LUKA 4 - WE NU GALE 1995

Satana yamba sila Yezu

¹ Yezu nɛa we hɔ nza 'dɔ lì Yɔrdanɛ, nɛ ngawi 'da Hi Wi Santo dunu kɔ a, nɛ a kã a dɛ li gba zɔ̃ i.

² Nɛ a ɔa i mɔ 'bu tũ nalɛ, nɛ Satana zi tɛ yamba sila a. Nɛ tũnɔ ni vɛ̃ Yezu nyɔ̀ngɔ̀ mɔ gɔ, nɛ wɔ ba a.

³ Nɛ Satana tɔ̃ hã a na: “Fala kɛ mɔ a Be 'da Gale kpaa nde, nɛ mɔ tɔ̃́ hã ta gɛ, kɔ ma kifi nyɔngɔmɔ, hã mɔ nyɔngɔ.”

⁴ Nɛ Yezu gese hã a na: “Wa kɔma kɔ 'Buki 'da Gale na: ‘Wele kpásá tati a we nyɔngɔmɔ iko gɔ.’ ”

⁵ Nɛ Satana ba Yezu dɛ li ngɔ i, nɛ a bia lenɔ ngɔ nù gɛ hã a vɛ̃ 'da kala gɔ,

^6-7 nɛ a tɔ̃ hã a na: “Fala kɛ mɔ dɔnggɔ mi, nɛ mi hã sɛ lenɔ gɛ, do dɔ̃lɔ̃ li 'da ma vɛ̃ hã mɔ, nɛ mɔ dungu nwa ngɔ nɛ. We kɛ wa 'dɔlɔ ma vɛ̃ hã mi, nɛ mi wia we hã ma hã wi kɛ zã mi kɔ̃a a ni.”

⁸ Nɛ Yezu gese hã a na: “Wa kɔma kɔ 'Buki na: ‘Mɔ dɔnggɔ sɛ Nwa Gale 'da mɔ, nɛ mɔ sambala tati a a zu a kpo.’ ”

⁹ Nɛ Satana ba 'bɔ a, nɛ a la do a dɛ kɔ le Yeruzalɛmɛ, nɛ a e a gbogbo zu tɔa Tɛmpɛlo i, nɛ a tɔ̃ hã a na: “Fala kɛ mɔ a ngbongbo Be 'da Gale, nɛ mɔ bṹlṹ, kɔ mɔ zĩ nù.

¹⁰ We kɛ wa kɔma kɔ 'Buki na: ‘Gale a a sɛ oanzɛnɔ 'da a na, wa zɔ mɔ tɛ mɔ.

¹¹ Wa kpɔ sɛ kɔ̃ wa ti mɔ dɛ li ngɔ gɛ na, dɔ mɔ tó nyanga mɔ do ta gɔ.’ ”

¹² Nɛ Yezu gese hã a na: “Wa kɔma 'bɔ kɔ 'Buki na: ‘Mɔ tɛ yàmbà Nwa Gale 'da mɔ gɔ.’ ”

¹³ Satana yamba Yezu do walanɔ ni vɛ̃ ia do'do, nɛ a la a we 'bɔ 'da mbé 'da fala.

Yezu ndua toe 'da a tɛ ngɔ nù Galile

¹⁴ Nɛ ngawi 'da Hi Wi Santo dunu kɔ Yezu, nɛ a kpolo tɛ̃ a dɛ ngɔ nù Galile i. Nɛ sako li a yɛ'ba ngɔ nùi ni vɛ̃.

¹⁵ Nɛ a be zi we kɔ tɔa mbulanɔ, nɛ winɔ vɛ̃ wa dɔnggɔ zi a wena.

