Levitɛnɔ 23 - WE NU GALE 1995

Kɔ̃ tũ ɛngganɔ 'da obe Israɛlɛ

¹ NWA tɔ̃a hã Mɔizɛ na,

² a e mbulanɔ gɛ hã obe Israɛlɛ na: “'Da fala kɛ nɛ dungu ɛngga do zu li mi nde, nɛ nɛ sá mɔ we mba li ngba wi kɛ ma santo. Nɛ zɔ́, ɛngganɔ ni ma kɛ:

³ Kɔ pɔsɔ kpo, nɛ nɛ wia we dɛ to 'do tũ gazɛlɛ. Nɛ nde kɔ̃ tũi kɛ sambo, mɛ a kɔ̃ tũ ɔmɔ tɛ wi. Nɛ tɛ dɛ̀ to do ngba soe ni gɔ, nɛ nde nɛ mbá ngba nɛ we dɔnggɔ mi. Gɛnɛ kɔ nɛ a do nde, nɛ nɛ ba sɛ kɔ̃ tũi ni na, mɛ a kɛ 'da mi.

⁴ Nɛ gele ɛngganɔ, kɛ nɛ mba sɛ ngba nɛ we dɔnggɔ mi ni, nɛ dungu sɛ ma do kɔ tũnɔ mi nɛ we hã nɛ gɛ.

Ɛngga Hɔ Nza kɔ Ngbá do Ɛngga Nyɔngɔ Mapa kɛ wa à ina hana mapa tɛ nɛ gɔ

⁵ “Do zɛkɛ 'da kpo, kɔ nɛ 'bu ngɔ nɛ nalɛ, do 'da fala wese le do tũ ni, nɛ nɛ ndo sɛ dungu ɛngga Hɔ Nza kɔ Ngbá.

⁶ Fala sa do kɔ̃ tũ 'bu ngɔ nɛ mɔlɔ, kɔ kpo zɛkɛ ni, nɛ nɛ ndo sɛ dungu ɛngga Nyɔngɔ Mapa kɛ wa à ina hana mapa tɛ nɛ gɔ ni, we dɔnggɔ do mi. Nɛ 'do tũ sambo vɛ̃, nɛ nyɔngɔ sɛ tɛlɛ tɛ mapa ni iko.

⁷ Nɛ do kuti kɔ̃ tũ kɔ pɔsɛ ni, nɛ nɛ mba sɛ ngba nɛ we dɔnggɔ mi. Do ngba soe ni, nɛ la sɛ fala dɛa tonɔ 'da nɛ.

⁸ Tũ kpo kpo kɔ pɔsɛ ni, nɛ dɔ sɛ sa'de we dɔnggɔ do mi. Kɔ ma hɔ tɛ tũi kɛ sambo, nɛ nɛ mba sɛ 'bɔ ngba nɛ we dɔnggɔ mi. Nɛ do ngba soe ni, nɛ la sɛ 'bɔ fala dɛa tonɔ 'da nɛ.”

Ɛngga Hã Kuti Kpalɛ hã NWA

⁹ NWA tɔ̃a hã Mɔizɛ na,

¹⁰ a e mbulanɔ gɛ hã obe Israɛlɛ na: “'Da fala kɛ nɛ hɔ sɛ tɛ ngɔ nùi kɛ mi nɛ hã ma hã nɛ ni, kɔ nɛ sɛlɛ kuti kpalɛ li fɔnɔ 'da nɛ, nɛ nɛ ba sɛ kuti lã kɛ nɛ sɛlɛ ni, nɛ nɛ tɛ do ma hã nganga.

¹¹ Nɛ nganga a yaka sɛ ma dɛ dati mi NWA, nɛ a hã ma hã mi do dɔnggamɔ, takɔ mi ɔ do dia zã dɛ 'da nɛ. A hã sɛ dɔnggamɛ ni tũ kpo 'do kɔ̃ tũ ɔmɔ tɛ wi.

