LUKA 24 - WE NU GALE 1995

Yezu za'da nza kɔ fio

¹ Nɛ do kuti tũi kɔ mbé pɔsɛ 'do ɛngga ɔmɔ tɛ wi, do titole belee, nɛ owukonɔ wa kala nɔyɔmbɔnɔ wa 'dafa ni, nɛ wa nɛ do ma ngɔ zunu i.

² Kɔ wa nɛa we hɔ i mɔ, nɛ wa zɔ gba gbɛlɛ ta nu zuni, nɛ nde ma kimili, kɔ ma do kɛ zã nɛ.

³ Nɛ wa lia dɛ kɔ zuni i, nɛ wa kpà wɔlɔ Nwa Yezu gɔ.

⁴ Nɛ zu wa vĩ do'do, kɔ wa nɛ fi li wa, nɛ wa zɔ Owi wili bɔa, wa hi'da fɛ̃a tulu ma ndele kpala kpala, kɔ wa dɛ kɛ zã wa ni.

⁵ Nɛ kili ba wukonɔ, nɛ wa gu li wa nù. Nɛ Owi wilinɔ ni wa aka wa na: “Gulu kɛ nɛ fa wi kɛ a do tunu li a ni sanga ofionɔ we ge nde?

⁶ Fo a dɛ bina, a tunu kɔ fio ia. Nɛ lénggé ngɔ wenɔ a tɔ̃a zi hã nɛ, 'da fala a zi tɛ Galile i ni.

⁷ A tɔ̃a zi na: ‘Ma wia na, wa 'dɔlɔ mi Be 'da Wele hã o'dã wi, nɛ wa bɛ̃lɛ̃ mi ngɔ finda te, nɛ do talɛ tũi, nɛ mi za'da sɛ nza kɔ fio!’ ”

⁸ Nɛ ta zu wukonɔ ni gba ngɔ we Yezu tɔ̃a zi ni.

⁹ Nɛ wa yolo di ni, nɛ wa nɛ we tɔ̃ wenɔ ni vɛ̃ hã owi yambala mɛnɔ 'bu ngɔ wa kpo ni, do mbe gele winɔ.

¹⁰ Wukonɔ ni zi a Maria, boko Magdala, do Zanɛ, do Maria, naa Zake. Nɛ gele wukonɔ kɛ wa sɔ do wa ni, wa tɔ̃a tɛ mɛ 'bɔ we nɛ hã owi nɛ tonɔ.

¹¹ Nɛ Owi nɛ tonɔ wa lingga na, wenɔ wa tɔ̃ ni a yia we iko, nɛ wa kɔ̃̀ gɛnɛ nɛ gɔ.

¹² Gɛnɛ kɔ na mɛ ni, nɛ nde Petro kulu ngɔ, nɛ a yu dɛ nu kɔ̃ i. Kɔ a nɛa we gɛ zu a kɔ nɛ, nɛ a zɔ̀ wele gɔ. A zɔa tati a du fɛ̃a tulu iko. Nɛ a kpula tɛ̃ a, nɛ a ɔngbɔ do mɛ ma la ni wena.

Yezu bia tɛ̃ a hã owinɔ 'da a bɔa tɛ li wala Emausi

¹³ Nɛ do kpo ngba soe ni, nɛ ombe winɔ 'da Yezu bɔa wa nɛa tɛ le Emausi. Yolo Yeruzalɛmɛ we hɔ Emausi, mɛ a kilomɛtrɛ 'bu ngɔ nɛ kpo.

¹⁴ Nɛ tɛ nɛ mɔ́ wa ni, nɛ wa ma ngɔ tɔ̃ lɛnggɛ mɛnɔ ma la ni.

¹⁵ Kɔ wa tɛ wele we do ba kafi nu ngba wa ni, nɛ Yezu tɛa, nɛ a kɔlɔ do wa, nɛ a kpe do wa.

¹⁶ Nɛ wa zɔ a, nɛ nde wa wè tɛ ĩ ti a gɔ.

¹⁷ Nɛ a aka wa na: “We kɛ nɛ ba kafi nɛ nu ngba nɛ do li wala gɛ, mɛ a we ge nde?” Nɛ wa yula nù do 'bako vɛ̃.

¹⁸ Nɛ mbe kpo, li a a Kleopasi tɔ̃ hã a na: “'Bali wi kpo kɔ le Yeruzalɛmɛ, kɛ a zèlè we mɛnɔ ma dɛa tɛ̃ ɛ kɔ tũnɔ gɛ gɔ ni, wi a mɔ nde?”

