Levitɛnɔ 4 - WE NU GALE 1995

Dɔnggamɔ we fo ku'da 'dã mɔ kɛ wele dɛ do mbana gɔ ni

¹ NWA tɔ̃a hã Mɔizɛ na,

² a e mbulanɔ gɛ hã obe Israɛlɛ na: “Fala kɛ wele dɛ 'dã mɔ, hã a gbini mbe kɔ mbulanɔ 'da NWA kpo, kɔ a dɛ̀ ma do mbana gɔ, nɛ wa dɛ sɛ na mɛ gɛ:

³ “Fala kɛ gã nwa nganga hã a dɛ 'dã mɔ, nɛ 'dã mɛ 'da a ma te sɛ ngo owinɔ vɛ. Nɛ a tɛ sɛ do wili ngɔmbɔ kɛ fo kunda tɛ̃ a bina ni, nɛ a doɛnggɔ do NWA, takɔ ma fo ku'da 'dã mɛ zu a.

⁴ A nɛ sɛ do wili ngɔmbɛ dɛ nu tɔa Tande kpa ngba wi do NWA. Nɛ a e kɔ̃ a zu sa'de ni, nɛ a 'bili gɛlɛ a dɛ dati NWA.

⁵ 'Do nɛ, nɛ a kpɔ sɛ tɔkɔ nɛ, nɛ a nɛ do ma dɛ kɔ tɔa Tande i.

⁶ A hɔ do ma i mɔ, nɛ a fi zu kɔ̃ a 'dɔ tɔkɛ ni, nɛ a kpã ma dɛ dati NWA fala sambo, tɛ si fala wa ia do ku'bu gɔnɔ sanga tɔa ni.

⁷ “A ndɔ sɛ 'bɔ tɔkɛ tɛ 'bɛ̃lɛ̃ zu gbagala, kɛ wa dɔ do fũ yɔmbɛ kɔ tɔa Tande i ni. 'Do nɛ, nɛ a tɛnɛ tala tɔkɛ ni dɛ nyanga gbagala, kɛ wa dɛa ma tɛ kpongbo nu tɔa Tande we dɔ do sa'de hã NWA ni.

⁸ A fo sɛ fala kɛndɔnɔ tɛ sa'de ni vɛ̃: okɛndɔnɔ tɛ kala zã sa'de, do

⁹ owala kole a do kɛndɔnɔ dɛ te'de, do kɛnɔ tɛ ngɔ zã a, do kɛnɔ tɛ gba'bua, kɛ wa fo ma fala nɛ kpo do owala kole sa'de ni.

¹⁰ Mɛ a kpo mɛnɔ kɛ wa fo tɛ sa'de we hã do dɔnggamɔ kɛ ma be dɛa na ni. Nɛ nganga a dɔ sɛ ma dɛ ngɔ gbagala ni.

^11-12 'Do nɛ, nɛ a tombo sɛ na, wa kala tala sa'de, do ndala nɛ, do zu a, do ogbɔgɔlɔ nyanga a, do okala zã a, nɛ wa la do ma dɛ 'do ngbo i, tɛ fala kɛ ma sa li Gale, nɛ wa a do bũ olo we ngɔ gbagala ni. Nɛ wa dã sɛ we dɛ di ni, nɛ wa da tala 'bili sa'de vɛ̃ dɛ li nɛ, nɛ ma bɛlɛ dɛ di ni.

¹³ “Fala kɛ wi a obe Israɛlɛ vɛ̃ hã wa dɛ 'dã mɔ, hã wa gbini mbe kɔ mbulanɔ 'da NWA kpo, kɔ wa dɛ̀ do mbana gɔ, nɛ wa dɛ sɛ na mɛ gɛ:

¹⁴ 'Da fala kɛ wa ĩ fala 'dã mɛ wa dɛa ni, nɛ ma wia na, wa tɛ do wili ngɔmbɔ we dɔnggɔ do NWA, takɔ ma fo ku'da 'dã mɛ zu wa. Wa tɛ sɛ do wili ngɔmbɛ ni dɛ dati tɔa Tande ni.

¹⁵ Okumunɔ 'da obe Israɛlɛ wa e sɛ kɔ̃ wa zu sa'de ni, nɛ mbe kpo kɔ wa ni, a 'bili gɛlɛ sa'de dɛ dati NWA.

¹⁶ Nɛ gã nwa nganga, a kpɔ sɛ mbe tɔkɔ wili ngɔmbɛ ni, nɛ a nɛ do ma dɛ kɔ tɔa Tande i.

¹⁷ Nɛ a fi zu kɔ̃ a 'dɔ tɔkɛ ni, nɛ a kpã ma dɛ dati NWA fala sambo, tɛ si fala wa ia do ku'bu gɔnɔ sanga tɔa ni.

¹⁸ Nɛ a ndɔ sɛ 'bɔ tɔkɛ tɛ 'bɛ̃lɛ̃ zu gbagala, kɛ wa dɔ do fũ yɔmbɛ kɔ tɔa Tande i ni. 'Do nɛ, nɛ a tɛnɛ tala tɔkɛ ni dɛ nyanga gbagala kɛ wa dɛa ma tɛ kpongbo nu tɔa Tande i, we dɔ do sa'denɔ hã NWA ni.

¹⁹ 'Do nɛ, nɛ a fo kɛndɔnɔ vɛ̃ tɛ sa'de ni, nɛ a dɔ ma ngɔ gbagala.

²⁰ Nganga a dɛ sɛ do wili ngɔmbɛ ni kpasaa ɔ nɛ tɛlɛ tɛ kɛ a dɛa do wili ngɔmbɛ, kɛ a hã ma do dɔnggamɛ we 'dã mɛ 'da a wele nɛ ni. Nɛ dɔnggamɛ ni, ma dɛ sɛ na, Gale fo ku'da 'dã mɛ zu obe Israɛlɛ.

