Levitɛnɔ 26 - WE NU GALE 1995

NWA wele nu a tɛ owi dɛ olo nu a

¹ NWA tɔ̃a na: “Nɛ tɛ dɛ̃ okpikimanɔ gɔ, nɛ nɛ tɛ sɛ̀ ta, tabi zĩ ta dɛ ngɔ, hã nɛ dɔnggɔ ma olo li mi gɔ. Mba gɔ, mi a NWA Gale 'da nɛ.

² Nɛ lénggé do kɔ̃ tũ ɔmɔ tɛ wi, nɛ nɛ dɛ kili tɔa dɔnggɔ do mi. Mi a NWA!

³ “Fala kɛ nɛ zele mi, hã nɛ dɛ mbulanɔ 'da mi,

⁴ nɛ mi tombo sɛ kolo hã nɛ, nɛ ma tɛ sɛ do li zɔlɔ nɛ, nɛ nùi ma ko sɛ okpalɛ, nɛ tenɔ ma hã sɛ owala nɛ.

⁵ Na mɛ ni, okpalɛ ma dɛlɛ sɛ li fɔnɔ 'da nɛ wena. Nɛ 'da fala kɛ nɛ 'bana sɛ kala kpalɛ li fɔnɔ ni, nɛ nde mbé wala tenɔ ma fila zu tenɔ ia. Kɔ fala kɛ nɛ 'bana sɛ tɛ 'bi wala tenɔ ni, nɛ nde mbé kpalɛnɔ ma fɛngɛ li fɔnɔ ia. Nɛ zɔ́lɔ́ sɛ nyɔngɔmɔ fala kpo gɔ, nɛ nɛ dungu sɛ do dia nɛ tɛ ngɔ nùi 'da nɛ, nɛ mɔ kpo dɛ́ sɛ nɛ gɔ.

⁶ “Mi dɛ sɛ na, dungu fio ɔ ngɔ nùi, nɛ nɛ ɔ yala do dia nɛ, nɛ mɔ kpo yɛ́kɛ́ sɛ nɛ gɔ. Mi kumu sɛ o'dã sa'denɔ ngɔ nùi 'da nɛ do'do. Nɛ wele tɛ́ sɛ we bi bolo do nɛ gɔ.

⁷ Nɛ ndaka sɛ owi sɛnɛ nɛ, nɛ wa te sɛ li bolo.

⁸ Fala kɛ nɛ ɔ Owele mɔlɔ, nɛ nɛ ndaka sɛ owi sɛnɛ nɛ kama. Hã nɛ ɔ Owele kama, nɛ nɛ ndaka sɛ owi sɛnɛ nɛ koto 'bu.

⁹ Mi be sɛ dia zã 'da mi hã nɛ, nɛ nɛ ko sɛ obe dɛlɛ wena. Nɛ mi 'bana sɛ dɛ olo gba tɔkɔ kɛ mi gba zi do nɛ ni.

¹⁰ Kpalɛ li fɔnɔ 'da nɛ ma dɛlɛ sɛ wena, nɛ nɛ nyɔngɔ sɛ ma kɔ sabɛlɛ kpo vɛ̃. Nɛ 'da fala ma hɔ li zɔlɔ kala mbé kpalɛnɔ, nɛ nɛ fo sɛ tala kpalɛnɔ kɔ yangganɔ 'da nɛ dɛ nù we a mbé kpalɛnɔ.

¹¹ Mi tɛ sɛ we ɔ dɛ sanga nɛ. Nɛ mi síkí sɛ 'do mi hã nɛ gɔ.

¹² Mi yɛnggɛ sɛ do nɛ fai, nɛ mi sɛ a Gale 'da nɛ, nɛ nɛ sɛ a owinɔ 'da mi.

