Levitɛnɔ 27 - WE NU GALE 1995

Mbili si do olo mbulu kɛ wele kpua

¹ NWA tɔ́a hã Mɔizɛ na,

² a e mbulanɔ gɛ hã obe Israɛlɛ na: “Fala kɛ wele kpo mbulu we hã wele hã NWA, nɛ wa wia tɛ we mbili fɛ̃a mɔ bolo olo li a, nɛ wi ni futa mbili ni.

^3-7 Nɛ we futa mbili ni, nɛ wa ba sɛ ma do 'da mɛ kɛ wa we do mbili kɔ tɔa Tande 'da NWA ni. Mbili kɛ wa we sɛ ma ni ma kɛ: A ɔ do wi wili kɛ sabɛlɛ 'da a sanga 'bu nɛ bɔa, we hɔ 'bu nɛ gazɛlɛ, nɛ wa futa sɛ mbili 'bu nɛ mɔlɔ. A ɔ do wuko, nɛ wa futa sɛ mbili 'bu nɛ talɛ. A ɔ do bulu be kɛ sabɛlɛ 'da a sanga mɔlɔ, we hɔ 'bu nɛ bɔa, nɛ wa futa sɛ mbili 'bu nɛ bɔa. A ɔ do be zɔnga, nɛ wa futa sɛ mbili 'bu. A ɔ do bulu be, kɛ a dɛ ti sabɛlɛ mɔlɔ, nɛ Wa futa sɛ mbili mɔlɔ. A ɔ do boko be, nɛ wa futa sɛ mbili talɛ. A ɔ do wi wili kɛ sabɛlɛ 'da a la ngɔ 'bu nɛ gazɛlɛ, nɛ wa futa sɛ mbili 'bu ngɔ nɛ mɔlɔ. A ɔ do wuko kɛ sabɛlɛ 'da a la ngɔ 'bu nɛ gazɛlɛ, nɛ wa futa sɛ mbili 'bu.

⁸ “Wele kɛ a a wi sã, hã a zɔlɔ mbili wa wia ni, nɛ a nɛ sɛ do wi kɛ a hã a hã NWA ni 'da nganga i. Nɛ nganga a we sɛ gole mbili do tɛlɛ tɛ kɛ na, wi ni a wia do futa ma ni.

⁹ “Fala kɛ wele kpo mbulu we hã sa'de hã NWA, kɔ ma ɔ do sa'de kɛ a kɔ wanɔ wa wia do dɔnggamɔ ni, nɛ ma wia na, wa ba sa'de ni na, a santo.

¹⁰ Nɛ wi kɛ a kpua mbuli ni, a wè tɛ kpolo sa'de ni do mbé gele dia sa'de, tabi 'dã nɛ gɔ. Nɛ gɛnɛ kɔ a kpolo a, nɛ sa'denɔ ni bɔa nɛ, wa sɛ santo.

¹¹ Fala kɛ wele kpo mbulu we hã sa'de hã NWA, nɛ nde mɛ a sa'de ndi kɛ a wè na, wa hã a do dɔnggamɔ hã NWA gɔ, nɛ wi ni, a nɛ sɛ do sa'de ni 'da nganga i.

¹² Nɛ nganga a zɔ sɛ sa'de ni, nɛ a we gole kɛ a lingga na, ma wia do 'da sa'de ni. Nɛ wa kpóló sɛ gole kɛ nganga wia ma ni gɔ.

¹³ Fala kɛ wele sa'de kɔ̃ we gɔnɔ zu sa'de ni, nɛ a futa sɛ gole kɛ nganga wia ma ni, nɛ a e kpo mbe mɔlɔ gole sa'de ni ngɔ nɛ.

¹⁴ “Fala kɛ wele e tɔa 'da a hã NWA, nɛ nganga a we sɛ gole nɛ do 'da dia tɔa, tabi do 'da 'dã tɔa. Nɛ wa oso sɛ ɔ nɛ kɛ nganga wia do gole nɛ ni.

¹⁵ Fala kɛ wele tɔa ni kɔ we gɔnɔ zu tɔa 'da a, nɛ a oso sɛ gole kɛ nganga wia ma ni, nɛ a e kpo mbe mɔlɔ gole tɔa ni ngɔ nɛ.

¹⁶ “Fala kɛ wele e mbe sanga fɔnɔ 'da a hã NWA, nɛ nganga a we sɛ gole fɔɛ do 'da dɔa gbãlã kpalɛ wi ni mi li fɔɛ ni. A hã sɛ mbili 'bu nɛ mɔlɔ we kilo ɔrzɛ kama talɛ.

¹⁷ Fala kɛ a e fɔɛ hã NWA do kɔ sabɛlɛ Yubile, kɔ a kɔ we gɔnɔ zu nɛ, nɛ a futa sɛ ma vɛ̃ do mbili.

¹⁸ Nɛ nde fala kɛ a e fɔɛ hã NWA do 'do sabɛlɛ Yubile, nɛ nganga a we sɛ gole nɛ dɛ nù, we do 'da sabɛlɛnɔ ma 'bana we hɔ tɛ sabɛlɛ Yubile kɛ 'do gɛ ni.

