Levitɛnɔ 9 - WE NU GALE 1995

Aroni do obenɔ 'da a wa ndua to nganga

¹ Ma hɔa Sɔkpɔ kɔ̃ tũnɔ, 'do kɛ Mɔizɛ a nɔɛ zu Aroni, do obenɔ 'da a ni, nɛ a sa mɔ hã wa do okumu Israɛlɛ.

² Nɛ a tɔ̃ hã Aroni na: “Mɔ bá he zagbãlã ngɔmbɔ, do wili bata kɛ fo kunda tɛ̃ wa bina ni, nɛ mɔ tɛ do wa dati NWA. Mɔ hã sɛ be zagbãlã ngɔmbɛ do dɔnggamɔ we fo ku'da 'dã mɔ, nɛ mɔ dɔ wili bata we dɔnggɔ do NWA.

³ 'Do nɛ, nɛ mɔ tɔ̃ sɛ hã obe Israɛlɛ na, wa tɛ do wili dua hã NWA, takɔ wa hã do dɔnggamɔ we fo ku'da 'dã mɔ. Nɛ wa tɛ 'bɔ do be wili ngɔmbɔ, do be bata, kɛ wa do sabɛlɛ kpo, nɛ fo kunda tɛ̃ wa bina ni, nɛ wa dɔ sɛ we dɔnggɔ do NWA.

⁴ Wa tɛ sɛ 'bɔ do wili ngɔmbɔ, do wili bata, mba do dɔnggamɔ fũ kɛ wa zanga ma do nɔ ni hã NWA. Nɛ ma sɛ a dɔnggamɔ kɛ ma be dɛa na. Mba gɔ, sɔɛ gɛ, NWA a be sɛ tɛ̃ a hã nɛ.”

⁵ Wa kala mɛnɔ vɛ̃ kɛ Mɔizɛ tɔlɔ ma ni, nɛ wa tɛ do ma dɛ dati tɔa Tande kpa ngba wi do NWA. Nɛ obe Israɛlɛ vɛ̃ wa mba ngba wa dɛ di ni, nɛ wa yolo dɛ dati NWA.

⁶ Nɛ Mɔizɛ tɔ̃ na: “Mi nɛ be mɛ kɛ NWA ba nu a hã nɛ na nɛ dɛ, takɔ gã dɔ̃lɔ̃ li 'da a ma be tɛ̃ ɛ hã nɛ ni.”

⁷ Nɛ a tɔ̃ hã Aroni na: “Mɔ tɛ́, kɔ mɔ kɔlɔ do gbagala, kɔ mɔ hã dɔnggamɛ 'da mɔ, we fo ku'da 'dã mɛ 'da mɔ, nɛ mɔ dɔ 'bɔ mbee nɛ, we dɔnggɔ do NWA. Dɔnggamɛ ni ma dɛ sɛ na, NWA fo ku'da 'dã mɛ 'da mɔ, do kɛ 'da owinɔ. 'Do nɛ, nɛ mɔ hã dɔnggamɛ kɛ owinɔ wa tɛa nɛ ni hã NWA. Nɛ ma fo ku'da 'dã mɛnɔ zu owinɔ, ɔ nɛ kɛ NWA ba do nu a ni.”

⁸ Aroni tɛa, nɛ a kɔlɔ do gbagala, nɛ a 'bili gɛlɛ be wili ngɔmbɛ, nɛ a dɔnggɔ do NWA, we fo ku'da 'dã mɛ 'da a wele nɛ.

⁹ Obenɔ 'da a wa kpɔa tɔkɔ sa'de, nɛ wa tɛ do ma hã a. Nɛ a fi zu kɔ̃ a 'dɔ nɛ, nɛ a kɔ tɛ 'bɛ̃lɛ̃ zu gbagala. Nɛ a tɛnɛ tala tɔkɛ dɛ tɛ nyanga gbagala.

¹⁰ A dɔa kɛndɔnɔ tɛ wala kole sa'de, do gba'bua do Okɛndɔ se'de ni, ɔ nɛ kɛ NWA ba do nu a hã Mɔizɛ ni.

