Levitɛnɔ 7 - WE NU GALE 1995

Mbula ngɔ dɔnggamɔ we si olo ku'da 'dã mɔ

¹ “Kɛ gɛ mɛ a mbula ngɔ dɔnggamɔ we si olo ku'da 'dã mɔ. Mɛ a dɔnggamɔ kɛ ma santo ngboo.

² Wa 'bili sɛ gɛlɛ sa'de dɛ fala wa 'bili do gɛlɛ sa'denɔ we dɔ wa hã NWA ni. 'Do nɛ, nɛ nganga a kpã sɛ tɔkɔ sa'de ni tɛ 'bolo zã gbagala.

³ Nɛ a kala sɛ fala kɛndɔnɔ tɛ sa'de vɛ̃, nɛ wa hã ma hã NWA. Mɛ a do sa'de, kɛndɔnɔ tɛ kala zã a,

⁴ owala kole a do okɛndɔnɔ dɛ se'de, do kɛnɔ tɛ ngɔ zã a, do kɛnɔ tɛ gba'bua, kɛ wa fo ma fala nɛ kpo do owala kole sa'de ni.

⁵ Nɛ nganga a dɔ sɛ ma vɛ̃ dɛ ngɔ gbagala dati NWA. Ki ni, mɛ a dɔnggamɔ si olo ku'da 'dã mɔ.

⁶ Tati a owi wilinɔ kɛ wa a nu fɛlɛ nganga ni, hã wa nyɔngɔ sɛ mulu sa'de ni. Wa nyɔngɔ sɛ ma dɛ li fanda tɔa Tande 'da NWA, kɛ mɛ a fala santo ni, we kɛ mulu sa'de ni ma santo.

⁷ Mbulanɔ gɛ ma 'bɔ kpasaa we duzu dɔnggamɔ fo ku'da 'dã mɔ. Nɛ nganga kɛ a dɔ sa'de we si olo ku'da 'dã mɛ ni, a wia sɛ we nyɔngɔ tala sa'de ni.

⁸ “Fala kɛ wele tɛ do sa'de hã nganga na, a dɔ ma hã NWA, nɛ ndala sa'de ni sɛ a mɔ́ nganga kɛ a dɔa sa'de ni.

⁹ Odɔnggamɔ fũ kɛ wa dɔa ma kɔ furu, tabi kɛ wa hana ma kɔ gbala, tabi ngɔ mbala mɔ bolo ni, ma a mɔ́ nganga kɛ a bia dɔnggamɛ dati NWA ni.

¹⁰ Nɛ nde odɔnggamɛnɔ vɛ̃ kɛ wa gì gi gɔ, tabi kɛnɔ wa zanga do nɔ, tabi nɔ tɛ nɛ bina ni, wa gɔnɔ sɛ sanga nɛ dɛ gbogbo dɛ kɔ onganganɔ vɛ̃.

Mbula ngɔ dɔnggamɔ kɛ ma be dɛa na

¹¹ “Kɛ gɛ mɛ a mbula ngɔ dɔnggamɔ kɛ wele hã ma hã NWA, we be dɛa na ni.

¹² “Fala kɛ wele hã dɔnggamɔ we tɔ̃ dia li NWA, nɛ ma wia na, dɛ ngɔ sa'de kɛ a nɛ gbɛ a ni, nɛ a tɛ sɛ do mukate kɛ a zanga ma do nɔ, nɛ a à ina hana mapa tɛ nɛ gɔ ni, do fũ kɛ a zanga ma do nɔ ni.

¹³ A tɛ sɛ 'bɔ do mapa kɛ a a ina hana mapa se'de ni, nɛ a mba ma do dɔnggamɔ kɛ ma be dɛa na, we tɔ̃ dia li NWA ni.

¹⁴ Nɛ a fo sɛ zu dɔnggamɛnɔ ni kpo kpo hã NWA, nɛ a hã sɛ tala nɛ hã nganga kɛ a kpã tɔkɔ sa'de tɛ 'bolo zã gbagala ni.

¹⁵ Nɛ nde we duzu mulu sa'de, kɛ a hã ma do dɔnggamɔ we be dɛa na ni, a nyɔngɔ sɛ ma do ngba soe kɛ a hã do ma ni, nɛ a tɛ è ma ngɔ gɔ.

¹⁶ “Hã fala kɛ wele hã dɔnggamɔ kɛ ma be dɛa na do kɔ sila a iko, tabi a hã ma we dɛ mbulu, nɛ a nyɔngɔ sɛ mbe mulu sa'de do ngba soe kɛ a hã do dɔnggamɛ ni. Nɛ a e tala nɛ ngɔ, kɔ fala sa, nɛ wa nyɔngɔ ma.

¹⁷ Fala kɛ ma ɔ 'bɔ ngɔ mbé nɛ, nɛ ma wia na, wa dɔ ma do'do.

¹⁸ Fala kɛ ma hɔ tɛ tũ kɛ talɛ, kɔ wele nyɔngɔ mulu sa'de dɔnggamɛ kɛ a hã ma ni, nɛ nde NWA kɔ̃́ sɛ gɛnɛ nɛ gɔ, nɛ dɔnggamɛ 'da a ni, ma sɛ yala iko. We kɛ mulu sa'de ni, ma hɔa mɔ ndi li NWA ia. Wele kɛ a nyɔngɔ ma, nɛ nde a dɛa 'dã mɔ.

