LUKA 17 - WE NU GALE 1995

Wele gɔ mbɔkɔ wi kɔ̃ mɔ, nɛ mɔ élé 'dã mɛ 'da a

¹ Nɛ Yezu tɔ̃ hã owi yambala mɛnɔ 'da a na: “Omɛnɔ kɛ ma tombo wele we dɛ 'dã mɔ ni, ma boe fai. Nɛ nde 'bako wena do wi kɛ a fa we fi ngba a li 'dã wala ni.

² Wi kɛ a fa we fi mbe sanga benɔ gɛ li 'dã wala, nɛ ma wia sɔ na, wa kpo gã ta gɛlɛ wi ni, nɛ wa da a 'dɔ gba lì.

³ Ní a li nɛ sɔ̃́! “Fala kɛ mbe nya mɔ dɛ 'dã mɔ dɛ 'da mɔ nde, nɛ mɔ nɛ́, nɛ mɔ bé gulu 'dã mɛ kɛ a dɛa ni hã a dɛ li a. Kɔ fala kɛ a kɔ̃ na, ɛ la fala nɛ, nɛ mɔ mbɔ́kɔ́ a.

⁴ Kɔ fala kɛ li wese kpo, hã a dɛ 'dã mɔ dɛ 'da mɔ fala sambo, hã a gili tɛ̃ a do 'da nɛ ni vɛ̃ we gɔ mbɔkɔ wi kɔ̃ mɔ, nɛ mɔ mbɔ́kɔ́ a.”

Owi nɛ tonɔ wa aka Yezu na, a gã 'da kɔ̃a we 'da lo

⁵ Nɛ Owi nɛ tonɔ wa aka Nwa Yezu na: “Mɔ dɛ́ na, kɔ̃a we 'da lɛ ma gã dɛ dati.”

⁶ Nɛ Nwa Yezu gese hã wa na: “Fala kɛ nɛ sɔ do kɔ̃a we dɛ 'da Gale ɔ nɛ be gbãlã mutardɛ ni, nɛ nɛ tɔ̃ sɔ hã te gɛ na, ma fó tɛ̃ ɛ de do'do, kɔ ma nɛ́, kɔ ma mí tɛ̃ ɛ 'dɔ gba lì i, nɛ ma dɛ sɔ tɛ̃ ɛ do olo nu nɛ ni.

Mɔ kɛ wi dɛa to wia tɛ dɛ ma

⁷ “Lɛ bá na, mbe wele kpo sanga nɛ gɛ do wi dɛa to mɔ́ a, nɛ wi dɛa toe ni wa fɔ, tabi a dala osa'de. Kɔ 'da fala a zɔ wi dɛa toe ni, nɛ nde a yula safɔ, kɔ a tɛ si nɛ, nɛ a tɔ̃ sɛ hã a na: ‘Mɔ tɛ́ dɔ̃, kɔ mɔ dungu nù we nyɔngɔ mɔ’ nde?

⁸ Ɔ̃ ɔ̃, a tɔ̃́ sɛ ní gɔ. A tɔ̃ sɛ na: ‘Mɔ gí nyɔngɔmɔ hã mi! Nɛ mɔ kpóló tulu tɛ mɔ we tɛ do nyɔngɔmɛ hã mi, sɛ nɛ mɔ ĩ ti nyɔngɔ kɛ 'da mɔ de!’

⁹ A wia tɛ gese iɔ̃nae hã wi dɛa toe ni we duzu kɛ a dɛa toe a tumba a we nɛ ni nde?

¹⁰ Ma tɛ mɛ 'bɔ na mɛ ni we duzu nɛ. 'Da fala kɛ nɛ dɛ mɔ kɛ wele ba nu ɛ hã nɛ na, nɛ dɛ ni, nɛ nɛ tɔ̃́ na: ‘Lɛ a owi dɛa to, kɔ lɛ dɛa gɛ a mɛnɔ kɛ wa tumba lɛ we dɛ ma ni iko.’ ”

Yezu kpasa Owi zɛlɛ ngbɛlɛ 'bu

¹¹ Yezu zi li wala we nɛ dɛ Yeruzalɛmɛ, nɛ a la do ngbala nù Galile do Samaria.

¹² Nɛ a hɔ tɛ mbe le kpo, nɛ owi zɛlɛ ngbɛlɛ 'bu wa tɛa 'da a, nɛ wa yula nyɛla do a bi sĩ.

¹³ Nɛ wa ma ngɔ he mɔ na: “Yezu, wi be mɔ, mɔ ĩ́ 'bako hã lɛ!”

¹⁴ Nɛ Yezu zɔa wa, nɛ a tɔ̃ hã wa na: “Nɛ nɛ́, hã onganganɔ wa zɔ nɛ.” Kɔ wa ma ngɔ la nɛ, nɛ zɛlɛ ngbɛlɛ tɛ wa ni e do ti.

¹⁵ Kɔ mbe kpo sanga wa ni nɛa we zɔ na, ɛ kpasa ni, nɛ a ma ngɔ dɔnggɔ Gale do nga gɛlɛ, nɛ a kpolo tɛ̃ a 'da Yezu i,

¹⁶ nɛ a gu gba zugolo dɛ ti Yezu ni, nɛ a gu li a nù, nɛ a gese iɔ̃nae hã a. Wi ni zi a be Yuda gɔ, a a wi Samaria.

¹⁷ Nɛ Yezu aka na: “Winɔ kɛ zɛlɛmɛ ia tɛ wa ni, wa sɔ zu wa 'bu, kɔ ombe kusi wa a do nde?

¹⁸ Wa kpòlò tɛ wa we gese iɔ̃nae hã Gale gɔ nde? Wi kpula tɛ̃ ɛ tati a gele wi gɛ iko nde?”