¹¹ Nɛ a hɔa do mulu sa'de do ndala a dɛ 'do ngbo ɔi i, nɛ a dɔ ma.

¹² 'Do nɛ, nɛ Aroni 'bili gɛlɛ wili bata, nɛ a dɔ a we dɔnggɔ do NWA. Nɛ obenɔ 'da a wa kpɔa tɔkɔ nɛ, nɛ wa tɛ do ma hã a. Nɛ a kpã ma tɛ 'bolo zã gbagala.

¹³ Wa tɛa 'bɔ do zu sa'de do mulunɔ wa gɔmɔ ni, nɛ a dɔa ma ngɔ gbagala.

¹⁴ A fɔlɔ kala zã sa'de ni, do ogbɔgɔlɔ nyanga nɛ, nɛ a mba do zu sa'de, do mulunɔ, nɛ a dɔ ma ngɔ gbagala.

¹⁵ 'Do nɛ, nɛ Aroni bia dɔnggamɛnɔ 'da obe Israɛlɛ hã NWA. A ba wili dua kɛ owinɔ wa tɛa do a we hã do dɔnggamɔ we fo ku'da 'dã mɔ ni, nɛ a 'bili gɛlɛ a, nɛ a dɔ a we dɔnggɔ do NWA, ɔ nɛ kɛ a dɔa do be wili ngɔmbɛ ni.

¹⁶ A bia sa'denɔ ni do bɔa nɛ hã NWA, nɛ a dɔ wa we dɔnggɔ do a, ɔ nɛ kɛ mbula ngɔ nɛ ma tɔ̃ ni.

¹⁷ Nɛ a be 'bɔ dɔnggamɔ fũi, nɛ a so zu nɛ, nɛ a dɔ ma ngɔ gbagala, mba do dɔnggamɔ kɛ wa dɔ ma tũ kpo kpo ni.

¹⁸ 'Do nɛ, nɛ a 'bili gɛlɛ wili ngɔmbɛ do wili bata, kɛ owinɔ wa tɛa do ma do dɔnggamɛ we be dɛa na ni. Nɛ obenɔ 'da a wa kpɔa tɔkɔ nɛ, nɛ wa tɛ do ma hã a, nɛ a kpã ma tɛ 'bolo zã gbagala.

¹⁹ Wa tɛa 'bɔ do kɛndɔnɔ tɛ wili ngɔmbɛ ni, nɛ wa mba ma do do wili bata, do kɛndɔnɔ tɛ kala zã a ni, do kɛnɔ tɛ wala kole a, do kɛnɔ tɛ gba'bua kɛ wa fua tɛ wili bata ni.

²⁰ Nɛ wa a okɛndɔnɔ ni dɛ ngɔ gbãlã ngu'du sa'denɔ ni, nɛ Aroni dɔ ma ngɔ gbagala.

²¹ 'Do nɛ, nɛ a yaka gbãlã ngu'du sa'denɔ ni, do ku wa kɛ si ngawili kɔ ni dati NWA, we dɔnggɔ do a, ɔ nɛ kɛ Mɔizɛ ba do nu a ni.

²² 'Da fala Aroni hã dɔnggamɛnɔ we fo ku'da 'dã mɛ, nɛ a dɔa sa'de we be dɛa na ia do'do ni, nɛ a kala kɔ a dɛ ngɔ, nɛ a wele nu a tɛ winɔ. Nɛ 'do nɛ, nɛ a zĩlĩ,

²³ nɛ wa le do Mɔizɛ dɛ kɔ tɔa Tande i. Kɔ wa nɛa we hɔ nza ni, nɛ wa wele nu wa tɛ winɔ. Nɛ gã dɔ̃lɔ̃ li 'da NWA bia tɛ̃ ɛ hã obe Israɛlɛ.

²⁴ Nyɛa we ma hɔa, nɛ ma bɛlɛ odɔnggamɛnɔ ngɔ gbagala, do kɛndɔnɔ, do gele dɔnggamɛnɔ ngɔ nɛ ni. Nɛ obe Israɛlɛ vɛ̃ wa zɔa ma, nɛ wa zɛ kaliã, nɛ wa bili gbaa, nɛ zu wa to nù.