LUKA 20 - WE NU GALE 1995

Yezu kpa ngawi dɛa to nwa 'da a do nde?

¹ 'Da fala kpo, nɛ Yezu tɛ be Dia Sakoe hã winɔ kɔ Tɛmpɛlo i, nɛ onwa nganganɔ do owi be mbulanɔ, do okumunɔ wa tɛa,

² nɛ wa aka a na: “Mɔ tɔ̃́ hã lɛ sɛ! Mɔ dɛ mɛnɔ gɛ do ngawi 'da wio nde? Wi tumba mɔ we dɛ ma a wio nde?”

³ Nɛ Yezu gese hã wa na: “Mi kɔ̃a tɛ mɛ 'bɔ we aka nɛ do we kpo, kɔ nɛ gese nu nɛ hã mi.

⁴ Wi tumba zi Yoanɛ, wi batisa winɔ a wio nde? Wi zi a Gale, tabi wi zi a Owele nde?”

⁵ Nɛ wa ma ngɔ tɔ̃ dɛ sanga tɛ ngba wa na: “Fala kɛ lɛ gese na: ‘Wi zi a Gale a tumba a,’ nɛ a tɔ̃ sɛ hã lɛ na: ‘Kɔ gulu kɛ nɛ kɔ̃̀ zi gɛnɛ a gɔ we ge nde?’

⁶ Kɔ lɛ gese 'bɔ na: ‘Wi zi a Owele hã wa tumba a,’ nɛ owinɔ vɛ̃, wa lo sɛ lɛ do ta, nɛ wa gbɛ lɛ iko. We kɛ winɔ wa tɔ̃ na, Yoanɛ zi a wi gba olo nu Gale.”

⁷ Na mɛ ni, nɛ wa gisa hã Yezu na: “Lɛ ĩ̀ ti wi tumba a ni gɔ.”

⁸ Nɛ Yezu tɔ̃ hã wa na: “Ní a mi sá sɛ tɛ mɛ 'bɔ li wi kɛ a tumba mi we dɛ mɛnɔ gɛ ni hã nɛ gɔ.”

Gba we ngɔ o'dã wi dɛ to fɔ

⁹ 'Do ki ni, nɛ Yezu ma ngɔ be we hã owinɔ do gba we na: “Mbe wi wili kpo, a wa zi fɔ mɔ́ a, nɛ a mi do vinɔ. Nɛ a e to fɔɛ ni dɛ kɔ̃ owi dɛa tonɔ na, wa dɛ, nɛ lo gɔnɔ sanga wala nɛ do wa, nɛ a la gɛnɛ, we dɛ dɔa kɔ̃ tũ.

¹⁰ “Kɔ ma hɔa ngba soe 'bi wala nɛ, nɛ a tombo mbe wi to mɔ́ a kpo hã wi dɛa tonɔ ni na, a kala kɛ 'dɛ ɛ si do ma hã ɛ. Wi toe ni nɛa we hɔ i mɔ, nɛ wa zɛ a gbaa, nɛ wa gese a do wila kɔ a.

¹¹ Nɛ wele fɔɛ tombo mbé wele hã wa, nɛ wa ba 'bɔ wele ki ni, nɛ wa zɛ a gbaa, nɛ wa dã a vɛ̃, nɛ wa gese a do wila kɔ a.

¹² Nɛ wele fɔɛ tumba 'bɔ talɛ wi toe, nɛ wa e dani tɛ̃ a, nɛ wa da a nza.

¹³ Nɛ wele fɔɛ ni tɔ̃ na: ‘Mi nɛ dɛ nɛ nɛ nde?’ Nɛ a na: ‘Mi tombo sɛ wá kpo bulu be 'da mi, kɛ mi kɔ̃a gɛnɛ a wena ni, nɛ mbe gɔ, kɔ wa zɔ a, nɛ wa dɔnggɔ sɛ a.’

¹⁴ Kɔ owi dɛ to fɔɛ wa nɛa we zɔ be, nɛ wa ma ngɔ tɔ̃ dɛ sanga tɛ ngba wa na: ‘Nɛ zɔ́ be wele fɔɛ, kɛ a ba sɛ fɔɛ olo baa a ni, a a i mɔ ni. Lɛ gbɛ́ a, nɛ lɛ ba sɛ fɔɛ gɛ do mɔ́ lɛ.’

¹⁵ Nɛ wa ba a, nɛ wa gbɔtɔ a kɔ fɔɛ dɛ nza, nɛ wa gbɛ a.” Nɛ Yezu aka wa na: “Kɔ ní, nɛ wele fɔɛ a dɛ sɛ do winɔ ni nɛ nde?

