Levitɛnɔ 25 - WE NU GALE 1995

Sabɛlɛ e fɔnɔ iko na ma sulu

¹ Yolo do ngɔ kala Sinai i, nɛ NWA tɔ̃ hã Mɔizɛ na,

² a e mbulanɔ gɛ hã obe Israɛlɛ na: “Fala kɛ nɛ le sɛ ngɔ nùi mi nɛ hã ma hã nɛ ni, nɛ nɛ wa sɛ fɔnɔ 'da nɛ 'do sabɛlɛ gazɛlɛ. Nɛ sambo sabɛlɛ nɛ wá sɛ ma gɔ, nɛ la sɛ nùi na mɛ ni we dɔnggɔ do mi.

³ Nɛ wia sɛ we mi fɔnɔ 'da nɛ 'do sabɛlɛ gazɛlɛ, nɛ nɛ 'dafa ti te vinɔnɔ 'da nɛ, nɛ nɛ kala owala nɛ.

⁴ Kɔ ma hɔ tɛ sabɛlɛ kɛ sambo, nɛ nùi ni ma dɛ́ sɛ to kpo gɔ. Nɛ nɛ e sɛ sabɛlɛ ni hã mi, takɔ nɛ dɔnggɔ do mi. Do kɔ sabɛlɛ ni, nɛ mí sɛ mɔ gɔ, nɛ nɛ 'dáfá sɛ ti te vinɔnɔ 'da nɛ gɔ.

⁵ Nɛ gɛnɛ kɔ kpalɛnɔ kɛ ma hɔa iko olo sabɛlɛ kɛ zi ni, nɛ kálá sɛ ma gɔ. Nɛ nɛ 'bí sɛ 'bɔ wala te vinɔnɔ kɛ ma fila ngɔ tenɔ kɛ nɛ 'dàfà ti nɛ gɔɛ ni gɔ. Mɛ a sabɛlɛ kɛ nùi ma dɛ́ sɛ to kpo gɔ.

⁶ Nɛ nde nɛ wia sɛ we nyɔngɔ kpalɛnɔ kɛ ma hɔ kɔ fɔnɔ 'da nɛ iko ni, fala nɛ kpo do owi dɛa tonɔ 'da nɛ, wi wilinɔ do wukonɔ, do ogɛnɛnɔ kɛ wa ɔ kɔ nɛ ni.

⁷ Nɛ onadalamɛnɔ 'da nɛ, do osa'denɔ kɛ wa ɔ zamɔ i ni, wa wia sɛ 'bɔ we nyɔngɔ ma.

Sabɛlɛ da kɔ̃ wi tɛ ngbá

⁸ “Nɛ tɔlɔ sɛ sabɛlɛ sambo fala sambo, nɛ ma hɔ sabɛlɛ 'bu nɛ nalɛ ngɔ nɛ kusi.

⁹ Kɔ ma hɔ tɛ zɛkɛ 'da sambo, kɔ nɛ 'bu, kɔ kpo sabɛlɛ ni, nɛ mɛ sɛ a gã ngba soe fo ku'da 'dã mɛnɔ zu winɔ. Nɛ nɛ dɛ sɛ na, wa dama mɔtũlũ ngɔ nùi vɛ̃.

¹⁰ Na mɛ ni, sabɛlɛ kɛ 'bu nɛ mɔlɔ, ma sɛ santo li nɛ. Nɛ nɛ da sɛ kɔ nɛ tɛ ongbánɔ ngɔ nùi 'da nɛ vɛ̃, nɛ nɛ gese sɛ 'bɔ omɛnɔ kɛ nɛ kala do tikɔɛ ni hã Owele nɛ. Nɛ nɛ sa sɛ li sabɛlɛ ni na: ‘Yubile.’ Nɛ kɔ sabɛlɛ ni, nɛ wa gese sɛ nùnɔ hã Owele nɛ, nɛ wa da sɛ kɔ̃ wa tɛ wanɔ wa bia gole tɛ wa do ngbá ni, nɛ wa si dɛ kɔ nu fɛlɛ wa.

¹¹ Na mɛ ni, 'do sabɛlɛ 'bu nɛ mɔlɔ mɔlɔ, mɛ sɛ a Yubile we duzu nɛ. Nɛ mí sɛ fɔnɔ 'da nɛ gɔ, nɛ nɛ kálá sɛ okpalɛ li nɛ, kɛ ma hɔa iko ni gɔ. Nɛ 'dáfá sɛ ti te vinɔnɔ 'da nɛ gɔ, nɛ nɛ 'bi sɛ 'bɔ wala te vinɔnɔ kɛ ma fila ngɔ nɛ ni gɔ.

