Levitɛnɔ 5 - WE NU GALE 1995

Dɔnggamɛnɔ kɛ ma wia we si olo ku'da 'dã mɛnɔ

¹ “O'dã mɛnɔ kɛ ma wia do dɔnggamɔ we fo ku'da nɛ zu wi kɛ a dɛa ma ni ma kɛ: Fala kɛ wa sa mɔ hã wele we ɔ temɔɛ we mɔ kɛ ma la ni, kɔ a bɛ̃ we tɔ̃̀ we mɛ kɛ a zɔa, tabi we kɛ a zila ni, nɛ 'dã mɛ ni sɛ dɛ zu a.

² “Tabi lɛ ba na, wele 'bia tɛ mɔ kɛ ma a mɔ ndi li Gale, ɔ nɛ fia sa'de zamɔ, tabi fia sa'de 'da le, tabi be sa'de kɛ a hala do ngu'du a, nɛ nde gɛnɛ kɔ a dɛ̃ do mbana gɔ, nɛ a te sɛ do ngbangga, nɛ a hɔ sɛ wi ndi li Gale.

³ “Tabi fala kɛ wele 'be 'bɔ tɛ wi kɛ a a wi ndi, nɛ ndi ni wia we te tɛ gele wi ni. Nɛ nde gɛnɛ kɔ a ĩ̀ fala nɛ do 'da fala ni gɔ, kɔ a ĩ fala nɛ do 'do, nɛ a te sɛ do ngbangga dati Gale.

⁴ “Fala kɛ wele zonggo tɛ̃ a ngo mbe mɔ, nɛ nde a lènggè mɔ dati gɔ, tabi a zonggo tɛ̃ a we kpa dia mɔ, tabi we kpa 'dã mɔ, kɔ a ĩ fala nɛ do 'do, nɛ a te sɛ do ngbangga dati Gale.

⁵ “Fala kɛ wele te do mbe kpo kɔ ngbangganɔ gɛ, nɛ ma wia na, a gbala 'dã mɛ ni,

⁶ nɛ a tɛ do be naa bata, tabi naa dua we dɔnggɔ do NWA, takɔ ma si olo ku'da 'dã mɛ zu a. Nɛ nganga a hã sɛ dɔnggamɛ ni hã NWA, nɛ ma dɛ sɛ na, NWA fo ku'da 'dã mɛ zu wi ni.

Dɔnggamɛ 'da owi sãnɔ

⁷ “Fala kɛ wele do wala we hã bata tabi dua, we si olo ku'da 'dã mɛ a dɛa ni bina, nɛ ma wia na, a tɛ do gbakulĩ bɔa, tabi opizɔ̃ bɔa we si do olo ku'da 'dã mɛ 'da a dati NWA. Mbe nɔɛ kpo sɛ we hã do dɔnggamɔ we fo ku'da 'dã mɔ, nɛ wa dɔ sɛ mbe nɛ vɛ̃ we dɔnggɔ do Gale.

⁸ Wi ni, a tɛ sɛ do onɔɛnɔ ni hã nganga, nɛ nganga hã dɔnggamɔ kɛ we fo ku'da 'dã mɛ ni dati. A sa'ba sɛ gɛlɛ mbe kpo nɔɛ, nɛ ma gbini, nɛ nde a fo sɛ ma gɔ.

⁹ Nɛ nganga a kpã sɛ mbe tɔkɔ nɔɛ ni tɛ 'bolo zã gbagala. Ki ni mɛ a dɔnggamɔ we fo ku'da 'dã mɔ.

¹⁰ 'Do nɛ, nɛ a dɔ sɛ nɔɛ kɛ bɔa we dɔnggɔ do NWA, ɔ nɛ kɛ mbula ngɔ ma tɔ̃ ni. Nganga a dɛ sɛ na mɛ ni, nɛ dɔnggamɛ ni ma dɛ sɛ na, Gale fo ku'da 'dã mɛ zu wi ni.

¹¹ “Fala kɛ wele do wala we kpa ogbakulĩ bɔa, tabi opizɔ̃ bɔa bina, nɛ ma wia na, a tɛ do kilo fũ nalɛ we hã do dɔnggamɔ we fo ku'da 'dã mɛ zu a. Nɛ nde a tɛ à nɔ, tabi fũ yɔmbɔ ngɔ nɛ gɔ, we kɛ mɛ a dɔnggamɔ we fo ku'da 'dã mɔ.

¹² A tɛ sɛ do fũi ni hã nganga, nɛ nganga a so sɛ zu nɛ, we gba ta zu nwa ngɔ wi hã dɔnggamɛ ni, nɛ a dɔ ma mba do gele dɔnggamɛnɔ ngɔ gbagala ni hã NWA. Ki ni a dɔnggamɔ we fo ku'da 'dã mɔ.