¹³ Mi a NWA Gale 'da nɛ, kɛ mi fua zi nɛ ngɔ nù Ezipeto dɛ nza na, nɛ tɛ dùngù 'bɔ ongbá gɔ ni. Nɛ yolo do ngba soe mi fua zi dĩ tole ngbá zu 'baka nɛ ni, nɛ nɛ yɛnggɛ do wali.”

NWA hã etumbu hã owi bɛ̃ we nu a

¹⁴ NWA tɔ̃a na: “Fala kɛ nɛ dɛ̃ mbulanɔ 'da mi gɔ, nɛ mi hã sɛ etumbu hã nɛ.

¹⁵ Fala kɛ nɛ bɛ̃ we dɛ mbulanɔ 'da mi, hã nɛ 'danga gba tɔkɛ mi gba zi do nɛ ni,

¹⁶ nɛ mi hã sɛ ngamɔ hã nɛ la li. Mi fi sɛ zɛlɛ kɛ ma é gɔ ni tɛ nɛ. Mi dɛ sɛ na, nga mbɔlɔ ma ba nɛ, nɛ ma 'danga gbali nɛ, nɛ ma yɔndɔ nɛ do'do. Nɛ nɛ mi sɛ fɔnɔ 'da nɛ, nɛ nde nɛ kpá sɛ mɔ olo nɛ gɔ Owi sɛnɛ nɛ wa kala sɛ Okpalɛnɔ 'da nɛ.

¹⁷ Mi e sɛ li mi ngɔ nɛ, nɛ nɛ te sɛ li bolo, nɛ owinɔ kɛ wa sɛnɛ nɛ ni, wa dungu sɛ ngɔ nɛ. Nɛ kili ma ba sɛ nɛ wena, do tɛlɛ tɛ kɛ na, nɛ yu iko, nɛ nde wele ndàkà 'do nɛ gɔ.

¹⁸ “Kɔ olo kɛ mi hã etumbunɔ ni vɛ̃ hã nɛ, hã nɛ 'bana tɛ bɛ̃ we nu mi fai, nɛ mi gã sɛ 'da etumbu olo 'dã mɛnɔ 'da nɛ fala sambo.

¹⁹ Mi dɛ sɛ na, nɛ hɔ ndɔti gã zui 'da nɛ. Mi dɛ sɛ na, li nza gbogbo zu nɛ i, ma nganda ɔ nɛ tũ mɔ bolo ni. Kolo tɛ́ sɛ gɔ, nɛ ngangga ma yolo sɛ. Nɛ nùi 'da nɛ ma nganda sɛ ɔ nɛ kpangba ta ni.

²⁰ Nɛ dɛ sɛ to nganda wena, nɛ ngawi 'da nɛ ma e sɛ. Nɛ nde nɛ kpá sɛ mɔ olo nɛ gɔ. Nùi ma kó sɛ kpalɛ gɔ, nɛ tenɔ ma kó sɛ owala nɛ gɔ.

²¹ “Kɔ fala kɛ nɛ 'bana tɛ mɛ tɛ dɛ nga zu hã mi, nɛ nɛ bɛ̃ we nu mi, nɛ mi gã sɛ 'bɔ 'da etumbu olo 'dã mɛ 'da nɛ fala sambo.

²² Mi tombo sɛ osa'de zamɔ na, wa tɛ hã wa gbɛ obenɔ 'da nɛ, nɛ wa kumu onadalamɛnɔ 'da nɛ. Nɛ nɛ 'báná sɛ dɛlɛ gɔ, nɛ Owele wa lá sɛ 'bɔ li wala 'da nɛ gɔ.

²³ “Kɔ fala kɛ 'do etumbunɔ ni vɛ̃, hã nɛ 'bana tɛ mɛ tɛ bɛ̃ olo nu mi, hã nɛ là fala dɛ nga zu hã mi gɔ,

²⁴ nɛ mi tɛ mɛ 'bɔ, mi dɛ sɛ nga zu hã nɛ, nɛ mi gã sɛ 'bɔ 'da etumbu olo 'dã mɛnɔ 'da nɛ fala sambo.

