Levitɛnɔ 18 - WE NU GALE 1995

Mbula ngɔ mba ngɔ te

¹ NWA tɔ̃a hã Mɔizɛ na,

² a e mbulanɔ gɛ hã obe Israɛlɛ na: “Mi a NWA Gale 'da nɛ!

³ Nɛ tɛ nɛ̀ 'do dɛa mɔ tɛ Oezipeto, kɛ nɛ ɔa zi sanga wa ni gɔ. Nɛ nɛ tɛ nɛ̀ 'bɔ 'do dɛa mɔ tɛ Okanana, kɛ mi nɛ ba nùi 'da wa hã nɛ ni gɔ. Nɛ tɛ dɛ̀ mbulanɔ 'da owinɔ ni gɔ.

⁴ Nɛ dɛ́ mbulanɔ kɛ ma yula 'da mi ni. Nɛ nɛ dɛ mɛnɔ kɛ mi ba nu mi na, nɛ dɛ ni, we kɛ mi a NWA Gale 'da nɛ.

⁵ Nɛ dɛ́ mbulanɔ 'da mi, nɛ nɛ kpasa sɛ do wala 'da ma. Mi a NWA!

⁶ “Wele kpo kɔ nɛ tɛ ɔ̀ do wuko kɛ a a wi na mɔ a ni gɔ. Mi a NWA.

⁷ Mɔ tɛ ɔ̀ do naa mɔ, kɔ ma hã sape hã baa mɔ gɔ. Mɔ ɔ do naa mɔ, nɛ ma hã sɛ 'bɔ sape hã a ngboo ni, we kɛ a a kua mɔ.

⁸ Mɔ tɛ ɔ̀ do mbe gula naa mɔ gɔ. Mɔ dɛ na mɛ ni, nɛ nde mɔ 'danga zu li baa mɔ 'danga.

⁹ Mɔ tɛ ɔ̀ do boko nya mɔ, be 'da naa mɔ, tabi be 'da baa mɔ gɔ. Gɛnɛ kɔ wa dàlà a dɛ nu tɔa 'da nɛ gɔ, nɛ nde mɔ tɛ ɔ̀ do a gɔ.

¹⁰ Mɔ tɛ ɔ̀ do be yaa mɔ, kɛ a a be zã bulu be 'da mɔ, tabi boko be 'da mɔ ni gɔ. Mɔ dɛ na mɛ ni, nɛ nde mɔ 'danga zu li mɔ wele nɛ ngboo.

¹¹ Mɔ tɛ ɔ̀ do boko be 'da gula naa mɔ gɔ, we kɛ a be 'da baa mɔ, nɛ a tɛ mɛ 'bɔ a boko nya mɔ.

¹² Mɔ tɛ ɔ̀ do kula mɔ gɔ, we kɛ a a nya baa mɔ ngboo.

¹³ Mɔ tɛ ɔ̀ do boko nya naa mɔ gɔ, we kɛ a a naa mɔ ngboo.

¹⁴ Mɔ tɛ ɔ̀ do kɛnɛ nya baa mɔ gɔ, we kɛ a a naa mɔ.

¹⁵ Mɔ tɛ ɔ̀ do konduka 'da mɔ, kɛnɛ be 'da mɔ gɔ.

¹⁶ Mɔ tɛ hã̀ sape hã nya mɔ wi wili nɛ, nɛ mɔ ɔ do kɛnɛ a gɔ.

¹⁷ Mɔ tɛ ɔ̀ do boko be zã wuko ngu'du mɔ, tabi be yaa a gɔ, we kɛ wa vɛ̃ a wi na, nɛ ki ni a dɛa mɔ sape.

¹⁸ Mɔ tɛ bà boko nya kɛnɛ mɔ do wuko, 'da fala kɛ kɛnɛ mɔ 'bana nza ni gɔ. Mɔ dɛ́ na mɛ ni, nɛ wɛla mɔ ma hɔ sɛ sanga wa.

¹⁹ “Mɔ tɛ ɔ̀ do wuko do 'da fala kɛ a zɔ zɛkɛ ni gɔ, we kɛ a hɔa wi ndi li Gale.

²⁰ Mɔ tɛ ɔ̀ do wuko mɔ ngba mɔ gɔ, we kɛ mɔ dɛ ni, nɛ mɔ hɔ sɛ wi ndi li Gale.

²¹ Mɔ tɛ gbɛ mbe kɔ obenɔ 'da mɔ, we hã do dɔnggamɔ hã gale Mɔlɛkɛ gɔ. Mɔ dɛ na mɛ ni, nɛ mɔ faka sɛ zu li mi Gale. Mi a NWA.

²² Mɔ tɛ ɔ̀ do ngba mɔ wi wili, ɔ nɛ kɛ wa ɔ do wuko ni gɔ. Ki ni, mɛ a sɔ dɛa mɔ.

²³ Wi wili tabi wuko tɛ ɔ̀ do sa'de gɔ. We kɛ a dɛ na mɛ ni, nɛ nde mɛ a gã 'dã mɔ.

²⁴ “Nɛ bɛ̃́ 'dã mɛnɔ ni vɛ̃ na, da dɛ kɔ nɛ hɔ́ owi ndi li mi Gale gɔ. Ogele nu kɔnggɔnɔ kɛ mi nɛ ndaka wa dati nɛ ni, wa dɛa na mɛ ni, nɛ wa hɔa wi ndi li mi Gale.

²⁵ Nɛ 'dã dɛa mɔ tɛ wa, ma dɛa na nùi 'da wa ngboo ni, ma hɔ mɔ ndi li mi. Ma kɛ mi hã etumbu hã nùi, nɛ ma bɛ̃a gɛnɛ owinɔ wa ɔ ngɔ nɛ ni.

^26-27 Owinɔ kɛ wa ɔa zi ngɔ nùi ni dati hã nɛ ni, wa dɛa zi gã 'dã mɛnɔ ni, nɛ nùi ma hɔa zi mɔ ndi li mi. Nɛ nde, nɛ tɛ dɛ̃ tɛlɛ tɛ gã 'dã mɛnɔ ni ni gɔ. Nɛ vɛ̃, gɛnɛ kɔ nɛ obe Israɛlɛ, tabi gɛnɛnɔ wa ɔ sanga nɛ ni, nɛ dɛ́ mbulanɔ 'da mi NWA.

²⁸ Nɛ kɔ̃̀ we dɛ mbulanɔ 'da mi gɔ, nɛ nùi ma bɛ̃ sɛ gɛnɛ nɛ, ɔ nɛ kɛ ma bɛ̃a do gɛnɛ ogele nu kɔnggɔnɔ zi dati nɛ ni.

²⁹ Owinɔ vɛ̃ kɛ wa hã tɛ wa we dɛ tɛlɛ tɛ 'dã mɛnɔ ni, nɛ wa fo sɛ wa sanga nɛ obe Israɛlɛ do'do.

³⁰ “Nɛ dɛ́ mbulanɔ kɛ mi ia ma hã nɛ gɛ do wala olo nɛ ngboo. Nɛ nɛ tɛ nɛ̀ 'do 'dã mɛnɔ 'da winɔ kɛ wa ɔa zi ngɔ nù Kanana dati nɛ ni gɔ, dɔ nɛ hɔ́ owi ndi li mi gɔ. Mi a NWA Gale 'da nɛ.”