Levitɛnɔ 19 - WE NU GALE 1995

Owinɔ 'da Gale wa ɔ́ santo

¹ NWA tɔ́a hã Mɔizɛ na,

² a e mbulanɔ gɛ hã obe Israɛlɛ na: “Nɛ ɔ́ santo, we kɛ mi NWA Gale 'da nɛ, mi santo.

³ Ma wia na, wele do wele dɔ́nggɔ́ baa a do naa a, nɛ a lengge do kɔ tũ ɔmɔ tɛ wi, ɔ nɛ kɛ mi tɔ́a ni.

⁴ Nɛ tɛ sìkì li nɛ dɛ 'da ogale bɛlɛnɔ gɔ, nɛ nɛ tɛ dòlò okpikima gale bɛlɛ do mɔ bolo gɔ. Mi a NWA Gale 'da nɛ.

⁵ Fala kɛ nɛ hã dɔnggamɔ hã mi we be dɛa na, nɛ nɛ dɛ́ ma do tɛlɛ tɛ mbulanɔ kɛ mi hã ma hã nɛ ni, sɛ a mi kɔ̃a gɛnɛ nɛ de.

⁶ Nɛ nɛ nyɔngɔ sɛ mulu sa'de dɔnggamɛ ni, do ngba soe nɛ gbɛa ma ni, tabi do tũ kɛ 'do nɛ ni. Nɛ nde ma ɔ ngɔ tũ bɔa, nɛ wa dɔ sɛ ma.

⁷ Fala kɛ ma ɔ ngɔ tũ bɔa, kɔ wele nyɔngɔ ma, nɛ nde mi kɔ sɛ gɛnɛ dɔnggamɛ ni gɔ.

⁸ Wele kɛ a nyɔngɔ ma, nɛ nde a faka mɔ kɛ wa ia ma hã mi ni. Nɛ a te sɛ do ngbangga, nɛ wa fo sɛ a sanga nɛ obe Israɛlɛ do'do.

⁹ “Fala kɛ nɛ kala kpalɛ li fɔnɔ 'da nɛ, nɛ nɛ tɛ sɛ̀lɛ̀ kpalɛnɔ kɛ nu ngbaka fɔɛ 'da nɛ ni gɔ. Nɛ nɛ te kpòlò 'bɔ tɛ nɛ we dɔlɔ tala kpalɛnɔ kɛ ma ala olo nɛ ni gɔ.

¹⁰ Nɛ 'da fala kala ganza vinɔ kɔ fɔnɔ 'da nɛ, nɛ nɛ tɛ kpòlò 'bɔ tɛ nɛ we kala kɛnɔ nɛ la ma ngɔ te nɛ, tabi ma ala dɛ nù ni gɔ. Nɛ la sɛ ma hã owi sãnɔ, do ogɛnɛnɔ. Mi a NWA Gale 'da nɛ

¹¹ Nɛ tɛ zũ̀ mɔ mɔ́ ngba nɛ gɔ, nɛ nɛ tɛ 'bìlì bɛlɛ, tabi ɔkɔlɔ ngba nɛ gɔ.

¹² Nɛ tɛ kànà tɛ nɛ do zu li mi do bɛlɛ gɔ. Nɛ dɛ ma, nɛ nɛ faka sɛ zu li mi. Mi a NWA Gale 'da nɛ.

¹³ Nɛ tɛ zɛ̀lɛ̀ tɛ ngba nɛ we kpa mɔ kɔ a gɔ, nɛ nɛ tɛ zu mɔ mɔ́ a gɔ. Nɛ tɛ è mbili zɛkɛ mɔ́ wi dɛa to ngɔ, sɛ nɛ nɛ hã ma hã a de gɔ.

¹⁴ Nɛ tɛ dã̀ wi la zala gɔ. Nɛ nɛ tɛ kèlè ti wi ba li na, a kɔ zu nyanga a gɔ. Nɛ dɛ́ mɔ tɛ nɛ ɔ nɛ dɛa mɔ tɛ wi kɛ a dɛ kili Gale dɛa ni. Mi a NWA Gale 'da nɛ.

¹⁵ “Nɛ tɛ 'bìlì we do bɛlɛ gɔ. Nɛ tɛ gbɛ̀ dia gulu we hã wi 'bako yala iko gɔ, nɛ nɛ tɛ dɛ̀ kili wi kpamɔ gɔ. Nɛ nde nɛ gɔ́nɔ́ wenɔ 'da ongba nɛ do bɔlɔ nɛ.

¹⁶ Nɛ tɛ tɔ̃̀ tɛ ngba nɛ gɔ. Nɛ tɛ tɔ̃̀ ngbangga dɛ zu wele do bɛlɛ, hã wa 'bili we fio hã a gɔ. Mi a NWA.

¹⁷ Nɛ tɛ ùsù mãlã nya nɛ dɛ kɔ sila nɛ gɔ. Nɛ nde nɛ tɛ dɛ̀ kili tɔ̃ we 'dã mɛ kɛ a dɛa ni gɔ, da dɛ kɔ nɛ té ko 'dã mɔ do zu li a gɔ.

¹⁸ Nɛ tɛ bìlì nu gbã 'dã mɔ hã nya nɛ be Israɛlɛ gɔ. Nɛ nɛ tɛ ɔ́ do sɛnɛ mɔ we a gɔ. Nɛ kɔ̃́ gɛnɛ nya nɛ ɔ nɛ kili tɛ nɛ wele nɛ ni.