¹³ Nganga a dɛ sɛ na mɛ ni, nɛ dɔnggamɛ ni ma dɛ sɛ na, NWA fo ku'da 'dã mɛ zu wi ni. Nɛ tala fũi ni sɛ a mɔ́ nganga ɔ nɛ kɛ 'da dɔnggamɔ fũi ni.”

Dɔnggamɔ we si olo ku'da 'dã mɔ

¹⁴ NWA tɔ̃a hã Mɔizɛ na, a e mbulanɔ gɛ hã obe Israɛlɛ na:

¹⁵ “Fala kɛ wele zɔlɔ tɛ do dɔnggamɛ kɛ ma wia ni hã NWA, kɔ gɛnɛ kɔ a dɛ̃ do mbana gɔ, nɛ nde a dɛa 'dã mɔ dɛ 'da NWA. Nɛ ma wia na, a tɛ do wili bata, tabi wili dua kɛ fo kunda tɛ̃ a bina ni hã NWA. A tɛ sɛ nɛ, we si olo ku'da 'dã mɛ zu a. Wa we sɛ gole sa'de ni do 'da mɔ we do mbili kɔ tɔa Tande. Nɛ sa'de ni sɛ we hã do dɔnggamɔ si olo ku'da 'dã mɔ.

¹⁶ Nɛ ma wia na, wi ni futa olo mɛnɔ 'da NWA kɛ ma 'bana kɔ̃ a i ni, nɛ a e kpo mbee mɔlɔ gole mɛ ni ngɔ nɛ. Nɛ a hã ma vɛ̃ hã nganga. 'Do nɛ, nɛ nganga a gbɛ sɛ sa'de ni, we dɔnggɔ do NWA. Nganga a dɛ sɛ na mɛ ni, nɛ dɔnggamɛ ni ma dɛ sɛ na, Gale fo ku'da 'dã mɛ zu wi ni.

¹⁷ “Fala kɛ wele gbini mbe kpo sanga mbulanɔ 'da NWA, hã gɛnɛ kɔ a dɛ̃ do mbana gɔ, nɛ nde a dɛa 'dã mɔ, nɛ a tia do ngbangga dati NWA, nɛ ma wia na, a futa olo nɛ.

¹⁸ Ma wia na, a tɛ do wili bata, tabi dua, kɛ fo kunda tɛ̃ a bina ni, nɛ gole a we do 'da kɛ wa wia hã a we si olo ku'da 'dã mɛ ni. Nganga a gbɛ sɛ sa'de ni, nɛ ma dɛ sɛ na, Gale fo ku'da 'dã mɛ zu wi ni.

¹⁹ Ki ni mɛ a dɔnggamɔ we si olo ku'da 'dã mɔ kɛ wele dɛa dɛ 'da NWA ni.”

²⁰ NWA tɔ̃a hã Mɔizɛ na, a e mbulanɔ gɛ hã obe Israɛlɛ na:

²¹ “Fala kɛ wele bɛ̃ we gese mɔ kɛ a kpa olo nya a be Israɛlɛ hã a, tabi a zũ mɔ mɔ́ nya a,

²² tabi a ba mɔ kɔ̃ nya a do nga nɛ, nɛ a 'bili bɛlɛ na, ɛ bà gɔ, nɛ nde a dɛa 'dã mɔ dɛ 'da NWA. Fala kɛ dɛ ngɔ mɛnɔ ni vɛ̃, kɔ a zonggo tɛ̃ a do bɛlɛ na ɛ dɛ̀ ma gɔ,

²³ nɛ a te sɛ do ngbangga. Nɛ ma wia na, a gese mɛ a ba ni hã wele nɛ.

²⁴ Kɔ 'da fala kɛ we 'dã mɛ 'da a hɔ nza, nɛ a gese sɛ mɛ ni vɛ̃ hã wele nɛ, nɛ a e 'bɔ kpo mbee mɔlɔ gole mɛ ni ngɔ nɛ, nɛ a hã ma hã wele nɛ.

²⁵ 'Do nɛ, nɛ a tɛ sɛ do wili bata tabi dua, kɛ fo kunda tɛ̃ a bina ni, nɛ gole a we do 'da kɛ wa wia hã a ni, nɛ a hã a hã nganga. Nɛ nganga a gbɛ sɛ sa'de ni do dɔnggamɔ hã NWA, we si do olo ku'da 'dã mɛ zu wi ni.

²⁶ Nganga dɛ sɛ na mɛ ni, nɛ dɔnggamɛ ni ma dɛ sɛ na, Gale fo ku'da 'dã mɛ zu wi ni.”