LUKA 2 - WE NU GALE 1995

Kula 'da Yezu

¹ Do 'da fala ni, nɛ Ogustɛ, gã nwa ngɔ nù Roma ba nu a na, wa tɔ́lɔ́ owinɔ ngɔ nùi 'da ɛ vɛ̃.

² Kuti tɔlɔ winɔ ni dɛa zi tɛ̃ ɛ do 'da fala kɛ Kiriniusi zi a wi fɔmɔ nù Siri ni.

³ Nɛ wele do wele si zi dɛ kɔ le 'da ɛ ngboo ni, takɔ wa kɔmɔ li a.

⁴ Nɛ Yozɛfu kulu tɛ mɛ 'bɔ ngɔ tɛ Nazarɛtɛ, tɛ ngɔ nù Galile, nɛ a si dɛ Bɛtleɛmɛ, tɛ ngɔ nù Yude. Mba gɔ, Bɛtleɛmɛ a le 'da nwa Davidi, nɛ Yozɛfu zi a wi nu fɛlɛ Davidi.

⁵ Yozɛfu nɛa zi fala nɛ kpo do wuke 'da a Maria, kɛ zã a dɛla zi kporr ni.

⁶ Kɔ wa hɔa Bɛtleɛmɛ i, nɛ kula to a,

⁷ nɛ a ko kuti kula 'da a do bulu be. Nɛ a kasa tulu tɛ be ni, nɛ a fi a kɔ mɛ wa a do nyɔngɔmɛ hã onadalamɛnɔ ni. Mba gɔ, wa kpà zi fala ɔi tɛ kɔ tɔa gɛnɛ i gɔ.

Anzɛ hɔa dati owi fɔmɔ batanɔ

⁸ Do tũi ni, owi fɔmɔ bata wa zi tɛ li zɔ̃nɔ 'do le ni, tɛ fɔmɔ batanɔ 'da wa.

⁹ Nɛ mbe anzɛ 'da Nwa Gale hɔa 'da wa, nɛ yele ngbala 'da Gale yele dɛ ngɔ wa, nɛ ma hɔa zu wa hau, nɛ kili ba wa wena.

¹⁰ Nɛ anzɛ ni tɔ̃ hã wa na: “Nɛ tɛ dɛ̀ kili gɔ, we kɛ mi tɛa do dia sako we tɔ̃ hã nɛ, nɛ sakoe ni ma hã sɛ yangga hã owinɔ 'da nɛ vɛ̃.

¹¹ Tũi gɛ, wa kua wi kpasa nɛ tɛ kɔ le 'da Davidi. Wi ni a Nwa Kristo.

¹² Hã nɛ zɔ́, mɛ kɛ nɛ ĩ sɛ do ti a ni ma kɛ: Nɛ kpa sɛ be nzɔ be, nɛ nde wa kasa tulu dɛ tɛ̃ a, nɛ wa fi a dɛ kɔ mɛ wa a do nyɔngɔmɛ hã onadalamɛnɔ ni.”

¹³ Kɔ anzɛ ni nɛa we fi nu ɛ nù, nɛ mbé gba gili oanzɛ wa yolo li nza i, nɛ wa tɛ hirr, nɛ wa mba do a, nɛ wa ma ngɔ dɔnggɔ Gale na:

¹⁴ “Dɔngga wi hã Gale tɛ li nza i, nɛ dungu fio ɔ do winɔ kɛ a kɔ̃a gɛnɛ wa ngɔ nù gɛ ni!”

Owi fɔmɔ batanɔ wa nɛa Bɛtleɛmɛ

¹⁵ Anzɛnɔ wa nɛa we kpolo tɛ wa dɛ ngɔ i, nɛ Owi fɔmɔ batanɔ wa tɔ̃ hã ngba wa na: “Lɛ nɛ́ Bɛtleɛmɛ i, kɔ lɛ zɔ mɛ ma dɛa tɛ̃ ɛ, hã Nwa Gale bia ma hã lɛ gɛ.”

¹⁶ Nɛ wa la dɛ i mɔ do gbɛnga tɛ̃. Wa hɔa, nɛ wa kpa Maria, do Yozɛfu, do nzɔ be kɛ wa fi a dɛ kɔ mɛ wa a do nyɔngɔmɛ hã onadalamɛnɔ ni.

¹⁷ Wa nɛa we zɔ nzɔ be, nɛ wa yɔlɔ gulu we kɛ anzɛ tɔ̃a hã wa ngɔ nzɔ be ni hã Maria do Yozɛfu vɛ̃.

¹⁸ Nɛ winɔ vɛ̃ kɛ wa zila we owi fɔmɔ batanɔ wa tɔ̃a ni, wa ɔngba do ma wena.

¹⁹ Nɛ Maria usu wenɔ ni vɛ̃ dɛ kɔ sila ɛ, nɛ a tɛ lengge ma fai.