¹⁹ “Nɛ dɛ sɛ 'bɔ mbulanɔ kɛ mi nɛ hã ma hã nɛ gɛ: Mɔ tɛ kàlà osa'de bɔa kɔ nadalamɛnɔ 'da mɔ kɛ kpala wa wè kɔ gɔ ni, nɛ mɔ mba li wa kpo na, wa ɔ do ngba wa gɔ. Mɔ tɛ mbà gili kpalɛ bɔa, kɔ mɔ mi ma li fɔɛ 'da mɔ gɔ. Mɔ tɛ hè'dè tulu kɛ wa dumu ma do gili fɛlɛ bɔa ni gɔ.

²⁰ “Fala kɛ wi wili ɔ do wuko ngbá, kɛ wa bia a hã gele wi wili, kɔ wa tɛ hã̀ mbili 'do a gɔ ni, nɛ wi wili kɛ a ɔa do a ni, a futa sɛ olo kili tɛ wuke ni. Nɛ nde wa gbɛ́ sɛ wi wili do wuke ni gɔ, we kɛ wuke 'bana do ngbá iko, wa tɛ è a na, a hɔ kɔ ngbá gɔ.

²¹ Nɛ wi wili ni, a tɛ sɛ do wili bata kpo dɛ nu tɔa Tande. Nɛ a hã sɛ ma do dɔnggamɔ hã mi NWA, we si olo ku'da 'dã mɛ zu a.

²² Na mɛ ni, nɛ nganga a dɛ sɛ mɔ kɛ na, wi ni a hɔ sa wi li mi Gale ni. Nɛ mi Gale, mi fo sɛ ku'da 'dã mɛ ni zu a.

²³ “'Da fala kɛ nɛ le ngɔ nù Kanana, nɛ nɛ mi sɛ ote kɛ ma wa wala ni kpi do kpi. Nɛ nde wala tenɔ ni, ma ɔ sɛ nɛ mɔ ndi we nɛ 'do sabɛlɛ talɛ, nɛ nɛ nyɔngɔ sɛ ma gɔ.

²⁴ Nɛ ma hɔ tɛ nalɛ sabɛlɛ, nɛ nɛ kala sɛ wala tenɔ ni vɛ̃, nɛ nɛ e ma hã mi. Nɛ nɛ dɛ sɛ ma do mɔ dɔ, we dɔnggɔ do mi.

²⁵ Kɔ ma hɔ tɛ mɔlɔ sabɛlɛ, nɛ nɛ wia sɛ we nyɔngɔ owala tenɔ ni. Nɛ dɛ sɛ na mɛ ni, sɛ a wala tenɔ 'da nɛ ma kua dɛ dati kua fai de.

²⁶ “Nɛ tɛ nyɔ̀ngɔ̀ mulu sa'de dɛ fala kɛ nɛ a do tɔkɔ tɛ̃ a nù ni gɔ. Nɛ tɛ dɛ̀ mɔ sɔ kpo gɔ, nɛ nɛ tɛ fà 'bɔ gulu mɔ gɔ.

^27-28 'Da fala kɛ nɛ dungu gɛla nde, nɛ nɛ tɛ kɛ̀lɛ̀ ti zu nɛ girr gɔ. Nɛ tɛ kɛ̀lɛ̀ mbee nzɛlɛ nɛ gɔ, nɛ nɛ tɛ gbà mɔ tɛ nɛ we dɛ 'bako gɔ, nɛ nɛ tɛ gɔnɔ dã tɛ nɛ gɔ.

²⁹ “Nɛ tɛ tòmbò boko benɔ 'da nɛ, we dɛ ndumba tɛ kɔ tɔa 'da ogalenɔ kɔ nɛ 'danga wa gɔ. Nɛ dɛ ni, nɛ owinɔ ngɔ nùi ni wa zɔ sɛ ma, nɛ wa hã sɛ tɛ wa we dɛ ndumba.

³⁰ Nɛ lengge do kɔ̃ tũ ɔmɔ tɛ wi, nɛ nɛ dɛ kili tɔa dɔnggɔ do mi. Mi a NWA.

³¹ “Nɛ tɛ àkà winɔ kɛ wa wele we do obɔzɔnɔ ni gɔ. We kɛ ma dɛ sɛ na, nɛ hɔ owi ndi li mi Gale. Mi a NWA!

³² Fala kɛ wele kɛ zu a kutu do mbu ni a hɔ, nɛ nɛ dɛ́ kili a, nɛ nɛ kulu ngɔ. Nɛ dɛ na mɛ ni, nɛ ma be sɛ na, nɛ dɛ kili mi Gale 'da nɛ dɛa. Mi a NWA.

³³ “Fala kɛ gɛnɛ tɛ we dungu ngɔ nùi 'da nɛ, nɛ nɛ tɛ zɛ̀lɛ̀ tɛ̃ a, we kpa mɔ kɔ̃ a gɔ.

³⁴ Nɛ nde nɛ dɛ́ do a ɔ nɛ nya nɛ ni. Nɛ kɔ̃́ gɛnɛ a ɔ nɛ kɛ nɛ kɔ̃a gɛnɛ kili tɛ nɛ wele nɛ ni. Nɛ lénggé do kɛ na, nɛ zi tɛ mɛ 'bɔ ogɛnɛ tɛ ngɔ nù Ezipeto ni. Mi a NWA Gale 'da nɛ.

³⁵ Nɛ tɛ bà 'dã kilo, tabi mɔ we do mɔ, we zũ do wele gɔ.

³⁶ Nɛ 'dafa kilo 'da nɛ, do mɔ we do mɔ, do tɛlɛ tɛ kɛ ma wia ni. Mi a NWA Gale 'da nɛ, kɛ mi fua zi nɛ ngɔ nù Ezipeto dɛ nza ni.

³⁷ Li nɛ sɔ̃, nɛ nɛ dɛ ombulanɔ 'da mi vɛ̃. Mi a NWA!”