LUKA 15 - WE NU GALE 1995

Gba we ngɔ bata kɛ a yɔa, nɛ wa kpa a

¹ Nɛ owi futa takonɔ, do o'dã winɔ vɛ̃, wa tɛa we zele wenɔ kɛ Yezu be ni.

² Nɛ Ofariziɛnɔ do Owi be mbulanɔ wa ma ngɔ lungu we na: “Nɛ zɔ́ wi gɛ, a kɔ̃ gɛnɛ o'dã zu winɔ, nɛ a nyɔngɔ mɔ do wa!”

³ Nɛ Yezu tɔ̃a hã wa do gba we na:

⁴ “Sanga nɛ gɛ, fala kɛ mbe wele kpo do obata kama, kɔ mbe kpo sanga wa ni yɔ, nɛ a dɛ sɛ ge nde? A lá sɛ tala wanɔ 'bu wa kusi ngɔ wa kusi ni tɛ nyɔngɔ mɔ li zɔ̃ i, nɛ a nɛ we fa wele kɛ yɔa ni gbaa na, a kpa a sɛ gɔ nde?

⁵ Kɔ fala kɛ a kpa bata ni, nɛ a dɛ sɛ yangga wena, nɛ a fi sɛ a ngɔ gɛlɛ a,

⁶ nɛ a si do a. Kɔ a hɔ nu tɔa 'da a i, nɛ a sa sɛ mɔ hã ongba a, do owinɔ kɛ zã tɔa 'da a ni vɛ̃, nɛ a tɔ̃ hã wa na: ‘Nɛ tɛ́ kɔ lɛ dɛ́ yangga! We kɛ mi kpa bata 'da mi, kɛ a yɔa zi dɛ ni ia!’ ”

⁷ Nɛ Yezu tɔ̃ na: “Mi tɔ̃ hã nɛ na, ma sɛ 'bɔ na mɛ ni tɛ li nza i. Yangga sɛ i mɔ wena we duzu mbe wi dɛ 'dã mɔ kpo, kɛ a kifi sila a ni. Nɛ yangga ni ma nɛ sɛ ngɔ kɛ wa dɛ we duzu obɔlɔ zu winɔ 'bu wa kusi ngɔ wa kusi, kɛ wa do mɔ kifi sila wa we nɛ bina ni.

Gba we ngɔ mbili kɛ ma yɔa, nɛ wa kpa a

⁸ “Fala kɛ mbe wuko kpo do gbãlã mbili 'bu, kɔ mbe kpo yɔ kɔ̃ a, nɛ a tṹ sɛ mwinda, nɛ a mili tɔa tɛ fa ma gbaa na, a kpa do'do sɛ gɔ nde?

⁹ Kɔ fala kɛ a kpa mbili ni, nɛ a sa sɛ mɔ hã ongba a, do winɔ kɛ zã tɔa 'da a ni, nɛ a tɔ̃ hã wa na: ‘Nɛ tɛ́ kɔ lɛ dɛ́ yangga! We kɛ mi kpa mbili 'da mi, kɛ ma yɔa zi dɛ ni ia!’ ”

¹⁰ Nɛ Yezu tɔ̃ na: “Mi tɔ̃ hã nɛ na, ma sɛ 'bɔ na mɛ ni tɛ li nza i. Oanzɛnɔ 'da Gale wa dɛ sɛ yangga wena we duzu mbe wi dɛ 'dã mɔ kpo, kɛ a kifi sila a ni.”

'Dã zu be kpula tɛ̃ a 'da baa a

¹¹ Nɛ Yezu tɔ̃ 'bɔ na: “Mbe wele kpo zi do obulu be bɔa.

¹² Nɛ be wele kɛ 'do gɛ tɔ̃ hã baa wa na: ‘Baa mi, mɔ kɛ̃ sanga kpamɛnɔ 'da mɔ, kɔ mɔ hã kɛ 'da mi hã mi.’ Nɛ baa wa kɛ̃a sanga mɛnɔ 'da ɛ hã wa.

¹³ Olo nɛ là tũ dɛlɛ gɔ, nɛ be 'do gɛ be gole mɛnɔ 'da ɛ, nɛ a kala mbili nɛ, nɛ a la do ma dɛ kɔ gele le ndũu. A nɛa we hɔ i mɔ, nɛ a 'danga mbili 'da a do ta zu a iko.

¹⁴ “Kɔ mbili nɛa we e kɔ̃ a, nɛ gba wɔ tia kɔ le ni, nɛ sã ba a.

¹⁵ Nɛ a nɛa, nɛ a le to 'da mbe wele kpo kɔ le ni. Nɛ wi ni tumba a kɔ fɔɛ 'da ɛ we dala ongulu.

¹⁶ A hɔa i mɔ, nɛ a kɔ̃a we nyɔngɔ mɛnɔ kɛ ongulunɔ wa nyɔngɔ ni, nɛ nde fo zi wi hã ma hã a bina.