²⁰ Nɛ owi fɔmɔ batanɔ wa kpula tɛ wa. Nɛ wa dɔngga Gale, nɛ wa hã iɔ̃nae hã a we wenɔ vɛ̃ kɛ wa zila, nɛ wa zɔa 'bɔ do li wa ni. Mba gɔ, mɛnɔ ni dɛa zi tɛ̃ ɛ vɛ̃, ɔ nɛ kɛ anzɛ tɔ̃a do gulu nɛ hã wa ni.

Wa ia li Yezu

²¹ 'Do kula la pɔsɔ kpo, nɛ ma hɔ ngba soe gɔnɔ be do gaza, nɛ wa e li a na Yezu, li kɛ anzɛ ia zi ma, dati kɛ Maria tɛ bà zi zã a gɔ̃ ni.

Wa nɛa do Yezu kɔ tɔa Tɛmpɛlo

²² Ngba soe kɛ na, Maria fɔlɔ tɛ̃ a olo kula we hɔ sa wi li Gale, ɔ nɛ kɛ mbula 'da Mɔizɛ tɔ̃a ni ma wia, nɛ wa do Yozɛfu wa nɛa tɛ Yeruzalɛmɛ i. Nɛ wa nɛa fala nɛ kpo do be, takɔ wa e a hã Nwa Gale.

²³ Mba gɔ, wa kɔmɔ kɔ 'buku mbula na: “Nɛ la sɛ Okuti bulu be Israɛlɛ vɛ̃ hã mi we dɔnggɔ do mi.”

²⁴ Nɛ Maria do Yozɛfu wa nɛa 'bɔ do dɔnggamɔ hã nganga, takɔ a dɔ we dɔnggɔ do Gale, ɔ nɛ kɛ wa kɔmɔ kɔ 'buku mbula na: “Nɛ ha gbakulĩ bɔa, tabi be pizɔ̃ bɔa” ni.

²⁵ Do 'da fala ni, mbe wele zi tɛ Yeruzalɛmɛ ni, li a a Simeoni. A zi a wi bɔlɔ zu, a dɔnggɔ zi Nwa Gale wena, nɛ a zi tɛ 'bɔ we zɔ wi kɛ a nɛ fo sɛ obe Israɛlɛ kɔ ngamɛ ni. Nɛ Hi Wi Santo zi fala nɛ kpo do a.

²⁶ Nɛ Hi Wi Santoe ni tɔ̃a zi hã a na, a fé sɛ do ti gɔ, gbaa kɔ a zɔ Mɛsiya, wele kɛ Nwa tumba a ni do'do sɛ nɛ de.

²⁷ Yozɛfu do Maria wa hɔa kɔ tɔa Tɛmpɛlo i do nzɔ Yezu, takɔ wa dɛ mɛ kɛ mbula 'da wa tɔ̃a ni, nɛ Hi Wi Santo tombo tɛ mɛ 'bɔ Simeoni dɛ di ni. A nɛa we zɔ be,

²⁸ nɛ a ba a dɛ kɔ̃ a, nɛ a ma ngɔ hã iɔ̃nae hã Gale na:

²⁹ “Nwa Gale, mbuli kɛ mɔ kpua zi ni, ma dɛa tɛ̃ ɛ ia. Kɔ mɔ e mi wi toe 'da mɔ hã mi fe do dia nɛ.

³⁰ Mba gɔ, mi zɔa wi kpasa wi do li mi ngboo.

³¹ Mɔ tumba a takɔ a 'dafa wala kpasi, nɛ ma be tɛ̃ ɛ li winɔ vɛ̃.

³² Kpasi ni ma ɔ nɛ wese kɛ ma to dɛ ngɔ ogele winɔ vɛ̃, nɛ ma be li wala hã wa ni. Nɛ owele wa dɔnggɔ sɛ owinɔ 'da mɔ, obe Israɛlɛ we duzu a.”

Simeoni gba olo nu Gale

³³ Nɛ baa Yezu do naa a, wa ɔngba do we kɛ Simeoni tɔ̃a ngɔ Yezu ni wena.

^34-35 Nɛ Simeoni wila nu ɛ tɛ wa, nɛ a tɔ̃ hã Maria na: “Gale saka be gɛ, takɔ do wala 'da a, nɛ ombe Yudanɔ wena wa te li ngbangga, nɛ ombe wena wa kpasa 'bɔ. Nɛ a be sɛ mɛ kɛ Gale kɔ̃a we dɛ nɛ ni dɛ li Owele, nɛ owinɔ wena wa bɛ̃ sɛ gɛnɛ a. Na mɛ ni, a be sɛ linggamɛ 'da owinɔ, kɛ ma usu tɛ̃ ɛ usu ni dɛ nza. Nɛ 'bako ma dunu sɛ kɔ sila mɔ, nɛ ma zɛlɛ mɔ ɔ nɛ wa dumu sila mɔ do kɔya ni.”

