LUKA 23 - WE NU GALE 1995

Wa nɛa do Yezu dati Pilatɛ

¹ Nɛ gba gili winɔ kɔ mba li ngba wi ni, wa kulu ngɔ vɛ̃, nɛ wa nɛ do Yezu dati Pilatɛ.

² Wa hɔa i mɔ, nɛ wa ma ngɔ kala we dɛ ngɔ a dɛlɛ wena na: “Lɛ kpa wi ge tɛ vĩ zu owinɔ 'da lɛ. A tɔ̃ hã wa na, wa tɛ fùtà takoe hã gã nwa ngɔ nù Roma gɔ. Nɛ a ba tɛ̃ a na, ɛ a Mɛsiya, kɛ a a Nwa.”

³ Nɛ Pilatɛ aka Yezu na: “Mɔ a nwa 'da Oyudanɔ nde?” Nɛ Yezu gese hã a na: “Ma a mɔ tɔ̃a ni.”

⁴ Nɛ Pilatɛ tɔ̃ hã onwa nganganɔ, do ogba gili winɔ na: “Mi kpà mbe gulu kɛ mi wia we fi wi gɛ li ngbangga ni gɔ.”

⁵ Nɛ wa dala nu wa wena na: “A ɔlɔ winɔ do bia wenɔ 'da a, takɔ wa 'danga le 'danga. A ndua zi nyanga nɛ tɛ Galile, do ngɔ nù Yude vɛ̃, kɔ ngangga ni, a tɛa 'bɔ gbaa Yeruzalɛmɛ nga.”

Wa nɛa do Yezu dati Herodɛ

⁶ Kɔ Pilatɛ nɛa we zele we ni, nɛ a aka na: “Wi gɛ a wi Galile nde?”

⁷ Nɛ wa gese hã a na: “Ĩi, a a wi Galile.” Kɔ Pilatɛ nɛa we zele na, Yezu yula ngɔ nùi kɛ Herodɛ zɔ mɔ tɛ nɛ ni, nɛ a tumba a dɛ 'da Herodɛ i. Do 'da fala ni, nɛ nde Herodɛ tɛa zi dɛ Yeruzalɛmɛ ni.

⁸ Kɔ a nɛa we zɔ Yezu, nɛ a dɛa yangga, we kɛ a zila zi we 'da Yezu wena, nɛ a fa zi we kpa ngba a do a belee. Nɛ a kɔ̃a na, Yezu dɛ mbe ɔngbamɔ dɛ gbali ɛ.

⁹ Kɔ Yezu hɔa, nɛ Herodɛ aka a do we wena, nɛ nde Yezu gèsè we kpo hã a gɔ.

¹⁰ Nɛ nde onwa nganganɔ, do Owi be mbulanɔ wa zi di ni boe, tɛ kala we dɛ ngɔ a nganda wena.

¹¹ Nɛ Herodɛ, do osodanɔ 'da a wa ma ngɔ yɔndɔ a, tɛ mɔmɔ a nɛ ge nde ni. Nɛ wa he'de tulu nwa hã a, nɛ wa tombo a hã Pilatɛ.

¹² Ĩ na, Herodɛ do Pilatɛ wa sɛnɛ ngba wa dati wena, nɛ do ngba soe ni, nɛ wa ba 'bia.

Wa 'bili we 'da Yezu na wa gbɛ a

¹³ Nɛ Pilatɛ mba li onwa nganganɔ vɛ̃, do gã winɔ, do tala owinɔ vɛ̃,

¹⁴ nɛ a tɔ̃ hã wa na: “Nɛ tɛa sɔ do wi gɛ hã mi, nɛ nɛ tɔ̃ na, a vĩ zu winɔ wena. Kɔ mi aka sɔ a dɛ li nɛ vɛ̃, nɛ nde mi kpà mbe 'dã mɔ kpo kɛ ma wia we fi ngbangga zu a ni gɔ.

