Levitɛnɔ 17 - WE NU GALE 1995

Mbula ngɔ tɔkɔ

¹ NWA tɔ̃a hã Mɔizɛ na,

² a e mbula gɛ hã Aroni do obenɔ 'da a, do obe Israɛlɛ vɛ̃ na:

³ “Fala kɛ be Israɛlɛ kpo kɔ̃ we gbɛ ngɔmbɔ, bata, tabi dua dɛ kɔ ngbo ɔi, tabi do 'do ngbo i we dɔnggɔ do NWA,

⁴ nɛ ma wia na, a nɛ do sa'de ni dɛ nu tɔa Tande i, nɛ a hã do dɔnggamɔ hã NWA, dɛ dati tɔa santoe 'da a ni. Kɔ fala kɛ a dɛ̃ na mɛ ni gɔ, nɛ a te sɛ do ngbangga, we kɛ a gbɛ sa'de, nɛ tɔkɔ tɛ̃ a a nù do wala olo mbula gɔ. Nɛ wa fo sɛ a sanga nɛ obe Israɛlɛ do'do.

⁵ Mbula gɛ, ma tombo sɛ obe Israɛlɛ na, wa tɛ gbɛ osa'de do zamɔ iko gɔ. Nɛ nde wa tɛ do wa hã nganga, dɛ nu tɔa Tande ni, nɛ a hã do dɔnggamɔ hã NWA, we be dɛa na.

⁶ Nɛ nganga a kpã sɛ tɔkɔ sa'de ni tɛ gbagala, kɛ ma dati tɔa Tande ni. Nɛ a dɔ fala kɛndɔnɔ dɛ ngɔ gbagala ni, nɛ zɛ̃ nɛ ma unu NWA, nɛ ma de tɛ̃ a.

⁷ Obe Israɛlɛ wa la sɛ fala gbɛ sa'denɔ 'da wa do dɔnggamɔ hã ogale bɛlɛnɔ kɛ wa dɛ hi wa ɔ nɛ wili dua ni. Dɔnggamɛnɔ ni ma hã sape wena. Obe Israɛlɛ vɛ̃ wa dɛ sɛ mbula gɛ kɔ sabɛlɛ do sabɛlɛ.

⁸ “Fala kɛ be Israɛlɛ kpo, tabi gɛnɛ kɛ a ɔ sanga obe Israɛlɛ ni, a kɔ̃ we dɔ sa'de, tabi hã gele dɔnggamɔ hã NWA,

⁹ nɛ a nɛ sɛ do ma dɛ nu tɔa Tande, nɛ a dɔnggɔ do NWA. Fala kɛ a dɛ̀ ni gɔ, nɛ wa fo sɛ a sanga wa obe Israɛlɛ do'do.

¹⁰ “Fala kɛ be Israɛlɛ, tabi gɛnɛ kɛ a ɔ sanga obe Israɛlɛ, a nyɔngɔ sa'de kɛ tɔkɔ 'bana kɔ nɛ ni, nɛ nwa a kifi sɛ 'do a lo do wi ni, nɛ a fo sí a sanga obe Israɛlɛ do'do.

¹¹ Mba gɔ, kpasi 'da mɛ kɛ ma do tunu li ɛ ni, ma a kɔ tɔkɔ. Ma kɛ NWA hã wala hã nɛ na, nɛ kpã tɔkɛ dɛ tɛ gbagala na, ma fo ku'da 'dã mɔ zu nɛ. Mba gɔ, tɔkɔ ma do kpasi, nɛ ma fo ku'da 'dã mɔ zu wele fua.

¹² Gulu nɛ hi NWA tɔ̃ hã nɛ obe Israɛlɛ na, wele kpo kɔ nɛ, tabi gɛnɛ kɛ a ɔ ngɔ nù Israɛlɛ ni, a tɛ nyɔngɔ sa'de kɛ tɔkɔ 'bana kɔ nɛ ni gɔ.

¹³ “Fala kɛ be Israɛlɛ kpo, tabi gɛnɛ kɛ a ɔ sanga obe Israɛlɛ, a gbɛ sa'de, tabi nɔɛ kɛ wa wia we nyɔngɔ mulu nɛ ni, nɛ a fo sɛ tɔkɔ tɛ̃ a dɛ nù, nɛ a a nù ngɔ nɛ.

¹⁴ Mba gɔ, kpasi 'da mɛ kɛ ma do tunu li ɛ ni, ma a kɔ tɔkɔ. Ma kɛ NWA tɔ̃ hã nɛ obe Israɛlɛ na, nɛ tɛ nyɔngɔ mulu sa'de kɛ tɔkɔ 'bana kɔ nɛ ni gɔ. We kɛ kpasi 'da mɛ kɛ ma do tunu li ɛ ni, ma a kɔ tɔkɔ. Kɔ fala kɛ wele nyɔngɔ ma, nɛ wa fo sɛ a sanga nɛ obe Israɛlɛ do'do.

¹⁵ “Fala kɛ be Israɛlɛ, tabi gɛnɛ, a nyɔngɔ mulu sa'de kɛ a fia iko, tabi sa'de kɛ 'dã sa'de zamɔ gbɛa a ni, nɛ wi ni a fɔ́lɔ́ tɛ̃ a, do tulu tɛ̃ a. Nɛ nde a 'bana sɛ wi ndi gbaa we hɔ gɛ̃a wese, sɛ nɛ a hɔ 'bɔ sa wi li Gale mbé nɛ de.

¹⁶ Fala kɛ a fɔ̀lɔ̀ tulu tɛ̃ a, tabi tɛ̃ a gɔ, nɛ a te sɛ do ngbangga dati Gale.”