Wuko wi gba olo nu Gale

³⁶ Do 'da fala ni, nɛ nde Ana, wuko wi gba olo nu Gale zi tɛ mɛ 'bɔ boe. A zi a be 'da Fanuɛlɛ, wi nu fɛlɛ Asɛrɛ, nɛ a dɛ zi gbɛlɛ wena. A ba zi wili kɔ be zɔnga tɛ̃ a, nɛ wa ɔa do wili a sabɛlɛ sambo iko,

³⁷ nɛ wili a fe. Nɛ a ɔa olo wili a ni gbaa, nɛ a hɔ 'bu sabɛlɛ ngbɛ'dɛ'dɛ ngɔ nɛ nalɛ. A ngbí zi kɔ tɔa Tɛmpɛloe gɔ, nɛ a dɔnggɔ Gale tũ do gba wese, tɛ sambala a do bɛ̃ nyɔngɔmɔ.

³⁸ Nɛ a hɔa do 'da fala ni, nɛ a gese iɔ̃nae hã Nwa Gale, nɛ a ma ngɔ tɔ̃ we 'da be ni hã winɔ vɛ̃, kɛ wa 'bɔ zi 'da Gale na, a fo Owi Yeruzalɛmɛ kɔ ngamɛ ni.

Yozɛfu do Maria wa kpula tɛ wa dɛ Nazarɛtɛ

³⁹ Yozɛfu do Maria wa dɛa mɛnɔ vɛ̃ kɛ mbula 'da Gale tɔ̃a ni do'do, nɛ wa kpolo tɛ wa dɛ kɔ le olo wa Nazarɛtɛ, tɛ ngɔ nù Galile.

⁴⁰ Nɛ be gã do sɔ̃a gbãlã tɛ, nɛ a 'bɔ do hã zã wena, nɛ Gale bia dia zã 'da ɛ hã a.

Yezu do sabɛlɛ 'bu ngɔ nɛ bɔa

⁴¹ Sabɛlɛ kpo kpo, nɛ Owi ko Yezu wa nɛ zi tɛ Yeruzalɛmɛ i, we dungu ɛngga Hɔ Nza kɔ Ngbá.

⁴² Kɔ Yezu nɛa we ɔ sabɛlɛ 'bu ngɔ nɛ bɔa, nɛ a nɛ tɛ mɛ 'bɔ we dungu ɛngga ni, ɔ nɛ kɛ wa dungu ma fai ni.

⁴³ Kɔ ɛngga ni ia, nɛ owinɔ wa si, nɛ Yezu 'bana dɛ Yeruzalɛmɛ i, nɛ nde owi ko a wa ĩ̀ fala nɛ gɔ.

⁴⁴ Nɛ wa lingga na, Yezu sanga owinɔ lo si do wa gɛ boe. Nɛ wa ɔa sanga wala, nɛ fala sa, nɛ wa ma ngɔ aka we a tɛ 'da wi nanɔ 'da wa, do oyali ngba wa,

⁴⁵ nɛ nde wa kpà a gɔ. Nɛ wa kpula tɛ wa Yeruzalɛmɛ i we fa a.

⁴⁶ Nɛ wa fa a gbaa 'do tũ talɛ, nɛ wa kpa a tɛ kɔ tɔa Tɛmpɛloe, nɛ nde a dungu nù dɛ sanga Owi be mbulanɔ, kɔ a tɛ zele wenɔ wa tɔ̃ ni, do aka wa do we.

⁴⁷ Nɛ winɔ kɛ wa zele zi a ni, wa ɔngbɔ wena we zɔ hã zã 'da a, do wenɔ kɛ a gese ni.

⁴⁸ Kɔ owi ko a wa nɛa we zɔ a, nɛ wa ɔngbɔ do a wena, nɛ naa a tɔ̃ hã a na: “Be 'daa, gulu kɛ mɔ dɛa do lɛ ní we ge nde? Lɛ do baa mɔ, lɛ fia tɛ fa mɔ.”

⁴⁹ Nɛ Yezu gese hã wa na: “Gulu kɛ nɛ fa mi we ge nde? Nɛ ĩ̀ na, mi wia we dungu kɔ tɔa 'da Baa mi ni gɔ nde?”

⁵⁰ Nɛ nde wa ĩ̀ gulu wenɔ kɛ a tɔ̃a hã wa ni gɔ.

⁵¹ Nɛ Yezu si do wa dɛ Nazarɛtɛ i, nɛ a zila we nu wa do dia nɛ. Nɛ naa a usu wenɔ ni vɛ̃ dɛ kɔ sila ɛ.

⁵² Nɛ Yezu gã, nɛ hã zã 'da a gã 'bɔ dɛ dati. Nɛ dɛa mɔ tɛ̃ a ma hã yangga hã Gale do owinɔ wena.