¹⁹ Fala kɛ wele fɔɛ kɔ̃ we gɔnɔ zu nɛ, nɛ a oso sɛ gole kɛ nganga wia ma ni, nɛ a e kpo mbe mɔlɔ gole fɔɛ ni ngɔ nɛ.

²⁰ Fala kɛ a gɔ̀nɔ̀ zu fɔɛ 'da a gɔ, kɔ a be gole nɛ hã mbé gele wele, nɛ 'do nɛ, a wé sɛ 'bɔ we gɔnɔ zu nɛ gɔ.

²¹ Nɛ 'do sabɛlɛ Yubile, nɛ wele fɔɛ ni sɛ a mɔ́ NWA fai. Nɛ wa hã sɛ fɔɛ ni hã onganganɔ do mɔ́ wa.

²² “Fala kɛ wele e fɔ hã NWA, nɛ nde mɛ a fɔ kɛ a oso ma usa,

²³ nɛ nganga a we sɛ gole nɛ do 'da sabɛlɛnɔ ma 'bana we hɔ tɛ sabɛlɛ Yubile ni. Nɛ wele kɛ a hã fɔɛ ni, a futa sɛ gole ni do kpo soe ni. Nɛ wele mbili sɛ a mɔ́ NWA.

²⁴ Nɛ 'da fala ma hɔ tɛ sabɛlɛ Yubile, nɛ wa gese sɛ fɔɛ ni hã kuti wele nɛ zi dati ni, tabi hã obe zã a.

²⁵ “Wa we sɛ golenɔ vɛ̃ do 'da mɛ kɛ wa we do mbili kɔ tɔa Tande 'da NWA ni.

Mbula ngɔ ogele dɔnggamɛnɔ

²⁶ “Kuti be sa'de kɛ wa kua a, ɔ nɛ be ngɔmbɔ, tabi be dua, tabi be bata, wele nɛ fai a mɔ́ NWA. Na mɛ ni, wele kpo wè tɛ hã kuti sa'denɔ ni do dɔnggamɔ hã NWA do kɔ sila a iko gɔ.

²⁷ Kɔ ma ɔ do kuti be sa'de kɛ mɛ a sa'de ndi, nɛ wele a wia we gɔnɔ zu a. A oso sɛ do gole kɛ nganga wia ma ni, nɛ a e kpo mbe mɔlɔ gole sa'de ni ngɔ nɛ. Nɛ nde fala kɛ a gɔ́nɔ́ zu sa'de ni gɔ, nɛ nganga a be sɛ gole a hã gele wele do 'da gole a wia zi ni.

²⁸ “Fala kɛ wele kpo sanga nɛ, a 'dɔlɔ mɔ mɔ́ a hã NWA na, ma ɔ do mɔ́ NWA fai, nɛ wa wè tɛ be 'bɔ gole mɛ ni, tabi we gɔnɔ zu ma gɔ. Mbula gɛ, ma we dɔnggamɔ vɛ̃, tabi wele, tabi sa'de, tabi fɔ. Mba gɔ, mɛ ni, ma hɔa santo, nɛ wele nɛ a mɔ́ NWA fai.

²⁹ Gɛnɛ kɔ ma ɔ do wele, nɛ wa wè tɛ gɔnɔ zu a gɔ. Nɛ ma wia na, wa gbɛ a.

³⁰ “Fala kɛ wa kala okpalɛ li fɔnɔ, tabi wa 'bi owala tenɔ nde, nɛ wa gɔnɔ sanga nɛ 'bu, nɛ wa hã kpo mbe 'bu hã NWA.

³¹ Nɛ wele kɛ a kɔ̃ we gɔnɔ zu kpo mbe 'bui ni, nɛ a oso sɛ gole kɛ nganga wia ma ni, nɛ a e kpo mbe mɔlɔ gole mɛ ni ngɔ nɛ.

³² Ma ɔ do ngɔmbɔ 'bu, tabi obata, tabi odua 'bu, nɛ kpo sanga wa 'bu ni sɛ a mɔ́ nwa Mɔ tɔlɔ sɛ nadalamɛnɔ 'da mɔ, nɛ mɔ e wele kɛ 'bu do tɛ̃ ɛ, we kɛ wele a mɔ́ NWA.

³³ Wele sa'denɔ wè tɛ saka sanga sa'denɔ na, a ba dia nɛ, tabi 'dã nɛ hã NWA gɔ. Nɛ a wè 'bɔ tɛ kpolo sa'de do ngbɛ ɛ gɔ. A dɛ na mɛ ni, nɛ sa'denɔ do bɔa nɛ sɛ a mɔ́ NWA, nɛ wa wè tɛ gɔnɔ 'bɔ zu wa do bɔa nɛ gɔ.”

³⁴ Ki ni a mbulanɔ kɛ NWA hã ma hã Mɔizɛ tɛ ngɔ kala Sinai i, we duzu obe Israɛlɛ gɛ a ni.