Levitɛnɔ 16 - WE NU GALE 1995

Gã ngba soe fo ku'da 'dã mɔ zu winɔ

¹ 'Do kɛ ozagbãlã benɔ 'da Aroni bɔa, wa dɔa zi fũ yɔmbɔ kɛ ma santo gɔ ni hã NWA, nɛ wa fia ni, nɛ NWA tɔ̃ hã Mɔizɛ na:

² “Mɔ tɔ̃ hã nya mɔ Aroni na, a tɛ lè 'do ku'bi i, tɛ Fala kɛ ma santo wena ni yala yala iko gɔ. We kɛ mɛ a fala mi be do tɛ mi kɔ lɔnggɔ zɛ̃ we de ngɔ mɔ nu Sanduku Gba Tɔkɛ ni. Ko fala kɛ a le iko, nɛ a fe sɛ.

³ “Nɛ dati kɛ na, a le tɛ Fala kɛ ma santo wena ni, ma wia na, a tɛ do wili ngɔmbɔ kpo, we hã do dɔnggamɔ fo ku'da 'dã mɔ zu a, do wili bata kpo, takɔ a dɔ a we dɔnggɔ do mi NWA.

⁴ Nɛ ma wia 'bɔ na, a he'de vungbu tulu ngɔ, do tulu ti nɛ, nɛ a kpo 'dɛ̃ ngɔ nɛ, nɛ a kpo 'bɔ kitambala zu a. Tulunɔ ni vɛ̃, sɛ a otulu linɛ. Nɛ́ kɛ mɛ a otulu santo ni, ma wia na, a fɔlɔ tɛ̃ a dati kɛ na a he'de ma ni.

⁵ Ma wia na, obe Israɛlɛ wa tɛ sɛ do owili dua bɔa hã Aroni, we hã wa do dɔnggamɔ fo ku'da 'dã mɔ zu wa. Nɛ wa tɛ 'bɔ do mbe wili bata kpo, takɔ a dɔ we dɔnggɔ do mi NWA.

⁶ Nɛ Aroni a ba sɛ wili ngɔ mbe ni, nɛ a hã a do dɔnggamɔ hã mi NWA, takɔ mi fo ku'da 'dã mɛ zu a do owi nu fɛlɛ a.

⁷ 'Do nɛ, nɛ a kala sɛ wili duanɔ bɔa ni, nɛ a tɛ do wa dɛ dati mi, dɛ nu tɔa Tande kpa ngba wi do mi NWA.

⁸ Nɛ a to zeke ngɔ wa, takɔ ma gɔnɔ sanga dua wele kɛ 'da mi NWA, do wele kɛ 'da Azazɛlɛ.

⁹ Nɛ a ba sɛ wili dua wele kɛ zeke bia na, a a mɔ mi NWA ni, nɛ a hã a do dɔnggamɔ fo ku'da 'dã mɔ.

¹⁰ Nɛ a ba wele kɛ 'da Azazɛlɛ, nɛ a be a do tunu li a hã mi NWA. 'Do nɛ, nɛ a da kɔ̃ a tɛ̃ a, nɛ a yu si 'da Azazɛlɛ tɛ li gba zɔ́ i. Nɛ mɛ a dɛa ni, ma fo sɛ ku'da 'dã mɛnɔ zu obe Israɛlɛ.

¹¹ “Nɛ Aroni a ba sɛ wili ngɔmbɛ, nɛ a 'bili gɛlɛ a, nɛ a hã a do dɔnggamɔ hã mi NWA na, ma fo ku'da 'dã mɔ zu a do owi nu fɛlɛ a.

¹² Nɛ a ba mɔ u do we, nɛ a u kalĩnɔ ngɔ gbagala dati tɔa Tande ni, nɛ ma dunu ma. Nɛ a so fũ yɔmbɔ kɔ̃ a bɔa, nɛ a la do ma vɛ̃ dɛ 'do ku'bi, tɛ Fala kɛ ma santo wena ni.

¹³ Nɛ a a fũ yɔmbɛ ni dɛ ngɔ kalĩ dɛ dati mi NWA ni. Nɛ zɛ̃ nɛ ma kpe kɛ zã Sanduku Gba Tɔkɛ, nɛ ma gu mɔ nu ma na, da dɛ kɔ li a á tɛ nɛ, kɔ a fe gɔ.