¹⁷ Nɛ a lingga mɔ ní gbaa, nɛ a tɔ̃ do kɔ sila a na: ‘Owi dɛa tonɔ 'da baa mi wa do nyɔngɔmɔ wena, kɔ gulu kɛ mi fe wɛ dɛ dɛ gɛ we ge nde?

¹⁸ Mi kɔ̃a we si dɛ 'da baa mi i. Mi hɔ i mɔ, nɛ mi tɔ̃ sɛ hã a na: Baa mi, mi dɛa 'dã mɔ dɛ 'da Gale, nɛ mi dɛa 'bɔ 'dã mɔ dɛ 'da mɔ.

¹⁹ Kɔ mi hɔ̀ wi kɛ mɔ sa li mi na, be 'da mɔ gɔ. Mɔ dɛ́ do mi ɔ nɛ kɛ mɔ dɛ do owi dɛa tonɔ 'da mɔ ni.’

²⁰ Nɛ a kulu ngɔ, nɛ a si 'da baa a i. “Kɔ a 'bana ndũu, nɛ baa a zɔ a, nɛ 'bako ba li baa a wena. Nɛ a gɔna dati a do yu, nɛ a kpa a, nɛ a 'be a dɛ tɛ̃ a, nɛ a ufu zala a.

²¹ Nɛ be tɔ̃ hã baa ɛ na: ‘Baa mi, mi dɛa 'dã mɔ dɛ 'da Gale, nɛ mi dɛa 'bɔ 'dã mɔ dɛ 'da mɔ. Kɔ mi hɔ̀ wi kɛ mɔ sa li mi na, be 'da mɔ gɔ.’

²² Nɛ baa a tɔ̃ hã owi dɛa tonɔ 'da a na: ‘Nɛ wɛ́lɛ́ tɛ nɛ, kɔ nɛ tɛ́ do tulu kɛ ma de wena ni, kɔ nɛ hé'dé ma hã a. Nɛ nɛ tɛ́ do pɛtɛ, kɔ nɛ yúlú zu kɔ̃ a, do mɔ nyanga wi, kɔ nɛ hé'dé hã a.

²³ Nɛ nɛ tɛ́ do wili ngɔmbɔ kɛ a dɛ nɔ wena ni, kɔ nɛ gbɛ́ a, kɔ lɛ nyɔ́ngɔ́, nɛ lɛ dɛ yangga.

²⁴ We kɛ be 'da mi gɛ, a fia zi fia, kɔ a kpasa. A yɔa zi yɔa, kɔ mi kpa a.’ Nɛ wa ma ngɔ dɛ yangga.

²⁵ “Do 'da fala ni, nɛ nde kuti be zi a safɔ i. Nɛ a si, kɔ a nɛa we kɔlɔ do tɔa, nɛ a zele giti biã yɔla.

²⁶ Nɛ a sa mɔ hã mbe sanga wi dɛa tonɔ, nɛ a aka a na: ‘Ki ni a ge nde?’

²⁷ Nɛ wi toe ni gese hã a na: ‘Nya mɔ si, ma kɛ baa mɔ gbɛa ngɔmbɔ dɛ nɔ, we kɛ a zɔa be 'da a do ba tɛ̃ a ni.’

²⁸ “Nɛ zã kuti be ni nɔ̃lɔ̃ wena, nɛ a bɛ̃a we le tɔa i. Nɛ baa a hɔa nza, nɛ a 'bɔndɔ a na, a le.

²⁹ Nɛ be ni gese hã baa ɛ na: ‘Baa mi, mɔ ĩ na, mi gala mɔ 'do sabɛlɛ dɛlɛ wena, nɛ mi bɛ mbe we nu mɔ fala kpo gɔ. Gɛnɛ kɔ na mɛ ni, nɛ nde mɔ hã̀ mbe dua kpo hã mi na, mi gbɛ, kɔ lɛ nyɔngɔ, nɛ lɛ dɛ yangga do ongba mi gɔ.

³⁰ Kɔ be 'da mɔ gɛ, kɛ a 'danga zi kpamɛnɔ 'da mɔ, tɛ yɛnggɛ do vĩ zu yali ni hɔa, nɛ mɔ gbɛa mɛ 'bɔ wili ngɔmbɛ kɛ a dɛ nɔ wena ni hã a!’

³¹ Nɛ baa a tɔ̃ hã a na: ‘Be 'da mi, mɔ fala nɛ kpo do mi fai, nɛ mɛnɔ 'da mi vɛ̃, mɛ a mɛnɔ 'da mɔ.

³² Nɛ nde ma wia na, lɛ dɛ mɔ dɔ, kɔ lɛ dɛ yangga, we kɛ nya mɔ gɛ, a fia zi fia, kɔ a kpasa. A yɔa zi yɔa, kɔ mi kpa a!’ ”