²⁵ Mi dɛ sɛ na, bolo bi ngɔ nùi 'da nɛ, we kɛ nɛ 'danga gba tɔkɛ kɛ mi gba zi do nɛ ni. Nɛ yu sɛ, nɛ nɛ usu sɛ tɛ nɛ dɛ kɔ lenɔ 'da nɛ, nɛ nde mi tombo sɛ o'dã zɛlɛ, nɛ ma te sanga nɛ. Nɛ nɛ te sɛ dɛ kɔ̃ owi sɛnɛ nɛ.

²⁶ Mi dɛ sɛ na, nɛ zɔlɔ nyɔngɔmɔ. Owuko 'bu, wa zanga sɛ mapa, nɛ nde mapa ni sɛ a bi sĩ, nɛ wa dɔ sɛ ma vɛ̃ dɛ kɔ furu kpo iko. Nɛ nɛ nyɔngɔ sɛ ma, nɛ nde zã nɛ ma hɛ̃́ sɛ gɔ.

²⁷ “Hã 'do mɛnɔ ni vɛ̃, kɔ nɛ 'bana tɛ bɛ̃ we nu mi, hã nɛ là fala dɛ nga zu hã mi gɔ,

²⁸ nɛ zã mi ma nɔ̃lɔ̃ sɛ nganda wena, nɛ mi dɛ sɛ tɛ mɛ 'bɔ nga zu hã nɛ, nɛ mi gã sɛ 'bɔ 'da etumbu olo 'dã mɛnɔ 'da nɛ fala sambo.

²⁹ Nɛ wɔ ma ala sɛ nɛ, nɛ nɛ nyɔngɔ sɛ sa'de tɛ obenɔ 'da nɛ ngboo ni.

³⁰ Mi 'danga sɛ fala nɛ 'dafa we dɔnggɔ do ogele galenɔ 'da nɛ, nɛ mi gbini sanga gbagalanɔ nɛ dɔ do fũ yɔmbɛ ni. Nɛ mi da sɛ wɔlɔ nɛ dɛ ngɔ gbini sɛa tenɔ 'da nɛ ni. Nɛ mi da sɛ sila mi ngɔ nɛ do'do.

³¹ Mi 'danga sɛ olenɔ 'da nɛ, nɛ ma hɔ sɛ bili tɔa, nɛ mi gbini sɛ tɔa sambala 'da nɛ, nɛ wele hɔ́ sɛ 'bɔ tɛ nɛ gɔ. Nɛ mi kɔ sɛ 'bɔ gɛnɛ dɔnggamɛnɔ 'da nɛ gɔ.

³² Mi 'danga sɛ nùi 'da nɛ vɛ̃, nɛ owi sɛnɛ nɛ kɛ wa tɛ sɛ we ɔ di ni, wa zɔ sɛ ma, nɛ ma kolo wa.

³³ Mi dɛ sɛ na, bolo bi ngɔ nùi 'da nɛ, nɛ mi pɛsɛ sɛ nɛ dɛ ngɔ gele nùnɔ. Nɛ nùi 'da nɛ, ma kifi sɛ li gba zɔ́. Nɛ lenɔ 'da nɛ, ma dɛ sɛ bili tɔa.

^34-35 “Nɛ kɔ sabɛlɛnɔ vɛ̃ kɛ nɛ ɔ sɛ kɔlɔ 'duli ngɔ gele nùnɔ ni, fɔnɔ 'da nɛ ma dɛ́ sɛ 'bɔ to gɔ. Ma ɔ sɛ ni olo li kɛ na, nɛ la sɔ ma iko 'do sabɛlɛ sambo sambo, ɔ nɛ kɛ mi ba do nu mi hã nɛ, nɛ nɛ bɛ̃a ni. Na mɛ ni, fɔnɔ 'da nɛ ma kulu sɛ do 'da fala nɛ a kɔlɔ 'duli i ni.

