Levitɛnɔ 24 - WE NU GALE 1995

Mbula ngɔ omwinda kɔ tɔa Tande

¹ NWA tɔ́a hã Mɔizɛ na:

² “Mɔ bá nu mɔ hã obe Israɛlɛ na, wa tɛ do nɔ olivɛ, kɛ ma gbala do dia nɛ ngboo ni hã mɔ, takɔ gɛ̃a wese kpo kpo, nɛ wa a sɛ kɔ mwindanɔ, nɛ wa tũ ma.

³ Nɛ Aroni a e sɛ mɔ a do mwindanɔ ni dɛ kɔ tɔa Tande kpa ngba wi do mi Gale. Wa e sɛ ma dɛ dati ku'bu kɛ ma kele Sanduku Gba Tɔkɛ ni. Wa tũ sɛ mwindanɔ ni do gɛ̃a wese, nɛ ma nyɛ sɛ dɛ dati mi ni gbaa we hɔ titole. Nɛ dɛ sɛ mbula gɛ 'da fala fai kɔ sabɛlɛ do sabɛlɛ.

⁴ Do gɛ̃a wese kpo kpo, nɛ Aroni a 'dafa sɛ mwindanɔ dɛ ngɔ mɔ a do mwindanɔ kɛ wa dɛa ma do dia mɔ mbali ngboo ni. A dɛ sɛ na mɛ ni, takɔ mwindanɔ ma nyɛ dɛ dati mi do tũnɔ vɛ̃.

Mapanɔ kɛ wa hã do dɔnggamɔ hã Gale

⁵ “Mɔ so sɛ fũ, nɛ mɔ dɛ ma do kili mapa 'bu ngɔ nɛ bɔa. Nɛ dĩ mapa ni kpo kpo sɛ a kilo gazɛlɛ.

⁶ Mɔ a sɛ ma dɛ dati mi dɛ ngɔ mɛsa kɛ wa dɛa ma do dia mɔ mbali ngboo ni. Mɔ a sɛ ma do ngɔ gili nɛ bɔa. Ngɔ gili nɛ kpo kpo sɛ do mapa gazɛlɛ.

⁷ Mɔ a sɛ dia fũ yɔmbɔ ngboo ngɔ gili mapa kpo kpo. 'Do nɛ, nɛ mɔ dɔ sɛ fũ yɔmbɛ ni olo li mapa, we gba ta zu owinɔ na, wele mapanɔ ni a mɔ mi.

⁸ Kɔ̃ tũ ɔmɔ tɛ wi kpo kpo fai, nɛ wa e sɛ mapanɔ ni dɛ dati mi. Mɛ a mbula kɛ obe Israɛlɛ wa dɛ sɛ ma fai.

⁹ Wele mapanɔ ni sɛ a mɔ Aroni do obe zã a. Nɛ wa nyɔngɔ sɛ ma tɛ fala kɛ ma santo ni. Mba gɔ, mapanɔ ni, ma santo wena, we kɛ wa dɔnggɔ do mi. Nɛ wele mapanɔ ni sɛ a mɔ́ onganganɔ fai.”

Etumbu hã hã wi kɛ a dã zu li Gale

^10-11 Mbe wele zi kpo, baa a a wi Ezipeto, nɛ naa a a boko Israɛlɛ. Li naa a a Sɛlɔmitɛ, be 'da Dibri, wi kɔ nu kpala Danɛ. Nɛ mbe ngba soe kpo, nɛ be 'da Sɛlomitɛ kpa we do mbe be Israɛlɛ kpo. Kɔ wa tɛ kpa we ni, nɛ be 'da Sɛlomitɛ dã zu li Gale. Nɛ wa ba a do ti, nɛ wa nɛ do a 'da Mɔizɛ i.

¹² Nɛ wa a Owele na, wa zɔ mɔ tɛ̃ a do dia nɛ, we 'bɔ na NWA gɔnɔ we 'da a, nɛ a tɔ̃ we ma wia na, wa dɛ do a ni.

¹³ Nɛ NWA tɔ̃ hã Mɔizɛ na:

¹⁴ “Mɔ bá wi dã zu li mi gɛ hɔ do a dɛ 'do ngbo ɔi i. Mɔ hɔ do a do'do, nɛ owinɔ vɛ̃ kɛ wa zila a tɛ dã zu li mi ni, wa a sɛ kɔ̃ wa dɛ zu a. 'Do nɛ, nɛ obe Israɛlɛ vɛ̃ wa lo sɛ a do ta, nɛ wa gbɛ a.

¹⁵ Mɔ tɔ̃ sɛ hã obe Israɛlɛ na, fala kɛ wele dã zu li mi NWA Gale, nɛ a kpa sɛ si olo nɛ.

¹⁶ Wele kɛ dã zu li mi NWA, nɛ ma wia na, wa gbɛ a. Obe Israɛlɛ vɛ̃ wa lo sɛ a do ta, nɛ wa gbɛ a. Gɛnɛ kɔ ma ɔ do gɛnɛ, tabi be Israɛlɛ ngboo, nɛ wa gbɛ sɛ a, we kɛ a dã zu li mi NWA Gale ni.

¹⁷ “Fala kɛ wele gbɛ ngba a, nɛ ma wia na, wa gbɛ a.

¹⁸ Fala kɛ a gbɛ sa'de mɔ́ gele wele, nɛ ma wia na, a kpolo fia sa'de ni do tunu li sa'de.

¹⁹ “Fala kɛ wele e kunda tɛ ngba a, nɛ wa e sɛ tɛ mɛ 'bɔ kunda tɛ̃ a we kɔ̃ do kɛ a ia tɛ ngba a ni.

²⁰ Fala kɛ a gbini gbãlã tɛ ngba a, nɛ wa gbini sɛ tɛ 'bɔ gbãlã tɛ̃ a. Fala kɛ a o mbee li ngba a, nɛ wa o sɛ tɛ 'bɔ mbee li a. Fala kɛ a gbini gogo ngba a kpo, nɛ wa gbini sɛ tɛ 'bɔ gogo a kpo. 'Dã mɛnɔ vɛ̃ kɛ wele dɛ do ngba a ni, nɛ wa gese sɛ olo nɛ hã a.

²¹ Wele kɛ a gbɛ sa'de, nɛ a gese sɛ gele sa'de olo nɛ. Nɛ nde wele kɛ a gbɛ ngba a ní, nɛ ma wia na wa gbɛ a.

²² Mbula gɛ ma we duzu nɛ vɛ̃, obe Israɛlɛ, do ogɛnɛnɔ kɛ wa ɔ kɔ nɛ ni. Mba gɔ, mi a NWA Gale 'da nɛ.”

²³ Mɔizɛ nɛa we tɔ̃ mbulanɔ ni hã obe Israɛlɛ, nɛ wa ba wi dã zu li Gale ni, nɛ wa hɔ do a dɛ 'do ngbo ɔi i, nɛ wa lua a do ta, nɛ wa gbɛ a. Na mɛ ni, obe Israɛlɛ wa dɛa mbula kɛ NWA ia ma hã Mɔizɛ ni.