¹⁶ A tɛ sɛ, nɛ a gbɛ wa, nɛ a ba fɔɛ 'da a we hã ma hã ogele wi dɛa to.” Kɔ winɔ wa nɛa we zele ní, nɛ wa tɔ̃ na: “Gɔ! A tɛ dɛ̀ ní gɔ.”

¹⁷ Nɛ Yezu ka mɔ tɛ wa, nɛ a aka wa na: “Gulu kɛ wa kɔma kɔ 'Buki 'da Gale na: ‘Ta kɛ Owi dɛ tɔanɔ wa da zi ma nù ni, ma hɔa ta bɛlɛduma tɔa’ ni we ge nde?

¹⁸ Kɔ wi kɛ a te ngɔ ta ni, nɛ sanga a ma 'bili sɛ. Kɔ fala kɛ ta ni te ngɔ wele, nɛ ma mbɔtɔ sɛ a.”

Wa aka Yezu ngɔ futa tako

¹⁹ Do 'da fala ni, nɛ owi be mbulanɔ do onwa nganganɔ wa ĩ na, Yezu tɔ̃ we ni hã lo, nɛ wa ma ngɔ fa wala we ba a. Nɛ nde wa dɛa kili gba gili winɔ.

²⁰ Nɛ wa gu kɔ̃ hã a, nɛ wa tombo Owi miã, nɛ wa dɛa tɛ wa ɔ nɛ odia wele ni, we le ti nu Yezu, takɔ wa da a hã Pilatɛ, gã wi fɔmɔ le.

²¹ Nɛ wa aka a na: “Wi be mɔ, lɛ ĩ na, wenɔ mɔ tɔ̃, nɛ mɔ be hã lɛ ni, mɛ a gbãlã we. Nɛ mɔ dɛ́ kili wele gɔ, nɛ mɔ sɔ́nzɔ́ do mɔ mɔ́ wele gɔ. Nɛ nde mɔ be tati a wala kɛ ma a bɔlɔ li Gale ni.

²² Kɔ mɔ tɔ̃́ hã lɛ sɛ! Mbula 'da lɛ kɔ̃a na, lɛ futa tako hã gã nwa ngɔ nù Roma, tabi lɛ tɛ fùtà gɔ nde?”

²³ Nɛ nde Yezu ĩ sɔ ti 'dã hã 'da wa ia, nɛ a tɔ̃ hã wa na:

²⁴ “Nɛ bé mbe gbãlã mbili hã mi sɛ!” Nɛ wa ba ma hã a. Nɛ a aka wa na: “Kɛ li mbili gɛ, mɛ a kpongbolo zu wio nde? Nɛ kɛ wa kɔma ti nɛ gɛ, mɛ a li wio nde?” Nɛ wa gese hã a na: “Mɛ a kpongbolo zu gã nwa ngɔ nù Roma.”

²⁵ Nɛ Yezu tɔ̃ hã wa na: “Na mɛ ni, nɛ gésé mɛ 'da nwa ngɔ nù Roma hã a, nɛ nɛ hã kɛ 'da Gale tɛ mɛ 'bɔ hã Gale.”

²⁶ Nɛ wa wè zi we ba a gɔ, we kɛ a tɔ̃a ma dɛ li owinɔ vɛ̃. Dɛ ngɔ nɛ, gisa we 'da a ma hã zi ɔngbamɔ hã wa wena, nɛ ma ba we nu wa do'do.

Wa aka Yezu ngɔ tunu kɔ fio

²⁷ Nɛ ombe sanga Osadisiɛnɔ wa tɛa 'bɔ 'da Yezu. (Sadisiɛnɔ wa a owinɔ kɛ wa tɔ̃ na, wele fe ia, nɛ nde a túnú 'bɔ kɔ fio gɔ ni.) Nɛ wa aka a na:

²⁸ “Wi be mɔ, Mɔizɛ kɔma zɛ́ mbula hã lɛ na: ‘Fala kɛ wele kpo do nya a, kɔ nya a ni fe, nɛ nde a kò do wuke 'da a gɔ nde, nɛ ma wia na, nya a wele kɛ 'bana ni ba wuke olo a, takɔ a ko be hã a.’

²⁹ Kɔ mɔ zɔ́, ombe wi wili sambo, wa vɛ̃ a onya wi dɛ kɔ zã kpo. Nɛ kuti be ba wuko, nɛ a kò do a gɔ, nɛ a fe.