Owi Nazarɛtɛ wa kɔ̃̀ gɛnɛ Yezu gɔ

¹⁶ Nɛ Yezu hɔa tɛ Nazarɛtɛ, le kɛ a gã zi dɛ kɔ nɛ ni. Nɛ do tũ ɔmɔ tɛ wi, nɛ a nɛa kɔ tɔa mbula ɔ nɛ kɛ a dɛ ma fai ni. Nɛ a kulu ngɔ we tɔlɔ 'Buki 'da Gale,

¹⁷ nɛ wa hã 'buki kɛ Ezai kɔma ni hã a. Nɛ a yala kasa 'buki ni, nɛ a kpa fala lɛnggɛ wa kɔma na:

¹⁸ “Hi Wi 'da Nwa Gale ngɔ mi boe, a saka mi na, mi be Dia Sakoe hã owi sãnɔ. A tumba mi na, mi tɔ̃ hã owi bɔlɔkɔ na, wa hɔa nza kɔ bɔlɔkɛ ia, nɛ mi hũi li owi lɔa linɔ na, wa zɔ mɔ, nɛ mi fo owinɔ kɛ ogele wele wa zɛlɛ tɛ wa ni ti kɔ̃ Owi zɛlɛ tɛ wa do'do.

¹⁹ Nɛ mi be 'bɔ hã owinɔ na, ngba soe kɛ Gale nɛ be do dia zã 'da a ni, ma wia ia.”

²⁰ Yezu nɛa we tɔlɔ ma do'do, nɛ a kasa 'buki, nɛ a gese hã wi dɛa toe, nɛ a dungu nù. Nɛ owinɔ kɔ tɔa mbula ni vɛ̃, wa kala li wa dɛ tɛ̃ a.

²¹ Nɛ a tɔ̃ hã wa na: “We kɛ nɛ zila kɔ 'Buki gɛ, ma dɛa tɛ̃ ɛ sɔɛ gɛ.”

²² Nɛ winɔ vɛ̃ wa ɔngbɔ do Yezu wena, nɛ wa kɔ̃a gɛnɛ dia wenɔ kɛ a bia ma ni. Nɛ wa tɔ̃ na: “Wi gɛ a be 'da Yozɛfu gɔ nde?”

²³ Nɛ Yezu tɔ̃ hã wa na: “Mi ĩ na, nɛ tɔ̃ sɛ hã mi do gba we na: ‘Monganga, mɔ kpásá kili tɛ mɔ wele nɛ!’ Nɛ nɛ tɔ̃ sɛ 'bɔ na: ‘Lɛ zila we mɛnɔ kɛ mɔ dɛa ma Kafarnaumɛ i ni vɛ̃. Kɔ mɔ dɛ́ mbe ma dɛ kɔ le 'da mɔ gɛ!’ ”

²⁴ Nɛ a tɔ̃ 'bɔ na: “Mi tɔ̃ hã nɛ do gbãlã we na, wa kɔ̃́ gɛnɛ wi gba olo nu Gale kɔ le 'da a gɔ.

²⁵ Gbãlã we, owi fio wili wa dɛlɛ zɛ́ ngɔ nù Israɛlɛ do 'da fala 'da Elia wena. Nɛ do ngba soenɔ ni, kolo tɛ́ zɛ́ gɔ gbaa 'do sabɛlɛ talɛ do zɛkɛ gazɛlɛ. Nɛ gba wɔ ma tia ngɔ nùi vɛ̃.

²⁶ Nɛ Gale tòmbò zɛ́ Elia 'da mbe wele kpo sanga owuko Israɛlɛnɔ ni gɔ. A tumba a 'da mbe gele wuko wi fio wili tɛ kɔ le Sarɛpta, tɛ ngɔ nù Sidoni.

²⁷ Nɛ 'da fala 'da Elize, wi gba olo nu Gale, Owi zɛlɛ ngbɛlɛ wa dɛlɛ zɛ́ ngɔ nù Israɛlɛ wena. Nɛ mbe kpo sanga wa ni kpàsà gɔ. Wi kpasa zɛ́ kpo a Namanɛ, gele wi kɛ a yula ngɔ nù Siri ni.”

²⁸ Owinɔ kɔ tɔa mbula ni wa nɛa we zele ni, nɛ zã wa vɛ̃ nɔ̃lɔ̃ wena.

²⁹ Nɛ wa kulu ngɔ dɛ tɛ̃ a, nɛ wa nɛ do a zununu dɛ 'do ngba i, tɛ gbogbo zu kala wa dɛa le 'da wa ngɔ nɛ ni, takɔ wa ili a dɛ kɔ gbangɔlɔ̃ i.

³⁰ Nɛ a hɔ nza do sanga wa ni, nɛ a la.