¹² Mba gɔ, mɛ a sabɛlɛ Yubile, nɛ nɛ ba sɛ ma na, mɛ a sabɛlɛ kɛ ma santo. Nɛ nde nɛ wia sɛ we nyɔngɔ kpalɛnɔ kɛ ma hɔa kɔ fɔnɔ 'da nɛ iko ni.

¹³ “Do kɔ sabɛlɛ Yubile ni, nɛ gese sɛ nùnɔ hã Owele nɛ.

¹⁴ Na mɛ ni, fala kɛ nɛ be gole nù hã nya nɛ be Israɛlɛ, nɛ nɛ tɛ dɛ̀ ngba nɛ 'danga gɔ.

¹⁵ Fala kɛ mɔ we gole nɛ, nɛ ma wia na, mɔ tɔlɔ sabɛlɛnɔ kɛ ma we sɛ na, wa kala kpalɛnɔ dati kɛ na sabɛlɛ Yubile ma hɔ ni.

¹⁶ Fala kɛ sabɛlɛnɔ ma 'bana wena, nɛ gole nɛ ma kũ sɛ dɛ ngɔ. Fala kɛ sabɛlɛnɔ ma 'bànà dɛlɛ gɔ, nɛ gole nɛ sɛ tɛ mɛ 'bɔ dɛ nù. Mba gɔ, mɛ wa oso tabi wa be gole nɛ ni, mɛ a kpalɛnɔ wa wia sɛ we kpa ma tɛ nùi ni.

¹⁷ Nɛ tɛ dɛ̀ mɔ kpo kɛ ma 'danga tɛ nya nɛ be Israɛlɛ ni gɔ. Mi a NWA Gale 'da nɛ, nɛ ma wia na, nɛ dɛ kili mi.

¹⁸ “Nɛ dɛ́ mbulanɔ 'da mi vɛ̃, nɛ 'dã mɔ kpo ma kpá sɛ nɛ ngɔ nùi ni gɔ.

¹⁹ Nɛ nùi ma ko sɛ okpalɛ wena, nɛ nɛ zɔ́lɔ́ sɛ nyɔngɔmɔ gɔ. Nɛ nɛ dúngú sɛ do linggamɔ gɔ.

²⁰ “Mbe gɔ, nɛ nɛ aka sɛ na, kɔ sambo sabɛlɛ ni, lo nɛ nyɔngɔ sɛ ge nde? We kɛ lo wè tɛ mi kpalɛ, tabi kala 'bɔ okpalɛ li fɔɛ gɔ.

²¹ Nɛ nde nɛ ĩ́ na, mi NWA, mi wele sɛ nu mi tɛ fɔnɔ 'da nɛ do gazɛlɛ sabɛlɛ, nɛ ma ko sɛ wena, do tɛlɛ tɛ kɛ na, nɛ kpa nyɔngɔmɔ we sabɛlɛ talɛ ni.

²² Nɛ 'da fala nɛ mi sɛ fɔnɔ 'da nɛ do sabɛlɛ kɛ ngbɛ'dɛ'dɛ ni, nɛ nɛ 'bana sɛ do kpalɛnɔ kɛ nɛ kala ma kɔ gazɛlɛ sabɛlɛ ni. Nɛ nɛ zɔ́lɔ́ sɛ nyɔngɔmɔ gɔ gbaa ndɔti nɛ a kɛ na, nɛ kala mbé kpalɛnɔ tɛ kɔ sabɛlɛ 'do nɛ ni sɛ nɛ de.

Mbula ngɔ si olo ku'da nùnɔ kɛ wa bia gole nɛ ni

²³ “Fala kɛ wele be gole nù, nɛ ma wia na, a ɔ do wala we si olo ku'da nùi a bia gole nɛ ni. We kɛ wele nùi a mɔ́ mi NWA, nɛ nɛ ɔ sɛ nɛ ogɛnɛ, tabi owinɔ kɛ wa ɔ ngɔ nùi 'da mi iko ni.

²⁴ Ma kɛ tɛ ngɔ nùi vɛ̃ kɛ mi hã sɛ ma hã nɛ ni, nɛ e mbula kɛ ma hã wala hã wele na, a si olo ku'da nùi kɛ a bia zi gole nɛ ni.

²⁵ Fala te sã ba nya nɛ be Israɛlɛ, kɔ a be gole nùi 'da a hã nɛ, nɛ ma wia na, mbe kɔ owi nanɔ 'da a ngboo fa we si olo ku'da nùi a bia gole nɛ ni.

²⁶ Mbe gɔ, nɛ nde a do wi na mɔ́ a kɛ a wia we si olo ku'da nùi a bia gole nɛ ni bina, nɛ ma wia na, a do tɛ̃ a, a fa mbili we si olo ku'da nùi a bia gole nɛ ni.