³⁶ “Nɛ mi dɛ sɛ na, sila owinɔ sanga nɛ kɛ wa 'bana sɛ nza tɛ kɔlɔ 'duli i ni, ma ɔ ngɔ fai. Wa zele sɛ giti nwá te kɛ bũi yaka ma ni iko, nɛ wa la do yu. Wa yu sɛ, ɔ nɛ kɛ winɔ wa yu do bolo ni. Nɛ gɛnɛ kɔ wi sɛnɛ wa kpo kɔ̀lɔ̀ do wa gɔ, nɛ wa te sɛ nù.

³⁷ Wa yu sɛ, nɛ wa lo li wa do ngba wa, ɔ nɛ kɛ wa yu dati wi sɛnɛ wa ni.

³⁸ Nɛ wa fe sɛ tɛ kɔlɔ 'duli. Owinɔ ngɔ gele nùnɔ wa kumu sɛ wa.

³⁹ Fala kɛ ombe sanga nɛ wa 'bana nza tɛ ngɔ nùnɔ 'da owi sɛnɛ nɛ i, nɛ wa kumu sɛ we 'dã mɛnɔ 'da wa wele nɛ, do kɛ 'da oyaa wa.

NWA a lengge sɛ do gba tɔkɛ 'da a

⁴⁰ “Nɛ do ndɔti nɛ vɛ̃, nɛ tala wanɔ wa 'bana nza ni, wa gbala sɛ 'dã mɛnɔ 'da wa, do kɛ 'da oyaa wa, kɛ wa bɛ̃a zi we nu mi, nɛ wa dɛa nga zu hã mi ni.

⁴¹ Wa ĩ sɛ na, mi bɛ̃a gɛnɛ wa, nɛ mi tombo wa kɔlɔ 'duli dɛ ngɔ nùi 'da owi sɛnɛ wa. Wa ba sɛ tɛ wa dɛ nù, nɛ wa kɔ̃ sɛ gɛnɛ etumbu olo 'dã mɛnɔ 'da wa.

⁴² Na mɛ ni, nɛ mi lengge sɛ do gba tɔkɛ lɛ gba zi do oyaa wa, Yakɔbɔ, Izaka do Abrahama ni. Nɛ mi lengge sɛ 'bɔ do mbulu kɛ mi kpua zi we hã nùi ni hã owinɔ 'da mi ni.

⁴³ Nɛ nde dati vɛ̃, ma wia na, owinɔ 'da mi wa fo tɛ wa ngɔ nùi ni, sɛ a ma ɔa iko de. Do 'da fala ni, nɛ owinɔ 'da mi, wa kpa sɛ etumbu olo kɛ wa bɛ̃a mbulanɔ 'da mi ni.

⁴⁴ Ĩ na, 'da fala wa 'bana sɛ dɛ ngɔ nùi 'da owi sɛnɛ wa i ni, nɛ nde mi bɛ̃ sɛ gɛnɛ wa vɛ̃ gɔ. Mi síkí sɛ 'do mi hã wa gɔ, nɛ mi kúmú sɛ 'bɔ wa gɔ. We duzu kɛ, mi dɛ na mɛ ni, nɛ mi 'danga sɛ gba tɔkɛ 'da mi do wa. Mi a NWA Gale 'da wa.

⁴⁵ Mi lengge sɛ do gba tɔkɛ lɛ gba zi do oyaa wa, do 'da fala mi fua zi wa ngɔ nù Ezipeto na, mi ɔ Gale 'da wa ni. Mi fua zi wa dɛ li ogele nu kɔnggɔnɔ, nɛ wa zɔa zi ngawi 'da mi. Mi a NWA!”

⁴⁶ Owenɔ gɛ vɛ̃ mɛ a mbulanɔ kɛ NWA hã ma hã obe Israɛlɛ ni. A hã ma hã wa tɛ ngɔ kala Sinai do wala 'da Mɔizɛ.