Levitɛnɔ 3 - WE NU GALE 1995

Mbula ngɔ dɔnggamɔ kɛ ma be dɛa na

¹ “Fala kɛ wele kɔ̃ we gbɛ ngɔmbɔ do dɔnggamɔ kɛ ma be dɛa na, nɛ ma wia na, ma ɔ do wili ngɔmbɔ tabi naa ngɔmbɔ kɛ fo kunda tɛ̃ a bina ni.

² Nɛ wi ni a e sɛ kɔ̃ a dɛ zu sa'de ni, nɛ a 'bili gɛlɛ a dɛ nu tɔa Tande kpa ngba wi do NWA. Nɛ onganganɔ, kɛ wa a obe zã Aroni ni, wa kpɔ sɛ tɔkɔ nɛ, nɛ wa kpã ma tɛ 'bolo zã gbagala.

³ Nɛ mɛnɔ tɛ sa'de kɛ wa hã sɛ ma hã NWA ni, mɛ a okɛndɔnɔ vɛ̃ tɛ kala zã sa'de ni,

⁴ owala kole a do okɛndɔnɔ dɛ te'de, do kɛnɔ tɛ ngɔ zã a, do kɛnɔ tɛ gba'bua, kɛ wa fo ma fala nɛ kpo do owala kole sa'de ni.

⁵ Nɛ onganganɔ wa dɔ sɛ mɛnɔ ni vɛ̃ dɛ ngɔ odɔnggamɛnɔ kɛ ma li we ngɔ gbagala ni. Nɛ zɛ̃ dɔnggamɛ ni ma unu sɛ NWA, nɛ ma de tɛ̃ a.

⁶ “Fala kɛ wele kɔ̃ we hã bata, tabi dua do dɔnggamɔ kɛ ma be dɛa na, nɛ ma ɔ sɛ do wili nɛ, tabi naa nɛ, nɛ nde a tɛ ɔ̃ do kunda tɛ̃ a gɔ.

⁷ Fala kɛ ma ɔ do bata, nɛ wi ni nɛ́ do a dɛ nu tɔa Tande i,

⁸ nɛ a e kɔ̃ a zu a, nɛ a 'bili gɛlɛ a dɛ dati tɔa Tande ni. Nɛ onganganɔ wa kpɔ sɛ tɔkɔ nɛ, nɛ wa kpã tɛ 'bolo zã gbagala.

⁹ Nɛ mɛnɔ tɛ sa'de ni, kɛ wa hã sɛ ma hã NWA ni, mɛ a do sa'de kɛ wa 'bili ma dɔ̃ɔ do nu gbãlã 'do a ni, okɛndɔnɔ vɛ̃ tɛ kala zã a ni,

¹⁰ owala kole a do kɛndɔnɔ dɛ te'de, do kɛnɔ tɛ ngɔ zã a, do kɛrɔ tɛ gba'bua, kɛ wa fo ma fala nɛ kpo do owala kole sa'de ni.

¹¹ Nɛ nganga a dɔ sɛ mɛnɔ ni vɛ̃ dɛ li we ngɔ gbagala ni. Mɛ sɛ a nyɔngɔmɔ kɛ wa dɔ hã NWA.

¹² “Fala kɛ wele kɔ̃ we gbɛ dua we dɔnggɔ do NWA, nɛ ma wia na, a nɛ do a dɛ nu tɔa Tande i.

¹³ Nɛ wi ni e kɔ̃ a zu sa'de, nɛ a 'bili gɛlɛ a dɛ nu tɔa Tande ni. Nɛ onganganɔ wa kpɔ sɛ tɔkɔ nɛ, nɛ wa kpã ma te 'bolo zã gbagala.

¹⁴ Nɛ mɛnɔ tɛ sa'de ni, kɛ wa hã sɛ ma hã NWA ni, mɛ a okɛndɔnɔ vɛ̃ tɛ kala zã sa'de ni,

¹⁵ owala kole a do okɛndɔnɔ dɛ te'de, do kɛnɔ tɛ ngɔ zã a, do kɛnɔ te gba'bua, kɛ wa fo ma fala nɛ kpo do owala kole sa'de ni.

¹⁶ Nɛ nganga a dɔ sɛ mɛnɔ ni vɛ̃ dɛ ngɔ gbagala. Mɛ sɛ a nyɔngɔmɔ kɛ wa dɔ hã NWA, he zɛ̃ nɛ unu a, nɛ ma de tɛ̃ a. Wele kɛndɔnɔ vɛ̃ a mɔ NWA.

¹⁷ Ma kɛ ma wè na, be Israɛlɛ kpo nyɔngɔ kɛndɔ, tabi tɔkɔ gɔ. Obe Israɛlɛ wa dɛ sɛ mbula gɛ fai tɛ falanɔ vɛ̃ kɛ wa nɛ dungu te'de ni.”