Levitɛnɔ 6 - WE NU GALE 1995

Mbula ngɔ dɔ sa'de do dɔnggamɔ

¹ NWA ba nu a hã Mɔizɛ na,

² a e mbulanɔ gɛ hã Aroni do obenɔ 'da a. Mbulanɔ ni ma ngɔ dɔ sa'de do dɔnggamɔ. A na: “Ma wia na, wa e dɔnggamɛ ni ngɔ gbagala do tũi, nɛ wa dã we tɛ nɛ, nɛ ma bɛlɛ gbaa we hɔ titole.

³ Do titole, nɛ nganga he'de vungbu tulu ɔ bɛndɛ bɛndɛ, nɛ tulu ti nɛ ma ɔ 'bɔ na mɛ ni. Nɛ a fo bũnɔ olo dɔnggamɛ wa dɔa ni, nɛ a a ma dɛ kɛ zã gbagala ni.

⁴ 'Do nɛ, nɛ a kpolo tulunɔ tɛ̃ a ni, nɛ a ba bũi ni hɔ do ma dɛ 'do ngbo ɔi i, tɛ fala kɛ ma sa li Gale ni.

⁵ Nɛ we ngɔ gbagala ni, ma tɛ bì gɔ. Titole kpo kpo, nɛ nganga a a sɛ ogua ngɔ gbagala, nɛ a 'dafa sa'de we dɔ a dɛ ngɔ guanɔ ni. 'Do nɛ, nɛ a dɔ Okɛndɔ sa'de do dɔnggamɔ kɛ ma be dɛa na ni dɛ ngɔ nɛ.

⁶ Ma wia na, we nyɛ ngɔ gbagala ni nyɛa fai, nɛ ma tɛ bì gɔ.

Mbula ngɔ hã fũ do dɔnggamɔ

⁷ “Winɔ kɛ wa be sɛ dɔnggamɔ fũ hã NWA tɛ dati gbagala, wi a obenɔ 'da Aroni.

⁸ Nɛ mbe kpo sanga wa ni a nɛ sɛ, nɛ a so zu fũi kɛ wa zanga do nɔɛ do fũ yɔmbɛ vɛ̃ ni, nɛ a dɔ ma. Nɛ dɔnggamɛ ni, ma gba sɛ ta zu nwa ngɔ wi hã ma ni. Nganga ni a dɔ sɛ ma ngɔ gbagala, nɛ zɛ̃ nɛ ma unu sɛ NWA, nɛ ma de tɛ̃ a.

⁹ Nɛ Aroni, do obenɔ 'da a, wa nyɔngɔ sɛ tala fũi ni. Wa nyɔngɔ sɛ ma, nɛ nde wa tɛ à ina hana mapa tɛ nɛ gɔ, nɛ wa nyɔngɔ sɛ ma dɛ li fanda tɔa Tande, kɛ mɛ a fala santo ni.

¹⁰ Wa dɔ sɛ ma do mapa, nɛ nde wa tɛ à ina hana mapa tɛ nɛ gɔ. Mba gɔ, mɛ a tala dɔnggamɛ kɛ ma yula kɔ dɔnggamɛnɔ wa tɛa do ma hã nwa, nɛ a hã ma hã onganganɔ ni. Ma a santo ɔ nɛ tala dɔnggamɛnɔ kɛ ma yula kɔ dɔnggamɛnɔ we fo ku'da 'dã mɔ, tabi we si olo ku'da 'dã mɔ ni.

¹¹ Nɛ tati a obe zã Aroni, wi wili wanɔ, hã wa nyɔngɔ sɛ tala dɔnggamɔ kɛ nwa hã ma hã wa, nɛ ma santo ni. We duzu ki ni, mbé gele wele iko 'be tɛ tala dɔnggamɛ ni, nɛ ma dɛ sɛ a 'danga wena, we kɛ ma santo.”

