Levitɛnɔ 21 - WE NU GALE 1995

Mbula ngɔ dungi 'da onganganɔ

¹ NWA tɔ́a hã Mɔizɛ na, a e mbulanɔ gɛ hã onganganɔ kɛ wa a obe zã Aroni ni na: “Ma wè na, nganga 'be tɛ wɔlɔ wi na mɔ́ a, kɔ a hɔ wi ndi li mi NWA gɔ.

² Nɛ nde fala kɛ ma ɔ do wi nu fɛlɛ a ngboo, ɔ nɛ naa a, tabi be 'da a, tabi nya a, nɛ a wia we 'be tɛ wɔlɔ a.

³ Ma sɛ 'bɔ na mɛ ni we wɔlɔ boko nya a, kɛ a ɔ dɛ ti a, nɛ a tɛ bà wili gɔ ni.

⁴ Nganga a ɔ sɛ ngbala owi nanɔ 'da a nɛ gã wi ngɔ wa ni. Ma kɛ ma wè na, a hɔ wi ndi gɔ, ní gɔ, nɛ ma hã sɛ sape hã a.

⁵ “'Da fala kɛ nganga dungu gɛla, nɛ ma wè na, a kɛlɛ mbee mili zu a, tabi mbee nzɛlɛ a gɔ. Nɛ ma wè 'bɔ na, a yɔlɔ mɔ tɛ̃ a gɔ.

⁶ Ma wia na, onganganɔ wa hã tɛ wa we dɛ toe 'da mi, nɛ wa tɛ 'dàngà zu li mi gɔ. Mba gɔ, toe 'da wa mɛ a hã odɔnggamɛnɔ kɛ mɛ a nyɔngɔmɛ 'da mi ni hã mi, NWA Gale 'da wa. Ma kɛ ma wia na, wa ɔ santo ngboo.

⁷ Ma wè na, nganga ba wuko kɛ a yɛnggɛ ndumba dati, tabi wi wili ɔa do a dati ni gɔ. Ma wè 'bɔ na, a ba wuko kɛ wili a bɛ̃a a ni gɔ. We kɛ ma wia na, nganga hã tɛ̃ a vɛ̃ we dɛ toe 'da mi.

⁸ Ma wia na, nɛ dĩlĩ fala tɛ nganga, nɛ nɛ zɔ a na, a santo. Mba gɔ, fala kɛ nɛ tɛ do nyɔngɔmɔ, nɛ wi hã ma hã mi Gale 'da nɛ, wi a a. Mi a Gale kɛ mi santo, nɛ mi saka nɛ obe Israɛlɛ na, nɛ ɔ owinɔ 'da mi kɛ nɛ santo.

⁹ Fala kɛ boko be 'da nganga dɛ ndumba, nɛ nde ki ni, a hã sape hã baa a. Nɛ ma wia na, wa gbɛ a, nɛ wa dɔ a do'do.

¹⁰ “Wi ngɔ onganganɔ, wi a gã nwa nganga. Do ngba soe kɛ a nɛa zi we ndo toe ni, nɛ wa he'de otulu santo hã a, nɛ wa a nɔ santo zu a. Ma kɛ ma wè na, a fi kɔ a kɔ zu a, tabi a ɛ̃ tulu tɛ̃ a we dɛ 'bako gɔ.

¹¹ Nɛ a tɛ kɔ̀lɔ̀ do wɔlɔ gɔ. Gɛnɛ kɔ mɛ a wɔlɔ baa a, tabi naa a, nɛ a tɛ kɔ̀lɔ̀ do ma gɔ. We kɛ a dɛ na mɛ ni, nɛ a hɔ sɛ wi ndi li mi Gale.

¹² Gã nwa nganga wè tɛ hɔ nza tɛ fala dɔnggɔ do mi, nɛ a le tɔa fio gɔ, da dɛ kɔ a fáká fala dɔnggɔ do mi gɔ. Mba gɔ, wa a zi nɔ santo zu a, takɔ a hã tɛ̃ a we dɛ to hã mi.

¹³ Ma kɛ ma wia na, nganga ba wuko kɛ a tɛ ɔ̀ do wili gɔ ni.

^14-15 Nɛ ma wè na, a ba wi fio wili, tabi wuko kɛ wili a bɛ̃a a ni gɔ. Nɛ a tɛ bà 'bɔ wuko kɛ a 'danga kili tɛ̃ a do yɛnggɛ ndumba ni gɔ, dɔ a yúlú gele wi kɔ nu fɛlɛ a gɔ. A saka sɛ be zɔnga dɛ kɔ nu fɛlɛ kula 'da a, nɛ a ba a. Mba gɔ, mi a NWA, kɛ mi ia a na, a dɛ to hã mi.”

¹⁶ NWA tɔa hã Mɔizɛ na,

¹⁷ a é mbulanɔ gɛ hã Aroni na: “Fala kɛ mbe kpo kɔ obe zã mɔ a ɔ wi kunda, nɛ ma wè na, a kɔlɔ do gbagala we hã nyɔngɔmɔ hã mi gɔ. Nɛ mbula ni sɛ we obe zã mɔ vɛ̃ kɔ sabɛlɛnɔ vɛ̃.

¹⁸ Wi lɔa li, tabi wi nɛ ku, tabi wi kɛ bula li a wɛ wɛngga, tabi wi kɛ a do gele kunda ni, a wè tɛ kɔlɔ do gbagala we dɛ to hã mi gɔ.

¹⁹ Mbula ni ma 'bɔ we wi wili kɛ 'baka a, tabi nyanga a gbini, nɛ ma kala do'do ni,

²⁰ tabi wi gbini 'do, gbamɔgigi, wi kɛ ndolo ngɔ li a, tabi wi kɛ a do zɛlɛ tɛ ndala tɛ̃ a, tabi hɔla wi wili.

²¹ Be zã mɔ kɛ a do kunda tɛ̃ a ni, a wè tɛ kɔlɔ do gbagala we hã nyɔngɔmɔ hã mi gɔ. Nɛ a wè tɛ dɛ to nganga gɔ, we kunda tɛ̃ a ni.

²² Nɛ nde a wia tɛ nyɔngɔ tala dɔnggamɛnɔ wa hã ma hã mi, do nyɔngɔmɛnɔ vɛ̃ kɛ ma santo, do dɔnggamɛnɔ kɛ ma santo wena ni.

²³ Nɛ a wè tɛ kɔlɔ do ku'bu gɔnɔ sanga tɔa Tande, tabi do gbagala gɔ. Ma wè na, a faka fala dɔnggɔ do mi do kunda tɛ̃ a ni gɔ. We kɛ mi a NWA, nɛ mi a mi e onganganɔ na, wa dɛ to hã mi.”

²⁴ Mɔizɛ ia mbulanɔ ni hã Aroni, do obenɔ 'da a do obe Israɛlɛ vɛ̃.