LUKA 10 - WE NU GALE 1995

Yezu tumba Owele 'bu wa sambo ngɔ wa bɔa

¹ 'Do nɛ, nɛ Nwa Yezu saka ombé gele wele 'bu wa sambo ngɔ wa bɔa, nɛ a tombo wa bɔa bɔa na, wa nɛ kɔ lenɔ, do falanɔ vɛ̃ kɛ ɛ nɛ yɛnggɛ sɛ do ma ni.

² Nɛ a tɔ̃ hã wa na: “Kpalɛ ma li fɔ i wena, nɛ nde Owi dɛ to kala ma wa dɛlɛ gɔ. Kɔ nɛ áká wele fɔɛ, kɔ a tombo Owi dɛa to we kala kpalɛnɔ ni.

³ Kɔ nɛ nɛ́! Mi tumba nɛ, nɛ nɛ ɔ sɛ nɛ obe bata kɛ wa lia sanga ogɔ̃̀ ni.

⁴ Nɛ tɛ bà koe mbili, tabi gele koe dɛ kɔ̃ nɛ gɔ. Nɛ tɛ kàlà mɔ nyanga wi gɔ, nɛ nɛ tɛ yòlò nù li wala we fana wele gɔ.

⁵ “Kɔ fala kɛ nɛ le kɔ tɔa mɔ wele, nɛ nɛ tɔ̃́ dati na: ‘E kɔ dungu fio ɔ kɔ tɔa gɛ!’

⁶ Kɔ fala kɛ wi fa dungu fio kɔ tɔa ni boe, nɛ dungu fio ma 'bana do a. Ní gɔ, nɛ dungu fie nɛ hã do balɛ ni, ma la sɛ kɔ tɔa ni do'do.

⁷ Nɛ ɔ́ dɛ kɔ tɔa kɛ wa ia hã nɛ ni, nɛ nɛ nyɔ́ngɔ́ mɛ, nɛ nɛ nɔ́ dɔ̃ɛ, kɛ wa hã ma hã nɛ ni. Mba gɔ, wi dɛa to wia tɛ kpa mɔ olo toe 'da a. Nɛ tɛ kpòlò tɔa ɔi 'da nɛ we ɔ kɔ gele nɛ gɔ.

⁸ Fala kɛ nɛ hɔ kɔ mbe le kpo, hã Owele lenɔ wa kɔ̃ gɛnɛ nɛ, nɛ nɛ nyɔ́ngɔ́ mɛnɔ vɛ̃ kɛ wa a ti nɛ ni.

⁹ Nɛ kpásá owi zɛlɛnɔ kɔ le ni, nɛ nɛ tɔ̃́ hã owinɔ na: ‘Dɛa to nwa 'da Gale kɔla do nɛ ia!’

¹⁰ Kɔ fala kɛ nɛ hɔ kɔ le kpo, kɔ owele lenɔ wa kɔ̃̀ gɛnɛ nɛ gɔ nde, nɛ nɛ hɔ́ dɛ ngɔ wala i, nɛ nɛ tɔ̃́ na:

¹¹ ‘Lɛ fɛlɛ nù kɔ le 'da nɛ ti tambala nyanga lɛ do zu li nɛ, we be hã nɛ na, nɛ dɛ de gɔ. Nɛ nde nɛ ĩ́ na, dɛa to nwa 'da Gale kɔla ia.’ ”

¹² Nɛ Yezu tɔ̃ hã wa na: “Mi tɔ̃ hã nɛ do gbãlã we na, do ngba soe 'bili we, nɛ owinɔ kɔ le ni wa kpa sɛ zɛlɛ tɛ nɛ ngɔ kɛ 'da owi Sodɔmɛ.”

Olenɔ kɛ ma bɛ̃a gɛnɛ Yezu ni

¹³ “'Bako do nɛ, owi kɔ le Korazinɛ do Bɛtsaida. Mba gɔ, ɔ do kɛ ɔngbamɛnɔ ma dɛa tɛ̃ ɛ kɔ le 'da nɛ gɛ, ma dɛ sɔ tɛ̃ ɛ kɔ le Tirɛ do Sidoni, nɛ owinɔ i mɔ ni, wa he'de sɔ saki, nɛ wa dungu zã bũ we be na, wa kifi sila wa belee ia.

¹⁴ Kɔ mi tɔ̃ hã nɛ na, do ngba soe 'bili we, nɛ nɛ kpa sɛ zɛlɛ tɛ nɛ ngɔ kɛ 'da Owi Tirɛ do Sidoni.

¹⁵ Nɛ nɛ, owi Kafarnaumɛ, nɛ ba tɛ nɛ na, nɛ nɛ sɛ ngɔ winɔ vɛ̃, nɛ nɛ ba li nza nde? Wa isi sɛ zu nɛ gbaa dɛ kɔ le 'da ofionɔ i.”

