Levitɛnɔ 22 - WE NU GALE 1995

Mbula ngɔ nyɔngɔ tala sa'de kɛ wa hã do dɔnggamɔ hã Gale

¹ NWA tɔ́a hã Mɔizɛ na,

² a e mbulanɔ gɛ hã Aroni, do obenɔ 'da a na: “Li wa sɔ̃́ tɛ dɔnggamɛnɔ kɛ obe Israɛlɛ wa tɛ nɛ hã mi, we dɔnggɔ do mi na, da dɛ kɔ wa fáká zu li mi kɛ ma santo ni gɔ. Mi a NWA.

³ Fala kɛ wi nu fɛlɛ nganga, a hɔ wi ndi, kɔ a kɔlɔ do dɔnggamɛnɔ kɛ obe Israɛlɛ wa tɛa do ma hã mi ni, nɛ ma wia na, wa fo nganga ni tɛ dɛa toe 'da a do'do. Mi a NWA. Nɛ mbulanɔ ni, ma sɛ 'bɔ na mɛ ni we onganganɔ 'do gɛ fai.

⁴ Nganga wele kɛ a ba zɛlɛ ngbɛlɛ, tabi a ba zɛlɛ tɛ wuko, nɛ ma wè na, a nyɔngɔ dɔnggamɔ santo dati kɛ na, a hɔ sa wi ni gɔ. Ma 'bɔ na mɛ ni, we duzu nganga wele kɛ a 'be tɛ wi kɛ a 'bia tɛ wɔlɔ, nɛ a hɔa wi ndi, tabi a 'bia tɛ mɔ kɛ ma ndɔa tɛ wɔlɔ, nɛ ma hɔa mɔ ndi ni. Ma 'bɔ na mɛ ni, we duzu nganga wele kɛ lì tɛ̃ a ma hɔa iko,

⁵ tabi a 'bia tɛ sa'de ndi, tabi a 'bia tɛ wi kɛ a hɔa wi ndi ni.

⁶ Wele kɛ a 'be te mɛnɔ ɔ na mɛ ni, nɛ a 'bana sɛ wi ndi gbaa we hɔ gɛ̃a wese. Nɛ a nyɔ́ngɔ́ sɛ dɔnggamɔ santoe gɔ, dati kɛ na a fɔlɔ tɛ̃ a vɛ̃ ni.

⁷ Kɔ wese le tũ, nɛ a hɔ sɛ sa wi, nɛ a wia we nyɔngɔ odɔnggamɔ santonɔ 'bɔ mbé nɛ, we kɛ mɛ a nyɔngɔmɔ kɛ nganga kpasa do ma.

⁸ Ma wè na, nganga nyɔngɔ mulu sa'de kɛ a fia iko, tabi kɛ 'dã sa'de gbɛa a ni gɔ. A nyɔngɔ ma, nɛ ma dɛ sɛ na, a hɔ wi ndi li mi Gale. Mi a NWA.

⁹ “Onganganɔ vɛ̃ wa dɛ sɛ mbulanɔ vɛ̃ kɛ mi hã ma gɛ. Ní gɔ, nɛ wa te sɛ do ngbangga, nɛ mi gbɛ sɛ wa, we kɛ wa faka dɔnggamɛnɔ 'da mi. Mi a NWA, nɛ mi ia wa na, wa dɛ to hã mi.

¹⁰ “Tati a owi nu fɛlɛ nganga hã wa wia we nyɔngɔ dɔnggamɛnɔ kɛ ma santo ni. Mbe gele wele iko nyɔ́ngɔ́ sɛ ma gɔ. Gɛnɛ kɔ wele kɛ a ɔ kɔ tɔa 'da nganga, tabi nganga a ba a do wi dɛa toe 'da a ni, nɛ nde a nyɔ́ngɔ́ sɛ ma gɔ.

¹¹ Nɛ nde ngbánɔ kɛ nganga usa wa ni, tabi ngbánɔ kɛ wa kua wa dɛ kɔ tɔa 'da nganga ni, wa wia we nyɔngɔ dɔnggamɛ kɛ ma we nganga ni.

¹² Be zɔnga be 'da nganga, kɛ wili a a nganga gɔ ni, a wè tɛ nyɔngɔ tala dɔnggamɛnɔ kɛ ma santo ni gɔ.

¹³ Nɛ nde fala kɛ wili a fe, tabi wili a bɛ̃ a, kɔ a si dɛ nu tɔa 'da baa a, we kɛ a kò be gɔ, nɛ a wia we nyɔngɔ dɔnggamɛ ni. Nɛ nde mbe gele wele iko, kɛ a a wi nu fɛlɛ nganga gɔ ni, a wè tɛ nyɔngɔ dɔnggamɛ kɛ wa hã we dɔnggɔ do mi NWA ni gɔ.

¹⁴ Fala kɛ mbe gele wele iko nyɔngɔ mɛ ni, hã a dɛ̃ do mbana gɔ, nɛ ma wia na, a gese olo mɛ ni hã nganga, nɛ a e kpo mbe mɔlɔ ngɔ nɛ.

^15-16 “Li onganganɔ sɔ na, da dɛ kɔ gele wele iko nyɔ́ngɔ́ mɛ kɛ wa hã ma do dɔnggamɔ hã mi NWA ni gɔ. Mba gɔ, fala kɛ nganga a hã wala hã gele wele iko na, a nyɔngɔ ma, nɛ nde a faka nyɔngɔmɛ ni ia. Kɔ ma dɛ na mɛ ni, nɛ wi nyɔngɔ mɛ ni, a kpa sɛ 'dã mɔ, nɛ a wia we si olo 'dã mɛ ni. Mi a NWA, nɛ mi a mi dɛ na, dɔnggamɛnɔ ma ɔ santo.”

