔ vɛ̃ na, mɔ kpasa tɛ zɛlɛ 'da mɔ ia.”

¹⁵ Nɛ do 'da fala ni, nɛ sako li Yezu ma yɛ'ba zi dɛ dati, nɛ gba gili owele wa mba li ngba wa we zele a, takɔ a kpasa wa tɛ zɛlɛnɔ 'da wa.

¹⁶ Nɛ nde Yezu fua zi tɛ̃ a sanga wa, nɛ a la tɛ fala kɛ wele wa tɛ nɛ bina ni, nɛ a ma ngɔ wele we nu ngba a do Gale.

Yezu kpasa wi kala nyanga

¹⁷ 'Da fala kpo, nɛ Yezu zi tɛ be we, nɛ Ofariziɛnɔ do owi be mbulanɔ wa dungu dɛ kɛ zã a ni. Ofariziɛnɔ do Owi be mbulanɔ ni wa yula zi kɔ lenɔ ngɔ nù Galile do Yude vɛ̃, do kɔ le Yeruzalɛmɛ. Nɛ ngawi 'da Nwa Gale zi fala nɛ kpo do Yezu, nɛ a kpasa Owi zɛlɛ.

¹⁸ Nɛ Owele wa hɔa do mbe wi kala nyanga ngɔ tangge. Nɛ wa ma ngɔ fa fala we le do a dɛ tɔa i, takɔ wa e a dɛ dati Yezu.

¹⁹ Nɛ nde wa kpà fala we le do a gɔ, we duzu gba gili winɔ. Nɛ wa zɔa ni gbaa, nɛ wa kũ dɛ ngɔ tɔa i, nɛ wa ɛ̃lɛ̃ mbe gbogbo zu tɔa, nɛ wa zumu wi ni do mɔ ɔi ni dɛ nù i dɛ dati Yezu ni.

²⁰ Yezu nɛa we zɔ kɔ̃a we 'da owinɔ dɛ 'da a ni, nɛ a tɔ̃ hã wi zɛlɛ ni na: “Nyae, mi fua ku'da 'dã mɛ zu mɔ ia.”

²¹ A nɛa we tɔ̃ ni, nɛ owi be mbulanɔ do Ofariziɛnɔ wa ma ngɔ lengge do kɔ sila wa na: “Wi gɛ a wio nde? Gulu kɛ a dã zu li Gale we ge nde? Wi wia we fo ku'da 'dã mɔ zu wele, wi tati a Gale gɔ nde?”

²² Nɛ nde Yezu ĩ sɔ ti linggamɛ 'da wa ia, nɛ a tɔ̃ hã wa na: “Gulu kɛ nɛ lengge ní we ge nde?

²³ Mba gɔ, sanga kɛ mi tɔ̃a hã wi gɛ na, mi fua ku'da 'dã mɛ 'da mɔ, do kɛ na, mɔ kulu ngɔ kɔ mɔ nɛ nɔ ni, kɛ ma nganda wena kɔ nɛ ni a ki nge nde?

²⁴ Kɔ mi kɔ̃a we be hã nɛ na, mi Be 'da Wele, mi do ngawi ngɔ nù gɛ we fo ku'da 'dã mɔ zu owele ni.” Nɛ a siki tɛ̃ a, nɛ a tɔ̃ hã wi kala nyanga ni na: “Mi tɔ̃ hã mɔ na, mɔ kúlú ngɔ, kɔ mɔ bá mɔ ɔi 'da mɔ, hã mɔ sí!”

²⁵ Nɛ wi ni kulu ngɔ do ti dɛ gba li winɔ ni, nɛ a ba mɛ kɛ a ɔa sɔ ngɔ nɛ ni, nɛ a ma ngɔ si nɛ tɛ dɔnggɔ Gale.

²⁶ Nɛ winɔ vɛ̃ wa ɔngba do ma wena, nɛ wa dɔnggɔ Gale, nɛ kili ba wa do ngba soe ni wena, nɛ wa na: “Lɛ zɔa mɔ ɔ ɔngba sɔɛ gɛ!”