¹⁶ Nɛ Yezu tɔ̃ 'bɔ hã owi yambala mɛnɔ 'da a na: “Wi kɛ a zele nu nɛ ni, nɛ nde a zila nu mi. Nɛ wi kɛ a bɛ̃ gɛnɛ nɛ, nɛ nde a bɛ̃a gɛnɛ mi. Nɛ wele kɛ a bɛ̃ gɛnɛ mi, nɛ nde a bɛ̃a tɛ mɛ 'bɔ gɛnɛ Wi tombo mi.”

Owinɔ 'bu wa sambo ngɔ wa bɔa ni wa kpula tɛ wa

¹⁷ Owinɔ 'bu wa sambo ngɔ wa bɔa kɛ Yezu tumba wa ni, wa nɛa, nɛ wa kpula tɛ wa, nɛ nde wa do yangga wena. Nɛ wa tɔ̃ hã Yezu na: “Nwa, mɔ zɔ́, lɛ hɔa i mɔ, nɛ lɛ ba nu lɛ do zu li mɔ, nɛ gɛnɛ kɔ o'dã hi winɔ, nɛ wa zila nu lɛ!”

¹⁸ Nɛ Yezu gese hã wa na: “Mi zɔa zi Satana, nɛ nde a yula li nza i, kɔ a tɛ te dɛ nù nga ɔ nɛ nyɛa li kolo ni.

¹⁹ Kɔ nɛ zélé! Mi hã ngawi hã nɛ na, nɛ ma ogɔ̃ do ogbatɔalanga ti nyanga nɛ, nɛ nɛ nɛ ngɔ ngawi 'da wi sɛnɛ wi, nɛ mɔ kpo dɛ́ sɛ nɛ gɔ.

²⁰ Nɛ nde nɛ tɛ sì tɛ dɛ yangga kɛ o'dã hi winɔ wa zele nu nɛ ni gɔ, nɛ nde nɛ dɛ́ yangga kɛ na, Gale kɔma li nɛ kɔ 'Buki 'da a li nza i ni.”

Yezu dɛa yangga we Baa a

²¹ Do 'da fala ni, nɛ Hi Wi Santo dɛa na, yangga dunu kɔ sila Yezu. Nɛ Yezu tɔ̃a na: “Ee Baa mi, mɔ a Nwa ngɔ li nza do nùi gɛ! Mi hã iɔ̃nae hã mɔ wena, we duzu kɛ mɔ usu mɛnɔ gɛ do owi hã zãnɔ, do owinɔ kɛ wa yambala mɔ wena ni, nɛ mɔ bia ma hã owinɔ kɛ wa yala iko ni. Gbãlã we, Baa mi, mɔ dɛa ni, we kɛ ma dia li mɔ na, ma dɛ tɛ̃ ɛ na mɛ ni.

²² “Baa mi ia mɛnɔ vɛ̃ dɛ tambala kɔ̃ mi. Nɛ wele wè tɛ ĩ ti mi Be 'da a gɔ. Wi ĩ ti mi, wi a Baa mi. Nɛ wele ĩ̀ ti Baa mi gɔ. Wi ĩ ti a, wi tati a mi Be 'da a, do owinɔ kɛ mi kɔ̃a we be Baa mi hã wa ni.”

²³ 'Do nɛ, nɛ Yezu siki tɛ̃ ɛ dɛ 'da owi yambala mɛnɔ 'da a, nɛ a tɔ̃ hã wa zu wa kpo na: “Nɛ a wi yangga, we kɛ nɛ zɔa mɛnɔ gɛ do gbali nɛ ni.

²⁴ Kɔ mi tɔ̃ hã nɛ do gbãlã we na, gba gili owi gba olo nu Gale do Onwanɔ, wa kɔ̃a zi we zɔ mɛnɔ kɛ nɛ zɔ ma ngangga gɛ, nɛ nde wa zɔ̃ zi ma gɔ. Nɛ wa kɔ̃a zi we zele 'bɔ wenɔ kɛ nɛ zele ma ngangga gɛ, nɛ nde wa zèlè zi ma gɔ.”

Gba we ngɔ wi Samaria

²⁵ Mbe wi be mbula kpo tɛa 'da Yezu we yamba a. Nɛ a aka Yezu na: “Wi be mɔ, mɛ mi nɛ dɛ ma, takɔ mi kpa kpasi kɛ ma é sɛ gɔ ni a ge nde?”

²⁶ Nɛ Yezu gese hã a na: “Wa kɔma kɔ 'buku mbula 'da lɛ na ge nde? Mɔ tɔlɔ kɔ nɛ na ge nde?”