¹⁹ Nɛ a aka wa na: “Ki a mɔ ge nde?” Nɛ wa gese hã a na: “Mɛ a we 'da Yezu, wi Nazarɛtɛ. A zi a wi gba olo nu Gale, nɛ dɛa mɛnɔ 'da a, do wila we nu a zi do ngawi li Gale, do li winɔ.

²⁰ Nɛ onwa nganganɔ 'da lɛ, do ogã winɔ wa ba a, nɛ wa bɛ̃lɛ̃ a ngɔ finda te, nɛ wa gbɛ a.

²¹ Nɛ nde lɛ gbini zi zã lɛ do a na, wi a a hã a nɛ fo sɔ obe Israɛlɛ kɔ ngbá. Hã mɔ zɔ, sɔɛ gɛ mɛ a talɛ tũi 'do mɛnɔ ma dɛa tɛ̃ ɛ ni.

²² Lɛ ĩ mɛ gɛ na, ombe wukonɔ sanga lɛ ni, wa tɔ̃a lɛnggɛ, nɛ ma vĩ zu lɛ. We kɛ wa kulu ngɔ do titole belee, nɛ wa nɛ ngɔ zunu i,

²³ nɛ nde wa zɔ̀ wɔlɔ a gɔ. Nɛ wa kpula tɛ wa, nɛ wa tɔ̃a hã lɛ na, oanzɛnɔ wa hɔa, nɛ wa tɔ̃ hã lo na, a do tunu li a.

²⁴ Nɛ ombe sanga lɛ wa nɛa ngɔ zunu i, nɛ wa kpa ɔ nɛ kɛ owukonɔ wa tɔ̃a hã lɛ ni, mɔ kpo a kɛ wa zɔ̀ a gɔ.”

²⁵ Nɛ Yezu tɔ̃ hã wa na: “O aa nɛ, gulu kɛ nɛ zɔla hã zã ni we ge nde? Gulu kɛ nɛ wè tɛ kɔ̃ wenɔ, kɛ owi gba olo nu Gale wa tɔ̃a zɛ́ ni dɔ̃ iko gɔ we ge nde?

²⁶ Ma wè na, tɛ Mɛsiya zɛlɛ na mɛ ni, sɛ nɛ a kpa dɔ̃lɔ̃ li de gɔ nde?”

²⁷ Nɛ a ndua tɔ̃ gulu wenɔ kɛ wa kɔma zɛ́ ngɔ a kɔ 'buki 'da Mɔizɛ, do owi gba olo nu Gale ni vɛ̃ hã wa.

²⁸ Kɔ wa nɛa we kɔlɔ do le wa nɛ tɛ nɛ ni, nɛ Yezu dɛa ɔ nɛ kɛ a nɛ la dɛ dati ni.

²⁹ Nɛ wa kɔ̃̀ zi na, a la gɔ. Nɛ wa tɔ̃ hã a na: “Mɔ tɛ là gɔ, lɛ ɔ́ dɛ dɛ, we kɛ wese gɛ̃a ia, nɛ tũi nɛ tũ tũ.” Nɛ a ɛlɛ we ɔ do wa dɛ di ni.

³⁰ Nɛ wa dungu nù nu nyɔngɔmɔ, nɛ a ba mapa, nɛ a hã iɔ̃nae hã Gale, nɛ a gbini sanga nɛ, nɛ a hã hã wa.

³¹ Nɛ li wa hũi wá, nɛ wa ĩ na, wi a a. Kɔ wa nɛ ka mɔ, nɛ nde fo 'bɔ a sanga wa ni bina.

³² Nɛ wa ma ngɔ tɔ̃ hã ngba wa na: “'Da fala a ma sɔ ngɔ tɔ̃ wenɔ hã lɛ, do tɔ̃ gulu wenɔ wa kɔma kɔ 'Buki 'da Gale li wala i ni, nɛ sila lɛ dùnù sɔ do yangga gɔ nde?”

³³ Nɛ wa kulu ngɔ do kpo tũi ni, nɛ wa si dɛ Yeruzalɛmɛ i. Nɛ wa kpa ngba wa do owi yambala mɛnɔ 'bu ngɔ wa kpo, do mbe gele winɔ wa zi do wa ni.

³⁴ Nɛ wa tɔ̃ hã wanɔ bɔa ni na: “Mɛ a gbãlã we, Nwa Yezu tunu kɔ fio! We kɛ Simɔ zɔa a do li ɛ ngboo!”

³⁵ Nɛ winɔ bɔa ni wa tɔ̃ tɛ mɛ 'bɔ we mɛnɔ ma dɛa tɛ̃ ɛ li wala i, do kɛ wa ĩ do ti Yezu, 'da fala a gbini do sanga mapa hã wa ni.