¹² NWA tɔ̃a hã Mɔizɛ na, a e mbulanɔ gɛ hã obe Israɛlɛ na:

¹³ “'Da fala kɛ wa a sɛ nɔ zu Aroni do obenɔ 'da a, takɔ wa dɛ to nganga ni, nɛ ma wia na tũ kpo kpo, nɛ a tɛ sɛ do kilo fũ talɛ we dɔnggɔ do Gale. Wa tɛ do ma, nɛ wa gɔna sɛ sanga nɛ dɛ gbogbo, nɛ wa hã mbee nɛ do titole, nɛ wa hã tala nɛ do gɛ̃a wese.

¹⁴ Wa zanga sɛ fũi ni do nɔ, nɛ wa 'bo ma do mukate, nɛ wa hana ma ngɔ mbala mɔ bolo. 'Do nɛ, nɛ wa gbini sɛ sanga mukate ni dati kɛ na, wa dɔ ma hã NWA ni. Nɛ zɛ̃ nɛ ma unu sɛ NWA, nɛ ma de tɛ̃ a.

¹⁵ “Nɛ 'da falanɔ vɛ̃ 'do gɛ, be zã Aroni kɛ wa a sɛ nɔ zu a, takɔ a dɛ to gã nwa nganga ni, a hã sɛ dɔnggamɔ kpasaa na mɛ ni. Nɛ wa dɔ sɛ ma vɛ̃ we dɔnggɔ do NWA. Wa dɛ sɛ mbula ni 'da fala fai.

¹⁶ Mba gɔ, dɔnggamɔ fũi vɛ̃, kɛ nganga hã ma hã NWA ni, wa nyɔ́ngɔ́ ma gɔ. Ma wia na wa dɔ ma vɛ̃ hã NWA.”

Dɔnggamɔ we fo ku'da 'dã mɔ

¹⁷ NWA tɔ́a hã Mɔizɛ na,

¹⁸ a e mbulanɔ ngɔ dɔnggamɛ we fo ku'da 'dã mɛnɔ ni hã Aroni do obenɔ 'da a. Mbulanɔ ni ma kɛ: “Ma wia na, wa 'bili gɛlɛ sa'de dɛ dati tɔa Tande 'da NWA, dɛ fala wa 'bili do gɛlɛ sa'denɔ we dɔ hã a ni. Dɔnggamɛ ni, mɛ a dɔnggamɔ kɛ ma santo.

¹⁹ Nɛ nganga kɛ a dɔ ma ni wia we nyɔngɔ tala dɔnggamɛ ni dɛ li fanda tɔa Tande 'da NWA, kɛ mɛ a fala santo ni.

²⁰ Mulu sa'de dɔnggamɛ ni, ma santo. We duzu ki ni, mbé gele wele iko 'be tɛ nɛ, nɛ ma dɛ sɛ a 'danga wena, we kɛ ma santo. Fala kɛ tɔkɔ sa'de dɔnggamɛ ni, ma zĩ tɛ tulu, nɛ wa fɔlɔ sɛ tɔkɛ ni tɛ fala kɛ ma santo ni.

²¹ Fala kɛ wa gi sa'de ni kɔ kpana kɛ wa 'bua ma do gili, nɛ ma wia na, 'do nɛ, nɛ wa o kpana ni do'do. Fala kɛ wa gi ma kɔ kpana kɛ wa dɛa ma do tũ mɔ bolo, nɛ 'do nɛ, nɛ wa sa sɛ tɛ nɛ, nɛ wa fɔlɔ kɔ nɛ do lì, nɛ ma sa.

²² Tati a owi wilinɔ kɛ wa a nu fɛlɛ nganga ni, hã wa nyɔngɔ sɛ dɔnggamɛ ni, we kɛ ma santo.

²³ Nɛ nde fala kɛ nganga tɛ do mbe tɔkɔ sa'de ni dɛ kɔ tɔa Tande na, a dɛ do mbala mɔ fo 'dã mɔ, nɛ wele nyɔngɔ sɛ mulu sa'de ni gɔ, wa dɔ sɛ ma vɛ̃.