²⁷ Nɛ wi ni gese na: “Mɔ kɔ̃́ gɛnɛ Nwa Gale 'da mɔ do sila mɔ vɛ̃, mɔ hã tɛ mɔ hã a, nɛ mɔ dɛ́ to hã a do ngawi 'da mɔ vɛ̃, do hã zã 'da mɔ vɛ̃, nɛ mɔ kɔ̃́ gɛnɛ ngba mɔ ɔ nɛ kɛ mɔ kɔ̃a do gɛnɛ kili tɛ mɔ wele nɛ ni.”

²⁸ Nɛ Yezu tɔ̃ hã a na: “Mɔ gisa de wena, kɔ mɔ dɛ na mɛ ni, nɛ mɔ kpa sɛ kpasi kɛ ma é sɛ gɔ ni.”

²⁹ Nɛ nde wi be mbula kɔ̃a zi we ba 'do nɛ, takɔ a kpa gbãlã we, nɛ a aka 'bɔ Yezu na: “Ní a ngba mi gɛ a wio nde?”

³⁰ Nɛ Yezu gese hã a na: “Mbe wele kpo yula zi Yeruzalɛmɛ, nɛ a nɛ Yeriko. Nɛ owi zũ wa ba a li wala, nɛ wa zɛa a gbaa, nɛ wa kã a hã fio. Nɛ wa hɔlɔ tulu tɛ̃ a, nɛ wa zũ mɛnɔ 'da a, nɛ wa la a dɛ di ni.

³¹ 'Do nɛ, nɛ mbe nganga kpo la do li wala ni. Kɔ a nɛa we zɔ wi ni, nɛ a ngbɛlɛ do mbee kɛ zã wala, nɛ a la.

³² 'Do nɛ, nɛ mbe Levitɛ kpo la 'bɔ do di ni, kɔ a nɛ zɔ wi ni, nɛ a ngbɛlɛ 'bɔ do mbee wala, nɛ a la.

³³ 'Do nɛ, nɛ mbe wi Samaria kpo, a nɛ zi gɛnɛ, nɛ a la do kpo li wala ni. Nɛ a hɔa, kɔ a nɛa we zɔ wi ni, nɛ 'bako ba li a dɛ tɛ̃ a wena.

³⁴ Nɛ a tɛ dɛ kɛ zã a, nɛ a fɔlɔ li daninɔ tɛ̃ a, nɛ a a nɔ do dɔ̃ li nɛ, nɛ a ɛnzɛ. Nɛ a ba a, nɛ a e a ngɔ punda 'da a, nɛ a la do a dɛ nu tɔa gɛnɛ, nɛ a gala a.

³⁵ Kɔ fala sa, nɛ a kala gbãlã mbili bɔa, nɛ a hã hã wele tɔa gɛnɛ ni, nɛ a tɔ̃ hã a na: ‘Mi la, kɔ mɔ gálá wi gɛ. Kɔ fala kɛ mɔ 'danga 'bɔ mbé mbili we a nde, nɛ fala si mɔ́ mi, nɛ mi gese sɛ hã mɔ.’ ”

³⁶ Nɛ Yezu aka na: “Sanga owinɔ talɛ ni, wele kɛ a bia na, ɛ a ngba wi kɛ a tia dɛ kɔ̃ wi zũnɔ ni a wio nde?”

³⁷ Nɛ wi be mbula gese na: “Wi a wele kɛ a gala a ni.” Nɛ Yezu tɔ̃ hã a na: “Mɔ sí, kɔ mɔ dɛ́ tɛ mɛ 'bɔ na mɛ ni.”

Yezu nɛa 'da Marta do Maria

³⁸ Yezu do owi yambala mɛnɔ 'da a, wa tɛ nɛ dɛ Yeruzalɛmɛ, nɛ wa hɔ tɛ mbe le kpo, nɛ mbe wuko kɔ le ni, li a a Marta, a sa mɔ hã Yezu, nɛ a dɛ gɛnɛ a.

³⁹ Nɛ nya wuke ni, li a a Maria, a dungu nù dɛ kɛ zã Yezu, tɛ zele wenɔ kɛ a be ni.

⁴⁰ Nɛ nde toe nɛ ngɔ Marta wena, nɛ a tɛa, nɛ a tɔ̃ hã Yezu na: “Aa Nwa, mɔ zɔ kɛ nya mi la tonɔ kɔ tɔa i vɛ̃ dɛ tɛ mi ni li mɔ nɛ nde? Mɔ tɔ̃ hã a, kɔ a tɛ we gala mi.”

⁴¹ Nɛ Nwa Yezu gese hã a na: “Marta, Marta, mi zɔa na, sila mɔ ɔ ngɔ ngbũu, nɛ mɔ fa we e kɔ̃ mɔ tɛ mɛnɔ vɛ̃.

⁴² Kɔ mɔ ĩ́ na, mɛ kɛ ma do gã gulu nɛ ni, mɛ a mɔ kpo iko. Nɛ mɛ kɛ Maria saka ni, ma de wena, fo sɛ wi dolo zu nɛ kɔ̃ a bina.”