²⁷ Fala kɛ a si olo ku'da nɛ do'do, nɛ a tɔlɔ sɛ sabɛlɛ ma 'bana we hɔ te sabɛlɛ Yubile ni. Nɛ a futa gole kɛ ma wia do 'da sabɛlɛnɔ ni. Na mɛ ni, nɛ a ba sɛ nùi 'da a.

²⁸ Nɛ nde fala kɛ mbili 'da a, ma wè na a si olo ku'da nùi ni gɔ, nɛ nùi ma 'bana sɛ do mɔ́ wi oso zi ma ni gbaa we hɔ tɛ sabɛlɛ Yubile. Nɛ kɔ sabɛlɛ ni, nɛ wele nùi a ba sɛ 'bɔ ma do mɔ́ a.

²⁹ “Fala kɛ wele be gole tɔa tɛ ko le kɛ gba ngbo zĩ ma takpa ni, nɛ a wia we si olo ku'da nɛ dati a kɛ na sabɛlɛ a bia do gole nɛ ni ma we.

³⁰ Nɛ nde fala kɛ sabɛlɛ ni ma we, kɔ a sì olo ku'da nɛ gɔ, nɛ tɔa ma 'bana sɛ do mɔ́ wi kɛ a oso ma ni, do obe zã a fai. Nɛ ma hɔ tɛ sabɛlɛ Yubile, nɛ nde a gésé sɛ 'bɔ ma gɔ.

³¹ Nɛ nde fala kɛ ma ɔ do tɔa kɛ wa dɛa ma do kɔ le kɛ gba ngbo zĩ̀ ma takpa gɔ, nɛ wa dɛ sɛ do ma, ɔ nɛ kɛ wa dɛ do fɔnɔ ni. Wele tɔa ni, a wia we si olo ku'da mbili wa oso zi do ma ni. Fala kɛ a sì olo ku'da nɛ gɔ, kɔ ma hɔ tɛ sabɛlɛ Yubile, nɛ wa gese sɛ tɔa ni hã a.

³² “Nɛ nde we tɔanɔ kɛ kɔ lenɔ 'da olevitɛnɔ ni, ma si sɛ do tɛ̃ ɛ. Levitɛ kpo kpo wia we si olo ku'da tɔa 'da a fai dɛ kɔ le 'da a ni.

³³ Fala kɛ kɔ mbe le 'da olevitɛnɔ, kɔ levitɛ kpo be gole tɔa, hã a sì olo ku'da nɛ gɔ, kɔ ma hɔ tɛ sabɛlɛ Yubile, nɛ wa gese sɛ ma hã a. Mba gɔ, olevitɛnɔ wa sɛ do mɔ mɔ́ wa ngɔ nù Israɛlɛ bina, tati a otɔanɔ ni.

³⁴ Nɛ wa bé sɛ 'bɔ gole fɔnɔ kɛ zã lenɔ 'da olevitɛnɔ ni gɔ. We kɛ wele nɛ a mɔ́ wa fai.

Mbula ngɔ e ku'da zu owi sã

³⁵ “Fala kɛ sã ba mbe nya mɔ be Israɛlɛ dɛ kɛ zã mɔ ni, kɔ mɔ kpo 'bànà kɔ a na, a kpasa do nɛ gɔ, nɛ ma wia na, mɔ gala a. Nɛ mɔ hã mɔ kɛ a wia we kpasa do ma ni hã a. Fala kɛ ma ɔ do gɛnɛ kɛ a ɔ ngɔ nùi 'da mɔ, nɛ mɔ dɛ sɛ 'bɔ do a kpasaa na mɛ ni.

³⁶ Mɔ tɛ fà na, a e mbé mbili ngɔ nɛ, sɛ nɛ a gese hã mɔ de gɔ. Mɔ dɛ mɔ tɛ mɔ we be na, mɔ dɛ kili mi Gale 'da mɔ dɛa. Nɛ mɔ é a na, a kpasa dɛ kɛ zã mɔ ni.

³⁷ Fala kɛ a ba ku'da mbili 'da mɔ, nɛ mɔ tɛ fà na, a e mbé mbili ngɔ nɛ, sɛ nɛ a gese hã mɔ de gɔ. Fala kɛ mɔ hã nyɔngɔmɔ hã a, nɛ mɔ tɛ fà na, a é mbé nɛ ngɔ nɛ, sɛ nɛ a gese hã mɔ de gɔ.

³⁸ Mi a NWA Gale 'da nɛ, mi a mi fua zi nɛ ngɔ nù Ezipeto dɛ nza na, mi hã nù Kanana hã nɛ, nɛ mi ɔ Gale 'da nɛ.

Mbula ngɔ be Israɛlɛ kɛ a hɔa ngbá

³⁹ “Fala kɛ sã ba mbe nya mɔ be Israɛlɛ dɛ kɛ zã mɔ ni, kɔ a be gole tɛ̃ a hã mɔ do ngbá, nɛ ma wè na, mɔ hã to ngbá hã a gɔ.