¹⁴ 'Do nɛ, nɛ a fi sɛ zu kɔ a 'dɔ tɔkɔ wili ngɔmbɛ ni, nɛ a kpã tɛ mɔ nu Sanduki si 'biti gba wese fala kpo. Nɛ a kpã 'bɔ mbé nɛ dɛ dati Sanduku Gba Tɔkɛ ni fala sambo.

¹⁵ “'Do nɛ, nɛ a 'bili gɛlɛ wili dua hã do dɔnggamɔ fo ku'da 'dã mɛ zu obe Israɛlɛ ni. Nɛ a kpɔ tɔkɔ nɛ, nɛ a le do ma dɛ 'do ku'bi i, nɛ a kpã ma tɛ mɔ nu Sanduki, nɛ a kpã 'bɔ dati Sanduki, ɔ nɛ kɛ a kpã do tɔkɔ wili ngɔmbɛ ni.

¹⁶ Nɛ mɛ a dɛa ni, ma fɔlɔ sɛ Fala kɛ ma santo wena ni olo ndinɔ do 'dã mɛnɔ 'da obe Israɛlɛ. Nɛ a dɛ sɛ 'bɔ na mɛ ni na, ma fɔlɔ tala kɔ tɔa Tande kpa ngba wi do mi NWA vɛ̃. Mba gɔ, wa zĩ ma dɛ gbogbo fala ɔi 'da owinɔ kɛ wa a sa wi li mi Gale gɔ ni.

¹⁷ 'Da fala Aroni a le sɛ tɛ Fala kɛ ma santo wena, we dɛ mɔ kɛ ma fɔlɔ kɔ tɔa Tande ni, nɛ ma wè na, wele kpo le kɔ tɔa Tande ni gɔ gbaa na, a hɔ nza sɛ nɛ de. 'Do kɛ a dɛ mɛ ni, kɔ ma fo ku'da 'dã mɛ zu a do owi nu fɛlɛ a, do obe Israɛlɛ vɛ̃ do'do,

¹⁸ nɛ a yolo sɛ tɛ Fala kɛ ma santo wena ni, nɛ a hɔ dɛ fala do gbagala dati tɔa Tande ni. Nɛ a dɛ mɔ kɛ na, ma fɔlɔ gbagala, kɔ ma hɔ sa li mi Gale ni. A ba sɛ tɔkɔ wili ngɔmbɛ do wili dua sĩ, nɛ a kɔ tɛ 'bolo zã gbagala.

¹⁹ Nɛ a fi zu kɔ a 'dɔ tɔkɛ ni, nɛ a kpã tɛ gbagala fala sambo. Nɛ mɛ a dɛa ni, ma fɔlɔ sɛ gbagala olo ndinɔ do 'dã mɛnɔ 'da obe Israɛlɛ, nɛ ma hɔ sa li mi Gale.

²⁰ “Nɛ Aroni a dɛ sɛ toe vɛ̃ kɛ ma fɔlɔ Fala kɛ ma santo wena, do tala kɔ tɔa Tande, do gbagala. Kɔ ma e, nɛ a tɛ sɛ do tunu li dua dɛ dati mi NWA.

²¹ Nɛ a a kɔ a bɔa nɛ dɛ zu sa'de ni, nɛ a gbala 'dã mɛnɔ do dɛa mɔ nga zui 'da obe Israɛlɛ dɛ zu dua ni. Nɛ 'dã mɛnɔ ni, ma la dɛ zu sa'de ni. 'Do nɛ, nɛ a saka sɛ wele kpo, nɛ a nɛ, nɛ a la dua ni dɛ li gba zɔ́ i.

²² Na mɛ ni, nɛ dua ni a la sɛ do 'dã mɛnɔ 'da winɔ vɛ̃ dɛ tɛ fala kɛ wele ɔ́ tɛ nɛ gɔ ni.