¹² Do kpo soe ni, nɛ nɛ tɛ sɛ do bata kɛ a dɛa sabɛlɛ kpo, nɛ fo kunda tɛ̃ a bina ni, nɛ nganga dɔ a we dɔnggɔ do mi.

¹³ “Nɛ mba sɛ ma do kilo fũ gazɛlɛ, kɛ wa zanga do nɔ ni, nɛ a dɔ sɛ ma we dɔnggɔ do mi. Nɛ fala tɛ dɔa mɛ ni, ma unu sɛ mi, nɛ ma dɛ yangga tɛ mi. Nɛ nɛ ba sɛ dɔ́ litrɛ kpo do dɔ nɛ, nɛ nɛ mba ma do dɔnggamɛnɔ ni.

¹⁴ Nɛ dati kɛ na, nɛ tɛ do dɔnggamɛ ni hã mi ni, nɛ nde nɛ nyɔ́ngɔ́ sɛ mɔ kpo kɔ kpalɛnɔ nɛ kala ni gɔ. Gɛnɛ kɔ mapa, tabi hana kpalɛ, tabi mbé gbãlã kpalɛ, nɛ nde nɛ nyɔ́ngɔ́ sɛ ma gɔ. Nɛ, do obe zã nɛ, nɛ dɛ sɛ mbulanɔ gɛ fai tɛ falanɔ vɛ̃ nɛ nɛ ɔ se'de ni.

Ɛngga Kala Kpalɛ

¹⁵ “Yolo do tũi 'do kɔ tũ ɔmɔ tɛ wi, kɔ tũ kɛ nɛ hã do dɔnggamɔ lã kpalɛnɔ ni, nɛ nɛ tɔlɔ sɛ pɔsɔ sambo nzurr.

¹⁶ Kɔ ma hɔ tɛ kɔ̃ tũ kɛ 'bu ngɔ nɛ mɔlɔ, tũ kɛ 'do sambo kɔ tũ ɔmɔ tɛ wi ni, nɛ nɛ hã 'bɔ mbé kpalɛ do dɔnggamɔ hã mi.

¹⁷ Nɛ nu fɛlɛ kula kpo kpo, wa tɛ sɛ do mapa bɔa we hã do dɔnggamɔ hã mi. Wa dɛ sɛ mapa kpo kpo do kilo fũ talɛ, nɛ wa a ina hana mapa se'de. Mapanɔ kɛ nɛ nɛ hã sɛ do dɔnggamɛ hã mi ni, mɛ sɛ a kɛnɔ nɛ dɛa ma do fũ mbé kpalɛ li fɔnɔ 'da nɛ ni.

¹⁸ Nɛ tɛ sɛ 'bɔ do wili bata sambo kɛ wa dɛa sabɛlɛ kpo ni, do wili ngɔmbɔ kpo, do wili bata bɔa. Nɛ wa tɛ ɔ̀ do kunda tɛ wa gɔ. Nɛ nɛ mba wa do dɔnggamɔ fũi do dɔ̃ɛ ni. Nɛ nɛ dɔ sɛ sa'denɔ ni vɛ̃, we dɔnggɔ do mi. Nɛ ma unu sɛ mi, nɛ ma dɛ sɛ yangga tɛ mi wena.

¹⁹ Nɛ nɛ ba sɛ 'bɔ wili dua kpo, nɛ nɛ hã a do dɔnggamɔ we fo ku'da 'dã mɔ. Nɛ nɛ kala obata bɔa kɛ wa dɛa sabɛlɛ kpo ni, nɛ nɛ hã wa do dɔnggamɔ we be dɛa na.

²⁰ Nɛ nganga a kala sɛ kuti mapanɔ do batanɔ bɔa ni, nɛ a yaka ma dɛ dati mi, nɛ a hã ma do dɔnggamɔ hã mi. 'Do nɛ, nɛ a kala sɛ ma do mɔ a, we kɛ dɔnggamɛ ni ma santo.