Yezu sa mɔ hã Levi

²⁷ 'Do nɛ, nɛ Yezu hɔa nza, nɛ a zɔ mbe wele kpo kɔ biro 'da a, kɛ owinɔ wa futa do takonɔ ni, li a a Levi. Nɛ Yezu tɔ̃ hã a na: “Mɔ tɛ́, kɔ lɛ yɛnggɛ do mɔ!”

²⁸ Nɛ Levi kulu ngɔ, nɛ a la mɛnɔ 'da a vɛ̃ dɛ di ni, nɛ a la do Yezu.

²⁹ 'Do nɛ, nɛ Levi dɛa gbalimɔ hã Yezu tɛ kɔ tɔa 'dɛ ɛ, nɛ gba gili owi futa takonɔ, do mbé gele Owele wa zi tɛ nyɔngɔ mɔ fala nɛ kpo do a.

³⁰ Nɛ zã Ofariziɛnɔ do owi be mbulanɔ 'da wa nɔ̃lã, nɛ wa tɔ̃ hã owi yambala mɛnɔ 'da Yezu na: “Gulu kɛ nɛ nyɔngɔ mɔ, nɛ nɛ nɔ dɔ̃ fala nɛ kpo do owi futa takonɔ do o'dã winɔ ní we ge nde?”

³¹ Nɛ Yezu gese hã wa na: “Wi kɛ a do nga tɛ̃ a ni, a nɛ́ 'da wi ina gɔ, nɛ nde wi zɛlɛ, sɛ nɛ a nɛ 'da wi ina de.

³² Kɔ mi tɛ̀ we fa obɔlɔ zu wele gɔ, nɛ nde mi tɛa we o'dã winɔ, takɔ wa kifi sila wa.”

Owele wa aka Yezu ngɔ bɛ̃ nyɔngɔmɔ we dɔnggɔ Gale

³³ Ombe wele wa aka Yezu na: “Owi yambala mɛnɔ 'da Yoanɛ wa bɛ̃ nyɔngɔmɔ fai, we dɔnggɔ Gale do sambala a. Nɛ owi yambala mɛnɔ 'da Ofariziɛnɔ wa dɛ 'bɔ na mɛ ni. Nɛ nde owi yambala mɛnɔ 'da mɔ, wa tɛ nyɔngɔ mɔ do nɔ dɔ̃ iko ni we ge nde?”

³⁴ Nɛ Yezu gisa hã wa do gba we na: “Nɛ lengge na, wa sa mɔ hã owele tɛ mɔ dɔ ba ngba wi, nɛ nɛ wia we tɔ̃ hã wa na, wa bɛ̃ nyɔngɔmɔ dɛ li wi ba wuke ni nde?

³⁵ Nɛ nde ngba soe kɛ owinɔ wa fo wi ba wuke ni sanga wa do'do, sɛ nɛ wa wia we bɛ̃ nyɔngɔmɔ de.”

³⁶ Nɛ Yezu tɔ̃a 'bɔ mbe gba we hã wa na: “Wele wè tɛ ba nu mbé tulu, nɛ a 'bamba do li ã tulu gɔ. A dɛ ní, nɛ nde a 'danga nu mbé tuli iko, nɛ mbé tuli ni, ma wè do ã kɛ gɔ.

³⁷ Nɛ wele wè tɛ a mbé dɔ̃ kɔ ã daka ndala gɔ. Ní gɔ, nɛ dɔ̃ɛ ma hana sɛ, nɛ ma fũ daka ndala, nɛ daka 'danga, nɛ dɔ̃ɛ a nù.

³⁸ Kɔ ma wia na, wa a mbé dɔ̃ kɔ mbé daka ndala!

³⁹ Nɛ wele wè tɛ kɔ̃ gɛnɛ mbé dɔ̃ 'do kɛ a nɔa ã dɔ̃ɛ dati ia ni gɔ. Mba gɔ, a wia tɛ tɔ̃ na: ‘Ã dɔ̃ɛ dia nɛa ngɔ mbé kɛ.’ ”