Yezu bia 'bɔ tɛ ɛ hã owinɔ 'da a

³⁶ Kɔ winɔ bɔa ni wa 'bana tɛ tɔ̃ tɔ̃a iko, nɛ Yezu hɔ 'bɔ dɛ sanga wa ni, nɛ a tɔ̃ hã wa na: “Nɛ ɔ́ do gɛ̃a sila!”

³⁷ Nɛ zu wa hɔa hau, nɛ kili ba wa wena. Nɛ wa lingga na, lo zɔa gba sɔ̃ mɔ.

³⁸ Nɛ Yezu tɔ̃ hã wa na: “Gulu kɛ sila nɛ yɛkɛ, nɛ nɛ do kafi ni we ge nde?

³⁹ Wi a mi! Nɛ ká mɔ, kɔ nɛ zɔ́ tambala kɔ̃ mi do nyanga mi. Nɛ támbá tɛ mi, kɔ nɛ zɔ́! We kɛ hi wi do kili tɛ wi, do gbãlã tɛ wi ɔ nɛ kɛ nɛ zɔ do mi gɛ bina.”

⁴⁰ A tɔ́a ní do'do, nɛ a be tambala kɔ̃ a, do nyanga a hã wa.

⁴¹ Nɛ wa zi do ɔngbamɔ do yangga wena, nɛ wa zɔ zi nɛ́ ma ɔlɔ wa ɔla ni. Nɛ a aka wa na: “Nɛ mbe do nyɔngɔmɔ boe nde?”

⁴² Nɛ wa kɔ̃a, nɛ wa hã gbini dɔa kɔyɔ hã a.

⁴³ Nɛ a ba ma, nɛ a nyɔngɔ ma dɛ li wa ni.

⁴⁴ 'Do nɛ, nɛ a tɔ̃ hã wa na: “Kɛ nɛ zɔ gɛ, mɛ a wenɔ mi tɔ̃a zi hã nɛ, 'da fala mi 'bana zi do nɛ ni. Ma wia na, wenɔ kɛ wa tɔ̃a zi ngɔ mi kɔ 'buki 'da Mɔizɛ, do owi gba olo nu Gale, do kɛnɔ kɔ 'buku zumanɔ ni, ma dɛ tɛ̃ ɛ.”

⁴⁵ Nɛ a dɛa na, linggamɛnɔ 'da wa hũi, takɔ wa ĩ ti 'du gulu 'Buki 'da Gale.

⁴⁶ Nɛ a tɔ̃ hã wa na: “Nɛ zɔ́, wa kɔma na, ma wia na, Mɛsiya kpa zɛlɛ tɛ, nɛ do talɛ tũi, nɛ a tunu sɛ kɔ fio.

⁴⁷ Nɛ ma wia 'bɔ na, Owele wa be sakoe 'da a nyanga nza gɛ vɛ̃, ndo do Yeruzalɛmɛ, we tɔ̃ hã winɔ na, wa kifi sila wa, kɔ Gale fo ku'da 'dã mɛnɔ zu wa.

⁴⁸ Temɔɛ mɛnɔ ma dɛa tɛ̃ ni, wi a nɛ.

⁴⁹ Nɛ mi ngboo ni, mi tombo sɛ dia mɛ kɛ Baa mi kpua zɛ́ mbulu hã ma hã nɛ ni hã nɛ. Nɛ nde ma wia na, nɛ 'bana dɛ kɔ le gɛ, gbaa ndɔti nɛ a kɛ ngawi 'da Gale zĩlĩ dɛ ngɔ nɛ do'do sɛ nɛ de.”

Yezu kũ dɛ li nza i

⁵⁰ 'Do kɛ a tɔ̃a wenɔ ni do'do, nɛ a kala wa dɛ tɛ̃ a, nɛ wa hɔ nza kɔ le Yeruzalɛmɛ, nɛ a nɛ do wa gbaa dɛ Betani. Wa hɔa i mɔ, nɛ a a kɔ̃ a ngɔ wa, nɛ a wele nu a tɛ wa.

⁵¹ Kɔ a tɛ wele nu a tɛ wa ni, nɛ a ma ngɔ gɔnɔ sanga tɛ ngba a do wa. Nɛ Gale ba a dɛ ngɔ i.

⁵² Nɛ wa dɔnggɔ a, nɛ 'do nɛ, nɛ wa kpolo tɛ wa dɛ Yeruzalɛmɛ i do yangga.

⁵³ Nɛ tũ kpo kpo, wa nɛ zi kɔ tɔa Tɛmpɛlo i, nɛ wa dɔnggɔ Gale.