²³ “'Do nɛ, nɛ Aroni a kpolo sɛ tɛ̃ a kɔ tɔa Tande i, nɛ a hɔlɔ tulunɔ kɛ a hi'da sɔ ma dati kɛ na, a le tɛ Fala kɛ ma santo wena ni.

²⁴ A hɔlɔ ma, nɛ a fɔlɔ tɛ̃ a tɛ mbe fala kɛ ma santo ni, nɛ a he'de tulunɔ 'da a, nɛ a hɔ we dɔ sa'de bɔa, we dɔnggɔ do mi NWA na, ma fo ku'da 'dã mɔ zu a, do obe Israɛlɛ.

²⁵ 'Do nɛ, nɛ a dɔ sɛ kɛndɔ tɛ sa'denɔ ni ngɔ gbagala.

²⁶ Nɛ wi kɛ a nɛa do dua 'da Azazɛlɛ dɛ li gba zɔ̃ i ni, a fɔlɔ tulu tɛ̃ a, nɛ a fɔlɔ 'bɔ tɛ̃ a dati, sɛ nɛ a ĩ ti kpolo tɛ̃ a dɛ kɔ ngbo ɔi i de.

²⁷ Nɛ ma wia na, wa kala fia wili ngɔmbɛ, do wili dua kɛ wa hã sɔ do dɔnggamɔ fo ku'da 'dã mɔ, nɛ wa kpã sɔ 'bɔ tɔkɔ wa kɔ tɔa Tande ni, nɛ wa hɔ do ma dɛ 'do ngbo ɔi i, nɛ wa da ndala, do mulu do kala zã sa'denɔ ni li we dɛ di ni.

²⁸ Nɛ wi dɔ mɛnɔ ni, a fɔ́ló tulu tɛ̃ a, nɛ a fɔlɔ 'bɔ tɛ̃ a dati, sɛ nɛ a ĩ ti kpolo tɛ̃ a dɛ kɔ ngbo ɔi i de.

²⁹ “Nɛ zélé mbulanɔ gɛ, nɛ ma wia na, nɛ dɛ ma fai. Do zɛkɛ 'da sambo, kɔ nɛ 'bu, nɛ nɛ obe Israɛlɛ vɛ̃, do ogɛnɛnɔ kɛ wa ɔ kɔ nɛ ni, nɛ bɛ̃ sɛ nyɔngɔmɔ, nɛ nɛ dɛ́ sɛ to gɔ.

³⁰ Mba gɔ, kɔ tũi ni, mɛ a kɔ tũ kɛ wa dɛ sɛ mbala mɔ fo ku'da 'dã mɛnɔ zu nɛ. Na mɛ ni, nɛ ma fɔlɔ sɛ nɛ vɛ̃, takɔ nɛ hɔ sa wi li mi NWA.

³¹ Ma wia na kɔ̃ tũi ni vɛ̃, nɛ bɛ̃ nyɔngɔmɔ, nɛ nɛ tɛ dɛ̃ to gɔ. Nɛ dɛ sɛ mbula gɛ 'da fala fai.

³² Nɛ nganga wele kɛ wa a zi nɔɛ zu a na, a dɛ toe olo baa a ni, a dɛ sɛ mbala mɔ fo ku'da 'dã mɛ do fɔlɔ winɔ, a he'de sɛ tulu santonɔ, kɛ wa dɛa ma do linɛ ni,

³³ we dɛ do mbala mɔ fɔlɔ Fala kɛ ma santo wena, do tala kɔ tɔa Tande, do gbagala na, ma hɔ sa li mi Gale. A he'de sɛ 'bɔ tulunɔ ni, we dɛ do mbala mɔ fo ku'da 'dã mɛnɔ zu onganganɔ, do zu obe Israɛlɛ vɛ̃.

³⁴ Nɛ dɛ sɛ mbula gɛ 'da fala fai kɔ sabɛlɛ do sabɛlɛ. Nɛ dɛ sɛ na mɛ ni, takɔ kɔ sabɛlɛ kpo, nɛ mi NWA, mi fo ku'da 'dã mɛnɔ zu obe Israɛlɛ vɛ̃ fala kpo.” Aroni dɛa mbulanɔ vɛ̃ kɛ NWA hã ma hã Mɔizɛ ni.