Levitɛnɔ 8 - WE NU GALE 1995

Wa a nɔ zu Aroni do obenɔ 'da a

¹ NWA tɔ̃a hã Mɔizɛ na:

² “Mɔ sá mɔ hã Aroni do obenɔ 'da a dɛ nu tɔa Tande kpa ngba wi do mi NWA. 'Do nɛ, nɛ mɔ tɛ do mɛnɔ gɛ: tulu santonɔ, nɔ a zu wi, wili ngɔmbɔ we gbɛ do dɔnggamɔ we fo ku'da 'dã mɔ, owili bata bɔa, do yele mapa kɛ wa à ina hana mapa tɛ nɛ gɔ ni.

³ Nɛ mɔ ngɛmɛ 'bɔ li obe Israɛlɛ dɛ di ni.”

⁴ Mɔizɛ zila nu NWA, nɛ a ngɛmɛ obe Israɛlɛ dɛ nu tɔa Tande ni.

⁵ Nɛ a tɔ̃ hã wa na: “Mbula mi nɛ dɛ nɛ ni, mɛ a kɛ NWA tɔ̃a ni.”

⁶ Nɛ a sa mɔ hã Aroni do obenɔ 'da a, nɛ a tɔ̃ hã wa na, wa fɔlɔ tɛ wa, takɔ wa hɔ sa wi li Gale.

⁷ 'Do nɛ, nɛ a hi'da vungbu tulu hã Aroni, nɛ a kpo 'dɛ̃ ngɔ nɛ. Nɛ a he'de 'bɔ du tulu tɛ̃ a, nɛ a he'de efɔdɛ dɛ ngɔ nɛ, nɛ a kpo fɛlɛ nɛ do li 'do a.

⁸ A hi'da koe tulu ngɔ ngu'du a dɛ ngɔ efɔdɛ ni. Nɛ a kala Urimɛ do Tumimɛ, mɛnɔ kɛ ma santo we aka do NWA ni, nɛ a a ma kɔ koe tuli ni.

⁹ 'Do nɛ, nɛ a ɛnzɛ zu a do kitambala, nɛ a kɔ'bɔ mɔ mbali kɛ ma ɔ nɛ fulɛlɛ ni dɛ dati nɛ we be na, nganga a a wi 'da NWA Gale. Mɔizɛ dɛa kpasaa ɔ nɛ kɛ NWA ba do nu a ni.

¹⁰ Nɛ Mɔizɛ ba nɔ kɛ ma santo ni, nɛ a kɔ ma tɛ tɔa Tande, do tɛ omɛnɔ kɔ nɛ ni vɛ̃, nɛ a e ma vɛ̃ hã NWA.

¹¹ Nɛ a fi zu kɔ̃ a 'dɔ nɔɛ, nɛ a kpã ma tɛ gbagala do osi'bili mɔ tɛ nɛ, gba sani a do lì fɔlɔ wi, do 'dinggili e sani ngɔ nɛ. A dɛa ni fala sambo,

¹² nɛ a a nɔɛ zu Aroni we e a hã Gale.

¹³ 'Do nɛ, nɛ a tili obenɔ 'da Aroni dɛ dati, nɛ a he'de vungbu tulu ngɔ tɛ wa. Nɛ a kpo 'dɛ̃nɔ 'da wa dɛ ngɔ nɛ, nɛ a gu ndasanɔ 'da wa zu wa, kpasaa ɔ nɛ kɛ NWA ba do nu a ni.

¹⁴ 'Do nɛ, nɛ a tɛa do wili ngɔmbɔ we gbɛ a do dɔnggamɔ we fo ku'da 'dã mɔ. Nɛ Aroni do obenɔ 'da a, wa a kɔ̃ wa dɛ zu sa'de ni.

¹⁵ Mɔizɛ 'bili gɛlɛ a, nɛ a kpɔ tɔkɛ, nɛ a fi zu kɔ̃ a 'dɔ nɛ, nɛ a kɔ tɛ 'bɛ̃lɛ̃ zu gbagala, takɔ ma hɔ sa li Gale. 'Do nɛ, nɛ a tɛnɛ tala tɔkɛ ni dɛ tɛ nyanga gbagala, we e ma hã Gale, takɔ a dɔ do sa'de fo ku'da 'dã mɔ zu winɔ. Ki ni a tɛlɛ tɛ kɛ Mɔizɛ dɛa do gbagala we e ma hã NWA gɛ a ni.

¹⁶ Mɔizɛ kala okɛndɔnɔ vɛ̃ tɛ kala zã sa'de ni, kɛndɔ tɛ gba'bua, owala kole a do kɛndɔnɔ se'de ni, nɛ a dɔ ma vɛ̃ ngɔ gbagala.

¹⁷ Nɛ wa kala tala mɔ tɛ sa'de ɔ nɛ: ndala a, muli do kala zã a, nɛ wa dɔa ma do 'do ngbo fala ɔi, kpasaa ɔ nɛ kɛ NWA ba do nu a ni.

¹⁸ 'Do nɛ, nɛ a tɛa do wili bata we dɔ a do dɔnggamɔ. Nɛ Aroni do obenɔ 'da a, wa a kɔ wa dɛ zu sa'de ni.

¹⁹ Nɛ Mɔizɛ 'bili gɛlɛ a, nɛ a kpɔ tɔkɔ nɛ, nɛ a kpã ma tɛ 'bolo zã gbagala.