²¹ 'Do nɛ, nɛ a tombo sɛ na, wa kala tala 'bili sa'de ni, nɛ wa hɔ do ma dɛ 'do ngbo i. Nɛ wa dɔ ma, ɔ nɛ kɛ wa dɔa do tala 'bili ngɔmbɛ kɛ a gbɛa we dɔnggɔ do Gale, we 'dã mɛ 'da a ni. Ki ni mɛ a dɔnggamɔ we fo ku'da 'dã mɔ zu obe Israɛlɛ.

²² “Fala kɛ wi a gã wi ngɔ obe Israɛlɛ, hã a dɛ 'dã mɔ, hã a gbini mbe kpo kɔ mbulanɔ 'da NWA Gale 'da a, kɔ a dɛ̃ do mbana gɔ, nɛ a dɛ sɛ na mɛ gɛ:

²³ 'Da fala kɛ a ĩ fala 'dã mɛ a dɛa ni, nɛ ma wia na, a tɛ do wili dua kɛ fo kunda tɛ̃ a bina ni, we dɔnggɔ do NWA, takɔ ma fo ku'da 'dã mɛ zu a.

²⁴ A tɛ do wili dua ni, nɛ a e sɛ kɔ̃ a zu a, nɛ a 'bili gɛlɛ a dɛ dati NWA, tɛ fala kɛ wa 'bili do gɛlɛ sa'denɔ we dɔ wa hã NWA ni. Ki ni mɛ a dɔnggamɔ we fo ku'da 'dã mɛnɔ zu wi.

²⁵ Nɛ nganga a fi sɛ zu kɔ a 'dɔ tɔkɔ sa'de, nɛ a ndɔ tɛ 'bɛ̃lɛ̃ zu gbagala kɛ wa dɔ do dɔnggamɛnɔ hã NWA ni. 'Do nɛ, nɛ a tɛnɛ tala tɔkɛ dɛ nyanga gbagala ni.

²⁶ 'Do nɛ, nɛ nganga a dɔ sɛ okɛndɔnɔ vɛ̃ tɛ sa'de ni dɛ ngɔ gbagala, ɔ nɛ kɛ wa dɛ do dɔnggamɔ kɛ ma be dɛa na ni. Nɛ dɔnggamɛ ni, ma dɛ sɛ na, Gale fo ku'da 'dã mɛ zu gã wi ni.

²⁷ “Fala kɛ wi a wi 'da le iko, hã a dɛ 'dã mɔ, hã a gbini mbe kpo kɔ mbulanɔ 'da NWA, kɔ a dɛ̃ do mbana gɔ, nɛ a dɛ sɛ na mɛ gɛ:

²⁸ 'Da fala kɛ a ĩ fala 'dã mɛ a dɛa ni, nɛ ma wia na, a tɛ do naa dua kɛ fo kunda tɛ̃ a bina ni, we dɔnggɔ do NWA, takɔ ma fo ku'da 'dã mɛ zu a.

²⁹ A tɛ do naa dua ni, nɛ a e sɛ kɔ̃ a zu a, nɛ a 'bili gɛlɛ a dɛ dati NWA, tɛ fala kɛ wa 'bili do gɛlɛ sa'denɔ we dɔ wa hã NWA ni.

³⁰ Nɛ nganga a fi sɛ zu kɔ̃ a 'dɔ tɔkɔ sa'de, nɛ a ndɔ tɛ 'bɛ̃lɛ̃ zu gbagala dɔ do dɔnggamɛnɔ hã NWA. 'Do nɛ, nɛ a tɛnɛ sɛ tala tɔkɛ dɛ nyanga gbagala ni.

³¹ 'Do nɛ, nɛ a fo sɛ okɛndɔnɔ tɛ sa'de ni, ɔ nɛ kɛ wa fo do okɛndɔnɔ tɛ sa'de dɔnggamɔ kɛ ma be dɛa na ni. Nɛ nganga a dɔ sɛ ma ngɔ gbagala, takɔ zɛ̃ nɛ ma unu NWA, nɛ ma de tɛ̃ a. Dɔnggamɛ ni, ma dɛ sɛ na, Gale fo ku'da 'dã mɛ zu wi ni.

³² “Fala kɛ wi dɛ 'dã mɛ kɔ̃ we ba bata we dɔnggɔ do NWA, takɔ a fo ku'da 'dã mɛ zu a, nɛ ma wia na, ma ɔ do naa nɛ, kɛ fo kunda tɛ̃ a bina ni.

³³ A tɛ do naa bata ni, nɛ a e sɛ kɔ a zu a, nɛ a 'bili gɛlɛ a dɛ dati NWA, tɛ fala wa 'bili do gɛlɛ sa'denɔ we dɔ wa hã NWA ni.

³⁴ Nɛ nganga a fi sɛ zu kɔ̃ a 'dɔ tɔkɔ sa'de ni, nɛ a ndɔ tɛ 'bɛ̃lɛ̃ zu gbagala dɔ do dɔnggamɛnɔ hã mi NWA. 'Do nɛ, nɛ a tɛnɛ tala tɔkɛ dɛ nyanga gbagala ni.

³⁵ 'Do nɛ, nɛ a fo sɛ okɛndɔnɔ te sa'de ni, ɔ nɛ kɛ wa fo do okɛndɔnɔ tɛ bata kɛ wa hã do dɔnggamɔ kɛ ma be dɛa na ni. Nɛ nganga a dɔ sɛ ma mba do gele dɔnggamɛ wa dɔ hã NWA ni. Nɛ dɔnggamɛ ni, ma dɛ sɛ na, Gale fo ku'da 'dã mɛ zu wi ni.