³⁰ Nɛ wele kɛ a hɔa dɛ 'do wi fio ni, a ba wuke olo nya a, nɛ a kò 'bɔ do a gɔ, nɛ a fe.

³¹ Nɛ hɔ dɛ 'do wele ki ni ba wuke ni, nɛ ma dɛ 'bɔ tɛ̃ ɛ ni. Ní do ní gbaa, nɛ wa fia sambo nɛ vɛ̃, nɛ nde wa kò mbe be kpo do wuke ni gɔ.

³² Nɛ 'do kɛ wa fia vɛ̃ ni, nɛ wuke fe tɛ mɛ 'bɔ.

³³ Ní a do ngba soe kɛ ofionɔ wa tunu sɛ kɔ fio ni, nɛ wuke ni sɛ a wuke 'da wio nde? We duzu kɛ wa sambo nɛ vɛ̃, wa zi a wili a!”

³⁴ Nɛ Yezu gisa hã wa na: “Owi wilinɔ do owukonɔ ngɔ nùi gɛ, wa ba ngba wa ba.

³⁵ Nɛ nde Owi wilinɔ do owukonɔ kɛ wa fia, kɔ Gale zɔa na, wa wia we tunu kɔ fio, hã wa le kɔ mbé nùi kɛ ma tɛ sɛ 'do gɛ ni, wa bá sɛ ngba wa gɔ,

³⁶ nɛ wa fé sɛ fio gɔ. Mba gɔ, wa ɔ sɛ nɛ anzɛnɔ ni. Wa hɔa benɔ 'da Gale ia, we duzu kɛ wa tunu kɔ fio.

³⁷ Nɛ we 'da ofionɔ kɛ wa nɛ tunu kɔ fio ni, Gale wila zi we hã Mɔizɛ kɔ nyɛa we tɛ kɔ gisa nwá, nɛ Mɔizɛ sa zi li Nwa Gale na: ‘Gale 'da Abrahama, do Izaka, do Yakɔbɔ.’

³⁸ Ĩ na, Gale a Gale 'da ofio gɔ, nɛ nde a a Gale 'da owinɔ wa do tunu li wa ni.”

³⁹ Nɛ ombe wi be mbulanɔ wa tɔ̃ na: “Wi be mɔ, mɔ tɔ̃a de wena!”

⁴⁰ Mba gɔ, wa zi 'bɔ do ngawi we aka Yezu do we bina.

Mɛsiya nɛa ngɔ Davidi

⁴¹ Nɛ Yezu aka wa na: “Kɔdɛ kɛ winɔ wa tɔ̃ na, Mɛsiya a be zã Davidi iko ni nɛ nde?

⁴² Mba gɔ, Davidi tɔ̃a kɔ 'buku zumanɔ na: ‘Nwa Gale tɔ̃a hã Nwa 'da mi na, Mɔ tɛ́, hã mɔ dúngú tɛ ngɔ ngawili kɔ̃ mi,

⁴³ kɔ mi a owi sɛnɛ mɔ nù, kɔ mɔ ma wa ti tambala nyanga mɔ.’

⁴⁴ Kɔ Davidi ngboo sa zi li Mɛsiya na, a a Nwa 'da ɛ ni, nɛ kɔdɛ kɛ Mɛsiya nɛ ɔ tati a be zã Davidi iko ni nɛ nde?”

Yezu bia we ngɔ Owi be mbulanɔ

⁴⁵ Owinɔ vɛ̃ wa zi tɛ zele Yezu, nɛ a tɔ̃ hã Owi yambala mɛnɔ 'da a na:

⁴⁶ “Li nɛ sɔ̃́ tɛ Owi be mbulanɔ, kɛ wa kɔ̃a we he'de du tulu dɔ̃lɔ̃ li, nɛ wa yɛnggɛ do ma, takɔ winɔ wa gu nù ti wa, nɛ wa hã balɛ hã wa do li gba fandanɔ ni. Wa le kɔ tɔa mbulanɔ, nɛ wa kɔ̃a na, lo dungu ngɔ kpongbo nwa do dati winɔ vɛ̃. Wa hɔ tɛ gbalimɔ, nɛ wa kɔ̃a na, wa hã dia fala dungu hã lo.

⁴⁷ Wa ɔlɔ Owi fio wilinɔ, nɛ wa kala mɛnɔ 'da wa vɛ̃, nɛ wa sambala dulu wena, we ɔlɔ do li winɔ. Nɛ nde wa kpa sɛ gã etumbu olo nɛ.”