¹⁵ Nɛ Herodɛ kpà 'bɔ a do 'dã mɔ gɔ. Ma kɛ a gisa 'bɔ a hã lɛ ni. Lɛ zɔa na, wi gɛ dɛ̀ mbe 'dã mɔ kpo, kɛ ma wia na, wa gbɛ a we nɛ ni gɔ.

¹⁶ Kɔ mi hã sɛ nu mi na, wa zɛ a do zufa ndala, nɛ 'do nɛ, nɛ mi da kɔ̃ mi tɛ̃ a.” [

¹⁷ Pilatɛ tɔ̃a ni, mba gɔ, we kɛ do ngba soe ɛngga Hɔ Nza kɔ Ngbá fai, nɛ ma wia zi na, a da kɔ̃ a tɛ mbe wi bɔlɔkɔ kpo.]

¹⁸ Nɛ wa vɛ̃ wa ma ngɔ he mɔ na: “Wa gbɛ́ wi gɛ! Nɛ mɔ dá kɔ̃ mɔ tɛ Barabasi hã lɛ!”

¹⁹ Mɛ ni nɛ nde wa fi zi Barabasi bɔlɔkɔ, we kɛ a fi zi balia kɔ le, nɛ a gbɛa 'bɔ wele.

²⁰ Nɛ nde Pilatɛ kɔ̃a zi we da kɔ̃ ɛ tɛ Yezu, nɛ a aka 'bɔ ogba gili winɔ mbé nɛ.

²¹ Nɛ wa he mɔ na: “Mɔ bɛlɛ a ngɔ finda te! Bɛ̃́lɛ̃́ a ngɔ finda te!”

²² Nɛ Pilatɛ aka fala talɛ kɛ na: “'Dã mɛ ngboo a dɛa ni a ge nde? We kɛ mi kpà mbe a do 'dã mɔ kɛ ma wia na, wa gbɛ a we nɛ ni gɔ. Kɔ mi hã sɛ nu mi na, wa zɛ a do zufa ndala, nɛ 'do nɛ, nɛ mi da sɛ kɔ̃ mi tɛ̃ a.”

²³ Nɛ nde wa tɛ mɛ tɛ he mɔ do nga gɛlɛ na, a bɛ̃́lɛ̃́ Yezu ngɔ finda te iko. Nɛ winɔ wa hia mɔ gbaa, nɛ nu wa nɛ ngɔ Pilatɛ,

²⁴ nɛ a 'bili na, wa dɛ do Yezu nɛ́ kɛ wa kɔ̃a ni.

²⁵ Nɛ a da kɔ̃ a tɛ wi winɔ wa kɔ̃a a ni. Wi a wele kɛ wa fi zi a bɔlɔkɔ, we kɛ a gbɛ zi winɔ, nɛ a fi balia kɔ le ni. Nɛ a hã Yezu hã winɔ na, wa dɛ do a ɔ nɛ kɛ zã wa kɔ̃a ni.

Wa bɛ̃lã Yezu ngɔ finda te

²⁶ Osodanɔ wa ma ngɔ la do Yezu, nɛ wa kpa Simɔ, wi Sirɛnɛ, nɛ nde a yula safɔ, kɔ a si si. Nɛ wa ba a, nɛ wa e tole finda te ngɔ gɛlɛ a na, a nɛ nɛ 'do Yezu.

²⁷ Nɛ gba gili owele wa kpia dɛ 'do a. Wa mba do owukonɔ kɛ wa dɛ zi 'bako, nɛ wa he kɔ̃a a ni,

²⁸ Nɛ Yezu siki tɛ̃ ɛ, nɛ a tɔ̃ hã owukonɔ ni na: “Aa nɛ, owuko Yeruzalɛmɛ, nɛ tɛ hè kɔ̃a mi gɔ! Nɛ hé kɔ̃a tɛ nɛ, do obenɔ 'da nɛ!