¹⁹ Fala kɛ mulu sa'de ni mba ngbɛ ɛ do mɔ ndi, nɛ ma wè na wa nyɔngɔ ma gɔ, wa dɔ ma do'do. “Ma wia na, wele ɔ sa wi li Gale, sɛ nɛ a ĩ ti nyɔngɔ sa'de dɔnggamɛ de.

²⁰ Hã fala kɛ wele ɔ do wi ndi li NWA Gale, kɔ a nyɔngɔ mulu sa'de dɔnggamɔ kɛ wa hã ma hã a na, ma be dɛa na ni, nɛ wa fo a sanga wa obe Israɛlɛ do'do.

²¹ Ma ɔ sɛ 'bɔ kpasaa na mɛ ni, we duzu wi kɛ a 'be tɛ wi ndi, tabi sa'de ndi, tabi mɔ kɛ vɛ̃ ma a mɔ ndi li Gale, nɛ 'do nɛ, nɛ a nyɔngɔ mulu sa'de dɔnggamɛ ni.”

²² NWA tɔ̃a hã Mɔizɛ na,

²³ a e mbula hã obe Israɛlɛ na: “Ma wè na, wa nyɔngɔ kɛndɔ kpo tɛ sa'de ngɔmbɔ, tabi bata, tabi dua gɔ.

²⁴ Ma wè na, wa nyɔngɔ kɛndɔ sa'de kɛ a fi fia iko, tabi sa'de zamɔ hã a gbɛa a ni gɔ. Nɛ nde wa wia we dɛ kɛndɔɛ ni do gele mɔ.

²⁵ Fala kɛ wele nyɔngɔ kɛndɔ tɛ sa'de kɛ wa nɛ dɔ a we dɔnggɔ do NWA ni, nɛ wa fo sɛ wi ni sanga obe Israɛlɛ do'do.

²⁶ Nɛ ma wè 'bɔ na, tɛ falanɔ vɛ̃ kɛ wa ɔ tɛ nɛ ni, wa nyɔ́ngɔ́ tɔkɔ nɔɛ, tabi tɔkɔ sa'de gɔ.

²⁷ Fala kɛ wele nyɔngɔ tɔkɔ nɔɛ, tabi tɔkɔ sa'de, nɛ wa fo sɛ 'bɔ a sanga obe Israɛlɛ do'do.”

²⁸ NWA tɔ́a hã Mɔizɛ na,

²⁹ a e 'bɔ mbula hã obe Israɛlɛ na: “Fala kɛ wele hã dɔnggamɔ we be dɛa na, nɛ a hã sɛ kɛ 'da NWA hã a.

³⁰ A do tɛ̃ a, a tɛ sɛ do o'bili tɛ sa'de kɛ mɛ a kɛ 'da NWA ni. Mɛ a okɛndɔnɔ do gbãlã ngu'du sa'de. Nɛ a yaka sɛ gbãlã ngu'du sa'de dati NWA, nɛ a hã ma hã a.

³¹ Nɛ nganga a dɔ sɛ kɛndɔnɔ ngɔ gbagala. Nɛ wele gbãlã ngu'du sa'de sɛ a mɔ Aroni, do obenɔ 'da a.

³² Ma wia na, wa fo 'bɔ ku sa'de ni, kɛ si ngɔ ngawili kɔ, nɛ wa hã ma hã nganga.

³³ Ki ni, mɛ a 'bili tɛ sa'de kɛ wa hã ma hã nganga kɛ a nɛ do tɔkɛ, nɛ a dɔ Okɛndɔ sa'de ngɔ gbagala ni.

³⁴ NWA do tɛ̃ a, a ba nu a hã nɛ obe Israɛlɛ na, nɛ bá gbãlã ngu'du sa'denɔ do oku wa, nɛ nɛ e do tɛ̃ ɛ, nɛ nɛ hã ma hã onganganɔ kɛ wa a obe zã Aroni ni. We kɛ mɛnɔ ni ma a mɔ́ wa fai.”

³⁵ Ki ni a mɛnɔ kɛ wa fua zi tɛ osa'denɔ we dɔnggɔ do NWA, nɛ wa hã zi ma hã Aroni do obe zã a, ndo do ngba soe kɛ wa a zi nɔɛ zu wa na, wa hɔ onganganɔ 'da NWA ni.

³⁶ NWA ba zi nu a hã obe Israɛlɛ na, wa hã mɛnɔ ni hã wa do ngba soe kɛ wa a nɔɛ zu wa ni. Nɛ ma wia na, wa dɛ sɛ mbula ni 'da fala fai.

³⁷ Ki ni, mɛ a mbula ngɔ dɔ odɔnggamɔ fũ, odɔnggamɔ we fo ku'da 'dã mɔ, odɔnggamɔ we si olo ku'da 'dã mɔ, odɔnggamɔ we be dɛa na, do odɔnggamɔ kɛ wa hã do ngba soe wele hɔ nganga ni.

³⁸ NWA hã zi mbula ni hã Mɔizɛ tɛ ngɔ kala Sinai, tɛ li gba zɔ̃, do ngba soe kɛ a tɔ̃a zi hã obe Israɛlɛ na, wa hã dɔnggamɛnɔ hã ɛ ni.