¹⁹ Nɛ 'do nɛ, nɛ Yezu tɔ̃ hã a na: “Mɔ kúlú ngɔ, kɔ mɔ sí! Mɔ kpasa we kɛ mɔ do kɔ̃a we dɛ 'da mi.”

Dɛa to nwa 'da Gale

²⁰ 'Da fala kpo, nɛ Ofariziɛnɔ wa aka Yezu na: “Gale nɛ ndo nyanga dɛa to nwa 'da a soe ki nge nde?” Nɛ a gese hã wa na: “Gale dɛ́ sɛ to nwa 'da a do tɛlɛ tɛ kɛ na, Owele wa zɔ ma zɔa ni gɔ.

²¹ Owele wa tɔ̃́ sɛ na: ‘Mɔ zɔ́, ma kɛ,’ tabi na: ‘Ma a i mɔ ni’ gɔ. Mba gɔ, nɛ ĩ́ na, Gale ndua nyanga dɛ to nwa 'da a dɛ sanga nɛ gɛ ia.”

²² 'Do nɛ, nɛ Yezu tɔ̃ hã owi yambala mɛnɔ na: “Mbe ngba soe kpo, nɛ nɛ sɛ do wɔ we zɔ mbe mbamba tũ kpo kɔ otũ dɛa to nwa 'da mi Be 'da Wele, nɛ nde nɛ zɔ́ sɛ ma gɔ.

²³ Nɛ Owele wa tɔ̃ sɛ hã nɛ na: ‘Nɛ zɔ́, ma a i mɔ ni,’ tabi na: ‘Ma kɛ!’ Nɛ nde nɛ tɛ nɛ̀ gɔ, nɛ nɛ tɛ yù we zɔ ma gɔ.

²⁴ Mba gɔ, tɛa 'da mi Be 'da Wele, ma ɔ sɛ nɛ kɛ kolo nyɛ li ɛ, nɛ ma kpa li nza vɛ̃ ni.

²⁵ Nɛ nde dati mɛnɔ ni, ma wia na, mi kpa zɛlɛ tɛ wena. Nɛ owinɔ kikina gɛ, wa bɛ̃ sɛ gɛnɛ mi.

²⁶ Nɛ kpo mɛ ma dɛa zɛ́ tɛ̃ ɛ 'da fala 'da Nowe ni, ma dɛ sɛ 'bɔ tɛ̃ ɛ do 'da fala tɛa 'da mi Be 'da Wele.

²⁷ We kɛ do 'da fala 'da Nowe, winɔ wa zi tɛ nyɔngɔ mɔ, do nɔ dɔ̃, do ba ngba wa, do ba wuko do wili hã benɔ 'da wa, gbaa we hɔ tɛ ngba soe Nowe lia nɛ kɔ masua ni. Nɛ kolo tɛa, nɛ lì dunu falanɔ vɛ̃, nɛ ma gbɛa winɔ vɛ̃.

²⁸ Nɛ tɛa 'da mi Be 'da Wele, ma ɔ sɛ 'bɔ kpasaa nɛ kɛ zi 'da fala 'da Lɔtɛ ni. Owinɔ wa zi tɛ nyɔngɔ mɔ, do nɔ dɔ̃, nɛ wa tɛ be gole, do oso mɔ, do mi okpalɛ, do dɛ otɔa.

²⁹ Kɔ ngba soe Lɔtɛ hɔa nza kɔ le Sodɔmɛ ni, nɛ Gale fi we, nɛ ma ala dɛ ngɔ le ɔ nɛ gbãlã mũlũ ni, nɛ ma gbɛa winɔ vɛ̃.

³⁰ Na mɛ ni, mi Be 'da Wele, mi hɔ sɛ do ngba soe kɛ winɔ wa lènggè do ma gɔ ni.

³¹ “Do ngba soe nɛ ni, wele kɛ a dungu ngɔ tɔa i, nɛ tolenɔ 'da a kɔ tɔa nga ni, dɔ a zĩ́lĩ́ we kala ma, sɛ nɛ a yu de gɔ. Nɛ wele kɛ safɔ i ni, dɔ a sí gbaa le nga, sɛ nɛ a yu de gɔ.

³² Ta zu nɛ tɛ èlè ngɔ kɛ kɛnɛ Lɔtɛ ka zi mɔ 'do a, nɛ a fia ni gɔ.

³³ Mba gɔ, wi kɛ a fa we kpasa kili tɛ̃ a, nɛ a fe sɛ. Nɛ wele kɛ a la kili tɛ̃ a na ma fe ni, nɛ a kpasa sɛ.

³⁴ Kɔ mi tɔ̃ hã nɛ na, do tũi ni, Owele bɔa wa sɛ ngɔ mɔ ɔi kpo, nɛ oanzɛnɔ wa ba sɛ mbe kpo, nɛ wa la mbe kpo.

³⁵ Owuko bɔa wa sɛ tɛ to tula fala nɛ kpo, nɛ oanzɛnɔ wa ba sɛ mbe kpo, nɛ wa la mbe kpo. [

³⁶ Owele bɔa wa sɛ tɛ wa fɔ fala nɛ kpo, nɛ wa ba sɛ mbe kpo, nɛ wa la mbe kpo.”]

³⁷ Nɛ owi yambala mɛnɔ wa aka a na: “Nwa, mɛnɔ gɛ ma dɛ sɛ tɛ̃ ɛ do nde?” Nɛ a gese hã wa do gba we na: “Fala wɔlɔ tɛ nɛ ni, nɛ oziki wa ngɛmɛ sɛ ngba wa dɛ di ni!”