²⁹ We kɛ ngba soenɔ 'do gɛ, nɛ Owele wa tɔ̃ sɛ na: ‘Yangga do owuko ndɔlɔnɔ, do owanɔ wa kò kuti kula gɔ, do wanɔ wa ɔ̀mɔ̀ mbe be fala kpo gɔ ni!’

³⁰ Nɛ owinɔ wa tɔ̃ sɛ hã kalanɔ do otɔ̃nɔ na: ‘Nɛ té dɛ ngɔ lɛ! Nɛ kélé lɛ!’

³¹ Kɔ nɛ́ kɛ wa dɛa do tɔlɔ te ní ni, nɛ wa dɛ sɛ do kula te nɛ nde?”

³² Nɛ wa nɛa 'bɔ do mbe gele Owi dɛ 'dã mɔ bɔa na, wa gbɛ wa fala nɛ kpo do Yezu.

³³ Kɔ wa nɛa we hɔ fala wa sa li nɛ na: “Gbãlã zu wi” ni, nɛ wa bɛ̃lɛ̃ Yezu ngɔ finda te dɛ di ni, fala nɛ kpo do owinɔ ni. Wa bɛ̃lɛ̃ mbe kpo tɛ ngɔ finda te si ngɔ ngawili kɔ̃ Yezu, nɛ mbe nɛ si ngɔ gale.

³⁴ Nɛ Yezu tɔ̃ na: “Baa mi, mɔ fó ku'da 'dã mɛ zu wa, we duzu kɛ wa ĩ̀ gulu mɛnɔ wa dɛ ni gɔ.” Nɛ wa tua zeke we kɛ̃ sanga tulunɔ 'da a dɛ kɔ̃ ngba wa.

³⁵ Nɛ Owele wa yolo dɛ di ni tɛ zɔ wa. Nɛ onwa Yudanɔ wa ma ngɔ mɔmɔ a tɛ tɔ̃ na: “A kpasa zi ogele winɔ, kɔ fala kɛ a a Mɛsiya, kɛ Gale saka a ni, nɛ a kpasa kili tɛ̃ a wele nɛ.”

³⁶ Nɛ osodanɔ wa mɔmɔ tɛ mɛ 'bɔ Yezu. Nɛ wa nɛa, nɛ wa hã kpã dɔ̃ hã a,

³⁷ nɛ wa tɔ̃ hã a na: “Fala kɛ mɔ a Nwa 'da Yudanɔ kpaa nde, nɛ mɔ kpásá kili tɛ mɔ, kɔ lɛ zɔ́!”

³⁸ Nɛ wa dɛa gulu fie 'da a do mbɛti dɛ ngɔ te ti zu a ni na: “Wi gɛ a Nwa 'da Oyudanɔ.”

³⁹ Nɛ mbe 'dã wi kɛ wa bɛ̃lɛ̃ a ngɔ finda te dɛ kɛ zã Yezu ni ma ngɔ dã a tɛ tɔ̃ na: “Mɔ a Mɛsiya gɔ nde? Mɔ kpásá kili tɛ mɔ, kɔ mɔ kpásá tɛ mɛ 'bɔ lɛ gɔ nde?”

⁴⁰ Nɛ ngba a kɔ'dɔ a na: “Mɔ kɛ mɔ kpa kpo etumbui do a ni, mɔ dɛ́ kili Gale gɔ nde?

⁴¹ Kɛ 'da lɛ do mɔ, gulu nɛ boe, we kɛ lɛ kpa gɛ a si olo kɛ lɛ dɛa ni. Nɛ nde kɛ 'da a, a dɛ̀ 'dã mɔ gɔ.”

⁴² Nɛ 'do nɛ, nɛ a tɔ̃ hã Yezu na: “'Da fala kɛ mɔ tɛ sɛ we dungu nwa ni, nɛ dɔ tɛ zu mɔ élé ngɔ mi gɔ.”