^20-21 A gɔmɔ sa'de ni, nɛ a fɔlɔ okala zã nɛ do ogbɔgɔlɔ nyanga nɛ. Nɛ a dɔ ma mba do zu a, do okɛndɔnɔ ngɔ gbagala, ɔ nɛ kɛ NWA ba do nu a ni. Mɛ a dɔnggamɔ kɛ zɛ̃ nɛ unu zi NWA, nɛ ma dia tɛ̃ a.

²² 'Do nɛ, nɛ Mɔizɛ tɛa do wili bata kɛ bɔa, we hã do dɔnggamɔ kɛ ma be na, onganganɔ wa ndua to nganga 'da wa ia ni. Nɛ Aroni do obenɔ 'da a, wa a kɔ̃ wa dɛ zu sa'de ni.

²³ Nɛ Mɔizɛ 'bili gɛlɛ a, nɛ a kpɔ tɔkɔ nɛ, nɛ a kɔ tɛ zala Aroni si ngawili kɔ̃. Nɛ a kɔ 'bɔ tɛ gba 'biti zu kɔ a, do tɛ gba 'biti zu nyanga a, kɛ si ngawili kɔ̃.

²⁴ 'Do nɛ, nɛ a tili obenɔ 'da Aroni dɛ dati, nɛ a kɔ 'bɔ tɔkɛ tɛ zala wa si ngawili kɔ. Nɛ a kɔ 'bɔ tɛ gba 'biti zu kɔ wa, do tɛ gba 'biti zu nyanga wa kɛ si ngawili kɔ̃. Nɛ a kpã tala tɔkɛ ni tɛ 'bolo zã gbagala do nalɛ nɛ.

²⁵ Mɔizɛ kala fala kɛndɔnɔ tɛ wili bata ni, do do a, do kɛndɔnɔ tɛ kala zã a, do kɛnɔ tɛ gba'bua, wala kole a do kɛndɔnɔ kɛ zã nɛ ni, do ku a, kɛ ngɔ ngawili kɔ.

²⁶ Nɛ a ka mɔ kɔ yele mapa kɛ wa à ina hana mapa tɛ nɛ gɔ, nɛ wa ia ma dɛ dati NWA ni, nɛ a saka mapa kɛ ma ɔ korr ni, do mukate nɔ kpo, do bisikiti kpo, nɛ a a ma dɛ ngɔ kɛndɔnɔ do ku sa'de si ngawili kɔ ni

²⁷ A mba li mɛnɔ ni vɛ̃ dɛ kɔ̃ Aroni, do obulu benɔ 'da a. Nɛ a tɔ̃ hã wa na, wa yaka ma dati NWA, nɛ wa dɔnggɔ do a.

²⁸ 'Do nɛ, nɛ a kala dɔnggamɛnɔ ni kɔ̃ wa, nɛ a mba do dɔnggɔmɛ kɛ ngɔ gbagala ni, nɛ a dɔ ma vɛ̃. Tɛlɛ tɛ kɛ wa hã dɔnggamɛ we be na, onganganɔ wa ndua to nganga 'da wa ia gɛ a ni. Nɛ zi dɔnggamɛ ni, ma unu zi NWA, nɛ ma de tɛ̃ a.

²⁹ Mɔizɛ ba gbãlã ngu'du wili bata ni, nɛ a yaka ma dɛ dati NWA, nɛ a dɔnggɔ do a. 'Do nɛ, nɛ a ba gbãlã ngu'du sa'de ni do mɔ a, kpasaa ɔ nɛ kɛ NWA ba do nu a ni.

³⁰ Nɛ Mɔizɛ sua mbe tɔkɛ kɛ ngo gbagala, do nɔɛ kɛ ma santoe ni, nɛ a kpã tɛ Aroni, do obenɔ 'da a, do te tulunɔ 'da wa. Na mɛ ni, Aroni do obulu benɔ 'da a, wa hɔa winɔ 'da NWA, nɛ tulunɔ 'da wa hɔa santo.

³¹ Nɛ Mɔizɛ tɔ̃a hã Aroni do obenɔ 'da a na: “Nɛ bá mulu wili bata kɛ nɛ dɔnggɔ a do NWA ni, nɛ nɛ gi ma dɛ nu tɔa Tande ni. Nɛ nɛ nyɔ́ngɔ́ ma dɛ di ni, do tala mapanɔ kɛ ma 'bana kɔ yele ni, ɔ nɛ kɛ mi ba do nu mi hã nɛ ni.

³² Fala kɛ tala mulu sa'de, do mapa ma ɔ ngɔ, nɛ nɛ dɔ sɛ ma do'do.

³³ Nɛ ɔ sɛ dɛ nu tɔa Tande gɛ tũ sambo. Nɛ lá sɛ di ni gɔ gbaa na, wa dɛ mɔ ngɔ ndua toe 'da nɛ vɛ̃ 'do tũ sambo, kɔ ma we do'do sɛ nɛ de.

³⁴ NWA ba nu a na, wa dɛ kpasaa ɔ nɛ kɛ lɛ dɛa sɔɛ gɛ ni, takɔ a fo ku'da 'dã mɛ zu nɛ.

³⁵ Nɛ 'báná dɛ nu tɔa Tande gɛ gba wese do tũ, gbaa 'do tũ sambo. Nɛ nɛ dɛ́ ombulanɔ 'da NWA. Ní gɔ, nɛ nɛ fe sɛ. Ki ni a ombulanɔ kɛ mi kpa ma kɔ Gale gɛ a ni.”

³⁶ Aroni do obenɔ 'da a, wa dɛa mbulanɔ vɛ̃ kɛ NWA hã ma hã wa do wala 'da Mɔizɛ ni.