Levitɛnɔ 2 - WE NU GALE 1995

Mbula ngɔ hã fũ do dɔnggamɔ

¹ “Fala kɛ wele kɔ we tɛ do fũ we dɔnggɔ do NWA, nɛ ma wia na, a saka dia kɛ, nɛ a zanga ma do nɔ, nɛ a a fũ yɔmbɔ ngɔ nɛ,

² nɛ a tɛ do ma hã onganganɔ, kɛ wa a obe zã Aroni ni. Nɛ mbe nganga kpo, a so zu fũi kɛ wa zanga do nɔɛ ni, nɛ a so fũ yɔmbɛ vɛ̃, nɛ a dɔ ma dɛ ngɔ gbagala, nɛ ma sɛ a dɔnggamɔ kɛ ma gba ta zu NWA ngɔ wi hã ma ni. Nɛ zɛ̃ dɔnggamɛ ni ma unu sɛ NWA, nɛ ma de tɛ̃ a.

³ Nɛ tala dɔnggamɛ ni sɛ a mɔ Aroni do obenɔ 'da a. Mɛ a nyɔngɔmɔ kɛ ma santo wena, we kɛ ma yula kɔ dɔnggamɛ kɛ wa hã ma hã NWA ni.

⁴ “Fala kɛ ma ɔ do dɔnggamɔ kɛ wa dɔa ma kɔ furu, nɛ ma wia na, ma ɔ do mapa kɛ nu ma ɔ dĩ, nɛ wa dɛ ma do fũ kɛ wa zanga ma do nɔ iko, nɛ wa tɛ à ina hana mapa tɛ nɛ gɔ. Tabi ma wia na, ma ɔ do mapa kɛ nu ma dĩ̀lĩ̀ gɔ, nɛ wa kpã nɔ ngɔ nɛ, nɛ wa tɛ à ina hana mapa tɛ nɛ gɔ.

⁵ “Fala kɛ ma ɔ do dɔnggamɔ kɛ wa hana ma ngɔ mbala mɔ bolo, nɛ ma wia na, ma ɔ do fũ kɛ wa zanga ma do nɔ. Nɛ nde wa tɛ à ina hana mapa tɛ nɛ gɔ.

⁶ Wa gbini sanga nɛ, nɛ wa tɛnɛ 'bɔ nɔ dɛ ngɔ nɛ. Mɛ sɛ a dɔnggamɔ fũ.

⁷ “Fala kɛ ma ɔ do dɔnggamɔ kɛ wa hana ma do gbala, nɛ ma wia na, ma ɔ do fũ kɛ wa mba do nɔ.

⁸ Wa tɛ sɛ do ma, nɛ wa hã ma hã nganga. Nɛ a nɛ do ma dɛ dati gbagala i.

⁹ Nɛ a fo sɛ zu dɔnggamɛ ni, nɛ a dɔ ma ngɔ gbagala, nɛ ma sɛ a dɔnggamɔ kɛ ma gba ta zu NWA ngɔ wi hã ma ni. Nɛ zɛ̃ dɔnggamɛ ni, ma unu sɛ NWA, nɛ ma de tɛ̃ a.

¹⁰ Nɛ tala dɔnggamɛ ni sɛ a mɔ́ Aroni do obenɔ 'da a. Mɛ a nyɔngɔmɔ kɛ ma santo wena, we kɛ ma yula kɔ dɔnggamɛ kɛ wa hã ma hã NWA ni.

¹¹ “Tũnɔ vɛ̃ kɛ wa dɔnggɔ do NWA ni, ma tɛ ɔ̃ do ina hana mapa kɔ nɛ gɔ. Wa tɛ à ina hana mapa, tabi nɔ gɔlɔ kɔ dɔnggamɛnɔ kɛ wa nɛ dɔ we dɔnggɔ do NWA ni gɔ.

¹² Wa wia we tɛ do dɔnggamɔ fũ 'da fala hã kuti kpalɛ li fɔnɔ hã NWA. Nɛ nde wa tɛ mbà ma kpo do dɔnggamɛnɔ ngɔ gbagala we dɔ ma hã NWA gɔ.

¹³ We dɔnggamɔ fũ kpo kpo, ma wia na, wa a tɔ̃ ngɔ nɛ, we duzu kɛ tɔ̃ɛ ma be gba tɔkɛ kɛ Gale gba zi ma sanga tɛ ngba a do nɛ ni. Ma kɛ ma wia na, nɛ a tɔ̃ ngɔ dɔnggamɛnɔ 'da nɛ vɛ̃.

¹⁴ Fala kɛ nɛ kɔ̃ we tɛ do dɔnggamɔ kuti kpalɛ li fɔnɔ 'da nɛ hã NWA, nɛ ma wia na, nɛ ndo do hana kpalɛ ni. Nɛ nɛ to ma dati kɛ na, nɛ tɛ do ma ni,

¹⁵ nɛ nɛ tɛnɛ sɛ nɔ, nɛ nɛ a fũ yɔmbɔ ngɔ nɛ. Mɛ sɛ a dɔnggamɔ fũ.

¹⁶ Nɛ nganga, a so sɛ mbe zu fũi do nɔɛ, nɛ a mba do fũ yɔmbɛ vɛ̃, nɛ a dɔ ma hã NWA. Nɛ dɔnggamɛ ni, ma gba sɛ ta zu NWA ngɔ wi hã ma ni.