⁴³ Nɛ Yezu gese hã a na: “Mi tɔ̃ hã mɔ do gbãlã we na, sɔɛ gɛ, mɔ sɛ do mi tɛ kɔ Paradizo i.”

Yezu fia

^44-45 Ma nɛa we hɔ dɔ̃ɔ do midi, nɛ wese bi tũ, nɛ gba tũ tũ mbĩi ngɔ nùi vɛ̃, gbaa 'do sa talɛ. Nɛ gba tulu ku'bi kɔ Tɛmpɛloe i, ma ɛ̃ dɛ gbogbo kparr, yolo ngɔ gbaa nù.

⁴⁶ Nɛ Yezu hia mɔ dɛ ngɔ na: “Baa mi, mi la hi mi dɛ tambala kɔ̃ mɔ!” A tɔ̃a ni do'do, nɛ a e sila a nù.

⁴⁷ Nɛ mbe wi ngɔ osoda Roma zɔa mɛnɔ ma la ni, nɛ a dɔnggɔ Gale na: “Gbãlã we, wi gɛ a zi a bɔlɔ zu wele!”

⁴⁸ Nɛ gba gili winɔ wa ngbula zi ngba wa dɛ di ni ni, wa zɔa mɛnɔ ma la ni, nɛ wa kpula tɛ wa, nɛ wa ma ngɔ zɛ ngu'du wa do 'bako vɛ̃.

⁴⁹ Nɛ oyali ngba Yezu, do owukonɔ kɛ wa yula zi do a Galile i ni, wa yula bi nyɛ nyɛla, nɛ wa tɛ zɔ mɛnɔ ma dɛ tɛ̃ ɛ ni.

Wa mi Yezu

⁵⁰ Nɛ mbe wele kpo, li a a Yozɛfu, wi kɔ le Arimate, tɛ ngɔ nù Yude. A zi a mbe kpo kɔ owi 'bili wenɔ, nɛ a zi a dia wi, nɛ zu a bɔlɔ wena.

⁵¹ Nɛ a kɔ̃̀ zi gɛnɛ linggamɛ 'da ongba a, do mɛ wa dɛa do Yezu ni gɔ. Nɛ a 'bɔ zi 'da ngba soe kɛ Gale nɛ ndo do to nwa 'da a ni.

⁵² Nɛ a nɛa 'da Pilatɛ i, we aka a na, a ba wɔlɔ Yezu hã ɛ. Nɛ Pilatɛ kɔ̃a.

⁵³ Nɛ Yozɛfu nɛa, nɛ a ba wɔlɔ Yezu ngɔ finda te dɛ nù, nɛ a kasa fɛ̃a tulu tɛ̃ a vɛ̃. Nɛ a e a kɔ kɔ̃ kɛ wa 'dungga ma kɔ tanɔ ni. Mɛ a kɔ̃ kɛ wa mì zi mbe wele kɔ nɛ dati gɔ.

⁵⁴ Nɛ ngba soe ni zi a tũ 'dafa tɛ wi dati kɛ na ɛngga ndo ni.

⁵⁵ Nɛ owukonɔ kɛ wa yula zi do Yezu Galile i ni, wa nɛa fala nɛ kpo do Yozɛfu, nɛ wa zɔ kɔ̃ɛ, nɛ wa zɔ 'bɔ tɛlɛ tɛ kɛ wa ia do Yezu kɔ nɛ ni.

⁵⁶ Nɛ 'do nɛ, nɛ wa kpula tɛ wa, nɛ wa fa nwá nyama, do nɔ yɔmbɔ, we fɛlɛ sɛ do tɛ Yezu. Nɛ do kɔ̃ tũ ɔmɔ tɛ wi, nɛ wa kpia tɛ wa ɔ nɛ kɛ mbula tɔ̃a ni.