²¹ Do ngba soe ni, ma wè na wele kpo sanga nɛ e kɔ a tɛ dɛa to gɔ. Nɛ nde nɛ vɛ̃, nɛ mba sɛ ngba nɛ we dɔnggɔ mi. Nɛ dɛ sɛ mbula gɛ fai, tɛ falanɔ vɛ̃ nɛ nɛ ɔ se'de ni.

²² “'Da fala nɛ kala kpalɛnɔ li fɔnɔ 'da nɛ ni, nɛ nɛ tɛ sɛlɛ kpalɛnɔ kɛ nu ngbaka fɔnɔ 'da nɛ ni gɔ. Nɛ nɛ tɛ kpòlò 'bɔ tɛ nɛ we kala tala kpalɛnɔ kɛ ma ala olo nɛ ni gɔ. Nɛ la sɛ ma hã owi sãnɔ do ogɛnɛnɔ. Mi a NWA Gale 'da nɛ.”

Ɛngga Kuti Kɔ̃ Tũ Sabɛlɛ

²³ NWA tɔ́a hã Mɔizɛ na,

²⁴ a e mbula gɛ hã obe Israɛlɛ na: “Do zɛkɛ 'da sambo, kɔ nɛ kpo, mɛ sɛ a kɔ tũ ɔmɔ tɛ wi we duzu nɛ. Nɛ do ngba soe ni, nɛ nɛ mba sɛ ngba nɛ do zu li mi, nɛ nɛ zɛ nu nɛ hã mi do yangga, takɔ tɛ zu mi gba ngɔ nɛ fai.

²⁵ Nɛ do ngba soe ni, nɛ la sɛ fala dɛa tonɔ 'da nɛ vɛ̃. Nɛ nɛ dɔ sɛ sa'de we dɔnggɔ do mi.”

Gã ngba soe fo ku'da 'dã mɔ zu winɔ

²⁶ NWA tɔ́a hã Mɔizɛ na:

²⁷ “Do kpo zɛkɛ 'da sambo, kɔ̃ nɛ 'bu, mɛ sɛ a gã ngba soe fo ku'da 'dã mɔ zu winɔ. Nɛ mba sɛ ngba nɛ do zu li mi, nɛ nɛ bɛ̃ nyɔngɔmɔ, nɛ nɛ dɔ sa'de we dɔnggɔ do mi.

²⁸ Nɛ nɛ la sɛ fala dɛa tonɔ 'da nɛ, we kɛ mɛ sɛ a ngba soe wa nɛ dɛ sɛ mbala mɔ fo ku'da 'dã mɛnɔ zu nɛ dɛ dati mi NWA Gale 'da nɛ.

²⁹ Wele kɛ a nyɔngɔ mɔ do ngba soe ni, nɛ nɛ fo sɛ a sanga nɛ obe Israɛlɛ do'do.

³⁰ Nɛ wele kɛ a dɛ to do ngba soe ni, nɛ mi do tɛ mi, mi gbɛ sɛ a kɔ winɔ 'da a.

³¹ Mba gɔ, mi kɔ̃̀ na, wa dɛ to do ngba soe ni gɔ. Nɛ dɛ sɛ mbula gɛ fai tɛ falanɔ vɛ̃, kɛ nɛ nɛ dungu se'de ni.

³² Nɛ e sɛ kɔ tũi ni ɔ nɛ kɔ tũ ɔmɔ tɛ wi ngboo we duzu nɛ, nɛ nɛ tɛ nyɔ̀ngɔ̀ mɔ gɔ. Ma ndo sɛ do kɔ̃ zɛkɛ kusi, zɛkɛ 'da sambo, do gɛ̃a wese, nɛ ma Sɔkpɔ do kɔ zɛkɛ 'bu, do gɛ̃a wese.”