⁴⁰ Nɛ nde mɔ dɛ a ɔ nɛ kɛ mɔ dɛ do wi to biti, tabi wele kɛ a ɔ dɛ ti mɔ ni. A dɛ sɛ to hã mɔ gbaa, we hɔ tɛ sabɛlɛ Yubile.

⁴¹ Nɛ tɛ sabɛlɛ Yubile, nɛ mɔ da sɛ kɔ mɔ tɛ̃ a do obenɔ 'da a, nɛ a si sɛ dɛ kɔ nu fɛlɛ a. Nɛ wa gese sɛ nùnɔ olo baa a ni hã a.

⁴² Mba gɔ, obe Israɛlɛ, wa a owi tonɔ 'da mi, we kɛ mi a mi fua wa ngɔ nù Ezipeto dɛ nza. Nɛ ma wè na, nɛ be gole wa ɔ nɛ ngbá ni gɔ.

⁴³ Nɛ tɛ dɛ wa 'danga gɔ. Nɛ dɛ́ mɔ tɛ nɛ we be na, nɛ dɛ kili mi Gale 'da nɛ dɛa.

⁴⁴ Fala kɛ nɛ kɔ we oso ongbá, nɛ nɛ nɛ we oso wa 'da ogele nu kɔnggɔnɔ kɛ zã nɛ ni.

⁴⁵ Nɛ wia 'bɔ we oso obenɔ 'da gɛnɛnɔ wa ɔ kɔ nɛ ni, tabi wanɔ wa kua wa dɛ ngɔ nùi 'da nɛ ni.

⁴⁶ Nɛ 'do nɛ, nɛ nɛ wia we la wa hã obenɔ 'da nɛ do mɔ́ wa. Nɛ wa sɛ a ongbánɔ 'da obenɔ 'da nɛ kɔ dungu nza 'da wa vɛ̃. Nɛ nde ma wè na, wele kpo kɔ nɛ gɛ a dɛ́ nya a be Israɛlɛ 'danga gɔ.

⁴⁷ “Fala kɛ gɛnɛ kpo, kɛ a ɔ sanga nɛ ni, a hɔ wi kpamɔ, hã sã ba nya nɛ mbe be Israɛlɛ, kɔ a be gole tɛ̃ a do ngbá hã gɛnɛ ni, tabi hã wi na mɔ́ gɛnɛ ni,

⁴⁸ nɛ ma gɔa na, wa si olo mbili we gɔnɔ zu be Israɛlɛ ni. Mbe nya a kpo,

⁴⁹ tabi nya baa a, tabi yamba a, tabi mbe gele wi na mɔ́ a wia we si olo ku'da mbili ni, we gɔnɔ zu a. Tabi fala kɛ wi ni ngboo ni, a kpa mbili, nɛ a wia we si olo ku'da ni zu a wele nɛ.

⁵⁰ Ma ɔ na mɛ ni, nɛ a wele sɛ we do wi kɛ a oso a ni, nɛ wa tɔlɔ sabɛlɛnɔ yolo tɛ 'da fala wa oso do a ni, gbaa we hɔ tɛ sabɛlɛ Yubile. Nɛ wa we gole ɔ nɛ kɛ sabɛlɛnɔ ma 'bana dati i ni, nɛ wa we sɛ mbili ni we kɔ do kɛ wa futa do wi to biti ni.

^51-52 Nɛ we si olo ku'da mbili ni, nɛ wa we sɛ gole do 'da sabɛlɛnɔ ma 'bana we hɔ tɛ sabɛlɛ Yubile ni. Fala kɛ ma 'bana wena, nɛ gole ma sɛ dɛ ngɔ, fala kɛ ma 'bànà wena gɔ, nɛ gole sɛ tɛ mɛ 'bɔ dɛ nù.

⁵³ Nɛ nde kɔ tũnɔ a ɔa 'da wi kɛ a oso a ni, wa ba sɛ a ɔ nɛ wi dɛa to kɛ wa futa we sabɛlɛ kpo kpo ni. Nɛ nde ma wia na, nɛ zɔ do dia nɛ na, nwa 'da a tɛ dɛ a 'danga gɔ.

⁵⁴ Nɛ fala kɛ wa kpà wala we si olo ku'da zu be Israɛlɛ ni gɔ, kɔ ma hɔ tɛ sabɛlɛ Yubile, nɛ wa da sɛ kɔ̃ wa tɛ̃ a, nɛ a hɔ sɛ kɔ ngbá fala nɛ kpo do obenɔ 'da a.

⁵⁵ Mba gɔ, obe Israɛlɛ wa a owi tonɔ 'da mi. Mi a mi fua wa ngɔ nù Ezipeto dɛ nza. Mi a NWA Gale 'da nɛ.”