Osa'denɔ kɛ wa wia we hã wa do dɔnggamɔ hã Gale

¹⁷ NWA tɔ̃a hã Mɔizɛ na,

¹⁸ a e mbulanɔ gɛ hã Aroni, do obenɔ 'da a, do obe Israɛlɛ vɛ̃ na: “Fala kɛ be Israɛlɛ, tabi gɛnɛ kɛ a ɔ ngɔ nù Israɛlɛ, a kɔ̃ we tɛ do sa'de we dɔ a hã mi, we si olo mbulu kɛ a kpua hã mi ni, tabi we dɔnggɔ do mi do kɔ sila a iko nde, nɛ ma wè na, sa'de ni ɔ do kunda tɛ̃ a gɔ.

¹⁹ Fala kɛ a kɔ̃ na, mi gɔmɔ zu mi we dɔnggamɛ 'da a, nɛ ma wia na, sa'de ɔ do wili ngɔmbɔ, tabi wili bata, tabi wili dua, nɛ a tɛ ɔ̃ do kunda tɛ̃ a gɔ.

²⁰ Nɛ mɔ tɛ bà sa'de kɛ kunda tɛ̃ a ni, nɛ mɔ dɔnggɔ a do mi gɔ, we kɛ mi kɔ̃́ sɛ gɛnɛ a gɔ.

²¹ Fala kɛ wele kɔ̃ we tɛ do dɔnggamɔ we be dɛa na hã mi, tabi a tɛ do dɔnggamɛ ni we dɔnggɔ do mi do kɔ sila a iko, tabi we si olo mbulu kɛ a kpua hã mi ni, nɛ ma wia na, a ba ngɔmbɔ, tabi bata, tabi dua, nɛ nde sa'de ni tɛ ɔ̃ do kunda tɛ̃ a gɔ. Ní gɔ, nɛ mi kɔ̃ sɛ gɛnɛ ma gɔ.

²² Mɔ tɛ tɛ̃ do ua li sa'de, tabi sa'de kɛ nyanga a kala, tabi wa ia dani tɛ̃ a, tabi sa'de kɛ a do hɛ̃a mɔ tɛ̃ a, tabi a do zɛlɛ tɛ ndala tɛ̃ a ni, nɛ mɔ é a ngɔ gbagala we dɔnggɔ do mi gɔ.

²³ Ngɔmbɔ, bata, tabi dua kɛ kunda tɛ̃ a, tabi a ga do dia nɛ gɔ ni, a wia do dɔnggamɔ kɛ wele hã do kɔ sila iko ni. Nɛ nde a wè do dɔnggamɔ kɛ wele hã we si olo mbulu ni gɔ.

²⁴ Mɔ tɛ tɛ̃ do sa'de kɛ wa ua kuli lo'do a, tabi wa fua ma, tabi wa 'bili ma do'do ni, kɔ mɔ dɔnggɔ do mi gɔ. Mi kɔ̃̀ na, wa hɔlɔ sa'de ngɔ nùi 'da nɛ gɔ.

²⁵ Kɔ fala kɛ mɔ oso sa'de ɔ na mɛ ni kɔ̃ gɛnɛ, nɛ mɔ tɛ hã̀ a do dɔnggamɔ hã mi gɔ. Mba gɔ, sa'de kɛ wa hɔla a ni, a hɔa sa'de kunda ia, nɛ mi wè tɛ kɔ̃ gɛnɛ a gɔ.”

²⁶ NWA tɔ̃a 'bɔ hã Mɔizɛ na:

²⁷ “Fala kɛ naa ngɔmbɔ, tabi naa bata, tabi naa dua ko, nɛ be sa'de ni, a 'bana sɛ do naa a 'do tũ sambo. 'Do nɛ, nɛ wa wia we ba be sa'de ni we hã a do dɔnggamɔ hã mi.

²⁸ Mɔ tɛ gbɛ naa ngɔmbɔ, tabi naa bata, tabi naa dua do be 'da a li wese kpo gɔ.

²⁹ Fala kɛ mɔ hã dɔnggamɔ we hã iɔ̃nae hã mi nde, nɛ mɔ dɛ ma ɔ nɛ kɛ mbula ngɔ nɛ tɔ̃a ni, sɛ nɛ mi we sɛ we kɔ̃ gɛnɛ ma de.

³⁰ Nɛ nɛ nyɔngɔ mulu sa'de ni do kpo soe ni, nɛ nɛ tɛ è tala nɛ ngɔ gɔ. Mi a NWA.

³¹ “Ma wia na, nɛ zele mbulanɔ 'da mi, nɛ nɛ e ma fala dɛa to. Mi a NWA.

³² Nɛ tɛ fàkà zu li mi kɛ ma santo ni gɔ. Mi kɔ̃a na, nɛ, obe Israɛlɛ, nɛ ĩ na, mi santo. Mi a NWA, nɛ mi saka nɛ na, nɛ ɔ owinɔ 'da mi kɛ nɛ santo.

³³ Nɛ mi fua zi nɛ ngɔ nù Ezipeto dɛ nza, takɔ mi dungu Gale 'da nɛ. Mi a NWA.”