Yezu ndaka 'dã hi wi kɔ wele

³¹ Nɛ Yezu la dɛ kɔ le Kafarnaumɛ, tɛ ngɔ nù Galile. Nɛ ma hɔa tũ ɔmɔ tɛ wi, nɛ Yezu lia kɔ tɔa mbula, nɛ a ma ngɔ be we hã owinɔ.

³² Nɛ winɔ kɛ wa zila a ni, wa ɔngba do tɛlɛ tɛ bia wenɔ 'da a wena, we duzu kɛ a be zi ma do dĩ wena.

³³ Nɛ mbe wele kpo zi kɔ tɔa mbula ni, a do 'dã hi wi kɔ a. Nɛ a ma ngɔ he mɔ nganda wena na:

³⁴ “Aa Yezu, wi Nazarɛtɛ, mɔ nɛ dɛ do lɛ nɛ nde? Mɔ tɛa we kumu lɛ kumu nde? Mi ĩ ti mɔ de wena. Mɔ a santo kɛ Gale a tumba mɔ!”

³⁵ Nɛ Yezu dãlã dɛ tɛ 'dã hi wi ni na: “Mɔ kpé nu mɔ, kɔ mɔ hɔ́ nza kɔ wi gɛ do'do!” Nɛ 'dã hi wi lua wi ni nù kpingbi dɛ dati winɔ vɛ̃, nɛ a za'da nza. Nɛ nde a dɛ̀ 'dã mɔ do wi ni gɔ.

³⁶ Nɛ winɔ vɛ̃ wa ɔngbɔ nɛ ge nde ni, nɛ wa ma ngɔ tɔ̃ dɛ sanga ngba wa na: “Ki a wila we ge nde? A ba nu a do ngawi ɔ nɛ nwa ni hã o'dã hi winɔ, nɛ wa hɔ nza kɔ wele!”

³⁷ Nɛ sako li Yezu yɛ'ba ngɔ nùi ni vɛ̃.

Yezu kpasa ogba dɔa wi zɛlɛ

³⁸ Nɛ Yezu hɔa nza kɔ tɔa mbula ni, nɛ a la dɛ kɔ tɔa 'da Simɔ. Kɔ a nɛa we hɔ i mɔ, nɛ nde kɛfɛ Simɔ wuko nɛ zi a ngɔ te ɔi, we duzu kɛ tɛ̃ a ba we kpangbangba. Nɛ wa tɔ́a hã Yezu na, a kpasa a.

³⁹ Nɛ Yezu bili zu ɛ dɛ ngɔ a, nɛ a tɔ̃ do nga gɛlɛ na: “Bawe tɛ wi, mɔ gɛ̃́!” Nɛ bawe tɛ̃ a gɛ̃a do ti, nɛ a kulu ngɔ, nɛ a ma ngɔ gi nyɔngɔmɔ hã wa.

⁴⁰ Kɔ wese nɛa we le nù, nɛ winɔ wa kala Owi zɛlɛ kpi do kpi, nɛ wa tɛ do wa hã Yezu. Nɛ a ia kɔ̃ a ngɔ wa kpo kpo, nɛ wa kpasa.

⁴¹ Nɛ Yezu ndaka o'dã hi wi kɔ owinɔ wena, nɛ o'dã hi winɔ ni wa ma ngɔ he mɔ na: “Mɔ a Be 'da Gale!” Nɛ Yezu ua dã zu wa nganda wena na, wa kpe nu wa. Mba gɔ, wa ĩ zi na, Yezu a Mɛsiya.

Yezu bia we tɛ ngɔ nù Yude

⁴² Fala nɛa we sa nɛ, nɛ Yezu hɔa nza kɔ le ni, nɛ a la dɛ 'do ngba i. Nɛ gba gili Owele wa ma ngɔ fa a. Kɔ wa nɛa we kpa a, nɛ wa disi a, nɛ wa kɔ̃̀ na a la lo gɔ.

⁴³ Nɛ Yezu tɔ̃a hã wa na: “Ma wia na, mi be tɛ mɛ 'bɔ Dia Sako dɛa to nwa 'da Gale tɛ kɔ gele lenɔ. We duzu kɛ Gale tumba mi we be ma.”

⁴⁴ Nɛ Yezu ma zi ngɔ be wenɔ kɔ tɔa mbulanɔ tɛ ngɔ nù Yude.