Ɛngga Ɔ ti Da

³³ NWA tɔ́a hã Mɔizɛ na,

³⁴ a e mbulanɔ gɛ hã obe Israɛlɛ na: “Yolo do zɛkɛ 'da sambo, kɔ̃ nɛ 'bu ngɔ nɛ mɔlɔ, nɛ nɛ dungu sɛ ɛngga Ɔ ti Da do zu li mi. Nɛ nɛ dungu sɛ ɛngga ni 'do tũ sambo.

³⁵ Do kuti kɔ tũi nɛ mba sɛ ngba nɛ we dɔnggɔ do mi ni, nɛ nɛ la sɛ fala dɛa tonɔ 'da nɛ.

³⁶ Nɛ nɛ dɔ sɛ sa'de tũ kpo kpo we dɔnggɔ do mi. Kɔ ma hɔ Sɔkpɔ kɔ tũi, do kɔ tũ kɛ ngbɛ'dɛ'dɛ, nɛ nɛ mba sɛ 'bɔ ngba nɛ we dɔnggɔ mi, nɛ nɛ dɔ sɛ 'bɔ sa'de hã mi, nɛ nɛ dɛ́ sɛ to gɔ.

³⁷ Nɛ zɔ́ gã ɛngganɔ, kɛ nɛ dungu sɛ ma do zu li mi gɛ a ni. Do kɔ̃ tũnɔ ni, nɛ nɛ mba sɛ ngba nɛ we dɔnggɔ mi, nɛ nɛ dɔ osa'de hã mi we dɔnggɔ do mi, nɛ nɛ hã odɔnggamɔ fũ, do odɔnggamɔ kɛ ma be dɛa na, do odɔnggamɔ dɔ̃, ɔ nɛ kɛ mbula ngɔ ɛngga kpo kpo ma tɔ̃ ni.

³⁸ Nɛ mba sɛ dɔnggamɛnɔ ni dɛ ngɔ dɔnggamɛnɔ nɛ hã ma hã mi do kɔ tũ ɔmɔ tɛ winɔ ni, nɛ nɛ mba 'bɔ do ogele dɔnggamɛnɔ kɛ nɛ hã ma hã mi do kɔ sila nɛ iko, tabi we dɛ olo mbulu kɛ nɛ kpua zi ni.

³⁹ “Na mɛ ni, fala kɛ nɛ kala kpalɛ li fɔnɔ 'da nɛ dɛ nza do'do, nɛ nɛ ndo sɛ dungu ɛngga ni do zu li mi. Ma ndo sɛ do zɛkɛ 'da sambo, kɔ̃ nɛ 'bu ngɔ nɛ mɔlɔ, nɛ ma ɔ sɛ tũ sambo. Kɔ tũ kɛ dati, do kɛ ngbɛ'dɛ'dɛ, mɛ sɛ a okɔ̃ tũ ɔmɔ tɛ wi.

⁴⁰ Do kuti tũi ni, nɛ nɛ 'bi sɛ odia wala te, nɛ nɛ gbini onwá 'bete do gbakɔ̃ tenɔ kɛ ma 'bɔ wena ni, nɛ nɛ dɔnggɔ do mi NWA Gale 'da nɛ, nɛ nɛ dɛ́ yangga gbaa 'do tũ sambo.

⁴¹ Sabɛlɛ kpo kpo, do kɔ zɛkɛ 'da sambo, nɛ nɛ dungu sɛ ɛngga ni 'do tũ sambo. Nɛ dɛ sɛ mbula gɛ 'da fala fai.

⁴² Do kɔ pɔsɔ ɛngga ni, ma wia na nɛ, obe Israɛlɛ, nɛ ɔ ti da,

⁴³ takɔ obe zã nɛ wa ĩ na, 'da fala mi fua zi oyaa nɛ ngɔ nù Ezipeto dɛ nza ni, nɛ wa ɔa zi ti da. Mi a NWA Gale 'da nɛ.”

⁴⁴ Tɛlɛ tɛ kɛ Mɔizɛ ia zi do tũ ɛngganɔ hã obe Israɛlɛ na, wa dungu we dɔnggɔ do NWA gɛ a ni.